2 Նեփի 16

«Սու՜րբ, սու՜րբ, սու՜րբ է Տերը»

Երբևէ ունեցե՞լ եք փորձառություն, որը դժվար է բառերով արտահայտել: Դա կարող է ճշմարիտ լինել Եսայիայի համար, երբ նա գրեց Տիրոջը Նրա ողջ փառքով տեսնելու մասին: Այս փորձառության մասին պատմելու համար Եսայիան օգտագործել է խորհրդանիշների լեզու՝ նկարագրելով Տիրոջ զորությունը և սրբությունը և ինչպես նաև Եսայիայի անձնական անբավարարության զգացումները: Տերը մաքրագործեց նրա մեղքերը և նրան մարգարե կոչեց: Այս դասը կօգնի ձեզ իմանալ, որ Տերը կարող է ներել և մաքրագործել ձեզ:

Օգնեք ուսանողներին հասկանալ սուրբ գրությունների դժվարըմբռնելի հատվածները: Ուսանողներին ուսուցանելով պատմական կամ մշակութային համատեքստը բառարանների, ուսանողների համար նախատեսված ձեռնարկների և սուրբ գրությունների ուսումնասիրության այլ օժանդակ միջոցներով կարող եք նպաստել հոգևոր լեզվի և խորհրդանիշների ավելի մեծ չափով ընկալմանը: Ուսանողներին խրախուսեք համբերատար լինել և Տիրոջից օգնություն խնդրել, երբ փորձում են հասկանալ Նրա խոսքը:

Ուսանողի նախապատրաստում Ուսանողներին առաջարկեք խորհել հետևյալ հարցի շուրջ. Ի՞նչ է ուզում սիրող Աստվածը, որ մենք հասկանանք, երբ համարում ենք, որ մենք բավականաչափ լավը չենք:

Հնարավոր ուսումնական վարժություններ

Հիսուս Քրիստոսի զորությունը և փառքը

Որոշ մարգարեներ և այլք ունեցել են Հիսուս Քրիստոսին և Նրա հրաշալի փառքը տեսնելու առավելությունը:

• Որո՞նք են այն մի քանի պատճառները, որ Տերն աշխարհի պատմության ընթացքում տարբեր մարդկանց է այցելել:

Կարող եք ուսանողներին առաջարկել թվարկել մի քանի օրինակներ այն ժամանակներից, երբ Տերը հայտնվել է մարդկանց: Ցուցադրեք մի քանի նկար, որոնք կարող են օգնել ուսանողներին հիշել դա: Կարող եք ուսանողներին հարցնել նաև, թե որ իրադարձությունների ժամանակ նրանք ամենից շատ կցանկանային ներկա լինել:

Կերպարանափոխություն, հեղինակ՝ Կառլ Բլոխ

Քրիստոսը Լիառատ երկրում, հեղինակ՝ Սայմոն Դյուի

Առաջին Տեսիլքը, հեղինակ՝ Վոլթեր Ռեյն

Հիսուս Քրիստոսը հայտնվում է մարգարե Ջոզեֆ Սմիթին և Օլիվեր Քաուդերիին, հեղինակ՝ Վոլթեր Ռեյն

• Ի՞նչ մտքեր կամ զգացողություններ կարող եք ունենալ Տիրոջ ներկայությամբ:

Եսայիան Տիրոջը տեսավ Նրա ողջ փառքով, երբ մարգարե կոչվեց: Նա գրառել է իր փորձառությունը, իսկ Նեփին ներառել է այն իր գրվածքներում (տես Եսայիա 6 և 2 Նեփի 16):

Չնայած դասը կազմվել է սուրբ գրությունները փոքր հատվածներով կարդալու համար, կարելի է ուսանողներին առաջարկել կարդալ նաև 2 Նեփի 16.1–8 հատվածները՝ տեսիլքի մասին միանգամից մանրամասն իմանալու համար:

Կարդացեք 2 Նեփի 16.1–4 հատվածները և փորձեք գտնել, թե Եսայիան ինչպես էր նկարագրել այն, ինչ տեսել էր: Քանի որ Եսայիան իր փորձառությունը նկարագրելու համար օգտագործել էր խորհրդանիշների լեզու, հետևյալ բացատրությունները կարող են օգտակար լինել.

Ստորև ներկայացվող տեղեկությունը կարելի է ցուցադրել կամ բացատրել դասարանին:

• Քղանցք. Տիրոջ հագուստի ստորին հատվածը, որը կարող է խորհրդանշել Նրա արդարությունը, զորությունը և մաքրությունը: Նշանակալի է այն, որ Եսայիան տեսավ, որ այն «լցրել էր տաճարը» (2 Նեփի 16.1):

• Սերովբեներ. հրեշտակներ, որոնք սպասավորում են Աստծո ներկայության մեջ (տես Աստվածաշնչի բառարան, «Սերովբեներ»): Սերովբեների թևերը խորհրդանշում են շարժվելու կամ գործելու իրենց զորությունը (տես Վարդապետություն և Ուխտեր 77.4):

• Ծուխ կամ ամպ. հաճախ խորհրդանշում է Աստծո ներկայությունը (տես Ելից 19.18, Հայտնություն 15.8):

• Այս հատվածներից ո՞ր բառերը կամ արտահայտություններն են օգնում ձեզ հասկանալ Տիրոջ փառքը:

• Ըստ ձեզ՝ ինչպե՞ս կարձագանքեիք, եթե տեսնեիք սա:

Կարդացեք 2 Նեփի 16.5 հատվածը և գտեք Եսայիայի արձագանքը, երբ նա տեսավ Տիրոջը:

Խնդրեք ուսանողներին կիսվել իրենց գտածով: Եթե օգտակար կլինի, կարող եք տալ ստորև ներկայացված հարցերը.

• Ո՞ր բառերը կամ արտահայտություններն են օգնում ձեզ հասկանալ, որ Եսայիան գիտեր իր մեղքերի ու թուլությունների մասին:

• Այսօր մարդիկ ի՞նչ պատճառներով կարող են իրենց անմաքուր կամ անարժան զգալ Աստծո առաջ:

  Առարկայական դասը կօգնի ուսանողներին մտածել, թե ինչպես կարող ենք տեսնել մեզ, երբ գանք դեպի Աստված: Կարող եք մի վառ սպիտակ կտոր վերցնել ու համեմատել այն ժամանակի ընթացքում դեղնած կամ նույնիսկ ավելի ակնհայտ կեղտոտ մի կտորի հետ: Կարող եք համեմատել նաև աղոտ լույսը շատ պայծառ լույսի հետ: Ուսանողներին օգնեք հասկանալ, որ հակադրությունն ակներև է դառնում, երբ երկու առարկաները մոտեցվում են, և մեկն ակնհայտ ավելի մաքուր կամ պայծառ է, քան մյուսը:

• Ինչպե՞ս կարող ենք ավելի լավ ճանաչել մեր սխալները, երբ ավելի շատ մոտենանք Տիրոջը:

Տերը պատրաստ է մաքրագործել մեր մեղքերը

Կարդացեք 2 Նեփի 16.6–7 հատվածը և փնտրեք, թե հետո ինչ պատահեց Եսայիային: Օգտակար կլինի հիշել, որ հին ժամանակներում տաճարներում երկրպագության համար օգտագործում էին զոհասեղաններ:

• Ինչպե՞ս կամփոփեք տեղի ունեցածը:

• Ըստ ձեզ, դա ի՞նչ կարող էր խորհրդանշել:

Մտածեք զոհասեղանի մոտ Եսայիայի փորձառության և այն մասին, թե դա ինչպես կարող է ուսուցանել մեղքերի ներման և Հիսուս Քրիստոսի Քավության միջոցով մաքրագործվելու մասին:

• Ըստ ձեզ, Եսայիայի վրա ի՞նչ ազդեցություն ունեցավ այն, որ Տերը մաքրագործեց նրա մեղքերը:

• Այս հատվածներն ի՞նչ ճշմարտություններ են օգնում ձեզ հասկանալ Տիրոջ մասին:

Ճշմարտություններից մեկը, որ կարող ենք սովորել, այն է, որ Տերն ունի մեզ մաքրագործելու զորություն:

Երբեմն մենք գուցե չհիշենք և չզգանք այս ճշմարտության կարևորությունը: Երիտասարդ տղամարդկանց գերագույն նախագահությունից եղբայր Բրեդլի Ռ. Վիլկոքսը կիսվել է մի երիտասարդ տղայի խոսքերով, որին նա Դեյմոն էր կոչում: Այս երիտասարդ տղան կիսվել է իր մեղքերի մասին ունեցած իր մտքերով ու զգացողություններով:

Դեյմոնը գրել է. … «Ես միշտ այնքան էի ամաչում, որ չէի կարողանում հաղթել այդ պայքարում: … Ես որոշեցի, որ պարզապես արժանի եմ ինձ անընդհատ վատ զգալու: Ես մտածեցի, որ Աստված հավանաբար ատում է ինձ, քանի որ ես պատրաստ չէի ավելի շատ ջանք գործադրել և մեկընդմիշտ հաղթահարել այդ սովորությունը: Ես մեկ շաբաթ, իսկ երբեմն նույնիսկ մեկ ամիս չէի դիտում, բայց հետո նորից սայթաքում էի ու մտածում. «Ես երբեք բավականաչափ լավը չեմ լինի, այնպես որ ջանք գործադրելը օգուտ չունի»: (Բրեդլի Ռ. Վիլկոքս, «Արժանավորությունը չի ենթադրում անթերիություն», Լիահոնա, նոյեմբեր 2021թ., 62):

• Դեյմոնի նման երիտասարդ տղան ինչո՞ւ կարող է այսպիսի մտքեր ունենալ:

Պատկերացրեք, որ հնարավորություն ունեք օգնելու Դեյմոնի նման մեկին: Մտածեք Եսայիայի փորձառության մասին: Նաև մտածեք, թե դուք անձամբ ինչ գիտեք Փրկչի մասին, որով կարող եք կիսվել: Գրի առեք այն, ինչը կարող է օգնել: Կարող եք փնտրել նաև բոլոր այն սուրբ գրությունները կամ Եկեղեցու առաջնորդների հայտարարությունները, որոնք կարող եք օգտագործել ձեր բացատրության մեջ: Հետևյալ օրինակները կարող են օգտակար լինել.

• Եսայիա 1.18

• Մոսիա 26.30

• Եթեր 12.27

Տասներկու Առաքյալների Քվորումից երեց Դիտեր Ֆ. Ուխդորֆն ուսուցանել է.

Աստծուն պետք չեն մարդիկ, որոնք անթերի են: Նա փնտրում է մարդկանց, որոնք իրենց «սիրտն ու պատրաստակամ միտքը» կմատուցեն [Վարդապետություն և ուխտեր 64.34], և որոնց Նա կդարձնի «կատարյալ Քրիստոսում» [Մորոնի 10.32–33] (Դիտեր Ֆ․ Ուխդորֆ, «Հինգ ուղերձ, որ Աստծո բոլոր զավակները պետք է լսեն» [Բրիգամ Յանգի համալսարանի հավաք, օգոստոսի 17, 2021թ.], 3, speeches.byu.edu):

Նոր տեսանկյուն

Կարդացեք 2 Նեփի 16.8 հատվածը՝ տեսնելու, թե ինչ արեց Եսայիան Տիրոջ կողմից մաքրագործվելուց հետո:

• Ըստ ձեզ՝ Եսայիայի մաքրագործման փորձառությունն ինչպես կարող էր ազդել հատված 8-ում ներկայացված նրա պատասխանի վրա:

Այս տեսիլքից հետո Եսայիան պատրաստակամորեն ծառայեց Աստծուն: Հաջորդ մի քանի տասնամյակների ընթացքում նա օգնեց առաջնորդել Հուդայի ժողովրդին: Եսայիայի ուսմունքները և գրվածքները անթիվ մարդկանց են ոգեշնչել, և Փրկիչը նրան մյուս մարգարեներից ավելի հաճախ է մեջբերել:

Դեյմոնը նույնպես փոխվեց: Եկեղեցու ղեկավարի օգնությամբ Դեյմոնը հասկացավ, որ Տերը վերևից չէր նայում իրեն զայրացած դատողությամբ, այլ ողորմությամբ՝ ցանկանալով օգնել իրեն կատարելագործվել: Կարդացեք Դեյմոնի խոսքերը, որտեղ նա պատմում է Աստծո վերաբերյալ իր նոր տեսանկյան մասին.

Դեյմոնն ասել է. … «Այժմ ես շատ ավելի քիչ ժամանակ եմ ծախսում, որ իմ արարքի համար ինքս ինձ ատեմ և ավելի շատ ժամանակ եմ ծախսում, որ Հիսուսին սիրեմ այն բանի համար, ինչ Նա արել է» (Բրեդլի Ռ. Վիլկոքս, «Արժանավորությունը չի ենթադրում անթերիություն», Լիահոնա, նոյեմբեր 2021թ., 62):

• Փրկչի Քավությունը, սերը և ներումը զգալը ի՞նչ ազդեցություն է ունեցել ձեր կյանքում:

Այս գլխի ուսումնասիրությունն ավարտելիս մտածեք հետևյալ հարցի շուրջ.

• Ըստ ձեզ՝ ի՞նչ կարող էիք անել, որ ավելի խորությամբ զգայիք Տիրոջ սերը և ներումը ձեր կյանքում:

Բացատրական և պատմական տեղեկություններ

2 Նեփի 16.1: Ո՞ւմ տեսավ Եսայիան:

Թե՛ Հովհաննեսը, թե՛ Նեփին վկայել են, որ Տերը, ում տեսավ Եսայիան, նախամահկանացու Հիսուս Քրիստոսն էր (տես Հովհաննես 12.41, 2 Նեփի 11.2–3): Բացի այդ, այլ մարգարեներ ևս վկայել են նույն պատմության մասին (տես Հայտնություն 4.1–11, Վարդապետություն և Ուխտեր 110.1–5):

2 Նեփի 16.5–8 Հրեշտակն ինչո՞ւ տաք ածուխ դրեց Եսայիայի շուրթերին:

Երբ Եսայիան ասել է «Վա՜յ ինձ, քանզի ես կործանված եմ» (2 Նեփի 16.5), արտահայտել է այն, որ իրեն անարժան է համարում Տիրոջ ներկայության մեջ գտնվելու համար: Ածուխը, որը սերովբեն դրեց Եսայիայի շուրթերին, Հիսուս Քրիստոսի միջոցով մաքրված, մաքրագործված և ներված լինելու խորհրդանիշն էր: Երբ Տերը կանչեց Ջոզեֆ Սմիթին, նրան նույնպես ասվեց, որ իր մեղքերը ներված են (տես Վարդապետություն և Ուխտեր 20.2, 5–6, տես նաև «Պատմություն, մոտավորապես 1832 թվականի ամառ», Առաջին տեսիլքը [2020], ChurchofJesusChrist.org):

2 Նեփի 16.9–10 Ի՞նչ գիտենք այն ժողովրդի մասին, որոնց քարոզելու համար էր կանչվել Եսայիան:

Տերը Եսայիային ասաց, որ մարդիկ հիմնականում կմերժեն նրա խոսքերը: Նրանք պնդեցին, թե լսել և տեսնել են, բայց նախընտրեցին չընդունել ուղերձի ոգին: Եսայիան քարոզեց Տիրոջ ուղերձը՝ պահանջելով նրանցից պատասխանատու լինել այն բանի համար, ինչն իմացան, բայց չընդունեցին:

Ինչպե՞ս կարող եմ խուսափել հուսահատությունից, երբ հասկանամ իմ թուլությունը:

Երիտասարդ կանանց գերագույն նախագահությունից Քույր Միշել Դ. Քրեյգն ասել է.

Մենք պետք է ողջունենք սուրբ դժգոհության զգացումները, որոնք մեզ կանչում են դեպի ավելի բարձր ուղի՝ միևնույն ժամանակ ճանաչելով և խուսափելով սատանայի կեղծիքից, որն է կաթվածահար անող հուսահատությունը: … Մենք կարող ենք ընտրել ավելի բարձր արահետը, որը տանում է մեզ փնտրելու Աստծուն, Նրա խաղաղությունն ու շնորհը, կամ կարող ենք լսել սատանային, որը ռմբակոծում է մեզ ուղերձներով այն մասին, որ մենք երբեք չենք լինի բավականաչափ լավը: … Մեր դժգոհությունը կարող է լինել կա՛մ սուրբ, կա՛մ կործանող (Միշել Դ. Քրեյգ, «Սուրբ դժգոհություն», Լիահոնա, նոյեմբեր, 2018, 53):

Օժանդակ ուսումնական վարժություններ

2 Նեփի 16.3 Ամբողջ երկիրը լցված է Տիրոջ փառքով

Որպեսզի օգնեք ուսանողներին քննարկել Հիսուս Քրիստոսի փառքը, կարող եք խոսել Նրա մասին՝ որպես այս գեղեցիկ երկրի Արարչի: Ուսանողները կարող են կիսվել, թե որ արվեստագետների գործերով են հիանում և ցույց տալ նրանց արվեստի գործերից մի քանիսը: Տասներկու Առաքյալների Քվորումից նախագահ Մ․ Ռասսել Բալլարդի ստորև ներկայացվող հայտարարությունը կարելի է օգտագործել՝ խոսելով այն մասին, թե ուսանողներն Աստծո արարումներից որն են հավանում:

«Երբեմն մենք մեծ հարգանք և ակնածանք ենք տածում ստեղծարար հանճարի նկատմամբ, որն արտահայտվում է արվեստի մեծ գործով կամ երաժշտության մեջ: Որքա՞ն մեծ պետք է լինի ակնածանքը մեր Աստվածային Արարչի զորության և վեհության հանդեպ» (Մ. Ռասսել Բալլարդ, «Աստծո ձեռքի աշխատանքը», Նոր դարաշրջան, մարտ, 2006թ., 5, տես նաև Մ. Ռասսել Բալլարդ, «Աստծո սերը դեպի Իր զավակները», Ensign, մայիս, 1988թ., 58):

2 Նեփի 168 Երբ մենք մաքրագործվում ենք Տիրոջ կողմից, մենք Նրան ծառայելու ցանկություն ենք զգում

2 Նեփի 16.8 հատվածը կարդալուց հետո կարող եք հարցնել. «Ինչո՞ւ եք կարծում, որ մեր պատրաստակամությունը՝ անելու այն, ինչ Աստված խնդրում է, մեծանում է, երբ մենք ներված ենք մեր մեղքերից»: Ուսանողներին առաջարկեք 1-10 սանդղակով գնահատել իրենց պատրաստկամությունը՝ անելու այն, ինչ Աստված է խնդրում է նրանցից (10-ը նշանակում է շատ պատրաստակամ, իսկ 1-ը՝ ընդհանրապես ոչ պատրաստկամ): Այնուհետև խնդրեք նրանց խորհել, թե որևէ մեղք, վախ կամ այլ պատճառ ինչպես կարող է խանգարել նրանց ավելի պատրաստակամ լինել անելու այն, ինչ Աստված խնդրում է իրենցից: