« នីហ្វៃទី២ ២១–២៤ ៖ សហស្សវត្សរ៍ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« នីហ្វៃទី២ ២១–២៤ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
នីហ្វៃទី២ ២១–២៤
សហស្សវត្សរ៍
សូមស្រមៃមើលថាតើជីវិតនឹងទៅជាយ៉ាងណា ប្រសិនបើពិភពលោកគ្មានអំពើអាក្រក់ ។ ថ្ងៃណាមួយពិភពលោកនឹងទៅជាបែបនេះ ។ វានឹងកើតឡើងក្នុងអំឡុងការសោយរាជ្យនាពេលសហស្សវត្សរ៍របស់ព្រះយេស៊ូវគ្រីស្ទ ។ ព្យាការីជាច្រើនរូប រួមទាំងនីហ្វៃ និងអេសាយ បានព្យាករណ៍អំពីភាពសុខសាន្តរយៈពេល ១០០០ ឆ្នាំដែលហៅថាសហស្សវត្សរ៍ ។ មេរៀននេះអាចជួយអ្នកឲ្យយល់ និងរៀបចំសម្រាប់ការសោយរាជ្យមួយពាន់ឆ្នាំរបស់ព្រះអង្គសង្គ្រោះ ។
ការផ្តោតទៅលើព្រះវរបិតាសួគ៌ និងព្រះយេស៊ូវគ្រីស្ទ ។ នៅពេលសម្រេចចិត្តថាសេចក្ដីពិត ឬគោលការណ៍អ្វីខ្លះដើម្បីជួយសិស្សឲ្យរកឃើញ សូមរកមើលអ្វីដែលនឹងជួយពួកគេឲ្យមករកព្រះយេស៊ូវគ្រីស្ទ ។ ព្រះវិញ្ញាណបរិសុទ្ធអាចជួយអ្នក និងសិស្សឲ្យស្គាល់សេចក្តីពិតអំពីព្រះអង្គសង្គ្រោះ និងអំណាចនៃការប្រោសលោះរបស់ទ្រង់នៅក្នុងគោលការណ៍ ព្រះបញ្ញត្តិ និងការបង្រៀនតាមការព្យាករណ៍នីមួយៗ ។
ការរៀបចំសិស្ស ៖ សូមអញ្ជើញសិស្សឲ្យសញ្ជឹងគិតអំពីអ្វីដែលពួកគេដឹងអំពីសហស្សវត្សរ៍ ហើយមកដោយរៀបចំខ្លួនដើម្បីសួរសំណួរដែលពួកគេអាចមានអំពីវា ។
សកម្មភាពរៀនសូត្រដែលអាចមាន
អនាគត
សិស្សអាចសរសេរចម្លើយរបស់ពួកគេចំពោះសំណួរខាងក្រោមនៅលើក្ដារខៀន ឬពិភាក្សាវាជាក្រុមតូចៗ ។
-
តើព្រឹត្តិការណ៍សំខាន់ៗអ្វីខ្លះនាពេលអនាគតដែលអ្នកទន្ទឹងរង់ចាំ ? ហេតុអ្វី ?
-
តើអ្នកមានអារម្មណ៍យ៉ាងណាពេលអ្នកគិតអំពីព្រឹត្តិការណ៍ទាំងនេះ ?
-
តើអ្នកកំពុងធ្វើអ្វីដើម្បីរៀបចំ ?
សហស្សវត្សរ៍
ព្រឹត្តិការណ៍ដ៏សំខាន់មួយនាពេលអនាគតគឺសហស្សវត្សរ៍ ។
សូមស្តាប់ដោយយកចិត្តទុកដាក់ពីរបៀបដែលសិស្សឆ្លើយតបទៅនឹងសំណួរខាងក្រោម ។ សូមពិចារណាធ្វើបញ្ជីអំពីសំណួររបស់សិស្សនៅលើក្ដារខៀន ។ ជំនួសឲ្យការឆ្លើយសំណួរទាំងនោះដោយផ្ទាល់ សូមលើកទឹកចិត្តសិស្សឲ្យស្វែងរកចម្លើយនៅពេលពួកគេសិក្សា ។
សូមសម្របមេរៀនតាមចម្លើយដែលពួកគេផ្តល់ឲ្យ ។ ឧទាហរណ៍ ៖ ប្រសិនបើសិស្សជាច្រើនមានសំណួរដូចគ្នា អ្នកអាចស្វែងរកចម្លើយជាមួយថ្នាក់ទាំងមូល ។ សិស្សដែលមានសំណួរស្រដៀងគ្នាអាចត្រូវបានដាក់ជាក្រុមដើម្បីស្វែងរកចម្លើយរួមគ្នា ។
-
តើអ្នកដឹងអ្វីខ្លះអំពីសហស្សវត្សរ៍ ? តើអ្នកមានសំណួរអ្វីខ្លះអំពីវា ?
ព្យាការីនីហ្វៃបានសរសេរអំពីថ្ងៃចុងក្រោយ ហើយរួមបញ្ចូលការព្យាករណ៍ជាច្រើនរបស់អេសាយអំពីថ្ងៃចុងក្រោយ ។ អេសាយបានព្យាករណ៍ពីការបំផ្លិចបំផ្លាញនៃស្រុកអាសសើរ និងបាប៊ីឡូន ថាជាប្រភេទនៃការបំផ្លិចបំផ្លាញនៅការយាងមកជាលើកទីពីរ ( សូមមើល នីហ្វៃទី២ ២០; ២៣ ) ។ លោកក៏បានព្យាករណ៍អំពីការស្ដារឡើងវិញនៃដំណឹងល្អមុនការសោយរាជ្យនាពេលសហស្សវត្សរ៍របស់ព្រះយេស៊ូវគ្រីស្ទផងដែរ ។ ការព្យាករណ៍របស់លោកពោរពេញទៅដោយនិមិត្តរូប និងការប្រៀបធៀបយ៉ាងប៉ិនប្រសប់ដែលបន្ថែមភាពស៊ីជម្រៅដល់ការយល់ដឹងរបស់យើងអំពីសហស្សវត្សរ៍ ។
សូមអានការព្យាករណ៍ខាងក្រោមពីនីហ្វៃ និងអេសាយ ហើយរកមើលការពិពណ៌នាអំពីសហស្សវត្សរ៍ ។
សូមពិចារណាដាក់ក្រដាសជាមួយនឹងសេចក្ដីយោងបទគម្ពីរខាងក្រោមជុំវិញបន្ទប់ ហើយអញ្ជើញសិស្សឲ្យដើរចុះឡើង ហើយអានវគ្គបទគម្ពីរផ្សេងៗ ។ ជម្រើសមួយទៀតគឺត្រូវឲ្យសិស្សគូរក្នុងសៀវភៅកំណត់ហេតុការសិក្សា ឬនៅលើក្ដារខៀននូវការពិពណ៌នាមួយចំនួននៅក្នុងខគម្ពីរទាំងនេះ ។
ប្រសិនបើចាំបាច់ សូមជួយសិស្សឲ្យយល់បទគម្ពីរទាំងនោះ ។ ឧទាហរណ៍ ៖ អ្នកអាចចង្អុលបង្ហាញថា សត្វដែលរស់នៅជាមួយគ្នាដោយគ្មានការឈ្លោះគ្នា តំណាងឲ្យលក្ខខណ្ឌនៃភាពសុខសាន្ត ( សូមមើល នីហ្វៃទី២ ២១:៦–៧ ) ឬថា ទឹកដែលគ្របដណ្ដប់លើសមុទ្រ តំណាងឲ្យការស្គាល់ព្រះអម្ចាស់ដែលគ្របដណ្ដប់លើផែនដី ( សូមមើល នីហ្វៃទី២ ២១:៩ ) ។
-
ចេញពីការពិពណ៌នាទាំងនេះ តើអ្នកគិតថាជីវិតរបស់អ្នកនឹងខុសគ្នាយ៉ាងណានៅក្នុងសហស្សវត្សរ៍ ?
-
តើមានការពិពណ៌នាអ្វីខ្លះអំពីព្រះអង្គសង្គ្រោះដែលអ្នកបានរកឃើញ ? តើការពិពណ៌នាទាំងនេះបង្រៀនអ្នកអ្វីខ្លះអំពីទ្រង់ ?
សេចក្តីពិតមួយដែលយើងរៀនពីព្រះគម្ពីរទាំងនេះគឺថា ព្រះយេស៊ូវគ្រីស្ទនឹងសោយរាជ្យនៅលើផែនដីដោយសេចក្ដីសុចរិត និងភាពសុខសាន្តក្នុងអំឡុងសហសវត្សរ៍ ។
សូមស្រមៃមើលនៅក្នុងចិត្តរបស់អ្នកថា តើវាទៅជាយ៉ាងណាក្នុងការរស់នៅកំឡុងសហស្សវត្សរ៍—នៅពេលព្រះអង្គសង្គ្រោះសោយរាជ្យក្នុងភាពសុចរិត និងភាពសុខសាន្ត ។ សូមសញ្ជឹងគិតអំពីរបៀបដែលភាពសុខសាន្តរបស់ព្រះអង្គសង្គ្រោះអាចប្រទានពរដល់ជីវិតរបស់អ្នក ។
ប្រធាន ដាលីន អេក អូក ក្នុងគណៈប្រធានទីមួយបានពិពណ៌នាអំពីពរជ័យមួយទៀតនៃសហស្សវត្សរ៍ ៖
ភាពនៅលីវ ភាពគ្មានកូន សេចក្ដីស្លាប់ និងការលែងលះគ្នារារាំងដល់គំនិតនានា ហើយពន្យារពេលនៃការបំពេញពរជ័យដែលបានសន្យា ។ … ព្រះអម្ចាស់បានសន្យាថា នៅឯភាពអស់កល្បជានិច្ច នឹងគ្មានពរជ័យណាមួយត្រូវបានបដិសេធចំពោះបុត្រាបុត្រីរបស់ទ្រង់ដែលបានគោរពតាមបទបញ្ញត្តិ ដែលស្មោះត្រង់ចំពោះសេចក្ដីសញ្ញារបស់ពួកគេ និងចង់បានអ្វីដែលត្រឹមត្រូវឡើយ ។
ការខ្វះខាតដ៏សំខាន់បំផុតជាច្រើននៃជីវិតរមែងស្លាប់ នឹងត្រូវបានកំណត់ត្រឹមត្រូវនៅក្នុងសហស្សវត្សរ៍ ដែលជាពេលវេលាសម្រាប់ការបំពេញនូវអ្វីដែលមិនពេញលេញ នៅក្នុងផែនការនៃសុភមង្គលដ៏អស្ចារ្យសម្រាប់បុត្រាបុត្រីទាំងអស់របស់ព្រះវរបិតាយើងដែលស័ក្តិសម ។ យើងដឹងថាការណ៍នោះនឹងក្លាយជាការពិតចំពោះពិធីបរិសុទ្ធនៃព្រះវិហារបរិសុទ្ធ ។ ខ្ញុំជឿថា វាក៏នឹងក្លាយជាការពិតចំពោះទំនាក់ទំនងគ្រួសារ និងបទពិសោធន៍នានាផងដែរ ។ ( ប្រធាន ដាល្លិន អេក អូក « The Great Plan of Happiness » Ensign ខែ វិច្ឆិកា ឆ្នាំ ១៩៩៣ ទំព័រ ៧៥ )
-
តើសេចក្តីថ្លែងការណ៍នេះបង្រៀនអ្នកអ្វីខ្លះអំពីព្រះវរបិតាសួគ៌ និងព្រះយេស៊ូវគ្រីស្ទ ?
-
តើពរជ័យមួយណានៃសហស្សវត្សរ៍ដែលអ្នកប្រាថ្នាចង់បានបំផុត ? ហេតុអ្វី ?
-
ក្នុងអំឡុងពេលមេរៀន តើអ្នកបានរកឃើញចម្លើយអ្វីខ្លះចំពោះសំណួររបស់អ្នកអំពីសហស្សវត្សរ៍ ?
ប្រសិនបើសិស្សនៅតែស្វែងរកចម្លើយចំពោះសំណួររបស់ពួកគេ សូមណែនាំពួកគេទៅកន្លែងដែលពួកគេអាចស្វែងរកចម្លើយបាន ។ វគ្គបទគម្ពីរមួយចំនួនខាងក្រោមអាចជួយបាន ៖ គោលលទ្ធិ និង សេចក្តីសញ្ញា ២៩:១១; ៨៨:១១០; ១០១:២៦–៣៤; មាត្រានៃសេចក្តីជំនឿ ១:១០ ។ សូមមើលផងដែរ « សហស្សវត្សរ៍ » នៅក្នុង សេចក្ដីណែនាំដល់បទគម្ពីរទាំងឡាយ ឬ ប្រធានបទនៃដំណឹងល្អ ។
ការរៀបចំសម្រាប់សហស្សវត្សរ៍
នៅឆ្នាំ ២០២០ ការជួសជុលកែលម្អបានចាប់ផ្តើមធ្វើឡើងនៅព្រះវិហារបរិសុទ្ធ សលត៍ លេក ។ អែលឌើរ ហ្គែរី អ៊ី ស្ទីវ៉ែនសុន ក្នុងកូរ៉ុមនៃពួកសាវកដប់ពីរនាក់បានថ្លែងអំពីការជួសជុលកែលម្អទាំងនេះ ។ សូមរកមើលពីរបៀបដែលលោកបានប្រៀបធៀបការជួលជុលទាំងនេះទៅនឹងជីវិតរបស់យើងផ្ទាល់ ។ សូមមើលវីដេអូ « A Good Foundation against the Time to Come » អាចរកបាននៅ ChurchofJesusChrist.orgចាប់ពីនាទីទី ១៤:៥១ ដល់នាទីទី ១៥:២៦ ឬអានសេចក្តីថ្លែងការណ៍ខាងក្រោម ។
វាគឺជាសេចក្តីសង្ឃឹមដ៏ស្មោះសររបស់ថ្នាក់ដឹកនាំសាសនាចក្រថា ការជួសជុលថ្មីដ៏សំខាន់ចំពោះព្រះវិហារបរិសុទ្ធ សលត៍ លេក នឹងចូលរួមចំណែកក្នុងការបំពេញតាមបំណងប្រាថ្នារបស់ ព្រិកហាំ យ៉ង់ ដែលចង់មើលឃើញ « ព្រះវិហារបរិសុទ្ធបានសង់ឡើង ដែលវាអាចគង់វង្សនៅរាប់ពាន់ឆ្នាំ » ។ នាពេលអនាគត សូមយើងអនុញ្ញាតឲ្យ ការកែលម្អទាំងនេះដែលយើងបានធ្វើចំពោះព្រះវិហារបរិសុទ្ធ សលត៍ លេក នឹងលើកទឹកចិត្ត ហើយបំផុសគំនិតយើង ជាបុគ្គលម្នាក់ៗ និងក្រុមគ្រួសារ ថាយើង—ជានិមិត្តរូប—នឹង « ត្រូវបានសង់ឡើងតាមរបៀបដែលអាចគង់វង្សនៅរាប់ពាន់ឆ្នាំ » ។ ( ហ្គែរី អ៊ី ស្ទីវ៉ែនសុន « A Good Foundation against the Time to Come » Liahona ខែ ឧសភា ឆ្នាំ ២០២០ ទំព័រ ៥១–៥២ )
-
តើអ្នកគិតថាវាមានន័យយ៉ាងណាក្នុងការ « ត្រូវបានសង់ឡើងតាមរបៀបដែលអាចគង់វង្សនៅរាប់ពាន់ឆ្នាំ » ?
សូមពិចារណាត្រឡប់ទៅមើលព្រឹត្តិការណ៍អនាគតដែលសិស្សកំពុងទន្ទឹងរង់ចាំ និងពិភាក្សាអំពីអ្វីដែលពួកគេកំពុងធ្វើដើម្បីរៀបចំសម្រាប់ពួកគេ ។ បន្ទាប់មក សូមពិភាក្សាអំពីវិធីរៀបចំសម្រាប់សហស្សវត្សរ៍ ។
សិស្សអាចទទួលបានប្រយោជន៍ពីការឆ្លើយសំណួរដូចខាងក្រោមនៅក្នុងសៀវភៅកំណត់ហេតុការសិក្សារបស់ពួកគេ ។
-
ពេលអ្នកគិតអំពីការសោយរាជ្យនាពេលសហស្សវត្សរ៍របស់ព្រះអង្គសង្គ្រោះ តើអ្នកមានអារម្មណ៍យ៉ាងណា ?
-
តើអ្នកអាចធ្វើអ្វីបានឥឡូវនេះ ដើម្បីរៀបចំខ្លួនសម្រាប់សហស្សវត្សរ៍ ?
-
តើអ្នកអាចប្រឈមមុខនឹងបញ្ហាអ្វីខ្លះនៅពេលអ្នកធ្វើការរៀបចំទាំងនេះ ?