2 Nifae 6–10

Vaaiga Aoao

Na faasoa mai e le uso o Nifae o Iakopo valoaga e uiga i o tatou aso ma le faapotopotoina o Isaraelu lea e mafai ona fesoasoani tatou te malamalama ai i la tatou matafaioi i le galuega a le Alii i aso e gata ai. Sa ia aoao atu sa Nifae e uiga i tulaga e feagai ma tagata uma ona o le Pa’ū o Atamu ma Eva. Sa ia tautino mai e laveai i tatou e Iesu Keriso mai aafiaga o le Pa’ū, ma sa ia lapatai mai e uiga i faatinoga ma amioga ia e toso ese ai i tatou mai ia Keriso. Sa ia valaaulia lona nuu e o mai ia Keriso ma taumamafa fiafia i faamanuiaga o le talalelei.

Saunia e Aoao Atu

O lenei faamatalaga e tuuina atu ai i faiaoga ni manatu o mea atonu e manaomia ona muai saunia mo lesona taitasi.

2 Nifae 6; 10

Faamoemoega o le lesona: O lenei lesona e mafai ona fesoasoani i tamaiti aoga ia lagonaina se naunautaiga sili atu e auai faatasi ma le Alii i le faapotopotoina o Isaraelu i aso e gata ai.

• Sauniuniga a le tamaitiiti aoga: Valaaulia tamaiti aoga e o mai saunia e faasoa mai ni aafiaga na latou maua i le auai ai i le faapotopotoina o Isaraelu.

• Vitio: “Faamoemoe o Isaraelu” (1:01:34; maimoa mai le faailotaimi 39:36 i le 40:05 ma mai le faailotaimi 40:29 i le 43:38); “O Aiga o loo Faapotopotoina Aiga i Itu Uma e Lua o le Veli” (3:22)

• Ata: O se fu’a, tagavai, po o se tulaga faatonuina ua faatuina

• Fautuaga faafaiaoga i vitio: Mo le gaoioiga i lalo o le “Fai se fuafuaga e fesoasoani ai i le Alii e faapotopoto Isaraelu,” mafaufau e kopi ma faapipii ia punaoa i le vaega o talanoaga ina ia mafai ai e tamaiti aoga ona vave mauaina. E mafai foi ona fesoasoani le tuu atu i tamaiti aoga o se taimi faatapulaa e toe faamanatu ai punaoa ma se faamanatu pe a toe tasi le minute o totoe. E mafai ona fesoasoani lenei mea ia i latou e faaiu ai a latou suesuega ma maua ai se taimi e fai ai a latou fuafuaga ma faasoa atu i le vasega.

2 Nifae 9:1–26

Faamoemoega o le lesona: O lenei lesona e mafai ona fesoasoani i tamaiti aoga e lagona ai le talisapaia sili atu o le matafaioi a Iesu Keriso i le fesoasoani ia i tatou e faatoilalo le agasala ma le oti.

• Sauniuniga a le tamaitiiti aoga: Mafaufau e valaaulia tamaiti aoga e suesue le 2 Nifae 9:1–26. E mafai ona latou faailogaina i se auala se tasi le mea o le a tupu ia i tatou e aunoa ma le Togiola a Iesu Keriso, ma faailoga i se isi auala le mea e mafai ona tupu ia i tatou ona o Iesu Keriso ma Lana Togiola.

• Vitio: “Aisea Tatou Te Manaomia ai se Faaola” (2:15)

• Anotusi e faaali atu: O le siata o loo ta’u mai ai le tulaga e i ai le olaga i le i ai ma le leai foi o le Faaola

• Fautuaga faafaiaoga i vitio: Mafaufau e faaaoga le vaega o le laupapa paepae i lau polokalama faavitio. Faataga le vasega e faatumu itu taitasi o le siata a o outou suesue ma aoao faatasi.

2 Nifae 9:27–49

Faamoemoega o le lesona: E mafai ona fesoasoani lenei lesona i tamaiti aoga e aloese mai amioga e taitai atu ai i le le fiafia ma le vavaeeseina o i latou mai ia Iesu Keriso.

• Sauniuniga a le tamaitiiti aoga: Valaaulia tamaiti aoga e gauai atu po o le fea o a latou amioga i le va o le taimi nei ma le isi vasega e fesoasoani latou te lagona ai le latalata atili atu i le Atua ae o le fea latou te lagona ai le taumamao mai ia te Ia.

• Mea faitino: O se aitema, e pei o lole, e fiafia tamaiti aoga e sue mo le taaloga “vevela pe malulu” i le amataga o le lesona

• Vitio: “O Lona Alofa Tunoa: E Mafai Ona Suia e ala ia Keriso” (3:29)

• Fautuaga faafaiaoga i vitio: E avea o se isi auala i sauniuniga a tamaiti aoga, valaaulia tamaiti aoga e o mai saunia i le vasega e faasoa mai ni faataitaiga o tagata e faaleagaga o latou manatu latou te iloa. Afai e mafai, mafaufau e uunaia i latou e aumai se ata o le tagata na latou filifilia ma tuu i luga i le mea pueata a o latou faasoa mai o latou manatu.

2 Nifae 9:50–52

Faamoemoega o le lesona: O lenei lesona ua faamoemoe e fesoasoani i tamaiti aoga ia lagonaina se naunautaiga sili atu e saili faamanuiaga ma le faamalieina lea e na o Iesu Keriso lava e mafai ona maua ai.

• Sauniuniga a le tamaitiiti aoga: Valaaulia tamaiti aoga e mafaufau i filifiliga na latou faia, nofoaga ua latou o i ai, po o mea ua latou aoaoina na aumaia ai le faamalieina tumau i o latou olaga.

• Mea faitino: O ipuinu e tumu i mea e le faamalieina ai le fiainu o se tagata, e pei o le sosi, sosi o le sinapi, po o le siamu suavaia po o sukalati. (E mafai foi ona e aumaia ni nai meaai e le faamalieina ai le fiaai, e pei o le masima po o se tamai lole feū, ma se meaai lelei e pei o se fasi fualaau aina.)

• Fautuaga faafaiaoga i vitio: Faaaoga potu malolo ma valaaulia tamaiti aoga e faasoa mai i a latou vaega se mau fesootai se tasi pe sili atu na latou maua mo le 2 Nifae 9:50–52. E mafai foi e tamaiti aoga ona galulue ma a latou vaega e sue faatasi mau fefaasinoai.

Atamai i Aoaoga Faavae Iloiloga 3

Faamoemoega o le lesona: O lenei lesona ua faamoemoe e fesoasoani e faateleina ai le malamalama o tamaiti aoga ma mafai ai ona latou faataitai le faamatalaina atu o aoaoga faavae o loo aoaoina i nisi o fuaitau o le atamai i aoaoga faavae o le Tusi a Mamona.

• Sauniuniga a le tamaitiiti aoga: Valaaulia tamaiti aoga e filifili se fuaitau se tasi o le atamai i aoaoga faavae o le Tusi a Mamona e taua ia i latou ma ia saunia e faasoa mai i le vasega pe aisea e anoa ai lenei fuaitau.

• Mea faitino: Soo se sapalai atonu e manaomia e au tamaiti aoga ina ia faamaea ai le gaoioiga A, E, I, po o le O

• Fautuaga faafaiaoga i vitio: Mafaufau e fesoasoani i tamaiti aoga e mafaufau i mea faitino ma meafaigaluega mai o latou fale e mafai ona latou faaaogaina e faamaea ai le gaoioiga A, E, I, po o le O. Valaaulia tamaiti aoga e faasoa mai a latou mea faitino i le vasega.