Atamai i Aoaoga Faavae: 2 Nifae 28: 30

“O Lea Fuaitau i Luga o Lea Fuaitau, ma Lea Mataupu i Luga o Lea Mataupu”

I se lesona talu ai o le “2 Nifae 28:27–32,” sa e suesueina ai le 2 Nifae 28:30 ma aoaoina ai e faaali mai e le Atua upumoni i lea fuaitau i luga o lea fuaitau ia i latou o e naunau e mauaina. O lenei lesona e mafai ona fesoasoani ia te oe e tauloto mau faasino ma le fasifuaitau autu o le mau mo le 2 Nifae 28:30, faamatala le aoaoga faavae o loo aoao mai i lenei fuaitau, ma faaaoga mataupu faavae o le mauaina o le malamalama faaleagaga i tulaga moni o le soifuaga.

Fesoasoani i tagata aoga ia malamalama lelei i fuaitau o le atamai i aoaoga faavae. Ia mautinoa ua iloa e tagata aoga ia punaoa e mafai ona fesoasoani ia i latou e malamalama lelei ai i fuaitau o mau o le atamai i aoaoga faavae. O nei punaoa e aofia ai le polokalama feaveai o le Atamai i Aoaoga Faavae ma le Pepa Autu o le Atamai i Aoaoga Faavae (2022), lea o loo i ai se lisi o mau o le atamai i aoaoga faavae ma fasifuaitau autu o mau.

Sauniuniga a le tagata aoga: Mafaufau e valaaulia tagata aoga e tauloto le mau faasino ma le fasifuaitau autu o le mau “2 Nifae 28:30: O le a ‘tuu atu [e le Atua] i le fanauga a tagata lea fuaitau i luga o lea fuaitau, ma lea mataupu i luga o lea mataupu.’”

Gaoioiga e Ono Mafai Ona Aoao Ai

O lenei lesona o le fuaitau o le atamai i aoaoga faavae ua mamanuina e aoao atu pe a maea le lesona o le “2 Nifae 28:27–32,” o le lesona faatatau mo le fuaitau o le atamai i aoaoga faavae o le 2 Nifae 28:30. Afai e manaomia le tuu o le lesona lenei o le atamai i aoaoga faavae i se isi vaiaso, ia mautinoa e aoao atu ai foi le lesona faatatau e o faatasi ma le lesona o le vaiaso foi lena.

Tauloto ma faamatala

Faaaoga gaoioiga nei po o se isi metotia aoga e fesoasoani ai i tagata aoga e tauloto le mau faasino ma le fasifuaitau autu o le mau mo le 2 Nifae 28:30 ma faamalamalama upumoni o loo maua i lenei fuaitau.

I luga o le laupapa, tusi ai ni laina faalalava se fa e foliga o ni faasitepu.

Valaaulia ni tagata aoga se toafa ia taitoatasi ma tusi se vaega o le fasifuaitau o le mau i luga o le laupapa e pei ona vaaia i lalo. Fesoasoani i tagata aoga ia malamalama o faasitepu e mafai ona faamanatu mai ai ia i tatou le auala o loo aoao mai ai i tatou e le Atua i “lea fuaitau i luga o lea fuaitau.”

Valaaulia tagata aoga e toe fai le mau faasino ma le fasifuaitau autu o le mau faatasi ma se paga seia mafai ona latou taulotoina mai le mafaufau. A o faataitai e tagata aoga, mafaufau e tapeese fasifuaitau mai le laupapa e fesoasoani ai ia i latou e tauloto.

I se lesona talu ai, “2 Nifae 28:27–32,” na e aoaoina ai e faaali mai e le Atua le upumoni i lea fuaitau i luga o lea fuaitau ia i latou o e o le a mauaina. Ina ia fesoasoani ia te oe e saunia e faamalamalama lenei upumoni, mafaufau loloto i fesili nei ona faamaea lea o le gaoioiga tusitusi lenei:

• O le a sou manatu i le uiga o le “fuaitau i luga o lea fuaitau”?

• O le a sou manatu e faapefea e le mauaina o le upumoni ua uma ona tuuina mai e le Atua ia i tatou ona saunia ai i tatou ia maua atili?

Filifili se tasi o nei tulaga lea e ono manaomia ai e se tasi le fesoasoani mai le Atua:

1. Manaomia o se fautuaga e uiga i se luitau o loo latou feagai.

2. O le manao e atiina ae se sootaga malosi atu ma le Faaola.

3. O le manao ia malamalama i lo latou faamanuiaga faapeteriaka.

Tusi se faamalamalamaga puupuu e uiga i mea ua e aoaoina mai i le 2 Nifae 28:30 lea e mafai ona fesoasoani i le tulaga na e filifilia.

Valaaulia tagata aoga e galulue i ni paga pe i ni vaega toalaiti e talanoaina a latou faamalamalamaga i tulaga na latou filifilia.

Faasolosolo i le vasega ma tuuina atu le fesoasoani pe a manaomia. A uma lenei gaoioiga, valaaulia ni nai tagata aoga e faasoa mai i le vasega a latou faamalamalamaga.

Faataitai le faaaogaina

Fesoasoani i tagata aoga e toe faamanatu mataupu faavae o le mauaina o le malamalama faaleagaga. E mafai ona e faamanatu atu ia i latou le mataupu faavae muamua (faatino i le faatuatua) ma fai atu i nisi o tagata aoga e faasoa mai upu po o fasifuaitau o loo faamatala ai mea ua tatou aoaoina mai lena mataupu faavae. Toe fai le mea lenei i isi mataupu faavae e lua. A manaomia, toe faamanatu nei mataupu faavae i le parakalafa 5–12 o le “Mauaina o le Malamalama Faaleagaga” i le vaega o le Pepa Autu o le Atamai i Aoaoga Faavae (2022).

Faitau tulaga faataitai nei e lua e uiga i le autalavou mai le uarota lava e tasi o loo auai i se sauniga anapogi ma molimau. E tofu le tagata ma ni manatu eseese i le taimi o le sauniga.

Mafaufau e vavae le vasega i ni vaega se lua ma atofa atu se vaaiga faataitai se tasi i vaega taitasi. Faaali atu tulaga faataitai ma fesili o i lalo o mataupu faavae taitasi nei o le mauaina o le malamalama faaleagaga, pe tuu atu i vaega taitasi se kopi e faaaoga i le taimi o la latou talanoaga.

E mafai foi ona e valaaulia tagata aoga e fatu se isi vaaiga faataitai e fesootai i le 2 Nifae 28:30. Tuu atu ia i latou e faaaoga mataupu faavae o le mauaina o le malamalama faaleagaga ma le aoaoga faavae mai le 2 Nifae 28:30 e fesoasoani ai i le vaaiga faataitai na latou fatuina.

1. Ua amata ona mafaufau Tomasi po o le a le mea o loo faaletonu ia te ia. E talitonu o ia i le Atua ma o Le Ekalesia a Iesu Keriso o le Au Paia o Aso e Gata Ai e moni. Ae na te lagonaina e pei o lana molimau e vaivai pe a faatusatusa atu i isi tagata o le uarota. Ua ia taumanatunatu pe mata e mafai ona ia iloaina mo ia lava mea uma o loo molimau mai ai isi.

2. I se vaega o le sauniga, ua le toe gauai atu Liz i molimau. Ua ia mafaufau ia te ia lava, “Ua uma ona ou faalogo i mea uma o loo latou fai mai ai, ma ua uma ona ou iloa e moni uma lava.” Sa ia lagonaina foi le faaitiitia o le manao e faitau tusitusiga paia ma auai i le seminare ona ua ia lagonaina ua lava le malosi o lana molimau.

Faamatala pe faapefea ona e faaaogaina mataupu faavae taitasi o le mauaina o le malamalama faaleagaga e fesoasoani ai ia Tomasi po o Liz i o la’ua tulaga. Afai e manaomia, e mafai ona fesoasoani fesili nei ia te oe.

Faatino i le faatuatua

Faitau le palakalafa 7 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae.

• O le a se mea e mafai ona e faasoa atu mai lenei parakalafa e fesoasoani ai ia Tomasi po o Liz e faatino i le faatuatua?

• E mafai faapefea e upumoni mai le 2 Nifae 28:30 ona fesoasoani ia Tomasi po o Liz e faatino ai i le faatuatua?

Iloilo manatu faavae ma fesili ma se vaaiga e faavavau.

• I le faaaogaina o mea ua e aoaoina mai le 2 Nifae 28:30, o le a se mea e mafai ona e faasoa atu e fesoasoani ai ia Tomasi po o Liz ia iloa atili o la’ua tulaga e pei ona silafia e le Alii?

• O a isi upumoni e mafai ona e faasoa atu e fesoasoani ai ia i laua e vaai atu i o laua atugaluga ma se vaaiga e faavavau?

• O le a se mea ua e iloa e uiga i le Atua e mafai ona fesoasoani ia i laua e vaai ai ia i laua lava e pei ona Ia faia?

Saili le malamalama atili e ala i punaoa mamana ua filifilia

• Aisea e mafai ai ona fesoasoani i a Tomasi po o Liz le talanoa ma o laua matua po o taitai o le ekalesia e uiga i o la manatu?

• O a mau po o tala o tusitusiga paia e mafai ona e mafaufau i ai e mafai ona fesoasoani ia i laua?

A uma sina taimi, valaaulia tagata aoga e faataamilo i le potuaoga, sue se tasi sa suesue i se tulaga faataitai e ese mai, ma faasoa atu mea sa latou aoaoina. Ona valaaulia lea o ni nai volenitia e faasoa mai i le vasega mea na latou tusia.

Toe faamanatuina o le atamai i aoaoga faavae

I le taimi o lesona o le a sosoo ai, fesoasoani i tagata aoga e toe faamanatu puupuu le mau faasino ma le fasifuaitau autu o le mau mo le 2 Nifae 28:30. O se tasi o auala e faia ai lenei mea o le toe faia lea o le gaoioiga mai lenei lesona, o le tusia o ni laina faalalava se fa i luga o le laupapa ma fai atu i tagata aoga e faatumu le mau faasino ma le fasifuaitau autu o le mau mai le mafaufau. Fesoasoani i tagata aoga pe a manaomia. Ona valaaulia lea o tagata aoga e toe fai le mau ma le fasifuaitau autu mo ni nai taimi seia oo ina latou taulotoina.