Mosaea 9–10

“I Le Malosi o le Alii”

Mata e mafai ona taulai atu i se mea tatou te mananao e faia ni faaiuga e aunoa ma le mafaufau i taunuuga e ono i ai? Sa matuai taulai atu Senifa i le toe foi atu i le laueleele o Nifae ma le toe fausia o aai iina lea na ia le mafaufau ai i nisi o taunuuga le lelei e mafai ona oo mai mai lana faaiuga. Ina ua uma ona oo i nisi o taunuuga, sa liliu atu Senifa ma lona nuu i le Alii i le faatuatua. O lenei lesona e mafai ona fesoasoani ia oe e iloa ai pe mafai faapefea ona e maua le malosi mai le Alii a o e tatalo ma agai atu i luma i le faatuatua.

Fesoasoani i tagata aoga ia iloa le Agaga Paia. Faamanatu i tagata aoga o le a musuia e le Agaga Paia i o latou mafaufau le taua o se aoaoga faavae po o se mataupu faavae o le talalelei. E mafai foi e le Agaga Paia ona musuia i latou i se manao e ola i le talalelei ma manatu i auala e mafai ona latou faia ai.

Sauniuniga a le tagata aoga: Valaaulia tagata aoga e sue se faauigaga o le upu soona-naunau. Uunaia i latou e o mai saunia e faasoa mai mea e soona naunau i ai le tupulaga talavou i nisi taimi ma luitau e mafai ona iu i ai.

Gaoioiga e Mafai Ona Aoao Ai

Gasetoto o le la

Faaali atu le fesili ma le ata lenei. I se isi itu, e mafai ona e amataina le vasega i le saunoaga lenei a Elder Gary E. Stevenson ona fai atu lea o fesili e lua o loo mulimuli mai.

• O le la e 400 taimi e telē ai i lo le masina, e faapefea la ona matautia le gasetoto o le masina, po o le poloka o le malamalama ma le mafanafana o le la e pei ona faaalia i le ata lenei?

Afai e le iloa e tagata aoga le tali, faamalamalama atu mea nei:

Ona e sili atu le latalata o le masina i le lalolagi nai lo le la, e mafai ona foliga mai e talitutusa lona lapoa ma le la ma punitia ai lona malamalama. E oo lava i se mea itiiti e pei o lou limamatua e mafai ona poloka ai lau vaaiga o le la pe afai e te faalatalataina atu i lou mata.

Mafaufau e valaaulia tagata aoga e faalatalata atu o latou limamatua i o latou mata e ufiufi ai a latou vaaiga o se mea e telē atu.

Sa faamalamalama mai e Elder Gary E. Stevenson o le Korama a Aposetolo e Toasefululua le auala e mafai ai ona avea se gasetoto o le la ma se talafaatusa mo o tatou olaga faaleagaga. Matamata i le “Gasetoto Faaleagaga” (15:12), o lo o maua i le ChurchofJesusChrist.org, mai le faailotaimi 1:01 i le 3:53, pe faitau le faamatalaga lenei.

I le tulaga lava e tasi lea e mafai ai e se masina itiiti lava ona punitia le la maoae, tineia ai lona malamalama ma le mafanafana, e mafai ona tupu se gasetoto faaleagaga pe a tatou faatagaina ni faalavefau laiti ma atuatuvale—ia tatou te fetaiai i o tatou olaga masani—ia faalatalata atili mai ma latou punitia ai le tulaga maoae, susulu, ma le mafanafana o le malamalama o Iesu Keriso ma Lana talalelei. (Gary E. Stevenson, “Gasetoto Faaleagaga,” Liahona, Nov. 2017, 45)

• O a nisi o mea laiti tatou te taulai atu i ai i nisi taimi e mafai ona punitia ai la tatou taulaiga ia Iesu Keriso ma Lana talalelei?

• O a luitau po o taunuuga le lelei e mafai ona oo mai i le taulai tele atu i nei mea laiti?

Mafaufau i mea atonu o loo e taulai atu i ai e mafai ona punitia ai lau vaai ia Iesu Keriso ma Lana talalelei. A o e suesue, vaavaai mo upumoni e mafai ona fesoasoani ia te oe e faafou ai lau taulaiga i le Alii ina ia aloese ai mai se “gasetoto faaleagaga.”

O le soona naunau o Senifa

I se lesona talu ai, sa e aoaoina ai na taitai e Senifa se vaega o tagata mai le laueleele o Saraemila e toe foi atu i le laueleele o Nifae.

Sa i ai ia Senifa se manao tele e mautofi i lenei laueleele, ae o lana taulaiga na taitai atu ai i faafitauli mo ia ma lona nuu.

Faitau le Mosaea 9:1–3, 6, 10–15 (tagai foi Mosaea 7:21), ma vaavaai pe na faapefea e le taulaiga a Senifa ma lona nuu ona taitai atu ai i taunuuga le lelei. Ia matau o le soona naunau o lona uiga o le manao tele e faataunuu pe maua se mea.

• O a nisi o taunuuga o le soona naunau ma telegese ai ona manatua le Alii?

Afai e tatau ai, fai atu i tagata aoga ni fesili e pei o le “E tusa ai ma le Mosaea 9:3, o a puapuaga na feagai ma Senifa ma lona nuu? Aisea?”

O se tasi o upumoni e mafai ona tatou aoaoina o le soona naunau ma le telegese ona manatua o le Alii e mafai ona taitai atu ai i taunuuga le lelei.

• O a nisi o auala atonu tatou te soona naunau ai ma ua faatelegese ai ona manatua le Alii i aso nei?

• O a ni taunuuga lē lelei e ono feagai ma i tatou?

O le liliu atu i le Alii

Sa nonofo filemu Senifa ma lona nuu mo le tele o tausaga a o lei saili le tupu o sa Lamana e faatino lana fuafuaga o le aumaia o i latou i le pologa. Faitau fuaitau nei e vaai ai pe na faapefea ona liliu atu Senifa ma lona nuu i le Alii ina ua o mai sa Lamana e faatoilalo i latou.

Faaali atu fuaitau ma fesili nei. Mafaufau e tuu tagata aoga i ni paga po o ni vaega toalaiti e faitau ia fuaitau ma talanoaina fesili a o lei tuuina atu i ni nai tagata aoga e faasoa mai o latou manatu i le vasega.

• Mosaea 9:14–19

• Mosaea 10:1–2, 6, 10–11, 19–20

• O a mea na faia e tagata e tuu atu ai lo latou faatuatuaga i le Alii? O a ni taunuuga na i ai?

• O a ni upumoni e mafai ona tatou aoaoina mai i lenei tala?

O se upumoni e tasi e mafai ona tatou aoao mai i lenei tala o le afai tatou te tatalo ma o atu i le faatuatua, e mafai ona tatou feagai ma o tatou luitau i le malosi o le Alii.

• O le a se mea ua uma ona e iloa e uiga i le Tama Faalelagi ma Iesu Keriso lea e tuuina atu ia te oe le mautinoa ina ia tuuina atu lou faatuatuaga ia i Laua e ala i le tatalo ma agai atu i luma i le faatuatua?

• O le a sou lagona i le iloaina o le a fesoasoani pea le Tama Faalelagi ma Iesu Keriso ia i tatou i o tatou luitau e ui lava ina ua tuanai ona tatou faia o ni mea sese?

• O a ni faataitaiga i lou olaga, olaga o isi, po o tusitusiga paia o loo faapupula mai ai lenei upumoni?

Ina ia vaai i se faataitaiga o lenei upumoni, mafaufau e matamata le “Tatalo” (4:12), o loo maua i le ChurchofJesusChrist.org, po o le faitau e uiga i le Faaola o loo faataitaia lenei mataupu faavae i le Luka 22:39–45.

O upumoni e faaaoga i le olaga moni

Faaali atu le vaaiga faataitai lenei pe valaaulia tagata aoga e fatu se vaaiga faataitai e talitutusa.

Vaai faalemafaufau o se tamaitai talavou ua ia masalomia lana molimau. Pe a ia mafaufau i tua i lona olaga, na ia iloa ai sa ia taulai atu i le mauaina o ni togi lelei ma saunia ai mo lona lumanai atonu na te lei faafaileleina ai lana molimau e pei ona sa tatau ai, ma o lea ua ia matuā masalomia ai lava pe moni le Ekalesia.

Tuu atu i tagata aoga ia lava se taimi e mafaufau loloto ai i fesili nei. Mafaufau e talanoaina a latou tali po o le valaaulia o tagata aoga e faatino le vaaiga faataitai, e avea ai le tasi tagata aoga e fai ma tamaitai talavou ma le isi o se uo o lo o taumafai e fesoasoani i ai. Valaaulia tagata aoga e mafaufau pe mafai faapefea ona faatatau a latou tali ia i latou lava.

Atonu e fesoasoani le fai atu o fesili tulitatao e pei o le “E faapefea e lena suiga i au tatalo ona maua ai se eseesega?” po o le “E faapefea ona suia lou olaga i se masina po o se tausaga mai le taimi nei pe afai e te mulimuli i na faatinoga e tumu i le faatuatua?”

• E mafai faapefea ona ia “tagi malosi atu i le Alii” (Mosaea 9:17)? E faapefea ona e faamatalaina lenei ituaiga o tatalo?

• E mafai faapefea ona ia faalagolago i le Alii ma agai atu i luma i le faatuatua ia Iesu Keriso pe a uma ona tagi malosi atu i le Alii?

• O le a se isi mea e mafai ona e fautuaina lenei tamaitai talavou e fai? Aisea?

Manatu ma Talaaga o Faamatalaga

Aisea e taua tele ai le agai atu i luma i le faatuatua?

Na aoao mai Elder David A. Bednar o le Korama o Aposetolo e Toasefululua:

O faamanuiaga e manaomia ai ni a tatou taumafaiga a o lei mafai ona tatou mauaina, ma o le tatalo, o se “ituaiga o galuega, o le auala tofia lea mo le mauaina o faamanuiaga aupito sili ona maualuluga o faamanuiaga uma” [Bible Dictionary, “Prayer”]. Tatou te fetaomi atu i luma ma tumau i le galuega mamana o le tatalo, i le maea ona tatou fai atu “amene,” e ala i le faatinoina o mea na tatou ta’u atu i le Tama Faalelagi. (David A. Bednar, “Ole Atu ma le Faatuatua,” Liahona, Me 2008, 95)

Na faamalosiau mai foi Peresitene Gordon B. Hinckley (1910–2008):

Tootuli i ou tulivae ma ole atu mo faamanuiaga a le Alii; ona e tulai lea i ou vae ma fai le mea ua poloaiina ai oe. Ona tuu atu lea o le mataupu i aao o le Alii. (Gordon B. Hinckley, “Mo Tina ma Tamaitai o le Ekalesia,” Liahona, Nov. 2003, 114)

O le a se faataitaiga o aso nei o le tagi atu i le Alii ma galue i le faatuatua?

Matamata i le “Uunaiga i le Afa” (7:26) e vaai ai i se faataitaiga a se tagata talavou o le Ekalesia i totonu o Fitafita o le Sami a le IS o lo o ola i lenei mataupu faavae i se tulaga faigata tele.

Gaoioiga Faaopoopo e Aoao Ai

O se isi taulaiga o le lesona

Tusi upu lagonaina ua sese pe faatiga, feitai (po o le ita), ma le inoino i luga o le laupapa. Valaaulia tagata aoga e faasoa mai pe faapefea ona fesootai nei lagona ma pe faapefea e le tasi ona taitaiina atu i le isi. Valaaulia i latou e faitau le Mosaea 10:11–18, ma vaavaai pe na faapefea ona aafia sa Lamana i nei lagona. Fai atu i tagata aoga e faailoa mai mataupu faavae. O nisi o faataitaiga o le taulai atu i mea sese ua iloa e mafai ona taitai atu ai i tatou e inoino i isi, faatuatuanai i le Atua, ma aafia ai i taunuuga e le manaomia. O le faatiga ma le taofimau i le ita e mafai ona taofia ai tagata taitoatasi ma a latou fanau mai le iloaina o le Alii ma Lona malosi.

Valaaulia tagata aoga e faasoa mai pe aisea e taua ai le malamalama i nei mataupu faavae, pe faapefea ona fesootai i o latou olaga, ma pe faapefea ona fesoasoani le Faaola pe a tatou lagonaina nei lagona.

Faatusatusaga ma eseesega o sa Nifae ma sa Lamana

Mafaufau e faaali atu le siata lenei. Valaaulia tagata aoga e faasoa mai mea e tutusa ma eseese ai faatinoga a le nuu o Senifa ma faatinoga a sa Lamana ma taunuuga o mea uma e lua. Valaaulia i latou e faasoa mai mea o lo o aoao mai e nei fuaitau e uiga i le Alii ma soo se mataupu faavae latou te vaaia o faaalia mai.

Senifa ma ona tagata	O Sa Lamana
Senifa ma ona tagata Mosaea 9:14–19; 10:1–2, 7, 9–10	O Sa Lamana Mosaea 9:12; 10:11, 19–20