Mosiah 12–13

Pagbaton sa mga Sugo nga Nahisulat sa Inyong Kasingkasing

Si Noah ug ang iyang mga pari mao unta ang espirituhanong mga lider. Apan, nagpuyo sila sa sala ug gitudloan ang ilang katawhan sa pagbuhat sa ingon. Gitudloan sila ni Abinadi mahitungod sa tahas ni Jesukristo sa ilang kaluwasan ug sa kamahinungdanon sa pagbaton sa mga sugo sa Dios nga nahisulat diha sa ilang mga kasingkasing. Sa tibuok niini nga leksiyon, imohang makat-onan nga mas mosunod ni Jesukristo samtang imong isulat ang mga sugo diha sa imong kasingkasing.

Pagkamasulundon ug gugma.Ang Manluluwas mitudlo, “Kon nahigugma kamo kanako, tumana ninyo ang akong mga sugo” (Juan 14:15). Kon ang pagkamasulundon gidasig sa gugma, kini mahimong mas natural ug makahuluganon. Tabangi ang mga estudyante nga makakita sa importante nga koneksiyon tali sa pagsunod sa ebanghelyo ug sa paghigugma sa Manluluwas.

Pagpangandam sa estudyante: Mahimong mohangyo ang mga estudyante sa usa ka sakop sa pamilya o higala sa pagpaambit og usa ka kasinatian sa dihang ang usa ka sugo nahimong personal nga makahuluganon ngadto kaniya.

Mga Posibleng Kalihokan sa Pagkat-on

Unsaon nimo paggrado ang imong pagkamasulundon?

Mahimo nimong isulat diha sa pisara ang mosunod nga duha ka pamahayag ug dayon ipasukod sa mga estudyante sa hilom kon unsa ka maayo ang paghulagway niini nga mga pamahayag ngadto kanila sa sukdanan nga 1–10 (10 nagpasabot nga kini maayo kaayo nga naghulagway kanila).

• AKONG GIBATI ang kamahinungdanon sa mga sugo sa Dios

• AKO NAGSUNOD sa mga sugo sa Dios

• Unsa kaha ang kabalaka kon ang usa ka tawo mobati sa kamahinungdanon sa mga sugo sa Dios apan dili motuman?

• Unsa kaha ang kabalaka kon ang usa ka tawo mosunod sa mga sugo sa Dios apan wala mobati sa kamahinungdanon niini?

Samtang magtuon ka niini nga leksiyon, pamalandonga ang imong mga pagbati ug pagsunod sa mga sugo sa Dios.

Pagkamasulundon nga naggikan sa kasingkasing

Human mabalhog sa bilanggoan tungod sa pagpamatuod sa pagkadautan ni Hari Noah (tan-awa sa Mosiah 12:9–17), si Abinadi gidala sa atubangan ni Noah ug sa iyang mga pari. Gibadlong sila ni Abinadi sa pagpakaaron-ingnon nga nakasabot ug nagtudlo sa pulong sa Dios nga wala gani nila gamita ang ilang mga kasingkasing aron sa pagsabot. Ang mga pari ni Noah nangangkon nga nagtudlo sa balaod ni Moises, apan wala sila motuman sa balaod ni Moises ni nagsunod sa Napulo ka Sugo. Gitudloan ni Abinadi si Noah ug ang iyang mga pari sa kamahinungdanon sa pagsunod sa mga sugo (tan-awa sa Mosiah 12:25–37).

Mahimo nimong pilion nga gamiton ang mga bahin o ang tanan nga bidyo sa “Si Abinadi Nagpamatuod sa atubangan ni Hari Noah ug sa Iyang mga Pari” (4:35), anaa sa https://www.churchofjesuschrist.org/study/video/mosiah-11-18/2020-03-0260-abinadi-suffers-death-for-his-faith-mosiah-16-17-1080p?lang=ceb ChurchofJesusChrist.org, sa kinatibuk-an sa leksiyon.

Sa dili pa basahon sa mga estudyante ang mosunod nga mga tudling, mahimo nimo silang hangyoon sa paglista og bisan pila sa Napulo ka Sugo kutob sa ilang mahimo gikan sa ilang panumdoman. Samtang isulti sa mga estudyante ang mga sugo, isulat kini diha sa pisara. Mahimo dayon nilang gamiton ang mosunod nga pagpangita sa kasulatan aron makompleto ang lista.

Basaha ang Mosiah 12:34–36; 13:15–24 ug ilha ang matag usa sa Napulo ka Sugo. Ikonsiderar ang pagbutang og numero niini diha sa imong mga kasulatan.

Basaha ang Mosiah 13:11 ug pangitaa ang usa sa mga rason nga si Abinadi mitudlo sa Napulo ka mga Sugo ngadto ni Noah ug sa iyang mga pari.

• Unsa nga mga kamatuoran ang atong makat-onan gikan niini nga bersikulo?

Usa ka kamatuoran nga atong makat-onan gikan niini nga bersikulo mao nga ang mga sugo sa Dios kinahanglang mahisulat sa atong mga kasingkasing.

• Unsa sa imong hunahuna ang gipasabot nga ang mga sugo nahisulat sa atong mga kasingkasing?

• Mahimo bang magmasulundon ang mga tawo sa usa ka sugo nga wala kini mahisulat sa ilang mga kasingkasing? Ngano o nganong dili?

• Sa imong hunahuna sa unsang paagi nga ang pagkasulat sa mga sugo diha sa atong mga kasingkasing makatabang kanato sa pagsunod ni Jesukristo?

Si Presidente Bonnie L. Oscarson, kanhi Kinatibuk-ang Presidente sa Young Women, mitudlo og importante nga mga kamatuoran nga makatabang nato nga makasabot kon unsay gipasabot sa mahisulat ang mga sugo sa atong mga kasingkasing:

Gikinahanglan nato nga hangupon ang ebanghelyo gikan sa atong hunahuna hangtod sa atong kasingkasing! Mahimo nga basta na lang kita mosunod sa ebanghelyo tungod kay gilauman kini o tungod kay kultura kini diin kita nagdako o tungod kay nabatasan na kini. …

Tanan kita kinahanglang magtinguha nga mausab ang atong mga kasingkasing ug kinaiyahan aron dili na kita magtinguha sa pagsunod sa mga pamaagi sa kalibotan apan sa pagpahimuot sa Dios. (Bonnie L. Oscarson, “Mituo Ba Ako?” Liahona, Mayo 2016, 88)

• Sa imong hunahuna sa unsang paagi mahangop sa mga tawo ang ebanghelyo gikan sa ilang mga hunahuna hangtod sa ilang mga kasingkasing?

Ikonsiderar ang pagmodelo sa mosunod nga kalihokan pinaagi sa pagpili og usa sa Napulo ka Sugo ug magtinabangay sa pagtubag sa mga pangutana isip usa ka klase. Pananglitan, ang sugo nga “Ayaw kamo pangawat,” kon mahisulat sa kasingkasing sa usa ka tawo, mahimong motultol sa usa ka tawo nga mahimong kugihan ug dili manglimbong. Sa samang paagi, ang “Ayaw kamo pagpatay” mahimong motultol sa usa ka tawo sa pagtahod sa uban ug maningkamot nga dili magpadala sa kasuko. Mahimo dayon nimong ipakompleto sa mga estudyante ang kalihokan nga magtinagsa, magtinagurha, o sa gagmay nga mga grupo.

Ang laing mga kapilian mao ang paghatag og lain-laing mga sugo ngadto sa mga estudyante ug ipaambit nila ang ilang mga tubag sa mga pangutana ngadto sa usa ka kapares, magpuli-puli og kapares kon mahuman na sila. O mahimong ang mga estudyante mag-drama-drama kon unsay buhaton sa usa ka tawo kon ang sugo nahisulat sa iyang kasingkasing.

Pagpili og duha o tulo sa Napulo ka Sugo. Alang sa matag usa, pagdrowing og kasingkasing ug isulat ang sugo ibabaw sa kasingkasing. Dayon isulat ang mga tubag sa mosunod nga mga pangutana sa matag kasingkasing:

• Unsa kaha ang mahimo o dili mahimo sa mga tawo kon kini nga sugo nahisulat sa ilang mga kasingkasing?

• Unsa ang mahimo sa mga tawo aron matabangan nga kini nga sugo mas hingpit nga mahisulat sa ilang mga kasingkasing?

Paghinumdom ni Jesukristo

Agi og dugang nga ang Napulo ka Sugo wala nahisulat sa ilang mga kasingkasing, si Noah ug ang iyang mga pari wala makasabot sa katuyoan sa balaod ni Moises.

Basaha ang Mosiah 13:28–32, mangita sa katuyoan sa balaod ni Moises.

• Unsa ang gusto ni Abinadi nga masabtan sa mga pari ni Noah mahitungod sa balaod ni Moises?

Si Presidente Dallin H. Oaks sa Unang Kapangulohan mitudlo mahitungod sa panginahanglan alang kang Jesukristo:

Ang mga lalaki ug babaye … makapahinabo sa dagkong mga butang. Apan human sa tanan natong pagkamasulundon ug maayong mga buhat, dili kita maluwas gikan sa kamatayon o sa mga epekto sa atong indibidwal nga mga sala kon wala ang grasya nga gihatag pinaagi sa pag-ula ni Jesukristo. Ang Basahon ni Mormon naghimo niini nga tataw. Nagtudlo kini nga “ang kaluwasan dili moabot pinaagi sa balaod lamang” (Mosiah 13:28). Sa laing pagkasulti, ang kaluwasan dili moabot sa pagsunod lamang sa mga sugo. “Ug pinaagi sa balaod walay tawo nga hatagan og kaangayan” (2 Nephi 2:5) … Ang tawo dili makaangkon sa iyang kaugalingong kaluwasan. (Dallin H. Oaks, “Another Testament of Jesus Christ,” Ensign, Mar. 1994, 67)

• Sa unsang paagi ang mga sugo makatabang kanato sa paghinumdom ni Jesukristo?

• Sa unsang paagi sa imong hunahuna ang paghinumdom ni Jesukristo makatabang sa mga sugo nga mahisulat sa atong mga kasingkasing?

Paghunahuna og usa ka sugo nga alang kanimo lisod tumanon o nga imong gibati nga wala mahisulat sa imong kasingkasing. Samtang mamalandong ka niini nga sugo, mahimo nimong tan-awon ang Alang sa Kalig-on sa mga Kabatan-onan (booklet, 2022). Tinguhaa ang inspirasyon pinaagi sa Espiritu Santo ug tubaga ang mosunod nga pangutana diha sa usa ka journal sa pagtuon:

Ikonsiderar ang pagpatukar og hinay nga instrumental nga musika samtang mamalandong ug motubag ang mga estudyante sa mosunod nga pangutana. Mahimo nimong hatagan ang mga estudyante og ginunting nga porma og kasingkasing nga ilang masuwatan aron tubagon ang pangutana. Dayon dapita sila sa pagbutang niini sa usa ka dapit aron sa pagpahinumdom kanila sa ilang tumong. Sa laing paagi, mahimo nilang idrowing ang kasingkasing diha sa ilang mga journal, sulatan kini, kuhaan og hulagway ang kasingkasing gamit ang ilang cellphone, ug gamiton ang hulagway isip ilang wallpaper sa cellphone sulod sa usa ka semana.

• Unsa ang imong mahimo aron mas mosunod ni Jesukristo ug mas hingpit nga mahisulat kini nga sugo sa imong kasingkasing?

Komentaryo ug Background nga Impormasyon

Ngano nga ang Napulo ka Sugo mahinungdanong gihapon karon?

Si Presidente Gordon B. Hinckley (1910–2008) mitudlo nga ang Napulo ka Sugo (tan-awa sa Exodus 20:3–17) usa ka mahinungdanon nga bahin sa ebanghelyo ni Jesukristo sa matag henerasyon:

[Ang] Napulo ka mga Sugo [gi]sulat pinaagi sa tudlo ni Jehova diha sa mga palid sa bato alang sa kaluwasan ug kahilwasan[safety], alang sa seguridad ug kalipay sa mga anak sa Israel, ug alang sa tanang mga henerasyon nga moabot human kanila. (Gordon B. Hinckley, “Our Solemn Responsibilities,” Ensign, Nob. 1991, 51)

ChurchofJesusChrist.org

Mosiah 12:27. Unsa ang gipasabot sa paggamit sa imong kasingkasing aron sa pagsabot?

Si Elder Kim B. Clark, samtang nagserbisyo isip usa ka sakop sa Seventy, mitudlo:

Ang mga pari [ni Hari Noah] adunay mga kasulatan, ug sila nasayod mahitungod sa balaod ug sa mga propeta, apan sila wala mogamit sa ilang mga kasingkasing sa pagsabot. Ang kasingkasing mao ang simbolo nga sentro sa atong kabubut-on, sa atong mga tinguha, sa atong mga pasalig, sa atong mga bili, mga prayoridad, sa atong mga pagbati ug sa atong mga pagpamatuod sa kamatuoran.

Ang pagsabot sa ebanghelyo labaw pa kay sa usa ka pagsinati sa panghunahuna. Usa kini ka espirituhanong kasinatian diin ang Espiritu Santo nagsaksi sa kamatuoran, modan-ag sa atong mga hunahuna, ug makausab sa atong kasingkasing. Ang pagsabot sa kasingkasing usa ka gasa sa Espiritu.

Kon [ang usa ka estudyante] magtinguha sa paggamit sa iyang kasingkasing sa pagsabot sa baroganan sa ebanghelyo sama sa hugot nga pagtuo diha ni Jesukristo, kinahanglang siya mogamit sa iyang kabubut-on sa pagpili ni Jesukristo ug sa pagsunod niana nga baroganan. Ang iyang kasinatian sa baroganan mao ang ganghaan sa pag-impluwensiya sa iyang kasingkasing. Iyang aksiyon nagtugot sa Espiritu Santo sa pagpamatuod, paglamdag, ug pag-usab sa iyang kasingkasing sa iyang pagdawat sa Ginoo ug niana nga baroganan. Sa iyang pagpadayon sa pagsunod sa baroganan, mamalandong sa iyang kasinatian, ug mopamatuod sa unsay iyang nahibaloan nga tinuod, ang iyang pagsabot sa hugot nga pagtuo molambo, ug ang iyang kasingkasing mausab.” (Kim B. Clark, ““Gamita ang Inyong Kasingkasing aron sa Pagsabot”” [gabii uban sa usa ka General Authority, Peb. 8, 2019], Tabernakulo sa Siyudad sa Salt Lake)

Dugang nga mga Kalihokan sa Pagkat-on

Mosiah 12:27. “Kamo wala mogamit sa inyong mga kasingkasing aron sa pagsabot”

Usa ka paagi sa pagtudlo sa unod niini nga bersikulo mao ang pagdapit sa mga estudyante sa paghunahuna og lain-laing mga paagi nga kita makaangkon og pagsabot, sama pinaagi sa pagtuon o kasinatian. Dapita ang mga estudyante sa pagbasa sa Mosiah 12:27 ug ipapangita kon unsay gitudlo ni Abinadi kang Noah ug sa iyang mga pari mahitungod sa pagsabot sa mga kasulatan. Mahimo nimong pangutan-on ang mga estudyante kon unsa sa ilang hunahuna ang gipasabot sa mga pulong nga “gamita ang inyong mga kasingkasing aron sa pagsabot”. Ang pamahayag ni Elder Kim B. Clark sa seksiyon sa Komentaryo ug Background nga Impormasyon mahimong makatabang.

Ang musika sa ebanghelyo

Samtang nagserbisyo isip sakop sa Seventy, si Elder Wilford W. Andersen mitandi sa pagsunod sa mga sugo sa Dios ngadto sa mga lakang sa pagsayaw ug sa pagbati sa kalipay sa pagpuyo sa ebanghelyo ngadto sa pagpaminaw og musika (“Ang Musika sa Ebanghelyo,” Liahona, Mayo 2015, 54–56). Ikonsiderar ang paggamit sa mga bahin sa iyang pakigpulong aron matabangan ang mga estudyante nga makasabot kon unsay ipasabot nga mahisulat ang ebanghelyo sa ilang mga kasingkasing.

Dayon dapita ang mga estudyante sa paghisgot sa pipila o sa tanang mosunod nga mga pangutana nga magpares o diha sa gagmay nga mga grupo:   

• Unsa ang kahulogan sa pagkadungog sa musika sa ebanghelyo nganha kanimo?  

• Sa unsang paagi kaha kini susama sa pagkasulat sa mga sugo diha sa atong mga kasingkasing?

• Sa unsang paagi nga ang pagkadungog sa musika sa ebanghelyo makausab sa imong pagtan-aw sa pagpuyo sa ebanghelyo?