Mosaea 2:1–18

“Auauna Atu i O Outou Uso a Tagata”

O le a le mea e avea ai ma se taitai maoae? I le lauga a le Tupu o Peniamina, tatou te maua ai sina vaaiga o le ituaiga taitai ma faataitaiga sa i ai o ia i lona nuu. O le Tupu o Peniamina o se tasi na auauna atu i le Atua e ala i le auauna atu i lona nuu ma aoao i latou e auauna atu le tasi i le isi. O lenei lesona ua faamoemoe e fesoasoani ia te oe e auauna sili atu ai i le Atua e ala i le auauna sili atu i isi.

Faalautele le aafiaga faaleaoaoga. Pe a e valaaulia tagata aoga e faatino aoaoga faavae moni, ua e fesoasoani ia i latou e faalautele lo latou aafiaga faaleaoaoga i o latou aiga ma olaga o aso uma. A o latou faia lenei mea, e mafai ona uunaia atili i latou e aoao ma faaaoga aoaoga o le talalelei.

Sauniuniga a le tagata aoga: Valaaulia tagata aoga e sue se auala itiiti e auauna atu ai i se isi tagata a o lei oo i le lesona e sosoo ai.

Gaoioiga e Mafai Ona Aoao Ai

E faapefea ona e vaai i auaunaga?

E mafai e tagata aoga ona faia lenei gaoioiga taitoatasi, i vaega toalaiti, pe o se vasega. E mafai ona fesoasoani le faia o se lisi autu i luga o le laupapa.

Faaalu le 60 sekone e tusi ai i lalo le tele o auala eseese e mafai ona e mafaufau i ai e ono mafai ona e auauna atu ai i se tasi i lenei vaiaso.

• O le a se mea e ono faaosofia ai se tasi e faia nei mea?

• Aisea e ono faatuai ai se tasi i le faia o nei mea?

O le iloiloga lenei faaletagata lava ia e mafai ona fesoasoani i tagata aoga e iloa ai o latou lagona e uiga i le auauna atu ma valaaulia le Agaga Paia e aoao i latou. Mafaufau e faaali atu le iloiloga ma valaaulia tagata aoga e tomanatu i a latou tali. I se isi itu, e mafai ona e tuu atu i tagata aoga taitasi se kopi o le lisi ma valaaulia i latou e faatulaga i latou lava i se fua mai le 1 i le 5 mo aitema taitasi.

O le fea o mea nei e sili ona faamatalaina ai ou lagona o i ai nei e uiga i avanoa e auauna atu ai?

• Ou te vaavaai mo avanoa e auauna atu ai.

• Ou te tali atu ma le naunautai pe a talosagaina au e fesoasoani.

• Ou te fia auauna atu ae faigata ona faamuamua le auaunaga i lo’u olaga.

• E matele lava ina ou mafaufau o le a faia e se isi tagata le auaunaga.

• Ou te fiafia e auauna atu ae popole i le auala e maitau mai ai e isi.

• Ou te fiafia e auauna atu ae tauivi ma le manao ia matauina pe iloaina e isi.

• Isi:

Afai e te lagona o le a aoga ma talafeagai, mafaufau e valaaulia tagata aoga e faasoa mai o latou manatu po o lagona a o latou faia lenei iloiloga.

A o e suesueina lenei lesona, mafaufau pe faapefea ma pe aisea e mafai ai ona sili atu lou auauna atu ia i latou o siomiaina oe, e amata atu i le asō.

Faataitaiga a le Tupu o Peniamina o le auauna atu

Ina ua latalata ina iu le soifua o le Tupu o Peniamina, sa ia fai atu i lona atalii o Mosaea e valaau faatasi tagata sa Nifae ina ia mafai ona ia talanoa atu ia i latou. Sa latou faapotopoto i aiga i le malumalu e faalogologo i le Tupu o Peniamina (tagai Mosaea 2:1–9).

Faitau le Mosaea 2:10–14, vaavaai pe na faapefea ona auauna atu le Tupu o Peniamina i lona nuu.

• O le a se mea e tumatila ia te oe e uiga i le Tupu o Peniamina?

  Mafaufau e fai se lisi o tali a tagata aoga i luga o le laupapa.

• E faapefea ona ese lou aiga, aoga, po o le nuu pe afai e ola tagata i le ala na ola ai le Tupu o Peniamina?

O le mafuaaga tatou te auauna atu ai

Faitau le Mosaea 2:15–18, vaavaai mo mea na aoao mai e le Tupu o Peniamina e uiga i le auauna atu.

• O a upumoni e mafai ona e faailoaina?

O leMosaea 2:17 o se fuaitau o le atamai i aoaoga faavae. Mafaufau e faailoga fuaitau o le atamai i aoaoga faavae i se auala tulaga manino ina ia mafai ai ona e maua gofie. O le a e maua se avanoa i le lesona e sosoo ai e faataitai ai le faaaogaina o le aoaoga faavae o loo aoaoina i lenei fuaitau i se fesili po o se tulaga.

O se tasi o upumoni e mafai ona tatou aoao mai i le Tupu o Peniamina e faapea “pe a outou auauna atu i o outou uso-a-tagata, ua na o lo outou auauna atu lava lea i lo outou Atua.”

O lenei vaega o le lesona ua faamoemoe e fesoasoani i tagata aoga e taulai atu i le Tama Faalelagi ma Iesu Keriso a o latou auauna atu. Mafaufau i manaoga o au tagata aoga ma faaaoga anomea nei po o isi e te lagona le musuia e faasoa atu.

O le isi filifiliga e fesoasoani ai i tagata aoga e manatunatu i le Faaola o le valaaulia lea o i latou e vaavaai mo le sootaga i le va o le Mosaea 2:18 ma le Mataio 20:27–28.

• E faapefea ona tatou auauna atu i le Atua pe a tatou auauna atu i isi?

• O le a se mea o e vaaia i nei fuaiupu e faamanatu atu ai ia te oe ia Iesu Keriso?

Faitau le saunoaga lenei a Peresitene Thomas S. Monson (1927–2018), ma vaavaai mo mea ua ia aoao mai e uiga i le sootaga i le va o la tatou auaunaga i isi ma la tatou sootaga ma le Atua:

A o tatou vaavaai atu i le lagi, e mautinoa lava tatou te aoao i lo tatou tiutetauave e aapa atu. Ina ia maua le fiafia moni, e tatau ona tatou sailia i se taulaiga e ese mai ia i tatou lava. E leai se tasi na aoaoina le uiga o le ola seia ofoina atu atoa o ia e auauna atu i ona uso a tagata. … Ua aoao mai le Feagaiga Fou e lē mafai ona ave se uiga sa’o ia Keriso e aunoa ma le tauaveina o se uiga lē manatu faapito i tagata. …

Tatou te vaai atu i le Faaola o la tatou faataitaiga o le auauna atu. E ui lava sa Ia afio mai i le lalolagi o le Alo o le Atua, ae sa Ia auauna atu ma le lotomaualalo i tagata uma na siomia o Ia. Na afio mai o Ia mai le lagi e soifua i le lalolagi o se tagata soifua ma faatuina le malo o le Atua. O Lana talalelei mamalu na toe faatulagaina ai mafaufauga o le lalolagi. Sa Ia faamanuia ē mamai; sa Ia faasavavali ē na pipili, o tauaso ia pupula, o ē tutuli ia logona. Sa Ia faatuina mai foi le oti i le ola. (Thomas S. Monson, “The Joy of Service,” New Era, Oke. 2009, 4, 6)

E mafai ona e valaaulia tagata aoga e tomanatu filemu ma tali le fesili lenei i a latou api talaaga.

• E faapefea e le mafaufau e uiga i le faataitaiga a le Faaola ona faaosofia oe e auauna atu i isi?

E mafai ona avea lenei mea ma se avanoa lelei e faia ai se talanoaga ma valaaulia tagata aoga e faasoa mai ni aafiaga patino e uiga i le auauna atu po o le auauna mai. O le faaalia o se vitio e pei o le “Auauna Atu e ala i Pese” e mafai ona valaaulia ai le Agaga ma fesoasoani ai i tagata aoga e tomanatu i o latou lava aafiaga i le auauna atu. Mafaufau e faasoa atu se aafiaga patino.

O faataitaiga faaopoopo e mafai ona maua i lalo o le ulutala “O a nisi o faataitaiga o auaunaga faa-Keriso?” i le vaega “Manatu ma Talaaga o Faamatalaga”.

• Na faapefea ona faamanuiaina oe e ala i le auauna atu i isi?

• Pe ua faamanuiaina oe ona o auaunaga a isi?

Fai se fuafuaga

Na faasoa mai e Sister Sharon Eubank, Fesoasoani Muamua i le Au Peresitene Aoao o le Aualofa lenei malamalamaaga taua e uiga i le auauna atu. Mafaufau i mea ua ia aoao mai a o e sauni e fai se fuafuaga e auauna atu ai i isi. Maimoa le vitio “O Oe o le Meaalofa” (0:54), o lo o maua i le ChurchofJesusChrist.org, pe faitau le faamatalaga lenei.

Afai tatou te suia la tatou vaaiga ina ia faaitiitia le tausiga o e matitiva ma e le tagolima e uiga i le foai atu o mea, ae ia sili atu i le faatumuima o le fiaai mo fesootaiga faaletagata, faia o talanoaga anoa, ma le fatuina o sootaga mauoa ma lelei, ona mafai lea e le Alii ona auina atu i tatou i se nofoaga. …

… Ma ia manatua, i le ala lava e tasi e pei o le Faaola, o oe lava o se tasi o meaalofa silisili e mafai ona e tuuina atu i isi tagata o manaomia le fesoasoani. (Sharon Eubank, “Turning Enemies into Friends” [Brigham Young University forum, Ian. 23, 2018], 6–7, speeches.byu.edu)

• O le a se mea e tulaga ese ia te oe mai mea na aoao mai e Sister Eubank e uiga i le auauna atu?

O a nisi o auala e mafai ona e faia ai mea na ia aoao mai? Mafaufau i lou aiga, uo, po o le nuu. Tatalo e ole atu i le Tama Faalelagi e musuia oe e uiga i auala e mafai ona e auauna atu ai. I lau api talaaga mo suesuega, tusi igoa o tagata e oo mai i le mafaufau ma ni manatu i auala e mafai ai ona e fesoasoani ia i latou. Filifili po o afea o le a e faatinoa ai ou lagona uunaia. Atonu e i ai se mea e mafai ona e faia i le taimi lava lenei.

Manatu ma Talaaga o Faamatalaga

E mafai faapefea ona tatou auauna atu ma le mataalia atili?

Na aoao mai Peresitene Joy D. Jones, o le sa avea ma Peresitene Aoao o le Peraimeri:

O nisi taimi tatou te muamua auauna atu mai se lagona o le tiute po o le matafaioi, ae o lena lava auaunaga e mafai ona taitai atu ai i tatou e faaaoga se mea e maualuga atu i totonu o i tatou, e taitai atu i tatou e auauna atu i “le ala silisili lava” [1 Korinito 12:31]. …

A tatou taulai atu i mea uma na faia e le Atua mo i tatou, e faaosofia ai la tatou auaunaga mai le loto faafetai. Ao faaitiitia lo tatou popole e uiga i le faalauaiteleina o i tatou e a tatou auaunaga, o le a tatou iloaina ai o le taulaiga o la tatou auaunaga o le faamuamua lea o le Atua. (Joy D. Jones, “Mo Ia,” Liahona, Nov. 2018, 50–51)

Na tuuina mai e Peresitene M. Russell Ballard o le Korama a Aposetolo e Toasefululua le valaaulia lenei:

I a outou tatalo o le taeao i aso fou taitasi, ole atu i le Tama Faalelagi e taiala oe ia iloa se avanoa e auauna atu ai i se tasi o Ana fanau faapelepele. Ona e faagasolo lea i aso faatasi ma lou loto ua faatumulia i le faatuatua ma le alofa, e saili mo se tasi e fesoasoani i ai. … A e faia lea mea, o le a faateleina lou gauai faaleagaga ma o le a e mauaina ni avanoa e auauna atu ai, ia sa e lē iloaina muamua e mafai. (M. Russell Ballard, “Ia Auai Ma le Naunautai,” Liahona, Nov. 2012, 31)

Sa aoao mai Peresitene Jean B. Bingham, Peresitene Aoao o le Aualofa:

O nisi taimi tatou te manatu ai e ao ona tatou faia se mea silisili ma toa e “faitaulia” ai o se auaunaga i o tatou tuaoi. Ae o ni faatinoga faatauvaa o auaunaga e mafai lava ona i ai ni aafiaga loloto i isi—faapea ai foi ma i tatou lava ia. O le a le mea na faia e le Faaola? E ala i Ana meaalofa faalelagi o le Togiola ma le Toetu … “e leai lava se isi ua i ai se aafiaga matua loloto na’uā o i latou uma na soifua ma o le a soifua ai i luga o le fogaeleele” [“O Le Keriso Soifua: O Le Molimau a le Au Aposetolo,” ChurchofJesusChrist.org]. Ae sa Ia ataata foi i [isi], talanoa i [isi], savavali ma [isi], faalogo atu i [isi], faaavanoa se taimi mo [isi], faamalosiau atu, aoao atu, fafaga, ma faamagalo atu. Sa Ia auauna atu i aiga ma uo, tuaoi ma tagata ese foi, ma sa Ia valaaulia ē masani ma ē pele ia olioli i faamanuiaga silisili o Lana talalelei. O na faatinoga “faigofie” o auaunaga ma le alofa ua maua ai se mamanu mo a tatou auaunaga i aso nei. (Jean B. Bingham, “Auauna Atu e pei ona Faia e le Faaola,” Liahona, Me 2018, 104)

Ae faapefea pe afai e lē tali lelei mai se tasi pe teena lau auaunaga?

Na aoao mai Peresitene Joy D. Jones, o lē sa avea ma Peresitene Aoao o le Peraimeri:

E mafai ona e mafaufau i tua i se taimi sa e aapa atu ai ma le alofa ma se taumafaiga faamaoni e fesoasoani i se tasi na manaomia se fesoasoani ma lagonaina sa lē amanaiaina au taumafaiga pe atonu sa lē talisapaia pe sa lē manaomia foi? I lena taimi, sa e fesiligia le taua o lau auaunaga? Afai o lea, e faamoemoe o upu a le Tupu o Peniamina o le a suitulaga i ou masalosaloga ma faapena foi le tiga: “Ua na o lo outou auauna atu lava lea i lo outou Atua” [Mosaea 2:17].

Nai lo le faatupulaia o le ita, e mafai ona tatou fausia, e ala i le auaunaga, se sootaga sili atu ona atoatoa ma lo tatou Tama Faalelagi. O lo tatou alofa ma le tuuto mo Ia e aveesea ai le manaomia o le viiga po o le talisapaia ma faataga Lona alofa e tafe ma oo mai i totonu ia i tatou. (Joy D. Jones, “Mo Ia,” Liahona, Nov. 2018, 50)

O a ni faataitaiga o auaunaga faa-Keriso?

O le vitio “Mitch Mobile” (4:14) o loo faaalia ai le ala na auauna atu ai se vaega o alii talavou i se tasi o o latou uso a korama.

O vitio nei e lua o ni faataitaiga o le autalavou o e sa taumafai e faia le tele o auaunaga na latou mafaia i aso e tolu.

O le vitio “Auauna Atu Nei” (2:18) o loo faaalia ai ni faatinoga e lei fuafuaina o auaunaga ua luiina ai tagata e fai.

“O Vae o Dayton” o se vitio e uiga i se alii talavou sa galue malosi ina ia mafai e lana uo e pe le tino (cerebral palsy) ona auai i taaloga faatasi ma ia.

Gaoioiga Faaopoopo e Aoao Ai

Isi auala e valaaulia ai le faaaogaina

E mafai ona e faaalia le vitio “Auauna Atu Nei” (2:18) ma valaaulia tagata aoga e tusi i ni fasipepa ni o latou lava manatu faigofie o auala e auauna atu ai. Ona toe tufatufa atu lea o manatu i tagata aoga ma valaaulia i latou e faatino le lui o le auaunaga.

Tau Lava o le Auauna Atu [Just Serve]

Faaali atu i tagata aoga le auala e faaaoga ai le polokalama o le Just Serve, ma valaaulia i latou e vaavaai mo avanoa i le lotoifale mo auaunaga. E mafai ona auauna atu tagata aoga o se aiga, o se uarota, po o se vaega o uo.

Vitio o le Tusi a Mamona

E mafai ona e faaaogaina se vaega po o le vitio atoa o le Tusi a Mamona “Ua Aoao Mai le Tupu o Peniamina e uiga i le Auauna Atu i le Atua” (4:18).