“Mosiah 21–24, Bahin 1: Pagpangita sa mga Katuyoan sa Ginoo alang sa Atong mga Pagsulay ug mga Kasakit,” Manwal sa Magtutudlo sa Basahon ni Mormon (2024)
“Mosiah 21–24, Bahin 1,” Manwal sa Magtutudlo sa Basahon ni Mormon
Mosiah 21–24, Bahin 1
Pagpangita sa mga Katuyoan sa Ginoo alang sa Atong mga Pagsulay ug mga Kasakit
Unsaon nimo sa pagpasabot ngadto sa usa ka tawo ngano nga ang Ginoo mitugot kanato nga makasinati og mga pagsulay ug mga kasakit? Ang Mosiah 21–24 naghulagway sa mga kasinatian sa katawhan ni Limhi ug sa katawhan ni Alma, kinsa parehong nakasugat og lisod nga mga hagit. Kini nga leksiyon gituyo aron sa pagtabang kanimo nga mobati og dugang nga pagsalig sa Langitnong Amahan ug ni Jesukristo kon ikaw makasinati og mga pagsulay ug mga kasakit sa imong kinabuhi.
Pangutana og makapadasig og diskusyon.Ang makahuluganon nga mga diskusyon sa klase mahitabo kon ang mga magtutudlo makig-istoryahanay sa mga estudyante ug ang mga estudyante makig-istoryahanay sa usag usa. Pangutana og may kalabotan ug kanang naghatag og mga kahigayonan sa daghang mga estudyante aron sa pagtubag. Mahimo usab nimong awhagon ang diskusyon pinaagi sa paghangyo sa mga estudyante sa pagtubag sa mga komentaryo nga gihimo sa ilang mga klasmeyt.
Pagpangandam sa estudyante: Mahimong dapiton ang mga estudyante sa paghunahuna mahitungod sa nangaging pagsulay o hagit nga nakatabang nila nga masinati ang paglambo o mas maduol ngadto sa Ginoo. Dasiga ang mga estudyante sa pagtambong nga andam sa pagpaambit sa unsay ilang nakat-onan o sa unsang paagi kini nga pagsulay mahimong positibong nakaimpluwensiya kanila.
Mga Posibleng Kalihokan sa Pagkat-on
Kini ang una sa duha ka mga leksiyon nga naghisgot sa Mosiah 21–24. Ang bahin 1 motutok kon ngano kaha nga ang Ginoo motugot kanato nga makasinati og mga pagsulay, ug ang bahin 2 motutok kon unsaon nato sa pagsalig sa Langitnong Amahan ug ni Jesukristo sa pagtabang kanato nga makalatas niini nga mga pagsulay. Kon ang oras sa klase limitado ug usa lamang ka leksiyon sa Mosiah 21–24 ang matudlo, ikonsiderar kon sa unsang paagi ang duha ka leksiyon mahimong epektibong mahiusa.
Pagpas-an sa mga palas-anon
Handurawa nga ang imong mga pagsulay, palas-anon, ug mga kasakit girepresentar sa mga bato nga kinahanglan nimong pisikal nga pagadad-on sa usa ka bag o backpack.
Mahimo nimong ikonsiderar ang pagdala og backpack ug bug-at nga mga butang nga nagrepresentar sa mga palas-anon ngadto sa klase. Dapita ang usa ka andam nga estudyante sa pagsul-ob sa backpack samtang ang mga sakop sa klase mohingalan og lain-laing mga pagsulay ug ibutang ang mga butang sulod sa bag. Seguroha nga ang backpack dili bug-at ra kaayo nga ang estudyante nga nagsul-ob niini mahimong maangol. Kon mahimo, ang estudyante mahimong magpadayon sa pagsul-ob sa backpack samtang ang klase maghisgot sa mosunod nga mga pangutana.
Ikonsiderar ang paglista diha sa pisara sa mga tubag sa mga estudyante sa mosunod nga mga pangutana.
-
Unsa ang pipila sa mga pagsulay o palas-anon nga masinati sa mga tin-edyer nga morag bug-at nga mga bato sa usa ka backpack?
-
Unsa nga mga pangutana ang tingale aduna ang mga tawo mahitungod sa mga palas-anon nga ilang gipas-an?
Ikonsiderar ang paghatag og panahon sa mga estudyante sa paglista sa pipila sa ilang personal nga mga pagsulay ug pagrekord sa ilang mga hunahuna, mga pangutana, ug mga pagbati mahitungod niadtong mga pagsulay diha sa ilang mga journal sa pagtuon. Makatabang kini nga mas maandam sila nga makabaton og personal nga kasinatian samtang magtuon sila sa mga kasulatan.
Samtang magtuon ka karon, pangitaa ang mga kamatuoran nga makatabang nimo nga mas makasabot kon ngano kaha nga ang Ginoo motugot kanimo nga makasinati niini nga mga pagsulay.
Ang mga katawhan ni Limhi ug ang mga katawhan ni Alma
Aron matabangan ang mga estudyante sa paghinumdom sa konteksto nga may kalabotan sa mga katawhan ni Limhi ug sa mga katawhan ni Alma, ikonsiderar ang pagpakita o pagdrowing sa mosunod nga hulagway ug itudlo ang nahimutangan sa matag grupo sa mga tawo samtang imong hisgotan sila.
Sa Mosiah 21–24, atong mahibaloan ang mahitungod sa duha ka grupo sa mga tawo kinsa nakasinati og dagkong mga pagsulay ug mga kasakit. Ang unang grupo mipuyo sa yuta sa Nephi ug gipangulohan sa anak ni Hari Noah nga si Limhi. Ang ikaduhang grupo mipuyo sa yuta sa Helam ug gipangulohan ni Alma.
Pagdapit og pipila ka mga boluntaryo sa pagpaambit unsay ilang nahibaloan mahitungod sa mga kahimtang nga misangpot ngadto sa pagkabihag sa mga katawhan ni Limhi ug sa mga katawhan ni Alma. Kon gikinahanglan, gamita ang mosunod nga mga pagpamubo [summaries].
Ang mga katawhan ni Limhi
Human sa pagsalikway sa mga pagtulun-an ug mga pasidaan ni Abinadi, ang mga Nephite, kinsa karon gipangulohan ni Hari Limhi, gibihag sa mga Lamanite sa yuta sa Nephi ug gikinahanglan nga mobayad og bug-at nga mga buhis (tan-awa sa Mosiah 19:15). Sama sa gipanagna ni propeta Abinadi (tan-awa sa Mosiah 12:5), gipugos sa mga Lamanite ang katawhan ni Limhi sa pag-alagad kanila ug sa pagpas-an sa bug-at nga mga palas-anon (tan-awa sa Mosiah 21:3).
Ang mga katawhan ni Alma
Human sa kamatayon ni Abinadi, si Alma ug ang iyang mga sumusunod milayas ngadto sa Katubigan sa Mormon, diin sila gibunyagan (tan-awa Mosiah 17:1–4; 18:1–14). Sa wala madugay sila milayas alang sa ilang kahilwasan [safety] ug mitukod og usa ka matarong nga pinuy-anan sa yuta sa Helam (tan-awa sa Mosiah 18:32–34; 23:1–4, 19–20). Ang katawhan ni Alma sa kataposan napalgan ug nabihag sa mga Lamanite (tan-awa sa Mosiah 23:25–29, 36–37). Si Amulon, kinsa usa sa daotan nga mga pari ni Noah, gihatagan og pagtugot ibabaw kanila ug misugod sa paglutos kang Alma ug sa iyang mga katawhan (tan-awa sa Mosiah 24:8–9).
Nganong gitugotan sa Ginoo ang mga pagsulay
Ikonsiderar ang pagbahin sa klase ngadto sa gagmay nga mga grupo ug ang katunga sa mga grupo magtuon sa katawhan ni Limhi ug ang laing katunga magtuon sa katawhan ni Alma.
Basaha ang mosunod nga mga tudling sa kasulatan, mangita sa mga pagtulun-an nga makatabang nimo nga masabtan nganong gitugotan kita sa Ginoo nga makasinati og mga pagsulay ug mga kasakit. Mahimo nimong markahan ang mga pulong ug mga hugpong sa mga pulong nga mahinungdanon diha kanimo.
-
Ang katawhan ni Limhi: Mosiah 21:5–16
-
Ang katawhan ni Alma: Mosiah 23:21–24; 24:8–14
Kon gitun-an sa mga estudyante kini nga mga bersikulo sa ginagmay nga mga grupo, dapita ang mga boluntaryo gikan sa matag grupo sa pag-summarize sa unsay ilang nakat-onan gikan sa mga bersikulo nga ilang gitun-an. Ang mosunod nga mga pangutana makatabang sa mga estudyante sa paghisgot unsay ilang nakat-onan gikan niini nga mga bersikulo.
-
Unsa nga mga pagkaparehas ug kalainan ang imong nakita tali sa duha ka grupo sa mga tawo ug unsa ang ilang nasinati?
-
Unsa nga ebidensiya ang imong nakita niini nga mga asoy sa gugma ug pagpakabana sa Ginoo alang sa mga tawo?
Agig tubag sa miaging pangutana, ang mga estudyante mahimong motudlo sa mga hugpong sa mga pulong sama sa “ang Ginoo mitubag sa ilang mga pangamuyo” (Mosiah 21:15), “sila misugod sa pag-uswag sa hinay-hinay” (Mosiah 21:16), “Ako usab mopagaan sa mga alantoson diin anaa gitungtong diha sa inyong mga abaga,” o “Ako, ang Ginoong Dios, moduaw sa akong mga katawhan diha sa ilang kasakit” (Mosiah 24:14).
-
Unsa ang imong nakat-onan bahin sa nganong gitugotan sa Ginoo ang mga tawo nga mag-antos sa mga pagsulay ug mga kasakit?
Ikonsiderar ang pagdapit sa mga estudyante sa pagsulat diha sa pisara sa ilang mga tubag sa miaging pangutana. Ang mosunod mao ang pipila ka mga ehemplo sa mga kamatuoran nga tingali nakit-an sa mga estudyante.
-
Ang Ginoo nagtugot kanato nga makasinati og mga pagsulay aron sa pagtabang kanato nga mahimong mapainubsanon ug mas mosalig Kaniya (tan-awa sa Mosiah 21:5–14).
-
Ang ubang mga pagsulay ug mga kasakit moabot isip resulta sa pagkamasinupakon (tan-awa sa Mosiah 21:15).
-
Ang atong mga pagsulay makahatag nato og mga kahigayonan sa pagtinguha ug pagbati sa gahom sa Ginoo sa atong mga kinabuhi (tan-awa sa Mosiah 21:15–16; 24:14).
-
Ang Ginoo mopanton sa Iyang mga katawhan ug mosulay sa ilang pailub ug hugot nga pagtuo (tan-awa sa Mosiah 23:21).
Daghang mga tawo ang naghunahuna nga ang gipanton (tan-awa sa Mosiah 23:21) adunay sama nga kahulogan sa gisilotan. Si Elder Lynn G. Robbins sa Seventy mipasabot, “Ang pulong nga pagpanton naggikan sa Latin nga castus, nagpasabot nga ‘putli o lunsay,’ ug ang pagpanton nagpasabot nga ‘aron malunsay’ [tan-awa sa Merriam-Webster’s Collegiate Dictionary, 11th ed. (2003), “pagpanton”]” (“Ang Matarong nga Maghuhukom,” Liahona, Nob. 2016, 97). Pamalandongi sa makadiyot kon sa unsang paagi ang Ginoo naglunsay kanimo pinaagi sa imong mga pagsulay ug mga kasakit.
Ang mosunod nga mga pangutana (o uban pa nga imong gihunahuna) mahimong gamiton aron makatabang sa paghimo og koneksiyon sa mga estudyante. Mahimo nimong ikonsiderar ang paghatag og panahon sa mga estudyante sa pagrekord sa ilang mga tubag diha sa ilang mga journal sa dili pa hisgotan ang mga pangutana isip usa ka klase. Seguroha nga pasalamatan ang mga estudyante sa pagpaambit sa ilang mga hunahuna.
-
Sa unsang paagi nga ang pagsabot niini nga mga kamatuoran makaimpluwensiya sa paagi sa imong reaksiyon sa imong mga pagsulay?
-
Unsa nga mga kasinatian ang nakatabang nimo nga makita ang mga katuyoan sa Ginoo sa pagtugot kanimo nga makasinati og mga pagsulay?
Aron sa pagpakitag ehemplo nga naghulagway sa miaging pangutana, ikonsiderar ang pagpasalida sa bidyo nga “Ako Nagabadlong ug Nagapanton sa Akong Gihigugma“ (6:33–9:37), anaa sa https://www.churchofjesuschrist.org/study/general-conference/2011/04/as-many-as-i-love-i-rebuke-and-chasten?lang=ceb ChurchofJesusChrist.org.
3:2 -
Unsa ang imong nakat-onan karon nga makatabang nimo nga mas masabtan ang mga pagsulay nga imong gisinati?
Pagpamatuod sa mga kamatuoran nga inyong nahisgotan karon.