Mosiah 19–20

“Ang mga Pulong ni Abinadi Nangatuman”

Gusto sa Langitnong Amahan nga magmalipayon ka ug luwas. Usa ka paagi nga imong masinati ang kalipay ug espirituhanong proteksiyon mao ang pagsunod sa mga pagtulun-an ug mga pasidaan sa Iyang mga propeta. Sa pagsalikway kang Abinadi, si Hari Noah ug ang iyang katawhan nawad-an sa mga panalangin sa kahilwasan [safety] ug nakasinati og dakong pag-antos. Kini nga leksiyon makatabang kanimo nga mobati og mas dakong tinguha nga mopatalinghog sa mga pasidaan ug mga pagtulun-an sa mga propeta sa Ginoo.

Pagtabang sa mga estudyante nga makasabot sa konteksto sa mga kasulatan.Ang konteksto mao ang mga kahimtang nga naglibot o naghatag og background sa mga tudling sa kasulatan, mga panghitabo, ug mga asoy. Kini nga konteksto makatabang kanato nga makasabot sa kalibotan niadtong anaa sa mga kasulatan. Ang pagsabot sa konteksto sa mga asoy sa kasulatan makatabang sa mga estudyante sa pag-ila sa mga baroganan ug mga doktrina ug mapahisama ang mga kasulatan ngadto sa ilang mga kaugalingon.

Pagpangandam sa estudyante: Dapita ang mga estudyante sa paghunahuna og ehemplo gikan sa mga kasulatan o sa ilang kaugalingong mga kinabuhi nga nagsuporta sa mosunod nga pamahayag. Dasiga sila sa pagtambong sa klase nga andam sa pagpaambit sa ilang ehemplo.

“Gipakita sa kasaysayan nga adunay kahilwasan [safety], kalinaw, kauswagan, ug kalipay sa pagsanong sa propetikanhong tambag” (M. Russell Ballard, “His Word Ye Shall Receive,” Ensign, Mayo 2001, 65).

Mga Posibleng Kalihokan sa Pagkat-on

Kahilwasan [safety] gikan sa peligro

Ikonsiderar ang pagpakita sa mosunod nga mga hulagway o pagdala og lain-laing mga butang ngadto sa klase nga gigamit sa paghatag og kahilwasan. Mahimo sab nimong hangyoon ang mga estudyante sa pagpaambit og mga ehemplo sa mga butang o mga lagda nga ilang gigamit kada adlaw aron magpabiling luwas.

• Unsa nga mga kapeligrohan ang gipanalipdan niini nga mga butang alang kanato?

• Ngano sa imong hunahuna nga ang ubang mga tawo mipili nga ibaliwala ang kahimanan o mga giya sa kahilwasan [safety]?

Mahimo nimong ipakita ang usa ka hulagway sa kasamtangan nga propeta kauban ang mga nangaging mga hulagway.

Agi og dugang sa pisikal nga mga risgo, ang espirituhanong mga kapeligrohan kabahin usab sa atong mortal nga kasinatian. Tungod kay Siya nahigugma kanato, ang Ginoo nagtawag og mga propeta aron sa paghatag kanato og mga giya ug mga himan nga makatabang kanato nga makasinati og pisikal, espirituwal, ug emosyonal nga kahilwasan sa tibuok natong kinabuhi.

Paggahin og higayon sa pagpamalandong sa kahilwasan [safety] nga gitanyag sa Ginoo kanimo pinaagi sa Iyang mga propeta ug apostoles. Ang mosunod nga mga pangutana mahimong makatabang:

Mahimong mapuslanon alang sa mga estudyante nga irekord ang ilang mga tubag sa ilang mga journal sa pagtuon.

• Unsa ka kasagad nga motan-aw sa mga propeta ug apostoles sa Ginoo isip paagi sa pagdawat sa Iyang espirituhanong panalipod?

• Unsa ang pipila ka mga ehemplo kon sa unsang paagi ang pagsunod sa mga propeta sa Ginoo makapanalangin kanimo?

Samtang magtuon ka, pangitaa ang mga pagtulun-an nga makatabang nimo nga mobati og mas dakong tinguha sa pagpangita og kahilwasan [safety] ug kalipay nga moabot gikan sa pagsunod sa propeta sa Ginoo.

Ang mga tawo ni Hari Noah nakasinati og mga sangpotanan sa ilang mga sala

Hinumdomi nga si Abinadi gipadala aron sa pagpasidaan sa mga katawhan ni Hari Noah sa ilang pagkadautan aron sila makalikay sa umaabot nga mga paghukom sa Ginoo. (Mahimong makatabang ang pagrebyo sa pipila ka mga pasidaan ni Abinadi sa Mosiah 11:20–25; 12:1–8.)

I-rebyo ang tubag ni Noah ug sa iyang mga katawhan sa mga pasidaan ni Abinadi pinaagi sa pagbasa sa Mosiah 12:13–15; 17:11–20.

• Ngano sa imong hunahuna nga si Noah ug ang iyang mga pari mipili sa pagbalewala sa mga pasidaan ni Abinadi?

• Unsa ang pipila ka mga ehemplo kon sa unsang paagi ang mga tawo mahimong mobalewala o mosalikway sa mga pagtulun-an sa mga propeta sa atong panahon? Ngano kaha nga ila kining gibuhat?

Sama sa gipanagna ni Abinadi (tan-awa sa Mosiah 17:15–19), ang mga katawhan ni Noah nakasinati og lisod nga mga pagsulay human nga gisalikway ang mga pulong sa Ginoo ug ang pagdapit sa paghinulsol. Tingale imong mahinumdoman gikan sa imong pagtuon sa Mosiah 7 nga wala madugay human sa kamatayon ni Abinadi, kini nga mga tawo napalgan sa usa ka grupo sa pagpangita nga gikan sa Zarahemla nga gipangulohan sa usa ka tawo nga ginganlan og Ammon (tan-awa ang dayagram sa ubos). Sa panahon sa ilang pagkakaplag, ang mga Nephite sa yuta sa Nephi mga binihag sa mga Lamanite.

Ang ilang lider mao si Limhi, ang anak ni Hari Noah. Basaha ang mga pulong ni Limhi sa Mosiah 7:24–29, mangita sa mga rason nga iyang giila sa pagkabihag nga ilang nasinati.

• Unsa ang imong nakita niini nga mga bersikulo nga makatabang sa usa ka tawo kinsa mibati nga dili importante ang pagsunod sa mga propeta sa Ginoo?

Ikonsiderar ang pagsulat sa mosunod nga dili kompleto nga kapahayag diha sa pisara. Human mahatagan og panahon ang mga estudyante sa paghunahuna niini, dapita ang pipila ka mga estudyante sa pagpaambit kon unsaon nila kini pagkompleto.

Ang pagbalewala o pagsalikway sa mga pulong sa Ginoo pinaagi sa Iyang mga propeta mosangpot sa …

Mahimong bahinon ang mga estudyante ngadto sa mga grupo ug dapiton sa pagtuon sa usa sa mosunod nga mga hugpong sa mga bersikulo: (1) Mosiah 19:3–8; (2) Mosiah 19:9–15; (3) Mosiah 19:16–21; 20:3, 21. Dapita sila sa pagpangita og mga detalye nga naghulagway sa kamatuoran nga ang pagbalewala o pagsalikway sa mga pulong sa Ginoo pinaagi sa Iyang mga propeta mosangpot sa pag-antos ug kasubo.

• Unsa nga ebidensiya ang imong nakita sa pag-antos o kasubo nga nasinati sa mga indibidwal niini nga mga bersikulo?

• Human makakita sa pag-antos nga gilahutay niini nga mga tawo ug nakahibalo nga ang Ginoo mipadala og propeta aron sa pagpasidaan kanila, unsay imong nakat-onan mahitungod sa Ginoo?

Si Presidente M. Russell Ballard sa Korum sa Napulog Duha ka Apostoles mipaambit sa pipila ka mga panalangin nga atong madawat kon kita mopatalinghog sa tambag sa Ginoo pinaagi sa Iyang mga propeta:

Ang kasaysayan nagpakita nga adunay kahilwasan [safety], kalinaw, kauswagan ug kalipay sa pagsanong sa propetikanhong tambag. (M. Russell Ballard, “His Word Ye Shall Receive,” Ensign, Mayo 2001, 65)

• Unsa ang pipila ka mga ehemplo gikan sa imong kinabuhi o sa mga kasulatan nga nagsuporta sa pamahayag ni Presidente Ballard?

Ang tambag sa Ginoo alang kanimo

Sama sa mga propeta sa karaang panahon, ang mga propeta karon naghatag kanato sa tambag, mga pasidaan, ug gisaad nga mga panalangin sa Ginoo. Usa ka dapit nga atong makita ang pipila niini nga tambag anaa sa Alang sa Kalig-on sa mga Kabatan-onan (booklet, 2022).

Ikonsiderar ang pagbahin sa mga estudyante ngadto sa gagmay nga mga grupo ug pag-assign sa matag grupo og usa o daghang mga hilisgotan nga tun-an gikan sa Alang sa Kalig-on sa mga Kabatan-onan (booklet, 2022). Mahimo kang magdala og pipila ka mga kopya ngadto sa klase aron magamit sa mga estudyante. Dapita ang mga estudyante sa pagpangita sa mosunod:

1. Mga sumbanan nga gidapit sa Ginoo nga imong sundon

2. Potensiyal nga espirituhanong mga peligro sa pagbaliwala sa tambag sa Ginoo

3. Gisaad nga mga panalangin alang sa pagsanong sa mga panudlo ug mga pahimangno sa Ginoo

Human matapos ang mga estudyante, dapita sila sa pagpaambit sa unsay ilang napalgan nga may kalabotan sa miaging tulo ka mga butang.

• Sa unsang paagi nga ang pagsunod niini nga mga pagtulun-an makatabang nimo nga mas makasunod ni Jesukristo?

Hunahunaa kon unsay imong nakat-onan karon mahitungod sa kamahinungdanon sa pagsunod sa propeta sa Ginoo. Paggahin og kadiyot sa pagpamalandong kon sa unsang paagi mas makasunod ka sa propeta ug nganong importante alang kanimo ang pagbuhat sa ingon. Irekord ang imong mga hunahuna ug espirituhanong mga impresyon diha sa imong journal sa pagtuon.

Komentaryo ug Background nga Impormasyon

Unsay gitudlo kanako sa propetikanhong mga pasidaan bahin sa Dios?

Si Elder D. Todd Christofferson sa Korum sa Napulog Duha ka Apostoles mitudlo:

Ako dugay nang naaghat, ug usab mibati, sa mapanganduyon nga gugma sa mga propeta sa Dios sa ilang mga pagpasidaan batok sa sala. Sila wala gidasig pinaagi sa tinguha sa pagpanghimaraot. Ang ilang tinuod nga tinguha sama ra sa gugma sa Dios; gani, kini mao ang gugma sa Dios. Sila mohigugma niadtong kinsa sila gipadala, kon si kinsa man sila ug unsa pa man sila sama. Sama lang sa Ginoo, ang Iyang mga sulugoon dili gusto ni bisan kinsa nga mag-antos sa kasakit sa sala ug sa dili maayo nga mga pagpili. (D. Todd Christofferson, “Ang Gugma sa Dios,” Liahona, Nob. 2021, 17)

Ngano nga ang ubang mga tawo dili dayon mobati sa negatibo nga mga epekto sa pagbalewala sa propeta?

Si Presidente Henry B. Eyring sa Unang Kapangulohan mitudlo:

Ang Dios mipadala og mortal nga mga sulugoon kinsa, pinaagi sa Espiritu Santo, makatabang nato nga makaila unsay gusto Niya nga ipabuhat kanato ug unsa ang Iyang gidili. Ang Dios mihimong madanihon sa pagpili sa matarong pinaagi sa pagpabati kanato sa mga epekto sa atong mga pagpili. Kon kita mopili sa matarong, makakaplag kita og kalipay—sa kataposan. Kon kita mopili sa dautan, moabot ang kagul-anan ug pagmahay—sa kataposan. Kadto nga mga epekto sigurado. Apan kasagaran malangay kini alang sa usa ka katuyoan. Kon ang panalangin moabot diha-diha dayon, ang pagpili sa matarong dili makamugna og pagtuo. Ug kay ang kagul-anan usab usahay malangay, nagkinahanglan kini og hugot nga pagtuo alang sa sayo nga pagpangayo og kapasayloan sa sala imbis unya na kon mabati na nato ang makaguol ug sakit nga mga epekto niini. (Henry B. Eyring, “Usa ka Labing Bililhon nga Kabilin sa Paglaom,” Liahona, Mayo 2014, 24–25)

Dugang nga mga Kalihokan sa Pagkat-on

Sunda ang propeta

Ikonsiderar ang pagkanta og himno o kanta sa Primary mahitungod sa mga propeta sa pagsugod sa klase. Dapita ang klase sa pag-ila sa mga baroganan nga may kalabotan sa pagsunod sa mga propeta gikan sa mga pulong sa kanta. Dasiga ang mga estudyante sa pagpangita og ebidensiya niini nga mga baroganan samtang magtuon sila sa mga sangpotanan nga giatubang ni Hari Noah ug sa iyang mga katawhan human sa pagsalikway sa propetikanhong tambag ni Abinadi.

Nagtukod diha sa pundasyon sa mga pagtulun-an ni Jesukristo

Ang mga baroganan sa ebanghelyo dili mausab. Agi og dugang sa paggamit sa mga baroganan gikan sa karaang kasulatan ug paggamit niini sa atong modernong panahon, makagamit kita og modernong propetikanhong mga pagtulun-an ug magamit kini sa mga istorya sa kasulatan. Dapita ang mga estudyante sa pagpangita kon sa unsang paagi ang mga parapo 6–8 sa “Ang Pamilya: Usa ka Pamahayag ngadto sa Kalibotan” (https://www.churchofjesuschrist.org/study/scriptures/the-family-a-proclamation-to-the-world/the-family-a-proclamation-to-the-world?lang=cebChurchofJesusChrist.org) mahimong magamit sa mga sitwasyon sa pamilya nga makita sa Mosiah 19:6–24; 20:3.

Ang pagsunod sa dili matarong nga mga indibidwal mahimong modala kanato sa paghimo og mga desisyon nga atong pagabasolan

Dapita ang mga estudyante sa pagbasa sa Mosiah 19:18–21, mangita kon unsay nahitabo tali ni Hari Noah ug niadtong misunod kaniya. Dapita ang mga estudyante sa pag-report sa unsay ilang napalgan.

Ikonsiderar kon unsay imong mahimo aron matabangan ang mga estudyante sa pagtimbang-timbang kon aduna bay mga impluwensiya sa ilang mga kinabuhi nga mahimong modala kanila sa paghimo og mga pagpili nga ilang basolan sa kaulahian.