Mosaea 3:19

Tuu Ese le Tagata Natura

Na i ai se taimi na e lagona ai le lē fiafia i au mea sese po o le lē mafai ona tausia o poloaiga uma a le Atua? Sa faatatau i ai le Tupu o Peniamina i lo tatou natura lē atoatoa o “le tagata natura.” Sa ia aoao mai e mafai ona tatou faatoilaloina lenei mea e ala i le Togiola a Iesu Keriso. O le faamoemoega o lenei lesona o le fesoasoani lea ia te oe e saili le fesoasoani a le Faaola i le faatoilaloina o lou natura pa’ū.

Fatuina o se siosiomaga e faaleleia ai le aoaoina. Pe a alolofa ma faaaloalo ia faiaoga ma tagata aoga i le Alii, le tasi i le isi, ma le afioga a le Atua, o le a faaleleia le aoaoina. O le taliaina ma le alofa e lagona e tagata aoga mai isi e mafai ona faamaluluina ai loto, faaitiitia le fefe, ma faateleina ai lo latou manao ma le mautinoa e faasoa lagona ma aafiaga.

Sauniuniga a le tagata aoga: Valaaulia tagata e faitau le Mosaea 3:19 ma mafaufau loloto i lona uiga. E mafai foi ona e valaaulia i latou e sue se mau po o se faamatalaga mai se taitai o le Ekalesia e faateleina ai lo latou malamalama i se vaega o lenei fuaiupu.

Gaoioiga e Mafai Ona Aoao Ai

O o tatou tulaga pa’ū

Mafaufau e faaali se ata o se luko a o e faasoa atu le tala mai ia Peresitene Dallin H. Oaks.

Sa toe faamatala mai e Peresitene Dallin H. Oaks o le Au Peresitene Sili le tala lenei:

O se Cherokee atamai, o se tasi o ituaiga o tagatanuu i le Iunaite Setete, sa ia ta’u atu i le atalii o le la tama, se faataoto e uiga i le olaga. “I totonu ia te a’u o loo i ai se taua matautia i le va o ni luko se lua,”o le tala lea a le tamā matua.  “O le tasi e leaga: tumu i le ita ma le lotoleaga, alofa faapito ia te ia lava ma le faanoanoa, faaloloto ma pepelo. O le isi e lelei: e tumu i le agalelei ma le agaalofa, lotomaualalo ma le upumoni, alofa ma le olioli. O loo tupu lena taua i totonu o i tatou taitoatasi.” “O le fea luko o le a manumalo?” sa fesili atu ai le atalii. (Dallin H. Oaks, “Filifiliga,” Mo le Malosi o le Autalavou, Set. 2021, 13; tala na sii mai le Shayne M. Bowen, “Faitalia ma le Tali Atu mo Oe Lava Ia,” New Era, Set. 2012, 8)

• Afai o oe o le tamā matua, mata e faapefea ona e tali atu i le fesili a le atalii o lou atalii?

  Valaaulia tagata aoga e mafaufau i a latou tali i le fesili lenei:

• Na faapefea ona e matauina lenei tauiviga i le va o “luko e lua” ia te oe lava ia?

I le tala na faasoa mai e Peresitene Oaks, o le tali a le tamā matua i le fesili a le atalii o lona atalii po o le fea luko o le a manumalo o le, “O le luko e te fafagaina.”

O se vaega o lana saunoaga mulimuli ia sa Nifae, na aoao atu ai e le Tupu o Peniamina upumoni faapea na faaali atu e se agelu ia te ia e uiga i lo tatou natura pa’ū ma le ala e aafia ai la tatou sootaga ma le Atua.

Faitau le Mosaea 3:19, ma vaavaai pe na faapefea ona faamatalaina e le Tupu o Peniamina se tasi e i ai ona uiga e pei o na uiga na faaalia e le luko muamua i le tala.

Mafaufau e faitau e tagata aoga na o le vaega muamua o le Mosaea 3:19 (faaiu i upu “e faavavau ma faavavau lava”) i le taimi lea o le lesona.

O leMosaea 3:19 o se fuaitau o le atamai i aoaoga faavae.  Mafaufau e faailoga fuaitau o le atamai i aoaoga faavae i se auala iloga ina ia mafai ai ona e maua gofie. O le a e maua se avanoa i le lesona e sosoo ai e faataitai ai le faaaogaina o le aoaoga faavae o lo o aoaoina i lenei fuaitau i se fesili po o se tulaga.

• O le a se mea na e mauaina?

Mafaufau e tusi upu Tagata Natura i luga o le laupapa o se ulutala. Valaaulia tagata aoga e mafaufau i upu po o fasifuaitau e ono fesoasoani ia i latou e malamalama ai i le uiga o le faaupuga. Ona tuu atu lea ia i latou e lisi a latou tali i lalo ifo o le ulutala.

Na aoao mai Elder David A. Bednar o le Korama o Aposetolo e Toasefululua:

I se isi itu, o le tagata natura o lo o faamatalaina e le Tupu o Peniamina o lo o ola pea ma o lo o i ai i totonu o i tatou taitoatasi. O le alii po o le tamaitai natura e le salamo, e tuinanau ma faatiapolo, e faalologo ma soonafai, ma e faamaualuga ma manatu faapito. (David A. Bednar, “Matou Te Talitonu i le Nofomama,” Liahona, Me 2013, 42)

• Aisea e te manatu ai o le tagata natura o se fili i le Atua?

• O le a le uiga o le “fafaga” le alii po o le tamaitai natura o i totonu ia i tatou uma?

Ina ia fesoasoani i tagata aoga ia malamalama atili i le tagata natura, mafaufau e tuuina atu nisi o vaaiga faataitai nei pe mafaufau foi i sa oe lava tulaga faataitai. Valaaulia tagata aoga e faasoa mai pe faapefea ona tali atu le tagata natura i tagata taitasi:

1. Ua faatiga se tasi ia te oe.

2. O lo o e faia se suega ma o lo o mafai ona e iloa atu tali a se isi tagata aoga.

3. Ua oso mai se ata lē talafeagai i luga o lau masini eletonika.

Mafaufau i nisi o auala e te matauina ai uiga po o amioga a le alii po o le tamaitai natura i lou olaga. A o faaauau pea ona e suesue, vaavaai mo aoaoga e mafai ona fesoasoani ia te oe i au taumafaiga e faatoilalo ai nei uiga ma amioga.

Faatoilalo le tagata natura

Toe faitau le Mosaea 3:19, o le taimi lea, ma vaavaai mo mea na aoao mai e le Tupu o Peniamina e uiga i le ala e mafai ai ona tatou faatoilaloina le tagata natura.

• O le a se mea na e aoaoina mai lenei fuaiupu e mafai ona fesoasoani ia te oe e faatoilalo ai le tagata natura?

Afai sa e tusia muamua le Tagata Natura i luga o le laupapa, mafaufau e fai se ulutala lona lua e faaaoga ai le upu Au Paia. A o maua e tagata aoga upumoni e uiga i le faatoilaloina o le tagata natura ma avea ma se tagata paia e ala i le Togiola a le Faaola, lisi na upumoni i luga o le laupapa i lalo o le ulutala lona lua.

Mai le Mosaea 3:19, ua tatou aoao ai e faapea, o le gauai atu i faatosinaga a le Agaga Paia, e mafai ai ona tatou faatoilaloina le tagata natura ma avea ma tagata paia e ala i le Togiola a Iesu Keriso.

• O le a sou manatu e mafai faapefea e Iesu Keriso ona fesoasoani ia i tatou e tuu ese le tagata natura ma avea ma tagata paia e ala i Lana Togiola?

• O le a sou manatu i le uiga o le gauai atu i uunaiga a le Agaga Paia? O le a sou manatu e faapefea e le faia o lenei mea ona fesoasoani ia te oe e faatoilalo ai le tagata natura?

Faaaogaina o mau fefaasinoa’i e faaloloto ai lou malamalama

Mafaufau e tuu atu i tagata aoga se taimi e faaloloto ai lo latou malamalama i aoaoga o i le Mosaea 3:19 e ala i le faaaogaina o le tomai mo le suesueina o tusitusiga paia o mau fefaasinoai.

O le faaaogaina o mau fefaasinoai o se tomai e suesue ai tusitusiga paia lea e mafai ona fesoasoani e faaloloto ai lou malamalama i se fuaitau o mau. Faataitai le tomai lenei e ala i le mauaina o mau fefaasinoai lea e faalolotoina lou malamalama i aoaoga o i le Mosaea 3:19.

Mafaufau e su’e ni mau fefaasinoai e ala i le sailia o le faaupuga “tagata natura” po o isi upu autu mai le Mosaea 3:19 i le polokalama o le Gospel Library. E mafai foi ona e sueina nisi o mau faasino ma autu o loo lisi atu i vaefaamatalaga mo le Mosaea 3:19.

E mafai ona e lisi mau faasino nei i luga o le laupapa: Ona tofi lea o ni vaega eseese e faitau se tasi pe sili atu o i latou ma faasoa mai mea na latou aoaoina. E mafai foi ona e tuu atu i tagata aoga se taimi e sue ai ni mau po o ni faamatalaga talafeagai mai taitai o le Ekalesia.

• Kalatia 5:16–17

• Mosaea 27:25–26

• Alema 22:13–14

• Eteru 12:27

• Mataupu Faavae ma Feagaiga 11:12–13

A uma ua lava se taimi o tagata aoga e suesue ai, valaaulia i latou e faasoa mai i le vasega mea sa latou aoaoina. E mafai ona e fai i tagata aoga e faasoa mai mea na latou maua e sili ona taua ia i latou ma pe faapefea ona fesootai i aoaoga o i le Mosaea 3:19. E mafai foi ona latou faasoa mai mea na latou aoaoina e uiga i le ala e fesoasoani ai Iesu Keriso ia i tatou e faatoilalo le tagata natura. Valaaulia ni tagata aoga e faasoa mai o latou malamalamaaga.

• O le a se mea na e aoaoina e uiga i le ala e mafai ai e le Faaola ona fesoasoani ia i tatou e faatoilalo le tagata natura ma avea ma se tagata paia?

Faaaogaina i lou olaga

O lea la ua e aoao atili i le uiga o le tuu ese o le tagata natura ma avea o se tagata paia e ala i le Togiola a le Faaola, mafaufau pe faapefea ona e faaaogaina nei aoaoga i lou olaga. O le a se mea ua musuia oe e fai pe tuu le faia? Tusi faamaumau ou manatu ma uunaiga i lau api talaaga mo suesuega.

Manatu ma Talaaga o Faamatalaga

Aisea e taua ai mo a’u le taumafai e tuu ese le tagata natura?

Na aoao mai Elder David A. Bednar o le Korama o Aposetolo e Toasefululua:

O le uiga moni lava la o le suega i le olaga nei, e mafai ona aoteleina i le fesili lea: Pe o le a ou tali atu ea i faamoemoega o le tagata natura, pe o le a ou gauai atu i uunaiga a le Agaga Paia ma tuu ese le tagata natura ae avea ma tagata paia e ala i le Togiola a Keriso le Alii (tagai Mosaea 3:19)? O le suega lena. O naunauga uma, manaoga, faamoemoega, ma moomooga o le tagata natura, e mafai ona faatoilalo e le, ma ala i le Togiola a Iesu Keriso. Ua tatou i ai iinei i le lalolagi e atiina ae uiga auaumama faale-atua ma ia pulea lelei tuinanau uma o le tino. (David A. Bednar, “Matou Te Talitonu i le Nofomama,” Liahona, Me 2013, 43)

Ae faapefea pe a ou lagona le lotovaivai i au taumafaiga e faatoilalo le tagata natura?

Na aoao mai Elder Jeffrey R. Holland o le Korama a Aposetolo e Toasefululua:

E na o [Satani] lava o le a fai mai, “E le mafai ona e sui. E te le sui. E umi tele ma faigata tele ona sui. Togi loa le solo. Tuu loa. Aua le salamo. Ua pau lava o le mea ua e oo i ai.” O lena mea, a’u uo e, o se pepelo e fanau mai i le atuatuvale. Aua nei outou talitonu i ai. (Jeffrey R. Holland, “Auala e Sui Ai,” Liahona, Fep. 2017, 60)

Na aoao mai Brother Bradley R. Wilcox o le Au Peresitene Aoao o le Aoga Sa:

E alofa le Atua ia i tatou i tagata ua avea ai i tatou, ae e alofa tele foi o Ia ia i tatou e lē tuua ai i tatou faapenei. O le tuputupu ae i le Alii o le uiga atoa lea o le olaga faitino. O le suia o le uiga atoa lea o le Togiola a Keriso. E le gata ina mafai e Keriso ona toetu, faamama, faamafanafana, ma faamalolo i tatou, ae o na mea uma, e mafai ona Ia suia i tatou ia avea atili e faapei o Ia. (Bradley R. Wilcox, “O Le Agavaa E Le o le Atoatoa,” Liahona, Nov. 2021, 61)

Gaoioiga Faaopoopo e Aoao Ai

Mosaea 3:19. Gauai atu i uunaiga a le Agaga Paia

Suesue i aoaoga a le Tupu o Peniamina e uiga i le gauai atu i uunaiga a le Agaga Paia. E mafai ona e taofi ma valaaulia tagata aoga e mafaufau po o le a le uiga o le upu gauai atu. Valaaulia i latou e mafaufau i ni matalalaga eseese i o latou olaga latou te vaai ai pe faaaoga lena upu ma mafaufau pe faapefea ona latou gauai atu i uunaiga a le Agaga Paia i o latou olaga. O se tasi o faauigaga mo le upu uunaiga o le tosina atu. O le Agaga e atili faatosina ai le amiotonu. Mafaufau e valaaulia ni nai tagata aoga e faasoa mai pe na faapefea ona fesoasoani le Agaga Paia i a latou taumafaiga e tuu ese ai le tagata natura.

Mosaea 3:19. Uiga faa-Keriso ma uiga auaumama faatamaitiiti

Mafaufau e iloilo ma talanoaina uiga auaumama faatamaitiiti o loo lisi atu i le Mosaea 3:19. I le avea ai ma se vaega o lenei talanoaga, e mafai ona e fesoasoani i tagata aoga e mafaufau pe faapefea ona faaalia e Iesu Keriso nei uiga auaumama taitasi. E mafai foi ona e valaaulia tagata aoga e suesue tusitusiga paia mo faataitaiga na faaalia ai e le Faaola se tasi pe sili atu foi o nei uiga auaumama. Mafaufau e valaaulia tagata aoga e talanoaina pe aisea latou te manatu ai o le avea faapei o se tamaitiiti o se vaega o le faagasologa o le tuu ese o le tagata natura.

Mosaea 3:21. “Ua na o le salamo”

Ina ia faamamafa atili atu aoaoga a le Tupu o Peniamina e uiga i le tuu ese o le tagata natura ma avea e faapei o se tamaitiiti e ala ia Iesu Keriso, mafaufau e valaaulia tagata aoga e faitau le Mosaea 3:16–23. E mafai ona e valaaulia tagata aoga e faailoga le fasifuaitau “na o i le salamo” i le Mosaea 3:21. Valaaulia tagata aoga e faasoa mai ni manatu pe faapefea e le salamo ona fesoasoani ia i latou e faatoilalo o latou natura pa’ū ma tumau i le mama faaleagaga.