Mosaea 5:6–15

“Ave i o Outou Luga le Suafa o Keriso”

E mafai ona i ai ni uiga maoae o igoa. O le a le uiga o le ave i ou lava luga o le suafa o Iesu Keriso? O leMosaea 5 o loo i ai le faaiuga o le lauga a le Tupu o Peniamina i lona nuu ina ua ia faapotopotoina faatasi tagata e tuu atu ia i latou se igoa (tagai Mosaea 1:11). O lenei lesona e mafai ona fesoasoani e te malamalama ai i le taua o le ave i o outou luga o le suafa o Iesu Keriso.

O le mulimuli i faataitaiga a Iesu Keriso. Ua faatuina e le Faaola le faataitaiga atoatoa o le auala e tatau ona tatou ola ai ia avea faapei o Ia. A o e fesoasoani i tagata aoga e faailoa mai upu, amioga, ma uiga o Iesu Keriso, valaaulia i latou e vaavaai mo auala e mulimuli ai i Lana faataitaiga i o latou olaga patino.

Sauniuniga a le tagata aoga: Valaaulia tagata aoga e mafaufau loloto i le fesili, “O le a le uiga o le tauave i ou lava luga o le suafa o Keriso?”

Gaoioiga e Mafai Ona Aoao Ai

O se igoa fou

O le gaoioiga lenei o se tasi lea o auala e fesoasoani ai i tagata aoga ia saunia e aoao e uiga i le tauaveina i o latou luga o le suafa o Keriso. Afai e maaleale i se tagata aoga le manatu o tamaiti ua matuaoti po o le vaetamaina, mafaufau i se isi gaoioiga.

Vaai faalemafaufau i se tamaitiiti matuaoti e leai se tasi e fesoasoani pe tausia i latou o e na iu lava ina iloa se aiga alofa, ma mautu lea e ofo mai e vaetamaina i latou.

• O a nisi o mafuaaga atonu e manao ai le tamaitiiti matuaoti e vaetamaina ma tauave le igoa o lo latou aiga fou?

• O a faamanuiaga e mafai e lo latou tinā ma tamā fou ona ofo atu e lē mafai e le fanau matuaoti ona mauaina e i latou lava?

• Faamata o a ni lagona o le tamaititi matuaoti e uiga i lo latou aiga fou?

I lana lauga maoae i lona nuu, na fai atu ai le Tupu o Peniamina, “Ou te manao ai ia outou ave i o outou luga le suafa o Keriso” (Mosaea 5:8) ma ta’ua “o le fanau a Keriso” (Mosaea 5:7). O nisi o le nuu o le Tupu o Peniamina o sa Nifaē, ma o isi na tupuga mai ia Moleka. Sa manao le Tupu o Peniamina ia lotogatasi tagata uma i lalo o se igoa e tasi e pei o se aiga.

A o e suesue i tusitusiga paia i le asō, mafaufau loloto i auala atonu e te pei ai o le tamaitiiti matuaoti i le tulaga o i luga ma le Alii e pei o le matua fou.

Mafaufau e tusi i luga o le laupapa le siata lenei. E mafai ona e tuuina tagata aoga i ni paga ma tofi atu i tagata aoga taitasi se tasi o koluma.

Faamanuiaga o le tauaveina i o tatou luga o le suafa o le Faaola	O le ala ou te tauaveina ai le suafa o le Faaola i o’u luga

Manatua i le Mosaea 5:1–5, na molimau atu ai tagata faapea o le Agaga o le Alii na faia “se liuga tele” ia i latou ma sa latou “malilie e ulu atu i se feagaiga ma … [le] Atua e fai lona finagalo” (Mosaea 5:2, 5).

Fai i tagata aoga e faitau ma le toto’a le Mosaea 5:6–10 ma tusi i lalo soo se mea latou te maua e faatatau i a latou koluma. A uma ua lava se taimi, tuu atu i tagata aoga e fefaasoaai le tasi ma le isi, ma faaaofia ai a latou tali i luga o le laupapa. Atonu e fesoasoani le faailoa atu i tagata aoga o le aao taumatau o le Atua e faailoa ai se faatusa o le fiafia ma o le aao agavale e faatusa i le lē fiafia.

Afai e le masani ona faasoa mai e tagata aoga ia tali i fesili nei, mafaufau e fesili atu ia i latou:

• O a faamanuiaga e te manao ai i lou olaga e na o le Faaola e mafai ona tuuina mai? (Mafaufau e faaaoga fasifuaitau na e faailoaina mai le saunoaga a le Tupu o Peniamina e tali ai lenei fesili.) Aisea e te manao ai i nei faamanuiaga?

• E mafai faapefea ona avea le Faaola e faapei o se matua alofa ia i tatou?

  Atonu e te manao e fai atu fesili tulitatao e pei o le “O a ni auala e faasaoloto ai i tatou e le Faaola?” “Aisea e aoga ai le iloa ‘ua leai lava se isi lava suafa … o mafai ona oo mai ai le olataga’?”

• E tusa ai ma le saunoaga a le Tupu o Peniamina, na faapefea ona avea tagata ma fanau a Keriso, pe tauaveina i o latou luga le suafa o Iesu Keriso?

O auala tatou te tauaveina ai le suafa o Keriso

O se upumoni e tasi e mafai ona tatou aoao mai le Tupu o Peniamina o le, a o tatou osia ma tausia feagaiga paia, e avea i tatou ma fanau a Keriso ma tauave i o tatou luga Lona suafa.

Faitau le saunoaga lenei a Peresitene Dallin H. Oaks o le Au Peresitene Sili e faamanino ai le ala tatou te tauaveina ai i o tatou luga le suafa o le Faaola.

I le mulimuli ai i le mamanu faatusi paia, o tagata ua papatisoina ua molimau i luma o le Ekalesia “ua latou salamo moni ia latou agasala uma, ma ua loto e tauave i o latou luga le suafa o Iesu Keriso, ma maua se naunautaiga e auauna atu ia te ia e oo i le iuga.” (MF&F 20:37; tagai foi 2 Ni. 31:13; Moro. 6:3.) Pe a tatou tagofia le faamanatuga, tatou te faafouina lenei feagaiga ma isi feagaiga uma na tatou osia i le vai o le papatisoga. (Dallin H. Oaks, “O Le Tauaveina i o Tatou Luga O Le Suafa o Iesu Keriso,” Ensign, Me 1985, 80)

• E faapefea e le osia ma le tausia o feagaiga ona e latalata atili atu ai i le Faaola?

Ina ia fesoasoani ia te oe e faaauau pea ona faalolotoina lou malamalama e uiga i le tauaveina o le suafa o Iesu Keriso, faitau le Mosaea 5:11–13, 15, ma vaavaai mo nisi fautuaga mai le Tupu o Peniamina e uiga i le tauaveina o le suafa o Iesu Keriso i ou lava luga.

Atonu e te manao e matamata le vitio “Suafa o Keriso” (3:51), o loo maua i le ChurchofJesusChrist.org, mo manatu faaopoopo i le uiga o le tauaveina i ou lava luga o le suafa o Keriso.

Valaaulia tagata aoga e faasoa mai ni malamalamaaga na latou maua mai nei fuaiupu ma le vitio. Mafaufau e fai atu se fesili tulitatao e pei o lenei: “O le a sou manatu i le uiga o le tusia o le suafa o Keriso i lou loto?” (tagai Mosaea 5:11–12). “O a faamanuiaga e oo mai ia i latou ua tusia le suafa o Keriso i o latou loto? “E faapefea e le tauaveina i ou luga o le suafa o Keriso i ou mafaufauga ma amioga i aso taitasi ona uunaia oe ia avea ma Ona soo sili atu?

Mafaufau i faataitaiga ua e vaaia i lou olaga o tagata o e na tauaveina i o latou luga le suafa o Keriso.

• O le a se mea latou te faia ua faaalia ai ua latou tauaveina i o latou luga Lona suafa?

• O le a le matafaioi e mafai ona faia e le faamanatuga e fesoasoani ai ia i tatou e faia lenei mea ia sili atu?

O le suafa o Iesu Keriso

Ina ia fesoasoani i tagata aoga e iloilo po o le a le lelei o lo latou tauaveina o le suafa o le Alii i o latou lava loto, mafaufau e valaaulia i latou e mafaufau loloto lē leoa i mea nei.

• O a nisi o auala e mafai ona e faaalia ai ua e tauaveina i ou lava luga le suafa o Keriso?

• O a faamanuiaga ua oo mai e ala i le tauaveina i ou luga o le suafa o Keriso?

Mafaufau i manatu ma uunaiga na e maua mai le Agaga Paia a o e suesue i le asō. Mafaufau i mea e mafai ona e faia ina ia e tauaveina atoatoa ai i ou lava luga le suafa o Keriso.

Fautua i tagata aoga e faatino mea ua uunaia i latou e fai. Mafaufau e faasoa atu pe na faapefea e le tauaveina o le suafa o Keriso i ou lava luga ona aafia ai lou olaga.

Manatu ma Talaaga o Faamatalaga

O le a le uiga o le ave i o tatou luga o le suafa o Iesu Keriso?

I lana saunoaga “Taking upon Us the Name of Jesus Christ” (Ensign, Me 1985, 80–83), sa faamalamalama mai ai e Peresitene Dallin H. Oaks o le Au Peresitene Sili ni uiga eseese o le tauaveina o le suafa o Keriso i o tatou luga.

E faapefea ona tatou aafia ona o le tauaveina o Lona suafa?

Sa faasoa mai e Peresitene Henry B. Eyring o le Au Peresitene Sili nisi o mea e mafai ona tatou faia e faaali atu ai ua tatou tauaveina i o tatou luga le suafa o le Faaola.

Tatou te folafola atu e tauave Lona suafa i o tatou luga. O lona uiga e ao ona tatou vaai ia i tatou lava o ni Ona [soo]. O le a tatou faamuamua o Ia i o tatou olaga. O le a tatou mananao i mea e finagalo i ai o Ia nai lo mea tatou te mananao i ai po o mea ua aoao mai le lalolagi ia tatou mananao i ai. (Henry B. Eyring, “That We May Be One,” Ensign, Me 1998, 67)

O le a le uiga o le manao e tauave i o tatou luga le suafa o Iesu Keriso?

Sa aoao mai Peresitene Henry B. Eyring o le Au Peresitene Sili:

Ou te mafaufau po o le a le uiga o le loto e ave i o tatou luga o le suafa o Iesu Keriso.

Na faamalamalama mai e Peresitene Dallin H. Oaks: “E taua tele pe a tatou aai ma feinu i le faamanatuga tatou te le molimau atu tatou te aveina i o tatou luga le suafa o Iesu Keriso. Tatou te molimau atu ua tatou loto e faia o lea. (Tagai MF&F 20:77.) O le mea moni e faapea ua na ona tatou molimau atu i lo tatou naunautai e faapea e i ai se isi mea e tatau ona tupu ae tatou te lei tauaveina tonu lena suafa paia i o tatou luga i le uiga aupito sili ona taua” [Dallin H. Oaks, “Taking upon Us the Name of Jesus Christ,” Ensign, Me 1985, 81].

O le faaupuga ua tatou “loto ina ia ave i o [tatou] luga” Lona suafa ua tau maia ia i tatou e ui sa tatou tauaveina Lona suafa ina ua tatou papatiso, o le aveina o Lona suafa e lē gata i le papatisoga. E tatau ona tatou galulue faifaipea e tauave Lona suafa i o tatou olaga atoa, e aofia pe a tatou faafouina feagaiga i le laulau faamanatuga ma osia feagaiga i malumalu paia o le Alii. (Henry B. Eyring, “Taumafai, Taumafai, Taumafai,” Liahona, Nov. 2018, 91)

Gaoioiga Faaopoopo e Aoao Ai

O se isi amataga

Mafaufau e valaaulia tagata aoga e tali fesili nei i ni paga pe i ni vaega toalaiti.

• Aisea e tuu ai e tagata o latou igoa i luga o mea e pei o meaa’oga i le aoga, ofu taalo, ma isi mea faapena?

• O a nisi o mafuaaga tatou te ofuina ai lavalava o i ai ni igoa po o ni faailoilo faapitoa?

• Aisea tatou te mananao ai i isi ia iloa o i tatou o se vaega o ni vaega po o ni faalapotopotoga faapitoa?

Valaaulia tagata aoga e mafaufau loloto i mea nei:

• O le a sou manatu o le a le uiga o le tauave i ou luga le suafa o le Faaola?

• E faapefea ona avea o se faamanuiaga le i ai o le suafa o le Faaola i ou luga?

• O le a sou lagona e uiga i le iloaina e isi ua e tauaveina i ou lava luga le suafa o le Faaola?

E mafai e tagata aoga ona mafaufau loloto i nei fesili a o latou suesueina lenei lesona.

Ave i ou luga le suafa o Keriso

Afai e mafai ona manuia tagata aoga mai manatu faaopoopo i le ala e tauave ai i o latou luga le suafa o Keriso, mafaufau e lolomi ni kopi o le lauga a Peresitene Oaks o loo faasino i ai i le vaega o Manatu ma Talaaga o Faamatalaga. Valaaulia tagata aoga e suesue i le saunoaga a Peresitene Oaks mai le parakalafa e amata i le “O se tasi o uiga manino” e oo i le faaiuga o le parakalafa lona lua mai le faaiuga lea e amata i le “Ma le mea mulimuli, o lo tatou naunautaiga e tauave i o tatou luga.” Valaaulia tagata aoga e faasoa mai mea ua latou aoaoina mai le lauga e uiga i le tauaveina i o latou luga o le suafa o Keriso.

O se vitio

O se tasi o faataitaiga vaaia o le ave i o tatou luga o le suafa o Iesu Keriso e mafai ona vaaia i le vitio “Tu Maualuga” (4:07), o loo maua i le ChurchofJesusChrist.org.

“Faama’ite ina ia latou manatua le tautoga na latou faia”

Fai i tagata aoga e faitau le Mosaea 6:1–3, vaavaai mo mea na faia e le Tupu o Peniamina ae na te lei faataapeina le motu o tagata. Fai atu i tagata aoga fesili nei:

• Aisea atonu na manao ai le Tupu o Peniamina e tusi i lalo igoa o tagata uma na osia le feagaiga?

• Aisea na tofia ai e le Tupu o Peniamina ia faitaulaga i le nuu?

• O le a se mea e mafai ona tatou faia e faamanatu ai ia i tatou lava i o tatou olaga i aso uma ia feagaiga na tatou osia?

• E mafai faapefea e uso o le korama po o le vasega ona fesoasoani le tasi i le isi ia manatua a latou feagaiga?