Naghunahuna ka ba sukad kon sa unsang paagi ang mga pagpili nga gihimo ni Adan ug Eva liboan ka tuig na ang milabay mahimong makaapekto gihapon kanimo? Gitudloan ni Lehi ang iyang mga anak mahitungod sa mga epekto sa Pagkapukan ni Adan ug Eva ug nga uban sa Manluluwas atong mabuntog ang tanang mga hagit sa mortalidad. Kini nga leksiyon makatabang kanimo nga mas makadayeg sa Manluluwas ug sa Iyang Pag-ula samtang imong masabtan ang Pagkapukan ni Adan ug Eva.
Pagtabang sa mga tigkat-on sa pagpalambo sa abilidad sa paghisgot sa mga pagtuo sa ebanghelyo ngadto sa uban. Mapun-an ang pagsabot sa mga estudyante kon sila mopasabot sa ebanghelyo. Paghimo og palibot diin ang mga estudyante mobati og kakomportable sa pagpaambit sa ilang pagsabot sa mga kamatuoran sa ebanghelyo ngadto sa uban.
Pagpangandam sa estudyante: Ikonsiderar ang pagdapit sa mga estudyante sa pagbasa sa ikaduhang artikulo sa hugot nga pagtuo ug sa paghunahuna kon unsaon nila kini pagpasabot ngadto sa laing tawo. Mahimo usab silang mohangyo og usa o duha ka tawo nga ilang gisaligan nga mopaambit ngadto kanila sa ilang pagsabot sa ikaduhang artikulo sa hugot nga pagtuo.
Kini nga pagpangandam mahimong gamiton sa sinugdanan sa leksiyon o sa higayon nga ang mga estudyante mopaambit sa unsay ilang nahibaloan mahitungod sa Pagkapukan ni Adan ug Eva.
Mga Posibleng Kalihokan sa Pagkat-on
Ang pagsabot mosangpot sa pagdayeg
Pamalandongi ang mosunod nga mga pangutana:
Sa sukdanan nga 1 hangtod sa 10 (ang 1 kay “wala gayod” ug ang 10 kay “nasabtan kaayo”), unsa ka dako ang imong pagbati nga imong nasabtan ug gidayeg ang Manluluwas nga si Jesukristo ug ang Iyang pagsakripisyo alang kanimo? Ngano man?
Hatagi ang mga estudyante og igong panahon sa pagpamalandong sa miaging mga pangutana sa dili pa mopadayon. Dayon dapita sila sa pagpaambit sa mga tubag sa sunod nga pangutana:
Kon adunay mangutana nimo kon unsay iyang buhaton aron masabtan ug madayeg ang Pag-ula ni Jesukristo, unsay imong isulti?
Si Elder Jeffrey R. Holland a Korum sa Napulog Duha ka Apostoles mipunto og usa ka gikinahanglan nga lakang aron mas masabtan ang Pag-ula sa Manluluwas. Mahimo nimong tan-awon ang bidyo “Asa ang Hustisya, Gugma, ug Kaluoy Mag-abot” gikan sa time code 6:51 hangtod sa 7:26 o basaha ang mosunod nga pamahayag:
Imahe
Elder Jeffrey R. Holland
Ang yanong kamatuoran mao nga kita dili hingpit nga makasabot sa Pag-ula ug Pagkabanhaw ni Jesukristo ug dili nato igong masabtan ang talagsaong katuyoan sa Iyang pagkatawo o sa Iyang kamatayon … kon dili masabtan nga adunay tinuod nga Adan ug Eva nga napukan gikan sa Eden lakip na ang tanang sangpotanan niana nga pagkapukan. (Jeffrey R. Holland, “Asa ang Hustisya, Gugma, ug Kaluoy Mag-abot,” Liahona, Mayo 2015, 105)
Aron matabangan ka sa pagtimbang-timbang kon unsa na ka daghan ang imong nahibaloan bahin sa Pagkapukan ni Adan ug Eva, hunahunaa ang mosunod nga mga pangutana:
Unsa ang Pagkapukan ni Adan ug ni Eva?
Unsay mga epekto sa Pagkapukan nganha sa kalibotan? nganha kanimo?
Sa unsang paagi nga ang Pagkapukan mihaum sa plano sa Langitnong Amahan sa kaluwasan?
Sa unsang paagi ang Pagkapukan nagtabang kanimo nga masabtan ug madayeg si Jesukristo ug ang Iyang pagsakripisyo alang kanimo?
Samtang magtuon ka, pangita og mga tubag niini nga mga pangutana ug pamalandongi kon sa unsang paagi ang pagsabot niini makatabang kanimo.
Ang mga epekto sa Pagkapukan ni Adan ug ni Eva
Ang mosunod nga parapo gituyo aron matabangan ang mga estudyante nga makasabot kon unsa ang Tanaman sa Eden aron mas masabtan nila ang mga epekto sa Pagkapukan. Ikonsiderar ang pagdapit sa mga estudyante sa pagpaambit unsay ilang nahibaloan bahin niining mga panghitabo, ug sa pagpuno og bisan unsang importante nga mga detalye.
Dihang nangandam na si Lehi nga mamatay, nakig-istorya kini pag-ayo sa iyang anak nga si Jacob mahitungod sa Pagkapukan ni Adan ug Eva. Si Adan, Eva, ug ang tanang matang sa kinabuhi sa yuta nabuhi sa imortal nga kahimtang, wala pa mapaubos sa kamatayon, ug anaa sa presensiya sa Dios. Nianang kahimtanga, dili sila mahimong masakit o mamatay, ug ang tanaman mihatag og pagkaon alang kanila nga dili na sila kinahanglang maghago aron sa pagpatubo niini. Dili usab sila makabaton og pamilya. Ang Ginoo mipahimangno kanila nga kon sila mokaon sa bunga sa kahoy sa kahibalo sa maayo ug dautan, sila sa kataposan mamatay (tan-awa ang Moises 3:16–17; Abraham 5:12–13). Ang desisyon ni Adan ug Eva sa pagkaon niana nga bunga ug ang mga sangpotanan alang kanila ug sa tibuok kalibotan nailhan nga Pagkapukan.
Basaha ang 2 Nephi 2:19–23 ug ang Alma 42:6–9, nga mangita sa mga sangpotanan sa Pagkapukan. Ikonsiderar ang pagmarka sa unsay imong mapalgan.
Mahimong makatabang nga ang mga estudyante magtinabangay diha sa gagmay nga mga grupo o magsulat og lista diha sa pisara isip usa ka klase.
Ikonsiderar ang pagdapit sa mga estudyante sa pagtubag sa mosunod nga duha ka mga pangutana nga magpares o sa gagmay nga mga grupo. Ipasabot nga kini nga mga pangutana kay opinyon nga mga pangutana, aron ang mga estudyante gawas-non nga makapaambit sa ilang mga hunahuna ug dili mabalaka mahitungod sa pagbaton og “saktong tubag.”
Unsay inyong bation kon kamo sila si Adan ug Eva nga nagsinati niini nga mga sangpotanan?
Sa imong hunahuna kini ba nga mga epekto maayo, dili maayo, o pareho? Ngano man?
Basaha ang 2 Nephi 2:24–25, ug hunahunaa kon unsaon nimo pagpamubo [summarize] niini nga mga bersikulo sa imong kaugalingong mga pulong.
Ang 2 Nephi 2:25 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron dali nimo kining mapangita. Mahatagan ka og kahigayonan sa sunod nga leksiyon sa pagpraktis sa paggamit sa doktrina nga gitudlo niini nga tudling ngadto sa usa ka pangutana o sitwasyon.
Dapita ang mga estudyante sa pagpaambit kon unsaon nila sa pagpamubo [summarize] ang mga bersikulo. Isulat diha sa pisara ang bisan unsa nga kamatuoran nga ilang gihisgotan. Ang mosunod maoy usa ka ehemplo sa usa ka kamatuoran nga mahimo nilang mailhan.
Usa ka kamatuoran nga gitudlo ni Lehi mao nga ang Pagkapukan usa ka mahinungdanong bahin sa plano sa kalipay sa Langitnong Amahan.
Paggahin og panahon sa pagpamalandong kon nganong ang Pagkapukan usa ka mahinungdanong bahin sa plano sa Langitnong Amahan samtang imong basahon kining pamahayag ni Elder Jeffrey R. Holland sa Korum sa Napulog Duha ka Apostoles:
Imahe
Elder Jeffrey R. Holland
Ang Pagkapukan usa ka importanting bahin sa balaan nga plano sa Langitnong Amahan. Kon wala pa kini walay mortal nga mga anak ang natawo unta ngadto ni Adan ug Eva, ug wala untay tawhanong pamilya nga mosinati sa oposisyon ug pagtubo, moral nga kabubut-on, ug sa hingpit nga kalipay sa pagkabanhaw, katubsanan, ug kinabuhing dayon [tan-awa sa 2 Nephi 2:22–27; Moises 5:11]. (Jeffrey R. Holland, “Ang Pag-ula ni Jesukristo,” Liahona, Mar. 2008, 34–35)
Ngano nga ang Pagkapukan usa ka mahinungdanon nga bahin sa plano sa Langitnong Amahan?
Isip kabahin niini nga pangutana, mahimo nimong pamarkahan ug pahisgotan sa mga estudyante ang hugpong sa mga pulong nga “ang mga tawo naingon, nga unta sila makabaton og hingpit nga kalipay” sa 2 Nephi 2:25. Mahimo kang mangutana sama sa mosunod:
Nganong importante nga masabtan nga bisan kon kita nag-atubang sa mga sangpotanan sa Pagkapukan, ang Langitnong Amahan gusto gihapon nga kita mobati og kalipay? Unsa ang gitudlo niini kaninyo mahitungod Kaniya?
Nagkinahanglan pa kita og tabang
Bisan og ang mga sangpotanan sa Pagkapukan kabahin sa plano sa atong Langitnong Amahan ug gituyo aron sa pagtabang kanato nga mouswag, dili kita makabati og tinuod nga kalipay kon walay balaanong tabang.
Mahimo nimong ilista diha sa pisara ang mga kasulatan sa ubos ug patun-i kini sa mga estudyante sa hilom ug papamalandongi kini og maayo.
Basaha pag-ayo ang 2 Nephi 2:26, nga mangita kon sa unsang paagi mahimong posible nga mabuntog ang mga epekto sa Pagkapukan ug mobati og kalipay. Dayon basaha ang Moises 5:10–11, nga pagamatikdan kon unsa nga mga kamatuoran ang midala kang Adan ug Eva sa pagmaya.
Unsay imong nakat-onan?
Ngano sa imong hunahuna si Adan ug Eva nagmaya human makakat-on mahitungod sa Pagkapukan ug sa Pag-ula ni Jesukristo?
Human mopaambit ang mga estudyante, mahimo nilang balikan ang upat ka mga pangutana sa pagtimbang-timbang sa kaugalingon gikan sa sinugdanan sa leksiyon ug tan-awon kon unsa ka maayo ang ilang pagtubag niini karon. Kon gikinahanglan, balika ang bisan unsa nga materyal diha sa leksiyon aron makatabang sa pagpatin-aw sa ilang pagsabot. Laing paagi sa pagtabang sa mga estudyante sa paghunahuna mahitungod sa unsay ilang nakat-onan niini nga leksiyon mao ang pagpaambit sa mosunod nga senaryo ug dapita ang mga estudyante sa pagpaambit kon unsaon nila sa pagtubag.
Hunahunaa nga sa usa ka panaghisgotan uban sa usa ka higala, imong namatikdan nga wala siya makadayeg sa Manluluwas o sa Iyang Pag-ula.
Unsa nga kahibalo mahitungod sa Pagkapukan ni Adan ug Eva ang makatabang kaniya sa pagdayeg sa Manluluwas ug sa Iyang Pag-ula?
Ikonsiderar ang paghatag sa imong pagpamatuod sa mga kamatuoran nga gitudlo niini nga leksiyon.
