“2 Nephi 2:1–16: ‘[Ang] Dios Mihatag ngadto sa Tawo nga Siya Molihok alang sa Iyang Kaugalingon,’” Manwal sa Magtutudlo sa Basahon ni Mormon (2024)
“2 Nephi 2:1–16: ‘[Ang] Dios Mihatag ngadto sa Tawo nga Siya Molihok alang sa Iyang Kaugalingon,’” Manwal sa Magtutudlo sa Basahon ni Mormon
2 Nephi 2:1–16
“[Ang] Dios Mihatag ngadto sa Tawo nga Siya Molihok alang sa Iyang Kaugalingon”
Hunahunaa ang imong kinabuhi kon wala kay mga kapilian. Ang kabubut-on, o ang gahom sa pagpili, mao ang usa sa pinakadakong gasa sa Dios ngari kanato. Ang anak ni Lehi nga si Jacob nakasinati na og daghang mga hagit sa batan-ong edad, mao nga si Lehi mitudlo kaniya og bililhong mga kamatuoran mahitungod sa Manluluwas ug kagawasan sa pagpili. Kini nga leksiyon makatabang nimo nga mas makasabot sa tahas sa kabubut-on diha sa plano sa Langitnong Amahan.
Pagpangutana sa mga pangutana nga nagdapit sa lawom nga paghinuktok [introspection].Mga pangutana nga nagdapit sa mga estudyante sa pagpamalandong sa mga kasulatan, sa ilang mga pagbati ngadto sa Manluluwas, sa Iyang mga pagtulun-an, o sa paggamit sa mga baroganan makapasiugda og pagpamalandong, nga magamit sa Espiritu sa pagtudlo. Hatagi ang mga estudyante og panahon nga gikinahanglan alang sa epektibong pagpamalandong ug pagsulat.
Pagpangandam sa estudyante: Dapita ang mga estudyante sa pag-ila ug paghimo og lista sa importante nga mga pagpili nga ilang gihimo tali sa karon ug sa sunod nga leksiyon. Hangyoa sila sa pagtambong nga andam sa pagpaambit nganong ang pagpili importante sa atong mortal nga kinabuhi ug sa plano sa Langitnong Amahan sa kaluwasan.
Mga Posibleng Kalihokan sa Pagkat-on
Importante nga mga pagpili
Dapita ang mga estudyante sa paggamit sa ilang pagpangandam sa klase sa pagbuhat sa mosunod nga kalihokan diha sa ilang mga journal sa pagtuon.
Sa sunod nga duha ka minuto, isulat ang pipila ka importante nga mga pagpili nga imong nahimo sa miaging pipila ka mga adlaw.
-
Ngano sa inyong hunahuna nga ang pagpili importante man sa atong mortal nga kinabuhi ug sa plano sa Langitnong Amahan sa kaluwasan?
Pamalandongi kon unsa ang imong nakat-onan gikan sa mga pagpili nga imong gipasigarbo ingon man usab niadtong imong gibasolan. Samtang magtuon ka niini nga leksiyon, tinguhaa ang giya sa Espiritu Santo aron makat-on kon unsay makatabang nimo nga mas makasabot ug makagamit sa imong abilidad sa pagpili. Kon duna kay mga pangutana mahitungod sa kabubut-on, pag-ampo usab ug tinguhaa ang mga tubag samtang magtuon ka.
Importante nga mga aspeto sa kabubut-on
Ang anak nga lalaki ni Lehi nga si Jacob natawo sa kamingawan human ang ilang pamilya mibiya sa Jerusalem. Sa wala pa mamatay si Lehi, gitudloan niya si Jacob og importante nga mga kamatuoran mahitungod sa kabubut-on.
Basaha ang 2 Nephi 2:1–4 aron makita kon giunsa pagsugod ni Lehi ang iyang mensahe ngadto ni Jacob. Mahimong makatabang ang pagkahibalo nga ang pulong “pagpahinungod” nagpasabot sa pagpahinungod o paghimo nga balaan (tan-awa sa “Pagpahinungod, Balaod sa Pahinungod” diha sa Giya ngadto sa mga Kasulatan [scriptures.ChurchofJesusChrist.org]).
-
Ngano kaha nga makahuluganon alang sa usa ka tawo nga nag-atubang og daghang mga pagsulay nga masabtan ang kaimportante sa gahom sa pagpili?
-
Unsa nga mga kamatuoran gikan niini nga mga bersikulo ang labing makahuluganon kanimo? Ngano man?
Ipakita ang mosunod nga impormasyon o ihatag kini isip handout. Mahimo nimong i-assign ang lain-laing mga estudyante o grupo sa mga estudyante sa usa sa tulo ka mga opsiyon. Isip alternatibo nga paagi, mahimo nimong bahinon ang mga estudyante ngadto sa mga grupo ug dapiton sila sa pagtuon kutob sa ilang mahimo sulod sa gitakdang panahon.
Ang Atong Gahom sa Pagpili
Manwal sa Magtutudlo sa Basahon ni Mormon (2024)—“2 Nephi 2:1–16”
Opsiyon A: Unsa ang gitudlo kanato sa atong gahom sa pagpili mahitungod sa Dios?
Basaha ang 2 Nephi 2:14, 16 nga mangita sa unsay gitudlo ni Lehi mahitungod sa Dios ug sa atong kabubut-on.
-
Unsay imong nakat-onan?
-
Ngano nga importante nga masabtan nga ang Dios naghatag kanato og gahom sa paglihok alang sa atong kaugalingon?
-
Unsa ang imong gibati nga ang Langitnong Amahan misalig kanimo sa paghimo sa imong kaugalingon nga mga pagpili?
Paghunahuna og ehemplo sa dihang migamit ka og kabubut-on sa paagi nga imong gibati nga nahimuot ang Langitnong Amahan.
-
Nganong gibati nimo nga ang imong gipili nakapahimuot sa Dios?
Mahimo usab nga mapuslanon ang pagpamalandong sa bisan unsang mga pagpili nga imong nahimo nga wala makapahimuot sa Dios ug kon unsa ang imong nakat-onan gikan niana.
Opsiyon B: Unsa ang gihatag sa Dios kanato aron matabangan kita sa pagpili nga maalamon?
Basaha 2 Nephi 2:5, 13 and Moroni 7:16 nga mangita sa mosunod nga mga kamatuoran. Timan-i ang “balaod” nagtumong sa mga sugo sa Dios.
-
Kinahanglang makahibalo kita sa maayo gikan sa dautan aron hingpit nga magamit ang atong kabubut-on.
-
Kinahanglan nga kita adunay balaod aron adunay kabubut-on.
-
Unsa ang imong nakat-onan mahitungod sa Langitnong Amahan ug ni Jesukristo gikan sa kamatuoran nga Ilang gihatag sa tanan ang igong kahibalo sa maayo ug dautan aron makahimo sa pagpili nga mahimong matarong o dautan?
-
Unsay mahitabo kon walay balaod o sugo?
Opsiyon C: Nganong makabati kita og oposisyon sa atong maayong mga pagpili?
Basaha ang 2 Nephi 2:11, 16, nga mangita sa dugang nga mga kamatuoran nga gitudlo ni Lehi mahitungod sa kabubut-on.
-
Unsay imong nahibaloan?
-
Sa plano sa Langitnong Amahan, nganong sa imong hunahuna ang katugbang usa ka kinahanglanon nga aspeto sa kabubut-on?
-
Sa unsang mga paagi kita gidani sa paghimo og husto ug sayop nga mga pagpili?
Aron matabangan ka nga makasabot niini nga kamatuoran, basaha ang mosunod nga pamahayag ni Elder Jeffrey R. Holland sa Korum sa Napulog Duha ka Apostoles:
Ang mga anak sa Dios sa wala pa dinhi sa yuta dili mahisama kaniya … gawas kon sila makaangkon og … kasinatian sa usa ka natad diin anaa ang maayo ug dautan. …
… Gusto nato ang kahigayonan nga … atubangon ang maayo ug dautan ug mahimong lig-on sa pagpili sa maayo. (Jeffrey R. Holland, Christ and the New Covenant: The Messianic Message of the Book of Mormon [1997], 200, 204)
Paghunahuna sa mga paagi nga ikaw nakakat-on sa pagpili sa maayo, bisan kon gitintal sa dautan. Mahimo nimong isulat ang imong mga hunahuna diha sa imong journal sa pagtuon. Mahimo usab nimong hunahunaon ang mga paagi nga makapangayo ka og tabang sa bisan unsang mga desisyon nga gusto nimong usbon.
Ang atong panginahanglan sa Manluluwas
Walay lain gawas sa Manluluwas ang hingpit nga migamit sa kabubut-on dinhi sa mortalidad. Kitang tanan makasala, ug kon walay tabang kitang tanan “malaglag … ug mahimo nga mauyamot sa kahangtoran” (2 Nephi 2:5).
Ikonsiderar ang paggamit sa impormasyon gikan sa seksiyon sa “Komentaryo ug Background nga Impormasyon” dinhi aron matabangan ang mga estudyante nga mas makasabot kon unsa ang gitudlo diha sa 2 Nephi 2:6–8.
Uban niini sa hunahuna, basaha ang 2 Nephi 2:6–8 aron makita kon unsa ang gibuhat ni Jesukristo alang kanatong tanan.
-
Giunsa pagpili sa Manluluwas ang pagtabang kanimo?
Usa ka baroganan nga gipamatuod ni Lehi mao nga pinaagi sa Iyang Pag-ula, ang Manluluwas mitubos kanato gikan sa atong mga sala.
-
Sa unsang paagi nga ang pagsabot niini mahitungod ni Jesukristo makaimpluwensiya sa imong mga pagbati ngadto Kaniya?
-
Unsa ang imong nakat-onan gikan sa ehemplo sa Manluluwas mahitungod sa paghimo og mga pagpili?
Dapita ang mga estudyante sa pagpamalandong sa mosunod nga dili ipaambit agi sa pagsulti ang ilang mga tubag, tungod kay kini mahimong personal ra kaayo.
Paghunahuna og panahon diin, uban sa tabang ni Jesukristo, naghinulsol ka sa usa ka sala. Sa unsang paagi ang paghinulsol nakaapekto kanimo?
Mahimo nimong hatagan ang mga estudyante og kahigayonan sa pag-summarize ug pagpakigbahin sa unsay ilang nasabtan mahitungod sa kabubut-on sa dili pa motapos niini nga leksiyon. Ang mosunod nga kalihokan maoy usa ka paagi nga mahimo nimo kini.
Hunahunaa nga ang mga misyonaryo sa inyong dapit nagtudlo og usa ka batan-on kinsa nakadungog mahitungod sa plano sa Langitnong Amahan sa unang higayon. Ang mga misyonaryo nagdapit kanimo sa pag-adto sa sunod nga pagtudlo uban niini nga batan-on. Sila naghangyo kanimo sa pag-andam og mga hunahuna gikan sa 2 Nephi 2 sa kaimportante sa kabubut-on diha sa plano sa Langitnong Amahan. Paghimo ug pagsumiter og usa ka mubo nga outline sa unsay imong itudlo. Ilakip ang mosunod:
-
Dili mokubos sa duha ka mga kasulatan gikan sa 2 Nephi 2:1–16, 26 uban sa ilang kaubang mga kamatuoran, lakip ang mubo nga pagpasabot kon nganong kini makahuluganon o importante
-
Sa unsang paagi ang sakripisyo ni Jesukristo makaimpluwensiya sa atong mga pagpili
-
Sa unsang paagi kini nga mga kamatuoran makahimo og kalainan sa atong mga kinabuhi
Ipares-pares ang mga estudyante o ginagmay nga grupo ug dapita sila sa pagpaambit sa ilang mga outline sa usag usa. Kon adunay panahon, ikonsiderar ang pagpa-drama-drama sa mga outline ug pagdapit sa mga estudyante sa pagtudlo sa usag usa.
Kon mahuman nimo ang imong outline, tinguhaa ang giya sa Espiritu Santo samtang mamalandong ka og mga paagi nga imong mahinumdoman kini nga mga kamatuoran ug sa unsang paagi ang paghinumdom niini makapanalangin sa imong kinabuhi. Sama pananglitan, mahimo kang magbutang og screensaver sa imong phone, magbutang og mubo nga sulat sa imong samin, o mobuhat og laing butang nga makapahimo nimo nga kanunay nga makakita ug makahinumdom niini nga mga kamatuoran.