Alma 1:19–33

Pagkaplag og Kalinaw diha kang Kristo pinaagi sa Pagpabiling Matinud-anon latas sa Pagpanggukod

Kami nagtuo nga ang tanang mga tawo adunay katungod sa pagsimba sa Dios sumala sa ilang kaugalingon nga tanlag (tan-awa sa Mga Artikulo sa Hugot nga Pagtuo 1:11). Apan unsay mahitabo kon mobiaybiay ang uban kanimo tungod sa imong mga pagtuo? Unsaon nimo pagsanong ug pagkaplag og kalinaw kon ang uban mosaway kanimo tungod sa imong hugot nga pagtuo? Sa panahon ni Alma, ang mga tawo “misugod sa pagpanggukod niadto nga sakop sa simbahan sa Dios” (tan-awa sa Alma 1:19). Kini nga leksiyon makatabang kanimo sa pagsanong nga matinud-anon ug mobati og kalinaw bisan kon ikaw nag-atubang og pagpanggukod tungod sa pagkamiyembro sa Ang Simbahan ni Jesukristo sa mga Santos sa Ulahing mga Adlaw.

Tabangi ang mga tigkat-on nga makapalambo og mga kahanas sa pagtuon sa kasulatan.Ang pagpangita sa mga lista diha sa mga kasulatan makatabang sa mga magtutudlo ug mga estudyante nga makaila sa mahinungdanong mga punto nga gihatagan og gibug-aton sa tigsulat. Ang mga estudyante mahimo usab nga maghimo og mga lista sa may kalabotan nga mga hunahuna, mga ideya, o mga instruksiyon aron matabangan sila nga makasabot unsa ang ilang nakat-onan.

Pagpangandam sa estudyante: Dapita ang mga estudyante sa paghunahuna og mga higayon sa ilang kinabuhi dihang gihagit ang ilang mga pagtuo ug giunsa kini nila pagsanong.

Mga Posibleng Kalihokan sa Pagkat-on

Gibiaybiay tungod sa imong mga pagtuo

Ipakigbahin ang mosunod gikan ni Elder Jeffrey R. Holland. O ikonsiderar ang pagdapit sa mga estudyante nga i-drama-drama ang usa ka senaryo diin sila mahimong gibiaybiay tungod sa ilang mga gituohan.

Si Elder Jeffrey R. Holland sa Korum sa Napulog Duha ka Apostoles mitambag sa kabatan-onan sa Simbahan. Tan-awa ang bidyo nga “Ang Bili—ug mga Panalangin—sa Pagkadisipulo” gikan sa time code 0:25 hangtod sa 2:05, nahimutang sa https://www.churchofjesuschrist.org/study/general-conference/2014/04/the-cost-and-blessings-of-discipleship?lang=ceb ChurchofJesusChrist.org, o basaha ang pamahayag sa ubos:

Uban sa pagdayeg ug pag-awhag alang sa tanan kinsa kinahanglan nga magpabiling lig-on niining ulahing mga adlaw, ako moingon sa tanan ug ilabi na sa kabatan-onan sa Simbahan nga kon wala pa kamo tawaga, moabot ang adlaw nga kamo pagatawgon sa pagpanalipod sa inyong tinuohan o tingali bisan sa paglahutay sa personal nga mga pang-abuso tungod kay kamo mga miyembro sa Ang Simbahan ni Jesukristo sa mga Santos sa Ulahing mga Adlaw. Ang maong mga higayon magkinahanglan og kaisog ug maayong pamatasan sa inyong bahin.

Pananglit, ang usa ka sister missionary misulat bag-o lang ngari nako: “Ang akong kompanyon ug ako nakakita og tawo nga naglingkod sa plasa sa lungsod nga naniudto. Sa among pagduol, mitan-aw siya ug nakita ang among mga missionary name tag. Lain kaayo ang iyang tinan-awan, mitindog siya ug mihunat sa pagsumbag nako. Nakahupo dayon ko, pero iyang gitutho ang iyang gikaon diri nako ug nagsugod sa pagpamalikas kanamo. Mipalayo mi nga walay gisulti. Pagtrapo na nako sa akong nawong, nahinolan nako ang dinugmok nga patatas nga miigo sa luyo sa akong ulo. Usahay lisod nga mahimong misyonaryo kay diha-diha gusto unta akong mobalik, liaban kadtong gamayng tawo, ug ingnon, ‘NGANO MAN KA!’ Apan wala ko kini buhata.” (Jeffrey R. Holland, “Ang Bili—ug mga Panalangin—sa Pagkadisipulo,” Liahona, Mayo 2014, 6)

Tabangi ang mga estudyante sa pagkonsiderar sa ilang kaugalingong mga pagbati pinaagi sa pagpangutana sa pipila o sa tanang mosunod nga mga pangutana.

• Giunsa kaha nimo pagsanong kon ikaw pa ang misyonaryo niini nga kahimtang?

• Ngano kaha nga lisod ang pagsanong sa Kristohanong paagi?

• Kanus-a ka nga gitagad og dili maayo o gibiaybiay tungod sa imong mga pagtuo?

• Unsa kaha ang pipila ka mga sitwasyon sa umaabot diin ikaw mahimong biaybiayon tungod sa imong mga pagtuo?

Samtang magtuon ka sa mga ehemplo sa mga miyembro sa Simbahan ni Kristo diha sa Basahon ni Mormon, pangitaa ang mga paagi nga makapabilin ka nga makanunayon ug makakaplag og kalinaw diha ni Jesukristo atol sa pagpanggukod.

Pagpanglutos diha sa Basahon ni Mormon

Si Alma adunay daghang mga hagit sa iyang panahon isip labaw nga maghuhukom. Human gipahamtangan og kamatayon si Nehor tungod sa pagpatay kang Gideon, pipila sa mga katawhan nagpadayon sa pagtuo sa mga pagtulun-an ni Nehor. Basaha ang Alma 1:19–24, mangita sa mga hagit nga giatubang sa mga Nephite.

• Unsa nga mga pagkaparehas ang imong nakita tali sa unsay giatubang sa mga Nephite ug sa imong mga kasinatian?

• Unsa nga mga lihok gikan sa mga miyembro sa Simbahan ang nakatampo niini nga mga hagit (tan-awa sa bersikulo 22)?

Mahimo nimong ipasabot sa mga estudyante nga ang Manluluwas mitudlo nga ang panagbingkil sayop ug gikan sa yawa (tan-awa sa 3 Nephi 11:29–30). Kini naglakip kon ang imong gitudlo tinuod ug husto.

Basaha ang Alma 1:25–28, mangita sa unsay gibuhat sa matarong nga mga miyembro sa Simbahan. Aron matabangan ka nga mahan-ay unsa ang imong gitun-an, paghimo og lista kon unsa ang gibuhat sa mga tawo. Mahimo nimo kining buhaton sa imong journal sa pagtuon, o mahimo nimong markahan ang unsay imong makit-an sa imong mga kasulatan.

Mahimong matudloan ang mga estudyante sa kahanas sa pagtuon sa kasulatan sa paghimo og mga lista. Mahimo nilang markahan ang mga kasulatan sa paagi nga makahuluganon ngadto kanila. Ang ubang mga estudyante mahimong modugang og ulohan sa lista sama sa “Unsaon Pagbaton og Kalinaw Kon Gigukod” o laing ulohan diha sa ilang mga kasulatan.

Mahimong dapiton ang mga estudyante sa pagpili og usa ka aytem gikan sa ilang listahan dayon molibot sa lawak [room] ug tubagan ang mga pangutana sa ubos uban sa daghang mga estudyante kutob sa ilang mahimo.

• Unsa ang pipila sa nagkalain-laing mga paagi nga ang mga miyembro sa Simbahan misanong sa pagpanglutos?

Kompletoha ang mosunod nga hugpong sa mga pulong gamit ang imong nakat-onan gikan sa ehemplo sa mga Nephite.

• … makatabang kanato nga mobati sa padayon nga kalinaw sa Manluluwas bisan kon kita gibiaybiay tungod sa pagtuo diha Kaniya.

• Sa imong hunahuna sa unsang paagi ang pagsanong niini nga mga paagi makatabang sa usa ka tawo nga mobati sa kalinaw sa Manluluwas?

• Unsa ang gikan niini nga mga bersikulo o sa imong lista ang gusto nimong labing mahinumdoman kon mag-atubang ka og pagbiaybiay tungod sa imong mga pagtuo? Ngano man?

  Kon adunay panahon, ikonsiderar ang paghisgot sa pipila ka mga pagtulun-an sa Manluluwas sa paglahutay sa pagpanglutos diha sa 3 Nephi 12:10–12, 43–45.

  Tingali makatabang ang pagdapit sa mga estudyante sa pagpamalandong sa sunod nga pangutana kay sa paghangyo kanila sa pagtubag og kusog. Ang pagbuhat sa ingon makatugot sa Balaang Espiritu sa paggiya kanila sa personal nga dili mopabati kanila nga napugos sa pagpakigbahin sa personal nga mga pag-aghat.

• Unsa nga mga kasinatian sa imong kinabuhi ang nakapabati nimo nga gikinahanglan ang kalinaw nga gitanyag ni Jesukristo?

Labaw pa kay sa kalinaw

Agi og dugang sa pagsinati og kalinaw, ang Langitnong Amahan mipanalangin sa matinud-anong mga Nephite sa laing mga paagi. Basaha ang Alma 1:29–32, mangita sa mga panalangin sa Langitnong Amahan ngadto sa mga Nephite samtang sila nagpabilin nga makanunayon atol sa lisod nga mga panahon.

• Sa unsang paagi nimo nakita ang mga panalangin sa Langitnong Amahan samtang ikaw o ang uban nga imong nailhan nagpabilin nga matinud-anon atol sa mga pagpangbiaybiay?

Ikonsiderar ang pagpakigbahin og personal nga kasinatian kon sa unsang paagi ang Ginoo mipanalangin kanimo o sa usa ka tawo nga imong nailhan tungod sa pagpabiling matinud-anon atol sa mga pagpangbiaybiay.

Pagpili og dili mominos duha sa mga binuhatan nga gihimo sa matinud-anong mga Nephite aron sa pagpakita og gugma ug kaluoy sa tanang katawhan bisan pa sa pagpanglutos (tan-awa sa Alma 1:25–30). Ihulagway kon sa unsang paagi ang usa ka tawo sa atong panahon makahimo sa samang butang.

Dapita ang mga estudyante sa pagpakigbahin sa ilang mga tubag.

Ipakigbahin ngadto sa mga estudyante ang imong pagsalig nga ang Manluluwas motabang kanila nga magpabiling makanunayon diha Kaniya bisan pa sa pagpanglutos. Dapita sila sa pagkonsiderar sa pagbuhat sa unsay gipakigbahin nila o sa usa sa ilang mga klasmeyt.

Komentaryo ug Background nga Impormasyon

Unsaon nako nga magpabilin nga makanunayon atol sa mga pagsulay sa hugot nga pagtuo?

Si Elder Neil L. Andersen sa Korum sa Napulog Duha ka Apostoles mipahayag:

Unsaon ninyo sa pagpabilin nga “makanunayon ug dili matarog” kon sulayan ang hugot nga pagtuo? Isubsob ninyo ang inyong kaugalingon sa mga butang nga nakatabang sa paglig-on sa pagtuo: ipakita ninyo ang inyong hugot nga pagtuo kang Kristo, mag-ampo kamo, mamalandong sa kasulatan, maghinulsol, magsunod sa mga sugo, ug moserbisyo sa uban. (Neil L. Andersen, “Pagsulay sa Inyong Hugot nga Pagtuo,” Liahona, Nob. 2012, 40)

Unsaon nako sa pagsanong ang pagpanglutos?

Si Presidente Harold B. Lee (1899–1973) miingon:

Ang dakong kadaut nga mahimong moabot tungod sa pagpanglutos dili gikan sa pangpanglutos mismo apan gikan sa posible nga epekto diha sa gilutos kinsa pinaagi niana mahimo nga mapugngan ang ilang dakong tinguha sa katarong sa ilang katuyoan. Ang kadaghanan niana nga pagpanglutos nagagikan sa kakulang sa pagsabot, kay ang mga tawo hilig sa pagsupak nianang wala nila masabti. Ang pipila niini gikan sa mga tawo nga nagtinguha sa dautan. Apan gikan sa bisan unsa nga hinungdan, ang pagpanglutos ingon og tibuok gayud kalibutan batok niadtong nagbuhat sa matarung nga katuyoan nga ang Magtutudlo nagpahimangno kanato, “Alaut kamo kon ang tanang mga tawo nagasultig maayo mahitungod kaninyo! kay ang mga mini nga propeta gibuhatan man sa ingon nga paagi sa mga ginikanan” (Lucas 6:26).

… Hinumdomi kana nga pahimangno kon kamo gisutsutan sa walay pag-uyon ug gibiay-biay tungod kay kamo midumili sa pagpaubos sa inyong mga sumbanan, sa dili paggamit og alkohol, tabako, tsa, o kape, sa pagkamatinuoron, ug sa moralidad aron makuha ang pagdayeg sa mga tawo. Kon kamo hugot nga mobarug alang sa katarung bisan sa pagbugal-bugal sa mga tawo o gani sa pisikal nga pagdagmal, pagapurong-purongan kamo uban sa kabulahanan sa mahangturong hingpit nga kalipay. (Mga Pagtulun-an sa mga Presidente sa Simbahan: Harold B. Lee [2000], 252)

Si Presidente Dallin H. Oaks miingon:

Dili gayod nato daug-daugon kadtong dili parehas nato og mga gituohan ug mga pasalig. (Dallin H. Oaks, “Duha ka Dagkong mga Sugo,” Liahona, Nob. 2019, 75)

Unsa ang akong mabuhat aron maangkon ang kalinaw sa Manluluwas sa akong kinabuhi?

Si Elder Quentin L. Cook sa Korum sa Napulog Duha ka Apostoles miila sa pipila ka mga paagi aron makabaton og kalinaw. Ikonsiderar ang pagbasa sa iyang pakigpulong nga “Personal nga Kalinaw sa mga Panahon nga Mahagiton” (Liahona, Nob. 2021, 89–92) aron mahibaloan ang lima ka mga paagi sa pagpangita og personal nga kalinaw gikan sa Langitnong Amahan ug sa Manluluwas.

Sa unsang paagi nga ang pagpakigbangi sa uban makapahilayo kanato gikan sa Manluluwas?

Si Elder Dale G. Renlund sa Korum sa Napulog Duha ka Apostoles miingon:

Ang panagbingkil dili makapahimsog sa espirituhanong paagi alang nato isip mga indibidwal. Mawala kanato ang kalinaw, kalipay, ug pahulay, ug ang atong abilidad sa pagpamati sa Espiritu mahuyang. (Dale G. Renlund, “Ang Kalinaw ni Kristo Makawagtang sa Pagdumot,” Liahona, Nob. 2021, 84)

Dugang nga mga Kalihokan sa Pagkat-on

Alternatibo nga senaryo alang sa pagsugod sa leksiyon

ChurchofJesusChrist.org.

Pagtinguha sa personal nga kalinaw

Sa pakigpulong nga “Personal nga Kalinaw sa mga Panahon nga Mahagiton” (Liahona, Nob. 2021, 89–92), si Elder Quentin L. Cook miila sa lima ka butang nga atong mahimo aron madugangan ang personal nga kalinaw pinaagi sa Manluluwas. Ikonsiderar ang pag-imprinta og mga bahin sa pakigpulong ug pagdapit og mga grupo sa pagbasa mahitungod sa usa sa mga butang nga gihisgotan ni Elder Cook. Mahimong hisgotan sa mga estudyante kon sa unsang paagi ang pagbuhat sa unsay ilang gitun-an makatabang kanila nga mobati sa kalinaw sa Manluluwas.