2 Nifae 9:27–49

“O le Mafaufau-Faaleagaga o le Ola lea e Faavavau”

E faafia ona e mafaufau po o fea o le a taitai atu ai oe e au amioga ma uiga faaalia? Ina ua uma ona tautino atu e i ai ia Iesu Keriso le mana e laveai ai tagata uma mai aafiaga o le Pa’ū, sa lapatai atu Iakopo e faasaga i amioga ma uiga ia e taitai ese ai i tatou mai le Alii. Sa ia molimau atu ia Iesu Keriso ma mea e mafai ona tatou faia e o mai ai ia te Ia ma faaolaina ai. E mafai ona fesoasoani lenei lesona ia te oe e aloese ai mai amioga e taitai atu ai i le le fiafia ma le vavaeeseina o i latou mai ia Iesu Keriso.

O le tuuina atu o fesili e valaaulia ai le mafaufau loloto. O le mafaufau loloto ma le iloiloga faaletagata lava ia e mafai ona valaaulia ai le Agaga Paia e fesoasoani i tagata aoga taitoatasi ia vaai i mea “e pei ona i ai moni lava, ma … o le a i ai moni lava” (Iakopo 4:13). O iloiloga mataalia faaletagata lava ia e fesoasoani i tagata aoga e mafaufau ai i lo latou malamalamaaga i le taimi nei i upumoni o le talalelei ma o latou manaoga po o faamoemoega.

Sauniuniga a le tagata aoga: Valaaulia tagata aoga e gauai atu po o le fea o a latou amioga i le va o le taimi nei ma le isi vasega e fesoasoani latou te lagona ai le latalata atili atu i le Atua ae o le fea latou te lagona ai le taumamao mai ia te Ia.

Gaoioiga e Ono Mafai Ona Aoao Ai

Vavaeese mai le Atua

A o lei amataina le vasega, mafaufau e nana se lole se tasi pe sili atu (po o se isi mea atonu e fiafia tagata aoga e sue) i se mea i totonu o le potu. Valaaulia ni nai tagata aoga e saili mo mea faitino. Ofo atu le fesoasoani i upu e pei o le mafanafana ma le mafanafana tele a o latalata atu tagata aoga i le mea o loo natia ai mea faitino ma faaaoga upu e pei o le malulu ma le malulu tele pe a latou mamao ese. A uma ona maua lole po o isi mea faitino, mafaufau e fai atu fesili e pei o nei:

• Na faapefea ona fesoasoani uunaiga ia te oe e maua ai mea faitino?

• Aisea e ono le mulimuli ai se tagata i uunaiga na faamoemoe e fesoasoani ia i latou ia maua se mea tauia?

Valaaulia tagata aoga e manatunatu filemu i le parakalafa lenei:

Mafaufau i taimi i lou olaga na e lagonaina ai le faapitoa o lou latalata atu i le Atua ma taimi na e lagonaina ai le mamao mai ia te Ia. O a nisi o faatinoga atonu na taitai atu ai i nei taunuuga?

• O le a se mea na e mauaina?

• O le a sou manatu i le mea na fesoasoani ia Iakopo e lagona ai le ala na ia faamatalaina i le 2 Nifae 9:49?

Mafaufau i lou lava olaga ma pe o le a le latalata o loo e lagonaina i le taimi nei i le Atua. A o e suesue atili i le lauga a Iakopo i le 2 Nifae 9, vaavaai mo aoaoga e mafai ona fesoasoani e te latalata atili atu ai i le Tama Faalelagi ma Iesu Keriso.

“Ua’i mai o’u taliga i a’u upu”

Ina ua uma ona aoao atu e uiga i le matafaioi a Iesu Keriso i le fesoasoani ia i tatou e faatoilalo le agasala ma le oti (tagai i le 2 Nifae 9:1–26), sa lapataia e Iakopo sa Nifae mai uiga ma amioga o le a taitai ese ai i latou mai le Faaola.

Mafaufau e vavae le vasega i le afa ma tuueseese le galuega atofaina o le faitauga lenei. (E mafai e le tasi afa o le vasega ona faitau le 2 Nifae 9:27–30, ae o le isi afa e mafai ona faitauina le 2 Nifae 9:31–38.)

Faitau le 2 Nifae 9:27–38, ma vaavaai mo uiga ma amioga na lapatai mai ai Iakopo e faasaga i ai. Atonu e te mafaufau e fai se lisi o na mea a o e faitauina.

Mafaufau pe na faapefea ona faatatau amioga taitasi na lapatai mai ai Iakopo i tupulaga talavou i aso nei. Mo se faataitaiga, e ui o le toatele o talavou e le auai i le fasioti tagata, ae o le fuaiupu 35 e mafai ona fesoasoani ia te oe e manatua ai ia aloese mai mafaufauga, lagona, ma amioga saua (tagai Mataio 5:21–22, 38–42).

O se tasi auala e fesoasoani ai i tagata aoga ia iloa pe faapefea ona fesootai aoaoga a Iakopo i o latou olaga o le valaaulia lea o i latou e faailoa mai aoaoga mai le Mo Le Malosi o le Autalavou: O Se Taiala mo le Faia o Filifiliga (tamaitusi, 2022) lea e fesootai i le 2 Nifae 9 E mafai ona e fai atu i tagata aoga e suesue ma faasoa atu i le vasega nisi o fautuaga latou te maua. O faataitaiga o aoaoga e aofia ai upumoni e faavavau, valaaulia, ma faamanuiaga folafolaina i itulau 31–32 (e faatatau i fuaiupu 28–29, 34) ma aoaoga e uiga i le tulafono o le ola mamā i itulau 23–28 (e faatatau i le fuaiupu 36).

• O a nisi o faataitaiga o auala e fesootai ai aoaoga a Iakopo i tupulaga talavou i aso nei?

• E mafai faapefea e uiga ma amioga o loo lisi mai e Iakopo ona aafia ai lo tatou sootaga ma le Atua?

O se tagata e faaalia amioga ma uiga faaalia na lapatai mai ai Iakopo e faasaga i ai e mafai ona faamatalaina o se “mafaufau-faaletino” (2 Nifae 9:39).

Faitau le 2 Nifae 9:39, ma vaavaai mo mea na aoao mai e Iakopo e uiga i aafiaga o le mafaufau faaletino ma le mafaufau faaleagaga.

Ina ia fesoasoani i tagata aoga e teuloto aoaoga a Iakopo i le 2 Nifae 9:39, mafaufau e valaaulia i latou e fatu se ata tusi po o se ata e faaalia ai le fasifuaitau “o le mafaufau-faaleagaga o le ola lea e faavavau.”

• O le a se mea na e mauaina?

• O le a sou manatu i le uiga o le loto i la le agaga?

Mai lenei fuaiupu, ua tatou aoao ai o le mafaufau faaletino e taitai atu ai i le oti faaleagaga. O le mafaufau faaleagaga e taitai atu ai i le ola e faavavau.

• O a nisi o faatinoga i aso taitasi e mafai ona e faia e faatumauina ai le taulai atu faaleagaga o lou mafaufau ia Iesu Keriso?

Ina ia vaai i se faataitaiga o se tasi na liliuese mai uiga ma amioga faaletino ma sa faamanuiaina e ala ia Iesu Keriso, mafaufau e matamata i le “Lona Alofa Tunoa: E Mafai Ona Suia e ala ia Keriso” (3:29), o loo maua i le ChurchofJesusChrist.org.

• O a ni ou manatu po o ni lagona e uiga i le saunoaga a Peresitene Nelson?

O Mai i le Paia e Toatasi o Isaraelu

Valaaulia tagata aoga e mafaufau loloto le leoa pe faapefea ona faatatau mea o loo latou aoaoina ia i latou lava. E mafai ona e fai atu ni fesili e pei o fesili o loo lisi atu i le parakalafa lenei, ae aua nei faasoa maia e tagata aoga.

Toe mafaufau i amioga o le mafaufau faaletino na lisiina e Iakopo i le 2 Nifae 9:27–38. O fea o faamatalaga nei e iva e aupito sili ona anoa ia te oe? Pe o i ai ni suiga e mafai ona e faia o le a fesoasoani e te latalata atili atu ai i le Tama Faalelagi ma Iesu Keriso? Mafaufau po o a laasaga e mafai ona e faia.

A o e mafaufau i ou lava tulaga, faitau upu a Iakopo i le 2 Nifae 9:40–45. Vaavaai mo ana aoaoga, aemaise lava i latou e uiga i le Faaola, e ono fesoasoani ia te oe i lou tulaga o i ai nei.

• O a upu ma fasifuaitau na e mauaina e sili ona anoa? Aisea?

• E mafai faapefea e le manatuaina “o le silisili ese o le Paia e Toatasi o Isaraelu” (fuaiupu 40) ona fesoasoani ia te oe ia mafaufau atili ai faaleagaga?

Tuu atu i tagata aoga se taimi e mafaufau loloto ai i mea sa latou aoaoina ma lagonaina i le lesona o le asō. Valaaulia i latou e faamaumau o latou manatu ma uunaiga i a latou api faamaumau suesuega. A uma, mafaufau e valaaulia ni nai volenitia e faasoa mai nisi o mea na latou tusia pe afai e le patino tele. Molimau atu e uiga i upumoni sa outou talanoaina.

Manatu ma Talaaga o Faamatalaga

2 Nifae 9:28–29. Aisea e taua ai le faamuamua o le aoaoina faaleagaga nai lo le aoaoina faalelalolagi?

Sa aoao mai Peresitene Henry B. Eyring o le Au Peresitene Sili:

Ua manino foi o le faamuamua o le aoaoina faaleagaga o le a le tuuesea ai i tatou mai le aoaoina o mea faaletino. I se isi itu, e na te tuuina mai i lo tatou aoaoina faaletino le faamoemoe ma uunaia i tatou e galulue malosi atu i ai.

Afai o le tatou tuuina le aoaoina faaleagaga i lona tulaga talafeagai, o le a manaomia ona tatou faia o ni filifiliga faigata i le auala tatou te faaaogaina ai o tatou taimi. Ae e le tatau lava ona i ai se filifiliga e faia ma le iloa e tuu ai le faaleagaga e avea ma vaega lona lua o o tatou olaga. E le tatau lava. O le a taitai atu ai i puapuaga. Atonu e le manino le puapuaga i le taimi muamua, pe o le a manino foi i le olaga faitino. Ae ia manatua, e te naunau i aoaoga, ia le gata mo le olaga faaletino ae mo le olaga e faavavau. A e vaai manino i lena mea moni i le vaaiga faaleagaga, o le a e faamuamua le aoaoina faaleagaga ae e te le manatu faatauvaa foi i aoaoga faalelalolagi. O le mea moni, o le a e galue malosi atu i lou aoaoina faalelalolagi nai lo lou galue e aunoa ma lena vaaiga faaleagaga. (Henry B. Eyring, “Education for Real Life,” Ensign, Oke. 2002, 18)

Matamata i le “O Le Moomooga Moni o le Agaga” e aoao atili ai e uiga i le taua o le faaaofia o le Atua i au sini ma gaioiga faaleaoaoga.

2 Nifae 9:39. E mafai faapefea e le taumafai ia mafaufau faaleagaga ona fesoasoani ia te au e vaai ai i mea i se auala ese?

Sa aoao mai Peresitene Dallin H. Oaks o le Au Peresitene Sili:

A o tatou mamao ese mai mea faalelalolagi, tatou te lagona le latalata atili atu i lo tatou Tama oi le Lagi ma sili atu ona mafai ona taialaina e lona Agaga. Tatou te ta’ua lenei uiga auaumamā o le ola faaleagaga.

I e faamaoni, o le faaleagaga o se tioata lea tatou te vaai atu ai i le olaga ma se vaaiga lea tatou te iloiloina ai. …

O le mafaufau faaleagaga o le vaai lea ma iloilo o tatou aafiaga e tusa ai ma le vaaiga faateleina o le faavavau.

… E ala i tiosua faaleagaga, tatou te vaai ai i poloaiga uma a le Atua o ni valaaulia i faamanuiaga. (Dallin H. Oaks, “Spirituality,” Ensign, Nov. 1985, 61, 63)

2 Nifae 9:40. E mafai faapefea e le manatuaina “o le silisili ese o le Paia e Toatasi o Isaraelu” ona fesoasoani ia te au e faatumauina ai se uiga faaalia faaleagaga?

Na aoao mai Elder Dale G. Renlund o le Korama a Aposetolo e Toasefululua:

E finagalo lo tatou Tama Faalelagi ia i tatou ia manatuaina Lona agalelei ma le agalelei a Lona Alo Pele, e le mo le faamalieina o i La’ua lava, ae mo le faatosinaga a lena manatuaga ia i tatou. E ala i le mafaufau i lo La’ua agalelei, e faateleina ai la tatou vaaiga ma le malamalamaaga. E ala i le manatunatu i lo La’ua agaalofa, o le a atili ai ona tatou lotomaualalo, lototatalo, ma tumau. …

Ou te valaaulia outou ia manatua i aso taitasi le silisiliese o le Tama Faalelagi ma Iesu Keriso ma mea ua La’ua faia mo outou. Ia avea ou mafaufauga o lo La’ua agalelei ia fusifusia mausali ai lou loto le mautonu ia i La’ua. Mafaufau loloto i lo La’ua agaalofa, ma o le a faamanuaina oe i se nofouta faaopoopo faaleagaga ma avea atili ai faapei o Keriso. (Dale G. Renlund, “Mafaufau i le Agalelei ma le Silisiliese o le Atua,” Liahona, Me 2020, 41, 44)

Gaoioiga Faaopoopo e Aoao Ai

2 Nifae 9:27. Isi amataga

O se isi auala e amata ai le lesona, valaaulia tagata aoga e faasoa mai nisi o mea na talosagaina i latou e aua nei faamaumauina. Talanoaina penefiti o le le faama’umau. Faitau le 2 Nifae 9:27 ma valaaulia tagata aoga e faailoa mai le fautuaga a Iakopo ma talanoaina le uiga o le faamaumau “o aso [o lo tatou] vaavaaiga.” Fautuaina tagata aoga e faailoa mai i le lesona atoa ia uiga ma amioga faama’umau na lapatai mai ai Iakopo.

Fesoasoani i tagata aoga ia malamalama e tusa lava pe na latou punouai i soo se amioga na talanoaina, e lei faama’umauina o latou olaga, ma a o latou “o mai i le Alii” (2 Nifae 9:41) e mafai ona latou ola fiafia atili ma sili atu ona faamanuiaina olaga.

2 Nifae 9:28–29. “E lelei le aoaoina”

Afai e mafai ona manuia tagata aoga mai le talanoaina atili e uiga i le aoaoina ma le auala e aloese ai mailei o loo faamatalaina e Iakopo, mafaufau e fai atu fesili e pei o nei pe a uma ona faitau le 2 Nifae 9:28–29:

• E mafai faapefea e le tuuina o lou faalagolago i le poto o le lalolagi ona taitai ese ai oe mai ia Iesu Keriso?

• O le a se mea e mafai ona tatou faia e faamautinoa ai e le tupu lenei mea?

E mafai foi ona e suesue faatasi ma tagata aoga nisi o manatu o loo tuuina atu i le vaega o le “Ao’ga” o le Mo le Malosi o le Autalavou (tamaitusi, 2011), 9–10.