“Doktrinal nga Kahanas: 2 Nephi 2:25: ‘Si Adan Napukan Aron Ang Mga Tawo Mahimo; ug Ang Mga Tawo Naingon, Nga Unta Sila Makabaton og Hingpit Nga Kalipay,’” Manwal sa Magtutudlo sa Basahon ni Mormon (2024)

Doktrinal nga Kahanas: 2 Nephi 2:25

“Si Adan Napukan Aron Ang Mga Tawo Mahimo; ug Ang Mga Tawo Naingon, Nga Unta Sila Makabaton og Hingpit Nga Kalipay”

Sa leksiyon sa “2 Nephi 2:17–26,” imong nakat-onan ang mahitungod sa Pagkapukan ni Adan ug Eva. Ang pagkahibalo mahitungod sa Pagkapukan makatabang nimo nga mosalig sa Manluluwas samtang imong giatubang ang mga hagit sa mortalidad. Kini nga leksiyon makatabang kanimo sa pagsag-ulo sa tudling sa doktrinal nga kahanas ug sa mahinungdanon nga hugpong sa mga pulong sa kasulatan alang sa 2 Nephi 2:25, mapasabot ang doktrina, ug mabansay ang paggamit sa mga baroganan sa pag-angkon og espirituhanong kahibalo sa tinud-anay nga mga senaryo.

Pagtabang sa mga tigkat-on nga mahibalo nga ang ilang mga kontribusyon gihatagan ug bili. Kasagaran nagkinahanglan og kaisog ang mga estudyante sa pagpaambit sa ilang mga hunahuna o mga kabalaka diha sa klase. Ang pagpasalamat sa mga estudyante sa ilang mga kontribusyon magpakita kanila nga imong gidayeg ang ilang kaandam sa pagpaambit sa ilang mga panabot, mga pangutana, ug mga pagpamatuod. Kini makadasig usab kanila sa pagpaambit sa umaabot.

Pagpangandam sa estudyante: Dapita ang mga estudyante nga motambong sa klase nga andam nga mosaysay sa 2 Nephi 2:25 gikan sa panumduman ug sa pagpaambit og usa ka paagi nga sila nagsinati og kalipay tungod sa Pagkapukan ni Adan ug Eva.

Mga Posibleng Kalihokan sa Pagkat-on

Gidisenyo kini nga leksiyon sa tudling sa doktrinal nga kahanas aron itudlo human sa leksiyon sa “2 Nephi 2:17–26,” nga mao ang pangkontekstong leksiyon para sa tudling sa doktrinal nga kahanas sa 2 Nephi 2:25. Kon kinahanglang ibalhin kini nga leksiyon sa tudling sa doktrinal nga kahanas sa laing semana, seguroha nga itudlo usab ang tukma nga pangkonteksto nga leksiyon nianang semanaha.

Ipasabot ug isag-ulo

Dapita ang kadaghanan sa klase sa pagpiyong sa ilang mga mata ug pipila ka mga estudyante nga magpabilin nga nagbuka ang ilang mga mata. Ipataas ang usa ka butang, ug dapita ang mga estudyante nga nagbuka ang mga mata sa paghulagway niini nga dili mogamit sa ngalan sa butang. Tan-awa kon makatabang ba sila sa ubang klase sa pagtag-an kon unsa kini. Kini nga kalihokan makatabang sa mga estudyante sa pagpraktis sa pagpasabot sa mga konsepto ngadto sa uban sa yano nga mga paagi.

Pipila ka mga bahin sa plano sa Langitnong Amahan mahimong lisod ipasabot, lakip ang Pagkapukan ni Adan ug Eva. Sa miaging leksiyon, natun-an nimo ang mahitungod sa Pagkapukan. Basaha ang 2 Nephi 2:25, nga naghunahuna sa imong nakat-onan. Hinumdomi nga ang Pagkapukan usa ka importante nga bahin sa plano sa kalipay sa Langitnong Amahan.

Isulat kon unsaon nimo pagpasabot ang Pagkapukan ni Adan ug Eva ngadto sa usa ka otso anyos ug nganong ang Pagkapukan importante nga masabtan.

Aron matabangan ang mga estudyante sa pagrebyo niini nga doktrina, mahimong makatabang ang pagdapit kanila sa pagpaambit diha sa ginagmay nga mga grupo kon unsay ilang nasulat. Paglakaw-lakaw libot sa kwarto, maminaw sa ilang mga pagpasabot. Kon gikinahanglan, rebyoha ang materyal gikan sa miaging leksiyon aron matabangan ang mga estudyante nga makasabot sa Pagkapukan ug sa kamatuoran nga gipahayag sa ibabaw.

Pagpraktis sa pagsag-ulo sa tudling sa doktrinal nga kahanas. Usa ka paagi sa pagpraktis sa pagsag-ulo niini mao ang pagbahin sa pakisayran sa kasulatan ug sa mahinungdanong hugpong sa mga pulong sa kasulatan ngadto sa mosunod nga lima ka mga bahin:

2 Nephi 2:25
“Si Adan napukan
aron ang mga tawo mahimo;
ug ang mga tawo naingon,
nga unta sila makabaton og hingpit nga kalipay.”

Kon mahimo, ikonsiderar ang paghimo og lima ka grupo ug tahasi ang usa sa mga bahin ngadto sa matag grupo. Kon imong itudlo ang usa ka grupo, mahimo nilang isulti ang ilang gitahas nga bahin. Dayon ibaylo kon hain nga bahin ang gitahas sa mga grupo, ug balika.

Isulat kini nga mga bahin ngadto sa usa ka piraso sa papel, ug balika og sulti ang matag bahin samtang imong itudlo kini. Dayon papasa o taboni ang mga pulong o hugpong sa mga pulong samtang balikon pagsulti ang kasulatan. Ipadayon hangtod nga mapapas ang tanan ug mahimo na nimong masubli pagsulti ang pakisayran sa kasulatan ug ang mahinungdanong hugpong sa mga pulong sa kasulatan gikan sa memorya.

Pagbansay sa paggamit

Tabangi ang mga estudyante sa pagrebyo sa mga baroganan sa pag-angkon og espirituhanong kahibalo. Usa ka paagi sa pagbuhat niini mao ang paghangyo sa mga estudyante sa pagsulay pagsulat sa tanang tulo ka mga baroganan gikan sa memorya.

Kon nagkinahanglan ka og tabang sa paghinumdom niini nga mga baroganan, tan-awa ang Mahinungdanon nga Dokumento sa Doktrinal nga Kahanas (2022).

Gamita kini nga mga baroganan sa mosunod nga senaryo:

Samtang nagkat-on mahitungod sa Pagkapukan ni Adan ug Eva sa iyang klase sa Sunday School, si Gideon nakurat sa pagkadungog sa iyang magtutudlo nga nag-ingon nga ang Pagkapukan usa ka importante nga bahin sa plano sa Langitnong Amahan sa kaluwasan. Nagsugod siya sa paghunahuna sa tanang negatibong mga butang nga mahimong mahitabo tungod sa Pagkapukan—sala, kamatayon, sakit, pagkabaldado, sakit sa pangisip, mga pagsulay, ug daghan pa. Siya nakaamgo nga ang mga butang nga iyang gireklamohan sa kasagaran mga sangpotanan sa Pagkapukan. Naghunahuna siya kon sa unsang paagi nga ang Pagkapukan mahimong usa ka butang nga gustong mahitabo sa Langitnong Amahan.

Samtang motubag ang mga estudyante, mahimo nimong tabangan sila sa paghimo og plano alang sa pagsulbad niini nga kabalaka. Mahimo kang mangutana sama sa mosunod: Unsa ang una ninyong buhaton? Unsa nga mga matang sa mga sinulat ang inyong irekord sa inyong journal sa pagtuon? Unsa nga ubang mga pangutana ang gusto ninyong pangitaan og mga tubag?

Paggahin og panahon sa imong pagpangandam sa leksiyon sa pagkonsiderar sa ubang mga paagi sa pagtabang sa mga estudyante nga makapraktis sa paggamit sa mga baroganan sa pag-angkon og espirituhanong kahibalo ug sa doktrina sa Pagkapukan.

Mahimo usab nimong hisgotan ang pipila o ang tanan sa mosunod nga mga pangutana uban sa mga estudyante.

Tinguhaa ang dugang nga panabot pinaagi sa balaanong gitudlo nga mga tinubdan

Rebyoha ang mga parapo 11–12 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas.

Sa unsang paagi nimo magamit kini nga baroganan sa pagtubag sa kabalaka ni Gideon?

Ubang mga paagi sa paggamit niini nga baroganan

Unsa nga balaanong gitudlo nga mga tinubdan ang imong irekomendar nga pangitaon ni Gideon alang sa dugang nga tabang?

Kon ang mga estudyante maglisod sa pag-ila sa mga tinubdan, mahimo nimong pahinumdoman sila sa 2 Nephi 2:24–26 o Moises 5:9–10. Mahimo usab nimo silang itudlo sa “Pagkapukan ni Adan ug Eva” diha sa Giya ngadto sa mga Kasulatan.

Ngano nga imong irekomendar kana nga mga tinubdan?

Susihon ang mga konsepto ug mga pangutana inubanan sa mahangtorong panglantaw

Rebyoha ang mga parapo 8–10 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas.

Sa unsang paagi nimo magamit kini nga baroganan sa pagtubag sa kabalaka ni Gideon?

Ubang mga paagi sa paggamit niini nga baroganan

Sa unsang paagi nga ang imong pagsabot sa Pagkapukan ug ang lugar niini sa plano sa kaluwasan makatabang niini nga sitwasyon?
Unsa ang imong nahibaloan mahitungod sa Manluluwas ug sa Iyang Pag-ula nga mahimong makatabang?
Unsaon pa man nato pagtan-aw niini nga sitwasyon nga adunay mahangtorong panglantaw?

Lihokon inubanan sa hugot nga pagtuo

Ribyoha ang mga parapo 5–7 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas.

Sa unsang paagi nimo magamit kini nga baroganan sa pagtubag sa kabalaka ni Gideon?

Ubang mga paagi sa paggamit niini nga baroganan

Hunahunaa ang imong kaugalingong mga kasinatian nga nag-atubang og mga hagit nga may kalabotan sa Pagkapukan. Pamalandongi kon unsay imong nahimo sa paglihok nga may hugot nga pagtuo ug pagsalig sa Manluluwas kon nag-atubang og mga hagit nga may kalabotan sa mortalidad.

Sa unsang paagi ang imong mga kasinatian makatabang sa sitwasyon ni Gideon?
Sa unsa pa nga paagi si Gideon makapakita og hugot nga pagtuo kang Jesukristo?

Rebyo sa doktrinal nga kahanas

Sa umaabot nga leksiyon, ikonsiderar ang pagsulat sa pakisayran sa kasulatan ug sa mahinungdanong hugpong sa mga pulong sa kasulatan sa usa ka sayop nga pagkahan-ay diha sa pisara. (Mahimo nimong gamiton ang mga bahin nga anaa sa kalihokan sa pagsag-ulo niini nga leksiyon.) Dapita ang matag estudyante sa pagsulay sa pagsulat niini sa saktong pagkasunod-sunod.

Kon anaa, mahimo nimong isulat ang pakisayran ug ang mga bahin sa hugpong sa mga pulong sa managlahi nga mga papel aron kini mapakita alang sa klase. Mahimong moduol ang usa ka estudyante ug, uban sa tabang sa klase, ibutang ang hugpong sa mga pulong sa husto nga pagkahan-ay.