Sukda ang Imong Nakat-onan 4

Enos–Mosiah 17

Kini nga leksiyon gituyo aron sa pagtabang kanimo sa pagtimbang-timbang sa mga tumong nga imong gitakda ug sa paglambo nga imong nasinati hangtod karon atol sa imong pagtuon sa Basahon ni Mormon.

Pagtabang sa mga estudyante sa pagbuhat sa personal nga pagpadayag.Aron makalihok sumala sa pagpadayag, ang mga estudyante kinahanglang makaila nga sila nakadawat og pagpadayag. Tabangi ang mga estudyante nga makasabot nga ang ilang espirituhanong mga pagbati nalambigit sa Espiritu Santo. Pinaagi sa paghisgot kon unsaon paggamit ang mga baroganan sa ebanghelyo, gihatagan nimo ang Espiritu Santo og kahigayonan sa pag-aghat sa mga estudyante kon unsay angay nilang buhaton aron mahimong mas mahisama ni Jesukristo.

Pagpangandam sa estudyante: Ikonsiderar ang pagdapit sa mga estudyante sa pagpakig-istorya sa usa ka ginikanan o higala mahitungod sa unsay pangbuhaton sa mga propeta ug sa unsang paagi ang mga propeta nakaimpluwensiya o nakapanalangin kanila.

Mga Posibleng Kalihokan sa Pagkat-on

Ang mosunod nga mga kalihokan gituyo aron sa pagtabang sa mga estudyante sa pagtimbang-timbang sa ilang mga tumong, sa ilang abilidad sa pagpasabot sa mga pagtulun-an diha sa Basahon ni Mormon, ug sa unsang paagi nausab ang ilang mga kinaiya, mga tinguha, ug abilidad sa pagsunod sa ebanghelyo.

Ang imong klase mahimong nakatutok sa lain-laing mga kamatuoran sa pagtuon niini sa Enos–Mosiah 17. Kon mao, batia ang pagkagawasnon sa paghimo og mga kalihokan sa pagtimbang-timbang nga nagtumong niadtong lain-laing mga kamatuoran. Alang sa tabang sa pagpahiangay o paghimo sa mga kalihokan sa pagtimbang-timbang, tan-awa sa Pagbansay sa Pagtimbang-timbang, makita sa Seminary Curriculum Training sa https://www.churchofjesuschrist.org/study/manual/seminary-curriculum-training-2022/04-assessments-training?lang=ceb ChurchofJesusChrist.org.

“Motimbang-timbang … ug magpadayon sa pagpaningkamot”

Matag karon ug unya, importante nga mogahin og panahon sa pagpamalandong ug pagtimbang-timbang kon kumusta kita sa atong gipangbuhat. Si Elder Dale G. Renlund sa Korum sa Napulog Duha ka Apostoles miingon:

Akong pagdapit nga kitang tanan motimbang-timbang sa atong kinabuhi, maghinulsol, ug magpadayon sa pagpaningkamot. … Kon mag-usab kita, atong makita nga ang Dios sa tinuod mas naghunahuna kanato kon si kinsa kita ug kinsa kita sa umaabot, kay sa unsa kita kaniadto. (Dale G. Renlund, “Ang mga Santos sa Ulahing mga Adlaw Magpadayon sa Pagpaningkamot,” Liahona, Mayo 2015, 58)

Ang mga estudyante mahimong mamalandong sa mosunod nga mga pangutana. Kon gikinahanglan, gamita ang mga kalihokan diha sa leksiyon aron matabangan ang mga estudyante sa pagsukod sa kaugalingon sa mas piho nga mga dapit.

• Sa unsa nga mga paagi imong gibati nga ikaw naglambo o nag-usab tungod sa unsay imong nakat-onan gikan sa Basahon ni Mormon?

• Giunsa nimo pag-uswag sa mga tumong nga imong gitakda?

• Unsa ang gusto nimong ipadayon nga paningkamotan, o makaayo ba ang pagpili og usa ka lahi nga dapit [area] nga pagatutokan?

Ang mosunod nga mga kalihokan makatabang kanimo sa pagsukod sa imong pagsabot, sa imong kahibalo, ug sa pag-uswag nga imong gipaningkamotan nga mahimo. Dapita ang Espiritu Santo sa pagtabang kanimo nga makaila sa imong mga paningkamot ug mobati sa gugma sa Langitnong Amahan.

Pagpasabot sa tahas sa mga propeta

Ang mosunod nga kalihokan makatabang sa mga estudyante sa pagbansay sa pagpasabot sa tahas sa mga propeta. Sa pagsugod, mahimo nimong dapiton ang usa ka estudyante sa pagsaysay og balik sa istorya ni Abinadi.

Sa imong pagtuon mahitungod ni propeta Abinadi sa Mosiah 11–17, tingali imong namatikdan nga si Alma mituo nga siya usa ka propeta ug misunod sa iyang mga pagtulun-an samtang si Hari Noah ug ang ubang mga pari dayag nga misalikway kaniya. Mahimo nimong mamatikdan sa atong panahon nga ang ubang mga tawo midawat sa mga propeta samtang ang uban misalikway kanila.

Gamita ang mosunod nga mga kapanguhaan o ang uban nga imong makit-an sa pag-andam og mubo nga tubag sa pagtabang sa usa ka tawo nga makasabot unsa ang propeta ug nganong gikinahanglan ang mga propeta karon. Ilakip ang usa o daghang kasulatan aron suportahan ang imong tubag.

Alang sa pagkalainlain, mahimong mag-post ang mga estudyante og usa ka post sa social media o usa ka mubo nga bidyo nga mahimong ipaambit sa klase. Mahimo usab nga magtinagurha ang mga estudyante aron sa pag-andam sa ilang mga tubag.

Mahimo nimong ikonsiderar ang pagpakita sa mosunod nga mga kapanguhaan ug mga pangutana aron sa pagtabang sa mga estudyante samtang sila nangandam. Makatabang usab ang paglibot sa kwarto aron mas makatabang niadtong adunay mga pangutana.

Mga kapanguhaan sa kasulatan nga mahimong makatabang:

• Mosiah 8:13, 16–18

• Mosiah 11:20–21; 13:33; 15:11

• Pangitaa sa Giya Ngadto sa mga Kasulatan ang “ Propeta” sa https://www.churchofjesuschrist.org/study/scriptures/gs/prophet?lang=ceb topics.ChurchofJesusChrist.org.

Mga pangutana nga mahimo nimong hunahunaon sa paghimo sa imong tubag:

• Unsa ang usa ka propeta, ug unsay buhaton sa mga propeta?

• Unsa nga mga pangutana o sayop nga pagsabot ang mahimong aduna ang mga tawo mahitungod sa mga propeta?

• Unsa pa ang imong mapaambit aron matabangan ang uban nga makasabot nganong ang Dios nagtawag og mga propeta karon?

Hatagi og panahon ang mga estudyante sa pagpresentar sa ilang mga tubag o pagpuli-puli sa pagpasabot sa tahas sa mga propeta.

Pagtabang sa pagpundok sa Israel ug pagserbisyo sa uban

Kini nga kalihokan makatabang sa mga estudyante sa pag-follow up sa mga imbitasyon nga ilang gilihok ug pagtimbang-timbang sa ilang paglambo ug pag-uswag.

Usa sa mga kamatuoran nga gipadayag sa Dios pinaagi sa Iyang mga propeta mao nga ang Iyang buhat ug himaya mao ang pagtabang sa Iyang mga anak nga makab-ot ang kinabuhing dayon (tan-awa sa Moises 1:39). Diha sa Basahon ni Mormon, si Hari Benjamin mipasabot nga usa sa mga paagi nga kita makatabang nga makab-ot ang buhat sa Dios mao ang pagserbisyo sa uban (tan-awa sa Mosiah 2:17). Bag-ohay lang, si Presidente Bonnie H. Cordon, Kinatibuk-ang Presidente sa Young Women, mitudlo:

Ang atong mahangturon nga katuyoan mao nga moduol ngadto ni Kristo ug aktibo nga moabag sa Iyang talagsaon nga buhat. Sama kini ka yano sama sa pagbuhat sa unsay gitudlo ni Presidente [Russell M.] Nelson: “Bisan kanus-a nga mobuhat kita og bisan unsa sa pagtabang ni bisan kinsa … sa paghimo ug pagtuman sa ilang mga pakigsaad sa Dios, nagtabang kita sa pagpundok sa Israel.” Ug kon kita mobuhat sa Iyang trabaho uban Kaniya, kita mahimong makaila ug labaw nga mahigugma Kaniya. (Bonnie H. Cordon, “Duol ngadto kang Kristo ug Ayaw Pag-inusara,” Liahona, Nob. 2021, 11)

Hunahunaa ang mga tumong o mga plano nga tingale imong nahimo sa naunang mga leksiyon nga nagtabang kanimo sa pag-apil sa buhat sa Dios pinaagi sa:

• Pagtabang sa Ginoo sa Iyang buhat sa pagpundok sa Israel (tan-awa sa Jacob 5:71–72, 75)

• Pag-alagad sa uban sa Kristohanong paagi (tan-awa sa Mosiah 2:17)

• Pagpaningkamot sa lain nga tumong nimo karon nga may kalabotan sa ebanghelyo o gusto pang sugdan sa pagpaningkamot

Hatagi og panahon ang mga estudyante sa pagtubag sa mosunod nga mga pangutana diha sa ilang mga journal sa pagtuon. Mahimong sensitibo sa mga pag-aghat sa Espiritu kon imong dapiton ang mga estudyante sa pagpaambit og mga hunahuna sa ilang espirituhanong pag-uswag.

• Giunsa nimo (o nganong gusto nimo) nga mouswag niining dapita? Unsa ang imong gibuhat (o mabuhat) aron mahimo kini nga pag-uswag?

• Unsa ang pipila sa mga babag o mga kalisod ang imong nasinati (o gipaabot)? Giunsa (Unsaon) nimo pagpaningkamot sa pagbuntog kanila?

• Sa unsang paagi nimo nabati ang gugma sa Langitnong Amahan samtang imong gihimo kini nga tumong? Ngano sa imong hunahuna nga Siya mahimuot sa imong mga paningkamot?

Pagbati og kamaya ug hingpit nga kalipay pinaagi ni Jesukristo

Ang mosunod nga kalihokan gituyo aron matabangan ang mga estudyante sa pagtimbang-timbang sa lebel sa kamaya ug hingpit nga kalipay nga ilang nasinati pinaagi ni Jesukristo. Aron maaghat ang mga panumduman sa mga estudyante, mahimo nimong ikonsiderar ang pagpakita og mga litrato niining mga asoy sa kasulatan.

Sa imong pagtuon sa Basahon ni Mormon, nakabasa ka og mga asoy sa daghang mga tawo kinsa nakakaplag og kamaya ug kalipay pinaagi ni Jesukristo ug sa Iyang ebanghelyo. Paggahin og panahon sa pagrebyo sa pipila niini nga mga ehemplo. Naglakip kini sa mosunod:

• Si Lehi ug kadto kinsa miadto sa kahoy sa kinabuhi (tan-awa sa 1 Nephi 8:10–12, 30)

• Enos (tan-awa sa Enos 1:1–8)

• Ang mga katawhan ni Hari Benjamin, kinsa nagmaya tungod sa unsay ilang nakat-onan mahitungod ni Jesukristo ug sa Iyang ebanghelyo (tan-awa sa Mosiah 2:41; 4:3; 5:1–5)

Hunahunaa kon unsaon nimo paghulagway o pagpakita ang kalipay nga imong gibati pinaagi sa ebanghelyo ni Jesukristo.

Mahimo nimong ikonsiderar nga sugdan ang mosunod nga kalihokan sa mind map diha sa pisara isip usa ka klase sa dili pa motrabaho ang mga estudyante nga sila ra. Ipasalig sa mga estudyante nga ang ilang mga hunahuna pribado ug dili kinahanglan nga ipaambit.

Sa tunga sa blangko nga panid sa imong journal sa pagtuon o sa lahi nga piraso sa papel, isulat ang mga pulong nga Hingpit nga Kalipay ug Kamaya pinaagi ni Jesukristo. Pagdrowing og lingin sa palibot sa mga pulong. Karon sugdi ang pagdugang og mga ideya nga imong malambigit niini nga mga pulong. Sa pagsugod, mahimo nimong ikonsiderar kon unsaon nimo pagtubag ang mosunod nga mga pangutana.

• Gibati ba nimo nga ang ebanghelyo ni Jesukristo nakatampo sa hingpit nga kalipay sa imong kinabuhi? Ngano o nganong wala?

• Unsa ang imong nakat-onan sa Basahon ni Mormon nga nakatabang kanimo nga mobati nga mas malipayon?

• Gibati ba nimo nga mas maayo ang imong relasyon sa Langitnong Amahan ug ni Jesukristo tungod sa imong pagtuon sa kasulatan? Ngano o nganong wala?

Samtang makahunahuna ka og mga ideya, isulat kini sa imong papel ug lingini kini. Ikonektar sila sa usag usa o balik ngadto sa hugpong sa mga pulong sa tunga. Samtang nagdugang ka og daghang mga hunahuna ug mga ideya, ang imong mind map magsugod nga mahimong sama niini tan-awon:

Hatagi ang mga estudyante og panahon sa pagpadayon sa paghimo sa ilang personal nga mga mind map. Mahimo silang mogamit og lain-laing mga kolor sa mga lapis o mga bolpen aron sa paghatag og gibug-aton sa makahuluganon nga mga ideya.

Human matapos ang imong mind map, ikonsiderar ang pagbutang niini sa usa ka dapit diin makita nimo kini sa sunod semana. Mahimo kang mag-ampo sa Langitnong Amahan alang sa tabang sa pagpangita ug pag-ila sa mas dakong hingpit nga kalipay ug kamaya diha ni Jesukristo ug sa Iyang ebanghelyo.

Samtang dili tuyo nga kini ipaambit sa mga estudyante ang ilang mga mind map, mahimo nimong dapiton ang mga estudyante sa paghisgot kon unsay ilang gibati sa dihang gibuhat nila kini. Mahimong sensitibo ug sunda ang mga pag-aghat sa Espiritu kon magkonsiderar ba sa pagdapit sa mga estudyante sa pagpaambit sa ilang mga hunahuna.