Mosiah 18

Ang Pakigsaad sa Bunyag

Ang ubang mga desisyon importante kaayo nga kini makaapekto sa tanang butang sa atong kinabuhi. Ang paghimo og pakigsaad uban sa Dios pinaagi sa ordinansa sa bunyag mao ang usa niadtong mga desisyon. Gitudloan ni Alma ang iyang katawhan diha sa kilid sa mga tubig sa Mormon mahitungod sa pakigsaad nga atong gihimo uban sa Dios sa dihang kita gibunyagan. Kini nga leksiyon makatabang nimo nga mas makasabot sa pakigsaad sa bunyag ug sa unsang paagi kini makaimpluwensiya sa imong relasyon sa Dios ug sa uban.

Pagtabang sa mga estudyante nga makakaplag og kalambigitan.Kon makita sa mga estudyante kon sa unsang paagi ang pulong sa Dios diha sa mga kasulatan adunay kalabotan sa ilang kaugalingong mga sitwasyon ug mga kahimtang, sa kasagaran mas madasig sila sa pagkat-on ug paggamit sa mga pagtulun-an sa ebanghelyo. Usa ka paagi sa pagtabang sa mga estudyante nga makakita sa kalambigitan mao ang pagpangutana kanila sama sa “Sa unsang paagi nga kini nga panghitabo o panudlo susama sa imong mga kasinatian?” o “Sa unsang paagi kini nga kamatuoran magamit sa imong kinabuhi?”

Pagpangandam sa estudyante: Ikonsiderar ang pagdapit sa mga estudyante sa pagdala og hulagway o entry sa journal gikan sa adlaw sa ilang bunyag ngadto sa klase. Mahimo usab nilang pangutan-on ang uban nga anaa didto kon unsa ang ilang nahinumdoman.

Bisan kinsa nga wala pa mabunyagi mahimong motambong nga andam mopaambit sa ilang mga hunahuna ug mga pagbati nga ilang nasinati samtang nagtambong sa usa ka bunyag o mangutana og mga pangutana nga aduna sila bahin sa bunyag.

Mga Posibleng Kalihokan sa Pagkat-on

Ang imong bunyag

Aron sa pagsugod sa imong pagtuon karon, hunahunaa ang imong bunyag ug suwayi paghinumdom ang mga detalye nianang adlawa. Kon wala ka pa mabunyagi, pamalandong kon unsay imong nahibaloan bahin sa bunyag o unsay imong nahinumdoman sa pagtambong og usa ka bunyag.

Kon ang mga estudyante nagdala og mga hulagway sama sa gisugyot sa pagpangandam sa estudyante, ikonsiderar ang pagpakita niini ug dapita ang klase sa pagsulay sa pag-ila kang kinsa nga mga hulagway kini. Mahimo dayon kang modapit og mga boluntaryo sa pagpaambit sa unsay ilang nahinumdoman mahitungod sa ilang bunyag. Ang mosunod nga mga pangutana makatabang sa mga estudyante sa paghinumdom ug paghisgot sa ilang mga pagbati bahin sa bunyag.

• Unsa ang imong paborito nga mga panumdoman gikan niadtong adlawa? Unsay imong gibati?

• Sa unsang paagi nga ang imong desisyon nga magpabunyag nakaimpluwensiya sa imong relasyon sa Dios ug sa ubang mga tawo?

Alma nagtudlo sa mga pulong ni Abinadi

Ang Mosiah 18 naglangkob sa asoy ni Alma, kinsa kanhi usa sa mga pari ni Hari Noah, nagtudlo sa mga pulong ni Abinadi ngadto sa uban. Napugos si Alma sa pagtudlo sa tago kay gusto ni Hari Noah nga patyon siya tungod sa pagtuo sa pagpamatuod ni Abinadi mahitungod ni Jesukristo.

Basaha ang Mosiah 18:1–7, mangita sa unsay gitudlo ni Alma sa mga tawo.

• Unsa ang gitudlo ni Alma mahitungod sa Manluluwas human makadungog sa pagpamatuod ni Abinadi?

• Ngano sa imong hunahuna nga si Alma mipili sa pagtudlo sa unsay iyang gibuhat niini nga mga bersikulo?

Ang pakigsaad sa bunyag

Human sa pagtudlo sa mga tawo mahitungod sa katubsanan pinaagi ni Jesukristo, si Alma mitudlo mahitungod sa kamahinungdanon sa bunyag. Gikan sa iyang mga pagtulun-an atong makat-onan nga kon kita mabunyagan, kita mosulod ngadto sa usa ka pakigsaad uban sa Dios. Samtang nagpadayon ka sa pagtuon sa mga pagtulun-an ni Alma, pamalandongi kon unsay imong nahibaloan mahitungod sa pakigsaad nga atong gihimo sa bunyag ug sa pagbag-o sa matag higayon nga moambit kita sa sakramento, ingon man sa bisan unsang mga pangutana nga anaa kanimo. Sa mainampoong paagi tinguhaa nga mas masabtan kon sa unsang paagi kini nga pakigsaad makaimpluwensiya sa imong relasyon sa Dios ug sa uban.

Si Elder D. Todd Christofferson sa Korum sa Napulog Duha ka Apostoles mipasabot unsa ang pakigsaad:

Ang pakigsaad usa ka panagsabot tali sa Dios ug sa tawo, usa ka kasabotan kansang mga kondisyon gihatag pinaagi sa Dios (tan-awa sa Giya ngadto sa mga Kasulatan, “Pakigsaad,” 208). Niining balaanong mga panagsabot, ang Dios misaad sa Iyang kaugalingon sa pagpaluyo, pagbalaan, ug paghimaya kanato agig bugti sa atong pasalig nga moserbisyo Kaniya ug motuman sa Iyang mga sugo. (D. Todd Christofferson, “Ang Gahom sa mga Pakigsaad,” Liahona, Mayo 2009, 20)

Alang sa mosunod nga kalihokan sa pagtuon, ikonsiderar ang pagdapit sa mga estudyante sa pagbuhat nga may kapares. Ipapangita sa usa ka kapares ang unsay atong gisaad sa dihang kita gibunyagan ug ang lain mangita sa mga panalangin nga gitanyag sa Langitnong Amahan kanato. Dayon dapita sila sa pagpakigbahin sa usag-usa kon unsay ilang napalgan.

Sa Mosiah 18:8–10, gihulagway ni Alma ang pakigsaad sa bunyag. Basaha ang Mosiah 18:8–10 ug ikonsiderar ang pagmarka sa unsay atong gipasalig nga buhaton dihang kita gibunyagan ug, sa lain nga kolor o estilo, markahan ang mga panalangin nga gitanyag sa Langitnong Amahan kanato.

Ang Mosiah 18:8–10 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron dali nimo kining mapangita. Mahatagan ka og kahigayonan sa sunod nga leksiyon sa pagpraktis sa paggamit sa doktrina nga gitudlo niini nga tudling ngadto sa usa ka pangutana o sitwasyon.

Ikonsiderar ang paghimo og duha ka kolum diha sa pisara ug isulat ang “Kami nakigsaad sa …” sa ibabaw sa usa ug “Ang Dios nagtanyag …” sa ibabaw sa lain. Dapita ang mga estudyante sa pag-adto sa pisara ug isulat ang unsay ilang nakit-an gikan sa Mosiah 18:8–10.

• Unsa sa imong hunahuna ang gipasabot sa “pagbangotan uban niadto nga nagbangotan” ug “paghupay niadto nga nagkinahanglan sa kahupayan”? (bersikulo 9).

• Unsa ang pipila ka mga paagi nga kita “mobarog ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit”? (bersikulo 9). Kinsay imong nailhan nga maayong ehemplo sa pagbuhat niini?

• Giunsa nimo pagkakita nga ang Dios mipanalangin kanimo o sa uban sa mga saad nga Iyang gihimo kanato pinaagi sa bunyag?

Pagtuman sa imong pakigsaad sa bunyag

Ang nahabilin sa leksiyon gituyo aron matabangan ang mga estudyante nga makasabot unsaon pagtuman sa mga pasalig sa bunyag nga gihulagway ni Alma sa Mosiah 18:8–10.

Ang mosunod nga bidyo mahimong gamiton sa pagpakita og mga ehemplo. Dapita ang mga estudyante sa paghatag og pagtagad ug sa pagpakigbahin sa mga hugpong sa mga pulong gikan sa mga bersikulo 8–10 nga ilang nakita nga gipakita sa bidyo. (Ang bidyo anaa sa https://www.churchofjesuschrist.org/study/general-conference/2020/10/14craig?lang=ceb ChurchofJesusChrist.org.) DayDayon Dayon mahimong moduol ang mga estudyante ug linyahan ang usa ka pamahayag sa pisara nga gibati nila nga gipakita sa bidyo. Mahimo dayon nimo silang pangutan-on kon nganong gipili nila kana nga pamahayag.

• No Cussing Club

  One boy’s crusade to encourage clean language has far-reaching effects.

• “Mata aron sa Pagtan-aw” (gikan sa time code 4:55 hangtod sa 6:53)

  Mata aron sa Pagtan-aw

  Si Sister Craig nagtudlo nga uban sa tabang sa Espiritu Santo kita makakat-on sa pagtan-aw sa uban ug sa pagtan-aw sa atong kaugalingon sama sa pagtan-aw sa Manluluwas.

• Mga Batiis ni Dayton

  Usa ka 13 anyos nga batang lalaki sa Arizona mituman sa iyang Katungdanan ngadto sa Dios pinaagi sa pagpaningkamot kutob sa mahimo aron ang iyang higala, nga adunay cerebral palsy, makasalmot uban niya sa triathlon.

Pagpili og bisan usa sa mga saad nga atong gihimo sa bunyag nga gipaambit ni Alma sa Mosiah 18:8–10. Sama pananglit, mahimo nimong pilion ang “pagtambayayong sa usag usa nga mga alantoson” (bersikulo 8) o “maghupot sa iyang mga sugo” (bersikulo 10).

Ikonsiderar ang pagpakita sa mosunod nga mga pangutana ug paghatag sa mga estudyante og igong panahon sa pagpamalandong sa ilang mga tubag. Dayon dapita sila sa pagpaambit sa ilang mga tubag ug ubang mga panabot diha sa gagmay nga mga grupo.

• Unsa ang pipila ka mga paagi nga ang usa ka tin-edyer makatuman niana nga saad?

• Ngano sa imong hunahuna nga ang Langitnong Amahan milakip niana isip kabahin sa atong pakigsaad sa bunyag?

• Giunsa pagpakita sa Manluluwas pinaagi sa ehemplo kon unsaon pagtuman kana nga saad?

• Kanus-a ka o ang imong kaila mituman niana nga saad? Unsa ang imong nakat-onan gikan niadtong mga kasinatian?

Paggahin og panahon sa pagrekord diha sa imong journal kon sa imong paminaw kumusta ka sa imong pagtuman sa mga saad sa bunyag nga gipakigbahin ni Alma sa Mosiah 18:8–10. Sa unsang paagi nga malamposon nimo nga natuman ang pipila niini nga mga saad? Sa unsa nga mga sitwasyon mahimo nimong mas tinuyo nga gituman ang usa niini? Sa unsang paagi sa imong hunahuna kini makaapekto sa imong relasyon sa Ginoo ug sa ubang mga tawo kon imo kining buhaton?

Komentaryo ug Background nga Impormasyon

Ngano nga importante nga masabtan ang akong pakigsaad sa bunyag?

Si Elder Joseph B. Wirthlin (1917–2008) sa Korum sa Napulog Duha ka Apostoles mipasabot:

Akong namatngunan sa tibuok nakong kinabuhi nga kon ang mga tawo moabot sa hingpit nga pagsabot sa mga panalangin ug sa gahum sa ilang pakigsaad sa bunyag, ingon isip bag-ong kinabig o isip dugay na kaayong mga miyembro sa Simbahan, dako kaayong kalipay ang moabot sa ilang mga kinabuhi ug sila naghimo sa ilang mga katungdanan sa gingharian uban sa makatakod nga kadasig. (“Alma the Elder: A Role Model for Today,” sa Heroes from the Book of Mormon [1995], 84)

Mosiah 18:14. Gibunyagan ba ni Alma ang iyang kaugalingon?

Si Presidente Joseph Fielding Smith (1876–1972) mipasabot:

Mahimo kitang makahukom nga si Alma naghupot sa pagkapari sa wala pa siya, kauban ang lain pang mga tawo, nahimong nasamok uban ni Hari Noah. Tinuod man kini o dili walay kalainan tungod kay diha sa Basahon ni Mosiah piho nga gipahayag nga siya adunay pagtugot [tan-awa sa Mosiah 18:13]. Kon siya adunay pagtugot sa pagbunyag kana ebidensiya nga siya nabunyagan.

Busa, sa dihang gibunyagan ni Alma ang iyang kaugalingon uban ni Helam dili kana ang kaso ni Alma nga nagbunyag sa iyang kaugalingon, apan usa lamang ka timaan ngadto sa Ginoo sa iyang pagpaubos ug hingpit nga paghinulsol. (Answers to Gospel Questions, comp. Joseph Fielding Smith Jr., 5 vols. [1957–66], 3:203)

Unsaon nako pagtuman ang akong pakigsaad sa pag-atiman sa uban?

Si Sister Sharon Eubank sa Kinatibuk-ang Kapangulohan sa Relief Society miingon:

Isip nabunyagan nga mga miyembro sa Simbahan, kita ubos sa pakigsaad nga moamuma niadtong mga nanginahanglan. Ang atong indibidwal nga mga pagpaningkamot wala gayod nagkinahanglan og kwarta o layo nga mga dapit; kini nagkinahanglan sa giya sa Balaang Espiritu ug usa ka andam nga kasingkasing nga moingon ngadto sa Ginoo, “Ania ako; ipadala ako.” (Sharon Eubank, “Ako Nag-ampo nga Siya Mogamit Kanato,” Liahona, Nob. 2021, 55)

Dugang nga mga Kalihokan sa Pagkat-on

Sagrado nga mga dapit

Human mabasa ang paghulagway sa mga tubig sa Mormon diha sa Mosiah 18:30, hangyoa ang mga estudyante sa pagpamalandong sa mga dapit nga sagrado alang kanila tungod kay sila “miabot ngadto sa kahibalo sa ilang Manunubos” didto. Mahimo nimong hatagan sila og panahon sa pagrekord og mga panumdoman diha sa ilang mga journal ug paghangyo og mga boluntaryo sa pagpaambit sa mga dapit nga ilang gihunahuna nga dili ipaambit ang mga detalye nga personal ra kaayo.

Pagkamanggihatagon sa Dios

Ikonsiderar ang paggamit niini nga ideya diha sa seksiyon sa leksiyon ubos sa ulohan nga “Ang pakigsaad sa bunyag.” Ipataas ang usa ka butang nga mahimong interesado ang mga estudyante nga makabaton, ug pangutana kon pila ang ilang andam nga ibayad alang niana nga butang. Pangutan-a sila kon unsa ang ilang bation nganha kanimo kon imong ihatag kanila ang butang isip usa ka gasa kon sila mosugot nga maningkamot kutob sa ilang mahimo sa pagpasalamat ug paggamit niini. Samtang magtuon ang mga estudyante kon unsay gitanyag sa Dios kanato pinaagi sa pakigsaad sa bunyag ug unsay Iyang gikinahanglan kanato, tabangi sila nga makasabot sa Iyang gugma ug sa kamanggihatagon sa pagtanyag og dako kaayo kon itandi sa Iyang gipangayo isip balos. (Tan-awa usab ang Mga Taga-Roma 8:16–17; Doktrina ug mga Pakigsaad 84:38.)

Ang sakramento

Ikonsiderar ang pagdapit sa mga estudyante sa paglista diha sa pisara sa mga saad nga atong gibag-o kon kita moambit sa sakramento. Kini nga mga saad makita sa Doktrina ug mga Pakigsaad 20:77, 79.

Dayon pangutan-a sila kon sa unsang paagi ang pagtuman niini nga mga saad makatabang kanato sa pagtuman sa mga saad nga gilatid diha sa Mosiah 18:8–10. Sama pananglit, mahimo kang mangutana, “Sa unsang paagi nga ang kanunay nga paghinumdom Kaniya makatabang kanato sa pagtambayayong sa usag usa nga mga alantoson?” o “Sa unsang paagi nga ang pagdala sa Iyang ngalan ngari kanato makatabang kanato nga mobarog ingon nga Iyang mga saksi sa tanan nga mga dapit?”

Gitudloan ni Alma ang iyang mga katawhan kon unsaon pagtuman ang pakigsaad sa bunyag

Isulat diha sa pisara ang mosunod nga mga pakisayran sa kasulatan: Mosiah 18:21; Mosiah 18:18–19; Mosiah 18:23, 25; Mosiah 18:27–29.

Bahina ang mga estudyante ngadto sa tinag-upat kada grupo. Dapita ang matag estudyante sa pagbasa sa hilom sa usa sa mga tudling sa kasulatan, maghunahuna sa mosunod nga mga pangutana. Dayon dapita sila sa pagreport sa ilang nakat-onan ngadto sa ilang grupo.

• Sa unsa nga paagi nga ang tudling makatabang kanimo nga mas makasabot unsaon pagpuyo sumala sa pakigsaad nga atong gihimo sa bunyag?

• Sa unsang paagi nga ang paghupot sa imong pakigsaad niining paagiha makaapekto sa uban diha sa imong ward o branch?

• Sa unsa nga paagi nga ang pagsunod sa tambag niini nga tudling makatabang kanimo nga makabaton sa Espiritu sa Ginoo uban kanimo?