Mosiah 11–17

Kinatibuk-ang Pagpasabot

Ang Ginoo mipadala ni Abinadi nga adunay mensahe alang ni Hari Noah ug sa iyang katawhan sa paghinulsol ug paglikay sa pag-antos nga mahimong moabot tungod sa ilang makasasala nga mga kinaiya. Gitudloan ni Abinadi si Noah ug ang iyang mga pari mahitungod sa tahas ni Jesukristo sa ilang kaluwasan ug ang kamahinungdanon sa pagbaton sa mga sugo sa Dios nga mahisulat sa ilang mga kasingkasing. Bisan tuod si Hari Noah andam sa pagpatay kaniya, si Abinadi nasayod nga ang Dios motugot kaniya sa paghuman sa mensahe nga siya gipadala aron sa pagpahayag. Si Alma, usa sa mga pari ni Hari Noah, mituo kang Abinadi. Human sa pagpahayag sa iyang mensahe ug pagpamatuod ni Jesukristo, si Abinadi gipatay.

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang kinahanglan nga andamon daan alang sa matag leksiyon.

Mosiah 11–17

Katuyoan sa leksiyon: Kini nga leksiyon makatabang nga madugangan ang tinguha sa mga estudyante sa pagdawat sa mga propeta sa Ginoo ug sa pagbuhat sa mga pagdapit nga ilang gihatag gikan sa Ginoo.

• Pagpangandam sa estudyante: Dapita ang mga estudyante sa paghimo og mubo nga lista sa mga pagdapit nga ilang nadungog nga bag-o lang gihatag sa mga propeta. Hangyoa sila sa pagtambong nga andam sa pagpaambit kon sa unsang paagi kini nga mga pagdapit nahimong ebidensiya sa gugma ug pagpakabana sa Ginoo alang kanila.

• Mga bidyo: “Gisaysay ni Alma ang Kadautan ni Hari Noah ” (2:26); “Ang Gugma sa Dios” (13:11; tan-awa gikan sa time code 6:35 hangtod sa 7:04); “Si Abinadi Nag-antos sa Kamatayon tungod sa Iyang Pagtuo” (4:28)

• Sugyot sa pagtudlo pinaagi sa videoconference: Ikonsiderar ang pagpakita og digital nga bersiyon sa mga kasulatan. I-highlight ang gibalikbalik nga hugpong sa mga pulong nga “gawas kon sila maghinulsol” diha sa Mosiah 11:20–25 ug ipakita sa mga estudyante ang ehemplo kon unsaon pagmarka ang gibalikbalik nga mga hugpong sa mga pulong diha sa mga kasulatan.

Mosiah 12–13

Katuyoan sa leksiyon: Kini nga leksiyon makatabang sa mga estudyante nga mas magsunod ni Jesukristo samtang ilang isulat ang mga sugo diha sa ilang mga kasingkasing.

• Pagpangandam sa estudyante: Mahimong mohangyo ang mga estudyante sa usa ka sakop sa pamilya o higala sa pagpaambit og usa ka kasinatian sa dihang ang usa ka sugo nahimong personal nga makahuluganon ngadto kaniya.

• Bidyo: “Si Abinadi Nagpamatuod sa atubangan ni Hari Noah ug sa Iyang mga Pari” (4:35)

• Sugyot sa pagtudlo pinaagi sa videoconference: Sa higayon nga hangyoon ang mga estudyante sa pag-ila sa matag usa sa Napulo ka Sugo, ikonsiderar ang pagdapit kanila sa paglista sa mga sugo diha sa chat aron masuta kon mahinumdoman ba nila ang tanang 10 isip usa ka klase.

Mosiah 14–16

Katuyoan sa leksiyon: Kini nga leksiyon makatabang sa mga estudyante sa pag-ila sa kamahinungdanon sa pagkahibalo kang Jesukristo isip ang bugtong makatubos kanato gikan sa sala ug kamatayon.

• Pagpangandam sa estudyante: Dapita ang mga estudyante sa pagpamalandong kon hain sa mga tahas ug mga titulo ni Jesukristo ang labing makahuluganon ngadto kanila ug ngano.

• Bidyo: “Katubsanan” (15:21; tan-awa gikan sa time code 0:59 hangtod sa 1:44)

• Sugyot sa pagtudlo pinaagi sa videoconference: Ikonsiderar ang paggrupo sa mga estudyante ngadto sa mga breakout room ug i-assign ang matag grupo sa usa sa tulo ka aghat sa pagtuon [study prompts] diha sa leksiyon. Mahimong magtuon ang mga estudyante sa ilang gi-assign nga mga bersikulo ug mangandam sa pagpaambit sa unsay ilang nakat-onan ngadto sa tibuok klase.

Sukda ang Imong Nakat-onan 4

Katuyoan sa leksiyon: Kini nga leksiyon gituyo aron sa pagtabang sa mga estudyante sa pagtimbang-timbang sa mga tumong nga ilang gitakda ug sa paglambo nga ilang nasinati hangtod karon atol sa ilang pagtuon sa Basahon ni Mormon.

• Pagpangandam sa estudyante: Ikonsiderar ang pagdapit sa mga estudyante sa pagpakig-istorya sa usa ka ginikanan o higala mahitungod sa unsay pangbuhaton sa mga propeta ug sa unsang paagi ang mga propeta nakaimpluwensiya o nakapanalangin kanila.

• Butang nga ipakita: Usa ka ehemplo sa usa ka mind map

• Sugyot sa pagtudlo pinaagi sa videoconference: Ikonsiderar ang pag-grupo sa mga estudyante ngadto sa mga breakout room. Mahimong magpuli-puli ang mga estudyante sa pagpasabot sa tahas sa mga propeta ngadto sa ilang grupo. Laing kapilian mao ang paghimo og drama-drama nga senaryo diin ang pipila ka mga estudyante mangutana ug ang ubang mga estudyante nagtudlo sa mga kamatuoran mahitungod sa mga propeta.

Rebyo 8 sa Doktrinal nga Kahanas

Katuyoan sa leksiyon: Kini nga leksiyon gituyo aron sa pagtabang sa mga estudyante sa pagsag-ulo sa usa o daghan pa nga mga pakisayran sa kasulatan ug sa mahinungdanon nga mga hugpong sa mga pulong sa kasulatan gikan sa unang 12 ka mga tudling sa doktrinal nga kahanas diha sa Basahon ni Mormon.

• Pagpangandam sa estudyante: Dapita ang mga estudyante sa pagdala o sa pag-andam sa paghulagway sa ilang paborito nga hulagway ni Jesukristo ug sa pagpaambit kon unsay nakatabang niini kanila sa paghinumdom mahitungod Kaniya.

• Mga Hulagway: Mga hulagway sa Manluluwas

• Sugyot sa pagtudlo pinaagi sa videoconference: Atol sa pagbansay sa pagdrowing, ikonsiderar ang pagdapit sa mga estudyante sa pag-mute sa ilang mga mikropono ug pagpalong sa ilang mga camera. Hatagi sila og 10–15 ka minuto sa paghimo sa ilang mga drowing diha sa papel o gamit ang software sa ilang mga device. Mahimo kang magpatukar og mga kanta sa The Tabernacle Choir sa Temple Square o uban pang makabayaw nga espirituhanong musika. Dayon dapita ang mga estudyante sa pag-on og balik sa ilang mga mikropono ug mga kamera ug ipaambit ang ilang mga drowing.