Seminare
Mosaea 7–8: O Perofeta a le Alii o ni Tagatavaai

“Mosaea 7–8: O Perofeta a le Alii o ni Tagatavaai,” Tusi Lesona a le Faiaoga o le Tusi a Mamona (2024)

“Mosaea 7–8,” Tusi Lesona a le Faiaoga o le Tusi a Mamona

Mosaea 7–8

O Perofeta a le Alii o ni Tagatavaai

Peresitene Russell M. Nelson

E pei lava ona i ai i le Faaola ni faalaniga e aoao ai i tatou e uiga ia te Ia, ua i ai foi i auauna a le Alii ni faalaniga e fesoasoani tatou te malamalama ai i a latou matafaioi i le fuafuaga a le Tama Faalelagi. Ina ua talosaga atu le Tupu o Limae mo se fesoasoani i se galuega na te le’i iloa pe faapefea ona faamae’a, sa faasino atu o ia e se tagata e igoa ia Amona i le perofeta. Sa faamalamalama atu foi e Amona i le tupu ia upumoni taua e uiga i le matafaioi a perofeta, tagatavaai, ma talifaaaliga. O lenei lesona e mafai ona fesoasoani e te malamalama ai i le taua o le avea foi o perofeta ma tagatavaai i le fuafuaga a le Tama Faalelagi.

Tuuina atu se molimau e uiga i perofeta soifua. Saili ni avanoa e faasoa atu ai lau molimau i upu a perofeta soifua. Na aoao mai Elder Dean M. Davies (1951–2021) o le Fitugafulu, “O le faalogo atu i perofeta soifua o le a i ai ni aafiaga loloto e oo lava i le suia ai o o tatou olaga. Ua faamalosia aii tatou. Ua sili atu lo tatou mautinoa ma le talitonuga i le Alii. Ua tatou faalogo i le afioga a le Alii.” (“O Mai Faalogo i le Siufofoga o le Perofeta,” Liahona, Nov. 2018, 36).

Sauniuniga a le tagata aoga: Mafaufau e valaaulia tagata aoga e mafaufau pe faapefea ona latou tali atu pe afai e fesili atu se tasi ia i latou pe aisea latou te talitonu ai i perofeta.

Gaoioiga e Mafai Ona Aoao Ai

Fesili e uiga i perofeta

Mafaufau e valaaulia tagata aoga e faatino le taliina o fesili muamua e tolu o fesili nei. E mafai foi ona latou taliina le lona fa pe afai latou te lagona le to’amalie e faia ai.

Mafaufau faapea ua iloa e se tasi e te masani ai e te talitonu i perofeta o aso nei. Latou te talanoa ma fesili atu ia oe i mea nei:

  • Sa ou faalogo e i ai se perofeta i la outou ekalesia. O a ana mea e fai?

  • Aisea tatou te manaomia ai se perofeta i aso nei?

  • Sa ou faitau i le initoneti e faapea na faaliliuina e Iosefa Samita se tusi anamua. Na faia muamua e se perofeta anamua po o aso nei lena mea?

  • O le a se mea e te talitonu i ai e uiga i perofeta?

Atonu e fesoasoani le fesili atu i tagata aoga pe i ai ni a latou fesili e uiga i perofeta. Mafaufau e tusi fesili nei i luga o le laupapa.

O loo i ai i le Tusi a Mamona le tele o aoaoga e uiga i perofeta, e aofia ai le faaaogaina o i latou e le Tama Faalelagi e fesoasoani ia i tatou. A o e suesue, mafaufau loloto i fesili o i luga ma saili ia faamalosia ai lau molimau i perofeta. Vaavaai foi mo tali i fesili faaopoopo atonu o ia te oe e uiga i perofeta.

Malaga e tolu

Mafaufau e faaali atu le ata lenei ma faamalamalama atu ia faamatalaga nei. (Atonu e te manao e kopi le ata i luga o le laupapa ma tuu ai iina e faasino atu i ai i le taimi o vasega e sosoo ai.) Pe e mafai foi ona e tuuina atu i tagata aoga ni mau faasino i parakalafa nei e lua ma valaaulia i latou e faitau ia fuaitau ma aotele mai mea ua latou aoaoina.

ata o malaga a sa Nifae e toe aumai le laueleele o Nifae

A’o tupu le tamā o le Tupu o Peniamina (Mosaea), sa tuua ai e le tagata e igoa ia Senifa ia Saraemila ma se vaega o tagata ina ia toe aumai le laueleele o Nifae (tagai Mosaea 9:3–4). Sa le’i toe maua se tala mai le vaega a Senifa i le tele o tausaga, o lea na auina atu ai e le tupu na sosoo ai, o Mosaea (le atalii o le Tupu o Peniamina), se vaega na taitaia e Amona e saili i latou (tagai Mosaea 7:1–3). Sa latou maua le nuu o Senifa, o e sa taitaia e le atalii o le atalii o Senifa, le Tupu o Limae. Sa faapologaina le nuu o Limae e sa Lamana “ona o a [latou] amioletonu” (Mosaea 7:20).

Sa ta’u atu e le Tupu o Limae ia Amona sa ia auina atu se vaega suesue e saili Saraemila, ae sa le’i faamanuiaina i latou. Nai lo lena, sa latou toe aumaia ni toega mai le laueleele i matu, e aofia ai se faamaumauga na tusia i luga o papatusi auro e 24 (tagai Mosaea 8:7–9). Sa faamoemoe le Tupu o Limae e mafai e Amona ona faaliliu le talafaamaumau pe iloa se tasi na te mafai ona faia (tagai Mosaea 8:6, 11–12).

Faitau le Mosaea 8:13–14, ma vaavaai po o ai na fai mai Amona e mafai ona faaliliuina le faamaumauga ma pe aisea.

  • O le a se mea sa e mauaina?

Atonu e fesoasoani le iloa o Mosaea ma Iosefa Samita sa i ai ni meafaigaluega faapitoa na ta’ua o le Urima ma le Tumema ua saunia e le Atua e fesoasoani ia i la’ua e faaliliu ai faamaumauga anamua. (Tagai Mosaea 28:13–14; Iosefa Samita—Talafaasolopito 1:35. Afai e te fia iloa atili, sue le “Urima ma le Tumema” i le Taiala i Tusitusiga Paia po o le Taiala mo Autu.)

O le matafaioi a se tagatavaai

Faitau le Mosaea 8:15–18 e aoao ai po o a tagatavaai ma pe aisea ua saunia ai e se Tama Faalelagi alofa ni tagatavaai mo i tatou.

  • O le a se mea na e aoaoina?

E ono fesoasoani le fai atu i tagata aoga e o mai i luga o le laupapa ma tusi le tele o upumoni e mafai ona latou maua. Afai e tusi e tagata aoga se faamatalaga e lē sa’o lelei, fesoasoani ia i latou e fetuunai le faamatalaga ina ia moni. O le faia o lena mea e mafai ona fesoasoani ai i tagata aoga e iloilo a latou lava matauga ma faamanino mea o loo latou aoaoina. O le upumoni e tasi o loo faapupula mai i lenei tala o le, e saunia e le Alii perofeta, tagatavaai, ma talifaaaliga ina ia manuia ai tagata. Atonu e te manao e valaaulia tagata aoga e faailoga upu po o fasifuaitau o loo aoao mai ai lenei upumoni pe tusi lenei upumoni i tafatafa o fuaiupu o loo aoao mai ai.

O loo faamatala mai e le Taiala i Tusitusiga Paia le matafaioi a se tagatavaai e faapea:

O se tagata ua faatagaina e le Atua e vaai i mata faaleagaga i mea ua natia e le Atua mai le lalolagi (Mose 6:35–38). O ia o se talifaaaliga ma o se perofeta (Mosaea 8:13–16). I le Tusi a Mamona, na aoao mai ai Amona e na o se tagatavaai e mafai ona faaaogaina mea faaliliuupu, po o se Urima ma se Tumema (Mosaea 8:13; 28:16). E iloa e se tagatavaai le taimi ua tuanai, le taimi nei, ma le lumanai. I aso anamua, o se perofeta sa masani ona ta’ua o se tagatavaai (1 Sam. 9:9; 2 Sam. 24:11).

O Iosefa Samita o le tagatavaai maoa’e o aso e gata ai (MF&F 21:1; 135:3). E le gata i lea, o le Au Peresitene Sili ma le Aufono a le Toasefululua ua lagolagoina o ni perofeta, tagatavaai, ma talifaaaliga. (Taiala i Tusitusiga Paia, “Tagatavaai,” scriptures.ChurchofJesusChrist.org)

  • O le a se mea na e aoaoina e uiga i le matafaioi a le perofeta o se tagatavaai?

  • Aisea e te manatu ai o le a saunia e le Tama Faalelagi nei tomai i le Au Peresitene Sili ma le Korama a Aposetolo e Toasefululua?

  • E faapefea ona avea perofeta, tagatavaai, ma talifaaaliga ma faamaoniga o le alofa o le Atua mo oe?

O le taua o tagatavaai i o tatou aso

O le a se gaoioiga e aoao ai e mafai ona fesoasoani i au tagata aoga e faaloloto ai lo latou talitonuga faapea o le Au Peresitene Sili ma le Korama a Aposetolo e Toasefululua o perofeta, tagatavaai, ma talifaaaliga? O ni nai manatu nei. Filifili se manatu se tasi pe sili atu, pe fatu ni ou lava manatu. E mafai e tagata aoga ona galulue taitoatasi pe faatasi ma se paga.

  • Mafaufau ia lē itiiti ifo ma le tolu ni tulaga lea e faapea o le iloaina o perofeta a le Tama Faalelagi o ni tagatavaai e mafai ona fesoasoani e te tumau faamaoni ai i le Alii. Tusifaamaumau nei tulaga.

  • Suesue i se lauga o le konafesi aoao talu ai nei mai se tasi o le Au Peresitene Sili po o le Korama a Aposetolo e Toasefululua. Tusifaamaumau faataitaiga e faapupula mai ai o i latou o tagatavaai.

  • Valaaulia tagata aoga e faitau le “Savali mai le Au Peresitene Sili,” o loo maua i le pito i luma o le tamaitusi Mo le Malosi o le Autalavou (2022, 2). Tusifaamaumau pe faapefea ona e manatu o lenei savali ma tulaga faatonuina o loo aofia i lenei tamaitusi ua faaalia ai o sui o le Au Peresitene Sili o ni tagatavaai.

  • Tusifaamaumau faamanuiaga ua maua e oe po o lou aiga mai le mulimuli i tagatavaai.

Valaaulia tagata aoga e faasoa mai mea na latou aoaoina ma saunia.

Atonu e fesoasoani le iloa na faaliliu e le Tupu o Mosaea talafaamaumau (tagai Mosaea 28:11–19). O le a mafai ona e faitauina se vaega o na faamaumauga pe a e suesueina le tusi a Eteru.

E oo lava a o le’i faaliliuina talafaamaumau, sa aafia le Tupu o Limae i le malamalama e faapea e mafai e le Tupu o Mosaea ona faaliliu. Faitau le Mosaea 8:19–20, ma vaavaai pe na faapefea ona tali atu le Tupu o Limae ina ua ia iloa e valaauina e le Atua perofeta, tagatavaai, ma talifaaaliga.

  • Na faapefea e le mauaina o lenei malamalama ona aafia ai Limae?

Mafaufau loloto i ou lagona e uiga i le sauniaina e le Tama Faalelagi o perofeta, tagatavaai, ma talifaaaliga e taialaina i tatou i aso nei. Atonu e te faamaumauina ou manatu i lau api talaaga mo suesuega.

Faasoa atu lau molimau i le taua o perofeta ma le auala ua latou faamanuiaina ai lou olaga.