“2 Nifae 9:1–26: ‘O Le Togiola e le Iu,”’ Tusi Lesona a le Faiaoga o le Tusi a Mamona (2024)
“2 Nifae 9:1–26,” Tusi Lesona a le Faiaoga o le Tusi a Mamona
2 Nifae 9:1–26
“O Le Togiola e Le Iu”
Sa aoao atu e Iakopo ia sa Nifae e uiga i tulaga e feagai ma tagata uma ona o le Pa’ū o Atamu ma Eva. Sa ia molimau mai e na o Iesu Keriso lava ma Lona mana togiola e mafai ai e tagata ona faatoilaloina le oti faaleagaga ma le faaletino. O lenei lesona e mafai ona fesoasoani ia te oe e lagona ai le talisapaia sili atu o le matafaioi a Iesu Keriso i le fesoasoani ia i tatou e faatoilalo le agasala ma le oti.
Fesoasoani i tagata aoga e aoao e faalagolago ia Iesu Keriso. E tatau ona iloa ma lagona e tagata aoga le mana e mafai ona ofo mai e le Faaola ona o Lana Togiola. O le mea lea, e tatau i faiaoga ona fesoasoani i tagata aoao ia malamalama pe faapefea ona faalagolago patino atu ia Iesu Keriso. E mafai ona latou faia lenei mea a o latou taumafai e salamo, saili le faamagaloga, ma talitonu e mafai ona Ia fesoasoani ia i latou i o latou olaga ma luitau i aso taitasi.
Sauniuniga a le tagata aoga: Mafaufau e valaaulia tagata aoga e suesue le 2 Nifae 9:1–26. E mafai ona latou faailogaina i se auala se tasi le mea o le a tupu ia i tatou e aunoa ma le Togiola a Iesu Keriso, ma faailoga i se isi auala le mea e mafai ona tupu ia i tatou ona o Iesu Keriso ma Lana Togiola.
Gaoioiga e Ono Mafai Ona Aoao Ai
O se Tulaga faigata
O le tala lenei ua faamoemoe e fesoasoani e saunia ai tagata aoga e suesue e uiga i le matafaioi a le Faaola i le laveaiina o i tatou mai le agasala ma le oti.
Mafaufau pe faapefea ona e tali atu i tulaga nei:
I le aso 5 o Aokuso, 2010, e 33 tagata o Chile e galulue i maina sa maileia i se solo maoae ina ua solo ifo i lalo le papa i totonu o le maina. Sa lokaina i latou i se vaega itiiti o le saogalemu ma auala o le maina i lalo o le solo, 2,300 futu (700 m) le loloto i totonu o le eleele.
Sa foliga mai ua leai se faamoemoe. Na vavae ese i latou mai aiga ma auaiga e toetoe lava o le afa o se maila mai se papa e le mafai ona aveese o i luga atu, ma e na o se sapalai laitiiti o meaai ma vai o loo ia i latou. E ui ina sa i ai a latou meafaigaluega ma le atamai, ae ona o le le saogalemu o le maina e le mafai ai ona latou faaolaina i latou lava. Na pau lava lo latou avanoa o le mauaina lea ma laveaiina e se tasi. (Connie Goulding, “Sailia o le Laveai,” Liahona, Iuni 2015, 63)
-
Ana faapea na e i ai i lenei tulaga, mata o a ni ou manatu ma ni lagona i lena taimi?
-
O a nisi o mea e manaomia ona laveaiina ai i tatou mai mea e le mafai ona tatou faatoilaloina e i tatou lava?
Ona o le Pau o Atamu ma Eva, o le a oo ai ia i tatou taitoatasi le oti faaletino ma le faaleagaga. O le oti faaleagaga e faasino i le vavaeese mai le Atua tatou te oo i ai o se taunuuga o le agasala.
Faitau le 2 Nifae 9:10, ma vaavaai mo le mea na faatusa i ai e Iakopo le oti faaletino ma le faaleagaga.
-
Aisea e te manatu na faamatalaina ai e Iakopo le oti (oti o le tino) ma seoli (oti o le agaga e mafua mai agasala e lei salamo ai), o se “sau’ai leaga matautia”?
Mafaufau pe faape’i le olaga pe ana faapea e le laveaiina i tatou mai le oti faaletino ma le faaleagaga. Mafaufau pe mafai faapefea ona e fesootai atu i se tasi lo tatou manaoga faavauvau mo se Togiola e laveai i tatou mai le oti faaletino ma le faaleagaga. A o faaauau pea ona e suesue, mafaufau loloto pe o a ou lagona ia Iesu Keriso, o le e fesoasoani ia i tatou e faatoilalo nei tulaga e ala i Lana Togiola.
Ua aoao mai Iakopo e uiga i le matafaioi a le Faaola i le laveaiina o i tatou mai le agasala ma le oti
Mafaufau pe sili ona lelei mo tagata aoga le suesue o fuaiupu nei ma faauma le siata o se vasega, i ni vaega, pe taitoatasi. Atonu e aoga le faaaoga o se tuufaatasiga o nei metotia. Atonu foi e aoga mo oe le faamaeaina o lau oe lava siata a o lei amataina le vasega ina ia mafai ona e saunia e ofo atu le fesoasoani ma malamalamaaga i tagata aoga a o latou suesue.
Tusi se siata e i ai ulutala nei e tolu i lau api talaaga mo le suesueina o tusitusiga paia. Suesue i fuaiupu o loo lisi atu i koluma taitasi ma tusifaamaumau ou malamalamaaga i lau siata. Faaauau pea ona faaopoopo ni malamalamaaga i lau siata i le aluga o le lesona.
|
Afai e leai se Faaola … (2 Nifae 9:7–9) |
Aua o loo i ai se Faaola … (2 Nifae 9:10–13) |
|---|---|
Atonu foi e te manao e matamata i le “Aisea Tatou te Manaomia ai se Faaola” (2:15), lea e mafai ona maua i le ChurchofJesusChrist.org. Mafaufau e faaopoopo ou malamalamaga i lau lisi.
Why We Need a Savior
What would life be like without a Savior? There would be no joy, no forgiveness, no hope for the future. This Christmas, learn more about the hope, peace and happiness our Savior Jesus Christ can bring into our lives at christmas.mormon.org.
A uma ua lava se taimi o le vasega e suesue ai, ona valaaulia lea e faasoa mai mea sa latou aoaoina. Mafaufau e fai atu fesili e pei o nei o se vaega o la outou talanoaga:
-
O a ni manatu po o ni lagona na ia te oe e uiga i le Faaola a o e suesue i lenei tala?
-
O le a se mea na e aoaoina e uiga i le mea o le a tupu ia i tatou pe ana leai se Faaola?
-
O le a se mea sa e aoaoina e uiga i le Faaola ma le mana o Lana Togiola?
O le upumoni e tasi o loo aotele ai aoaoga a Iakopo i fuaiupu na e suesueina o le, e ala i Lana Togiola, ua fesoasoani ai Iesu Keriso ia i tatou e faatoilalo le agasala ma le oti.
-
E mafai faapefea e le malamalama i lenei upumoni ona aafia ai lou olaga?
Mafaufau e faasoa atu se faataitaiga patino a o lei valaauliaina tagata aoga e faasoa mai a latou tali i le fesili lenei.
Atonu foi e aoga le faaali atu o se tasi o vitio i le “Manatu ma Talaaga o Faamatalaga” i lalo o le ulutala “E mafai faapefea e le malamalama i le manumalo o Iesu Keriso i le agasala ma le oti ona aafia ai o tatou olaga?”
-
O anafea na sili atu ai ona anoa ia te oe le malamalama i le manumalo o Iesu Keriso i le agasala ma le oti?
Filifili e talia le laveai
Toe mafaufau i le tala i le au galulue maina i Chile mai le amataga o le lesona. A o e aoao e uiga i le vaega o totoe o la latou tala, mafaufau i mea e tutusa ai o latou aafiaga ma lo tatou laveai mai le oti faaletino ma le faaleagaga.
Mafaufau e faaali atu le parakalafa lenei ma valaaulia se tagata aoga e faitau leotele.
E silia ma le lua vaiaso talu ona maileia le au galulue maina, ae maua e le au laveai se auala e tuuina atu ai ia i latou meaai, vai, ma sapalai. Toeitiiti lua masina mulimuli ane, na iu lava ina mafai e le au laveai ona fatuina se avanoa tele e tuu ai i lalo se tamai pusa e mafai ona laveai ai le au galulue maina e taitoatasi i le taimi. Na laa atu taitoatasi le au galulue maina i le pusa ma tuuina atu lona faatuatuaga i le fuafuaga ma le au laveai. Ina ua uma ona maileia mo le aofaiga o aso e 69, sa laveaiina uma le au galulue maina (tagai Connie Goulding, “Sailia o le Laveai,” Liahona, Iuni 2015, 63–65).
-
O a ni mea e tutusa ai o e vaaia i le va o lenei tala ma le Faaola o laveaiina i tatou mai le agasala ma le oti?
-
O le a sou manatu pe ana faapea e musu se tasi o tagata eli maina sa taomia e alu i totonu o le pusa laveai? Aisea?
E ui o le laveaiina mai le oti faaletino o se meaalofa ua ofoina mai e le Faaola i tagata uma, ae o lo tatou laveaiga mai le oti faaleagaga e faalagolago lea i se vaega o o tatou manaoga ma faatinoga.
Mafaufau e tuu tagata aoga i ni vaega toalaiti e faitau ai fuaitau ma talanoaina ia fesili.
Faitau le 2 Nifae 9:21–24 ma vaavaai mo filifiliga e tatau ona tatou faia ina ia mafai ai e le Faaola ona laveai i tatou mai le oti faaleagaga. Mafaufau e tusi ni malamalamaaga faaopoopo e te maua e uiga i le Faaola i le koluma lona lua o lau siata.
-
O le a se mea na e aoaoina e uiga i mea e tatau ona tatou faia mo le Faaola e laveai ai i tatou mai le oti faaleagaga?
-
Aisea e te manatu ai “e le mafai ona faaolaina i tatou i le malo o le Atua” pe afai tatou te le faia nei mea?
Mafaufau mo ni nai minute i mea sa e aoaoina i le aso e uiga ia Iesu Keriso ma mea sa Ia faia mo oe. Atonu e te manao e tusifaamaumau soo se manatu po o ni uunaiga na e maua pe faaaofia ai lou agaga faafetai mo lo tatou Faaola alofa.
Faaiu le lesona i le faasoa atu o lau molimau ia Iesu Keriso ma Lana Togiola. Faamalosiau atu i tagata aoga e saili faamanuiaga e na o Iesu Keriso e mafai ona ofoina atu e ala i le taumafai e mulimuli ia te Ia i o latou olaga atoa.