Atamai i Aoaoga Faavae Iloiloga 7

Faaaoga Fuaitau o le Atamai i Aoaoga Faavae

O se tasi faamoemoega autu o le atamai i aoaoga faavae, ma o lenei lesona e faapitoa lava, o le fesoasoani lea ia te oe e aoao pe faapefea ona faaaoga le aoaoga faavae o loo aoaoina i fuaitau o mau o le atamai i aoaoga faavae i tulaga moni o le olaga.

Fesoasoani i tagata aoga e saili tali i a latou fesili. E le o se tiutetauave o se faiaoga le tali o fesili uma e fesili mai ai tagata aoga. Fesoasoani i tagata aoga e faaaoga ia mataupu faavae o le mauaina o le malamalama faaleagaga ina ia mafai ai ona latou maua tali mo i latou lava. Uunaia tagata aoga e liliu atu ma le faatuatua ma faalagolago i le Alii.

Sauniuniga a le tagata aoga: Valaaulia tagata aoga e iloilo ni nai fuaitau o le atamai i aoaoga faavae ua uma ona latou suesueina ma mafaufau loloto pe faapefea ona faatatau na fuaitau i le olaga o se talavou i aso nei.

Gaoioiga e Mafai Ona Aoao Ai

Atonu e manaomia le aoaoina se lesona o le fuaitau o le atamai i aoaoga faavae e suitulaga i lenei lesona. Tagai i le faasologa faatulagaina o lesona ua saunia e lou faatonu o le eria po o le itulagi po o le taitai faamaopoopo ia mautinoa o lesona taitasi o fuaitau o le atamai i aoaoga faavae o le a aoaoina a o faagasolo vasega seminare.

E mafai e Iesu Keriso ma Lana talalelei ona suia olaga.

O le faaaogaina o tusitusiga paia i o tatou olaga o le faatinoina lea o mea latou te aoao mai.

Mafaufau e faaali le vitio lenei o se faataitaiga o le faaaogaina o upumoni faatusi paia e mafai ona uunaia ai o tatou olaga, pe faasoa atu se tala patino e faamanino ai lenei manatu.

Ina ia vaai i se faataitaiga o se tamaitai talavou ma lona tamā o faaaogaina upumoni o loo aoao mai i le Mosaea 3:19, matamata i le “Ua Ia Aoao i Tatou e Tuu Ese le Tagata Natura” (10:51) mai le faailotaimi 0:00 i le 5:15. E mafai ona maua lenei vitio i le ChurchofJesusChrist.org.

Mafaufau e fai le gaoioiga lenei i luga o le laupapa o se vasega ma valaaulia tagata aoga e faamaea ona fai i a latou api talaaga mo suesuega. Talanoa faapuupuu tali a tagata aoga.

Tusi se laina i lalo i le ogatotonu o se itulau i lau api talaaga mo suesuega. I le pito i luga o le tasi itu tusi ai le “[Olaga] Muamua,” ma i le pito i luga o le isi itu tusi ai le “[Olaga] Mulimuli Ane.” Mafaufau i ni nai faataitaiga o tagata e te iloa po o tagata i tusitusiga paia na faaleleia o latou olaga e ala i le aoaoina ma le faaaogaina o upumoni o le talalelei a Iesu Keriso o lo o i ai i tusitusiga paia. I le koluma “[Olaga] Muamua”, lisi faapuupuu upu po o fasifuaitau e faamatala ai pe na faape’i tagata po o mea na latou faia a o lei faaaogaina tusitusiga paia. I le koluma “[Olaga] Mulimuli Ane”, faamatala faapuupuu ia suiga na fesoasoani le Faaola ia i latou e fai a o latou faaaogaina upumoni mai tusitusiga paia.

• Na faapefea ona avea tusitusiga paia ma meafaigaluega i le Faaola e fesoasoani ai i na tagata e faia ni suiga?

Tusi se vaaiga faataitai e uiga i se tasi o lau tupulaga o loo feagai ma luitau atonu e taatele i le autalavou i la outou eria. O le vaaiga faataitai e mafai ona moni pe mafaufauina ae e le tatau ona faamatalaina ai se tasi e ono iloa e tagata o lau vasega po o le faiaoga. Ia aofia ai faamatalaga e pei o o latou tausaga, itupa, tulaga faaleaiga, pe o i latou o ni tagata O Le Ekalesia a Iesu Keriso o le Au Paia o Aso e Gata Ai, ma ni nai faafitauli po o luitau o lo o feagai ma i latou i le taimi nei.

A uma loa ona tusia i lalo e tagata aoga a latou vaaiga faataitai, atonu e aoga le tuu atu ia i latou e tuu se faailoga tulaga ese i luga o le pepa ina ia latou iloa ai o latou e ona ia mea. Ona mafai lea ona latou faafesuiai ma se isi tagata aoga i le vasega. I se isi itu, e mafai e tagata aoga uma ona ave i totonu a latou pepa. E mafai ona e faafefiloiina pepa ona toe tufa atu lea ina ia tofu le tagata aoga ma se vaaiga faataitai na tusia e se tasi o le vasega.

Valaaulia tagata aoga e mafaufau loloto ma atonu e tusi a latou tali i fesili nei e faavae i le vaaiga faataitai lea faatoa latou mauaina mai se tasi o le vasega pe faavae i a latou lava vaaiga faataitai pe afai latou te lei faafesuiaia.

• E tusa ai ma tulaga o lo o i ai nei talavou ma faafitauli o lo o feagai ma i latou, o a nisi o a latou fesili atonu o i ai ma lagona atonu o lo o latou lagonaina? Aisea?

• O le a se mea ua e iloa e uiga i lagona o le Faaola e uiga ia i latou ma le auala e mafai ona Ia fesoasoani ai ia i latou?

Malamalama ma le faaaogaina o tusitusiga paia

Toe iloilo fuaitau nei o le atamai i aoaoga faavae mai le afa muamua o le Tusi a Mamona, ma vaavaai mo fuaitau e te lagona atonu e aoga mo le autalavou i lau vaaiga faataitai ina ia malamalama ai ma faaaoga.

Faaali pe tuu atu i tagata aoga le siata lenei.

Mau Faasino	Fasifuaitau Autu o le Mau
Mau Faasino 1 Nifae 3:7	Fasifuaitau Autu o le Mau “O le a ou alu ma fai mea ua poloaiina e le Alii.”
Mau Faasino 2 Nifae 2:25	Fasifuaitau Autu o le Mau “Na pa’ū Atamu ina ia i ai tagata; ma ua i ai tagata, ina ia latou maua le olioli.”
Mau Faasino 2 Nifae 2:27	Fasifuaitau Autu o le Mau “Ua latou saoloto e filifili le saolotoga ma le ola e faavavau … pe … [o] le faatagataotauaina ma le oti.”
Mau Faasino 2 Nifae 26:33	Fasifuaitau Autu o le Mau “Ua tutusa tagata uma i le Atua.”
Mau Faasino 2 Nifae 28:30	Fasifuaitau Autu o le Mau O le Atua e “tuu atu i le fanauga a tagata lea fuaitau i luga o lea fuaitau, ma lea mataupu i luga o lea mataupu.”
Mau Faasino 2 Nifae 32:3	Fasifuaitau Autu o le Mau “Ia taumamafa fiafia i afioga a Keriso; aua faauta, o afioga a Keriso o le a taʼu mai ai ia te outou mea uma e tatau ona outou faia.”
Mau Faasino 2 Nifae 32:8–9	Fasifuaitau Autu o le Mau “E ao ina outou tatalo e le aunoa.”
Mau Faasino Mosaea 2:17	Fasifuaitau Autu o le Mau “Pe a outou auauna atu i o outou uso a tagata, ua nao lo outou auauna atu lava lea i lo outou Atua.”
Mau Faasino Mosaea 2:41	Fasifuaitau Autu o le Mau “O i latou o e e tausi i poloaiga a le Atua … e faamanuiaina i latou i mea uma.”
Mau Faasino Mosaea 3:19	Fasifuaitau Autu o le Mau “[Tuu] ese le tagata natura ma [avea] ma tagata paia e ala i le togiola a Keriso le Alii.”
Mau Faasino Mosaea 4:9	Fasifuaitau Autu o le Mau “Ia talitonu i le Atua; … ia talitonu ua ia te ia le poto uma.”
Mau Faasino Mosaea 18:8–10	Fasifuaitau Autu o le Mau Ia “papatisoina i le suafa o le Alii, o se molimau … ua outou ulu atu i se feagaiga faatasi ma ia.”

Faaali atu faatonuga nei, ma valaaulia tagata aoga e faamaea le gaoioiga o lo o i luga o le pepa na latou mauaina mai tagata o le latou vasega po o luga o a latou lava pepa pe afai latou te lei faafesuiaia.

Tusi se tusi puupuu e fesoasoani ai i lenei tagata i o latou tulaga o i ai nei. Ia aofia ai mea nei:

• Ia le itiiti ifo ma le tasi se fuaitau o le atamai i aoaoga faavae mai le siata o i luga ma isi fuaitau aoga o mau, faatasi ai ma upumoni mai fuaitau e te lagona o le a aoga i lenei talavou.

• O ni nai auala e mafai ona latou faaaoga ai na upumoni ma pe o a faamanuiaga atonu latou te maua mai le Tama Faalelagi ao latou faia. Atonu e fesoasoani le faasoa atu o se faataitaiga o le auala na faaaogaina ai e oe, o se tasi e te iloa, po o se tasi i tusitusiga paia nā upumoni ma faamanuiaga na mulimuli mai ai.

• O le ala e mafai ai e le Tama Faalelagi ma Iesu Keriso ona fesoasoani i le autalavou e faaaoga nei upumoni.

A uma ua lava se taimi, valaaulia tagata aoga e aumai a latou tusi ma tuu i luga o le fola i le mea e mafai ona iloa lelei atu ai. Valaaulia tagata aoga e sue le pepa o i ai a latou vaaiga faataitai ma faitau le tali na tuuina atu e tagata o le latou vasega. Afai e i ai se taimi, e mafai e tagata aoga ona filifili se isi fuaitau o le atamai i aoaoga faavae e faatatau i le tulaga faataitai na latou fatuina. A uma ona latou faia, valaaulia i latou e faasoa mai mea na latou aoaoina mai lenei gaoioiga. Fai atu ia i latou e faasoa mai ni auala na latou lagonaina ai le alofa o le Tama Faalelagi ma Iesu Keriso a o latou faia le gaoioiga. Valaaulia i latou e mafaufau pe o le a le mea latou te mananao e faaaoga i o latou lava olaga e faavae i mea sa latou aoaoina ma lagonaina i lenei lesona.