“Mosiah 11–17: ‘Maghinulsol ug Mobalik ngadto sa Ginoo,’” Manwal sa Magtutudlo sa Basahon ni Mormon (2024)
“Mosiah 11–17,” Manwal sa Magtutudlo sa Basahon ni Mormon
Mosiah 11–17
“Maghinulsol ug Mobalik ngadto sa Ginoo”
Kasagaran mosulay kita sa pagpasidaan sa mga tawo nga atong gihigugma bahin sa mga desisyon nga makahatag og kasakit ug pag-antos. Ang Ginoo mipadala ni Abinadi nga adunay mensahe alang ni Hari Noah ug sa iyang katawhan sa paghinulsol ug paglikay sa pag-antos nga mahimong moabot tungod sa ilang makasasala nga mga kinaiya. Kini nga leksiyon makatabang nga madugangan ang imong tinguha sa pagdawat sa mga propeta sa Ginoo ug sa pagbuhat sa mga pagdapit nga ilang gihatag gikan sa Ginoo.
Andama ang imong kaugalingon pinaagi sa makugihong pagtuon sa mga kasulatan.Paningkamot nga kanunay magtuon sa konteksto ug unod sa mga tudling sa kasulatan. Pangitaa ang doktrina ug mga baroganan nga makahuluganon ug may kalabotan ug makatabang sa mga estudyante sa paghigugma ug pagsunod ni Jesukristo.
Pagpangandam sa estudyante: Dapita ang mga estudyante sa paghimo og mubo nga lista sa mga pagdapit nga ilang nadungog nga bag-o lang gihatag sa mga propeta. Hangyoa sila sa pagtambong nga andam sa pagpaambit kon sa unsang paagi kini nga mga pagdapit nahimong ebidensiya sa gugma ug pagpakabana sa Ginoo alang kanila.
Mga Posibleng Kalihokan sa Pagkat-on
Ang Ginoo nagpasidaan sa peligro
Ikonsiderar ang paghimo og senaryo nga makarelate ang imong mga estudyante aron matabangan sila sa pagsuhid sa daghang nagkalain-laing mga paagi nga makapahimangno sila sa uban bahin sa peligro.
Kunohay nga ikaw bag-o lang nakadawat og impormasyon bahin sa usa ka butang diin ang imong mga higala ug mga minahal anaa sa peligro.
-
Unsa ang pipila ka nagkalain-laing mga paagi nga mahimo nimong ipahibalo ang mensahe sa pasidaan ngadto kanila?
Ang Ginoo adunay daghang mga paagi sa pagpasidaan kanato. Ikonsiderar ang mosunod nga mga paagi:
Ikonsiderar ang pagpakita sa mosunod nga lista diha sa pisara.
-
Tambag gikan sa mga ginikanan
-
Mga pagpanudlo gikan sa mga propeta ug ubang mga lider sa Simbahan
-
Mga pagtulun-an diha sa mga kasulatan, sa simbahan, o sa seminary
-
Mga hunahuna o mga pagbati gikan sa Espiritu Santo
-
Uban pa:
Hatagi ang mga estudyante og panahon sa pagpamalandong sa mosunod:
Hunahunaa kon unsa ka kamaayo sa imong pagbuhat sa paglikay sa sala ug kapeligro tungod sa paagi sa imong pagpili sa pagsanong sa mga pasidaan sa Ginoo.
-
Hain nga mga paagi ang mura og labing lisod nga dawaton? Ngano man?
-
Unsa ang gisulti niini mahitungod sa Ginoo nga Siya mitabang kanato sa nagkalain-laing mga paagi?
Mahimo nimong isulat diha sa pisara ang mosunod nga kamatuoran ug ipasabot sa mga estudyante nga tun-an ninyo pag-ayo kini dinhi niini nga leksiyon: Ang Ginoo namulong kanato pinaagi sa Iyang mga propeta aron sa pagdapit kanato sa paghinulsol ug pagbalik ngadto Kaniya.
Ang Ginoo mitawag kang Noah ug sa iyang mga katawhan aron sa paghinulsol
Hinumdomi nga si Zeniff nangulo sa usa ka grupo sa mga tawo gikan sa Zarahemla ngadto sa yuta sa Nephi. Sa wala pa mamatay si Zeniff, iyang gitugyan ang gingharian ngadto sa iyang anak nga si Noah (tan-awa sa Mosiah 9–10). Si Noah ug ang mga pari nga iyang gipili nagpakabuhi nga daotan. Ilang gikombinsir ang mga tawo pinaagi sa pagpamakak ug maulog-ulugon nga mga pulong aron sa pagpakasala (tan-awa sa Mosiah 11:7, 11).
Basaha ang Mosiah 11:2, 14–15, 19 mangita sa mga sala nga nahimo ni Noah ug sa iyang mga katawhan. (Angbersikulo 19 naghulagway sa ilang reaksiyon human mapanalipdan ang ilang mga kaugalingon gikan sa pag-atake sa mga Lamanite.) Mahimo usab nimong tan-awon ang bidyo nga “Gisaysay ni Alma ang Kadautan ni Hari Noah | Mosiah 11–12, 17” (2:26), anaa sa https://www.churchofjesuschrist.org/study/video/mosiah-11-18/2020-03-0220-alma-recounts-the-wickedness-of-king-noah-mosiah-11-12-17-1080p?lang=ceb ChurchofJesusChrist.org.
Sa tibuok niini nga leksiyon, pangita og mga paagi aron pagtabang sa mga estudyante sa pagpahisama sa mga kasulatan ngadto sa atong panahon. Ang mosunod nga mga pangutana maoy usa ka paagi sa pagbuhat niini.
-
Sa unsa nga mga paagi nga ang mga pagpili nga gihimo ni Noah ug sa iyang katawhan matandi sa mga pagpili sa mga tawo karon?
-
Unsa ang pipila ka posibleng mga sangpotanan sa pagpuyo sama sa ilang gibuhat?
Ang Ginoo mitawag og propeta nga ginganlan og Abinadi aron paghatag sa mensahe ngadto kang Noah ug sa iyang katawhan aron sa pagtabang kanila nga makakita sa mga sangpotanan sa ilang mga binuhatan.
Basaha ang mensahe ni Abinadi sa Mosiah 11:20–25, mangita sa mga sangpotanan nga gipasidaan sa Ginoo. Ang pulong nga “alaot” sa bersikulo 20 nagpasabot og kasubo o kasakit.
-
Unsa ang pipila ka mga sangpotanan nga imong nakaplagan nga ang Ginoo mipasida-an ngadto sa mga tawo?
Bantayi ang gibalikbalik nga mga hugpong sa mga pulong nga “gawas kon sila maghinulsol” ug “gawas kon kini nga mga katawhan maghinulsol.” Mahimo nimong markahan kini nga mga pulong ug hunahunaa kon unsa ang imong makat-onan mahitungod sa Ginoo gikan niini nga mga hugpong sa mga pulong.
Basaha ang Mosiah 11:26–29, mangita kon unsay reaksiyon ni hari Noah ug sa uban ngadto kang Abinadi.
Pagtan-aw sa paghinulsol isip gasa sa gugma gikan sa Ginoo
Dapita ang mga estudyante sa pagtaho sa ilang pagpangandam alang sa klase ug paghimo og lista diha sa pisara sa mga pagdapit nga gihatag sa Ginoo sa atong panahon aron kita maghinulsol ug mag-usab. Pangandam sa pagpaambit og duha o tulo ka bag-ohay lang nga mga pagdapit gikan sa kinatibuk-ang komperensiya. Kini mao ang laing dapit diin ikaw makatabang sa mga estudyante sa pagpahisama sa mga kasulatan ngadto sa ilang mga kaugalingon.
-
Unsa ang pipila ka mga pagkaparehas o kalainan tali sa reaksiyon sa mga tawo sa panahon ni Abinadi ug sa reaksiyon sa katawhan sa atong panahon ngadto sa mga propeta? Ngano kaha nga ingon niini ang ilang reaksiyon?
Hatagi ang mga estudyante og igong panahon sa hilom aron sa pagpamalandong sa ilang personal nga pasalig sa pagpaminaw ngadto sa Dios, ilabi na sa dihang Siya mipasidaan kanila pinaagi sa Iyang mga propeta sa sala ug sa mga sangpotanan niini. Ang imong mga estudyante mahimong adunay nagkalain-laing mga hunahuna ug mga pagbati mahitungod sa mga propeta samtang sila mamalandong. Ang mosunod nga pamahayag makatabang sa mga estudyante nga makakita sa mga propeta isip ebidensiya sa gugma sa Dios.
Si Elder D. Todd Christofferson sa Korum sa Napulog Duha ka Apostoles mipasabot kon unsaon nato paglantaw ang pagdapit sa paghinulsol gikan sa mga propeta.
Ako dugay nang naaghat, ug usab mibati, sa mapanganduyon nga gugma sa mga propeta sa Dios sa ilang mga pagpasidaan batok sa sala. Sila wala gidasig pinaagi sa tinguha sa pagpanghimaraot. Ang ilang tinuod nga tinguha sama ra sa gugma sa Dios; gani, kini mao ang gugma sa Dios. Sila mohigugma niadtong kinsa sila gipadala, kon si kinsa man sila ug unsa pa man sila sama. Sama lang sa Ginoo, ang Iyang mga sulugoon dili gusto ni bisan kinsa nga mag-antos sa kasakit sa sala ug sa dili maayo nga mga pagpili. (D. Todd Christofferson, “Ang Gugma sa Dios,” Liahona, Nob. 2021, 17)
-
Sa unsang paagi nga ang pagsabot niini mahitungod sa mga propeta makaimpluwensiya sa imong tinguha sa pagbuhat sa ilang mga pagdapit?
Sa kalooy, ang Ginoo mihatag sa mga tawo og panahon sa pagbalik ngadto Kaniya ug paghinulsol sa ilang mga sala. Apan, sa dihang si Abinadi mibalik paglabay sa duha ka tuig, sila nasuko pag-usab ug nangita aron sa pag-akusar kaniya(tan-awa sa Mosiah 12:1, 9, 19).
Si Abinadi sa walay kahadlok mipamatuod nga ang mga pari wala magtudlo sa mga tawo sa pagsunod sa mga sugo sa Dios (tan-awa sa Mosiah 12:33–37; 13:12–25). Siya mipamatuod usab nga si Jesukristo moabot aron sa pagtubos sa tanang mga tawo ug nga ang kaluwasan posible lamang pinaagi sa Manunubos.(tan-awa sa Mosiah 15:1, 19). Sa dihang si Abinadi nakahuman sa pagpamatuod ni Jesukristo, ang iyang kinabuhi nameligro na usab. Apan niining higayona, mao usab ang kinabuhi sa usa sa mga pari, si Alma.
Basaha ang Mosiah 17:1–4 aron sa pagpangita sa mga tubag ni Noah ug Alma sa pagpamatuod ni Abinadi kang Kristo.
-
Giunsa kaha niining hilabihan ka lahi nga mga tubag pagtabang kanato nga makasabot?
Human sa tulo ka adlaw nga pagkabilanggo, si Abinadi gidala pag-usab sa atubangan ni Hari Noah. Si Noah miingon nga iyang patyon si Abinadi gawas kon siya andam sa paglimod sa mga kamatuoran nga iyang gitudlo (tan-awa sa Mosiah 17:5–8).
Basaha ang Mosiah 17:9–10, 13, mangita sa tubag ni Abinadi sa hangyo sa hari sa paglimod sa iyang pagpamatuod. O mahimo nimong tan-awon ang bidyo nga “Si Abinadi Nag-antos sa Kamatayon tungod sa Iyang Pagtuo | Mosiah 16–17” (4:28), anaa sa https://www.churchofjesuschrist.org/study/video/mosiah-11-18/2020-03-0260-abinadi-suffers-death-for-his-faith-mosiah-16-17-1080p?lang=ceb ChurchofJesusChrist.org.
-
Unsa ang imong nakat-onan gikan sa ehemplo ni Abinadi?
-
Sa unsang paagi kaha kana makaimpluwensiya sa paagi sa imong pagsanong sa Ginoo ug sa Iyang mga propeta?
Ikonsiderar ang pagpaambit og pagpamatuod sa tahas sa mga propeta sa pagpamatuod ni Jesukristo ug pagdapit kanato sa paghinulsol.