“Alema 2–3: Lē Ua Tatou Filifili e Usitai i Ai,” Tusi Lesona a le Faiaoga o le Tusi a Mamona (2024)
“Alema 2–3,” Tusi Lesona a le Faiaoga o le Tusi a Mamona
Alema 2–3
Lē Ua Tatou Filifili e Usitai i Ai
I le gasologa atoa o tusitusiga paia, ua faaauau pea ona lapataia i tatou e perofeta e faapea o le a tatou feagai ma taunuuga o a tatou amioga, e faavae i luga o e tatou te filifili e mulimuli i ai. Mo se faataitaiga, ina ua mavae se feteenaiga i le va o sa Nifae ma sa Amiliki, sa aoao mai le perofeta o Mamona e faapea o i latou o e na maliliu o le a “selesele le fiafia e faavavau po o le pagatia e faavavau, e tusa ma le agaga sa latou filifili e usiusitai i ai, pe o se agaga lelei po o se agaga leaga” (Alema 3:26). O lenei lesona e mafai ona fesoasoani e te malamalama atili ai i taunuuga e afua ona o le ua e filifili e te mulimuli i ai i lenei olaga.
Saunia ma le Faamoemoega i le mafaufau. Faaalu se taimi e mafaufau ai i mea o le a oo i ai tagata aoga i le vasega lea o le a fesoasoani ai ia i latou e “malamalama ma faalagolago i aoaoga ma le Togiola a Iesu Keriso.” Sa uunaia e Peresitene Russell M. Nelson faiaoga ina ia “manatua lena faamoemoega i aso uma ae e te lei aoaoina au tagata aoga” (“Teaching Youth in the Day of the Wave” [Faasalalauga faasatelite mo Seminare ma Inisitituti o Mataupu Faalelotu], 6 Aokuso, 2013).
Sauniuniga a le tagata aoga: Valaaulia tagata aoga e faitau pe faalogologo i le Alema 2–3 a o lei o mai i le vasega. Tuu atu ia i latou e mafaufau e uiga i mea e mafai ona latou aoaoina mai le tala i nei mataupu.
Gaoioiga e Ono Mafai Ona Aoao Ai
O le a le aoaoga o le tala?
Mafaufau e valaaulia tagata aoga e mafaufau i ni tala po o ni talafatu e aoao atu ai lesona ma valaaulia i latou e faasoa mai i le vasega. Afai e manaomia, e mafai ona e faaaogaina le faataitaiga lenei. Afai e masani tagata aoga i le faataitaiga, mafaufau e valaaulia i latou e faamatala le tala ia latou lava upu ma faailoa mai le aoaoga po o le lesona. O le a fesoasoani lenei mea i tagata aoga e faailoa ai mataupu faavae na faamoemoe Mamona mo i tatou e aoao mai i ana tusitusiga.
-
E mafai ona e mafaufau i se tala po o se talafatu e aoao atu ai se lesona o le olaga?
O se talafatu lauiloa na taua e se tusitala Eleni anamua e igoa ia Aesop o le “The Boy Who Cried Wolf.” O loo faamatala i le tala se tama talavou leoleo mamoe na faalua ona fai togafiti i ona tuaoi ia talitonu o loo osofaia e se luko le lafu mamoe a le nuu. O le mea na maofa tele ai le tamaitiiti, ona sa faanatinati atu nisi o tagata o le nuu e ofo atu le fesoasoani, ma le le iloa e leai se luko. Mulimuli ane, sa osofaia e se luko moni le lafu. Ae ina ua alaga faatolu le tamaitiiti mo se fesoasoani, sa leai se tasi na sau e fesoasoani ia te ia.
-
O le a se aoaoga poo se lesona e mafai ona tatou aoao mai i lenei tala?
Vaavaai mo avanoa i lau suesuega atoa o le Tusi a Mamona e fesoasoani ai i tagata aoga ia iloa ma faailoa mai mataupu faavae ma lesona na faamamafaina e le perofeta o Mamona.
E pei lava ona masani ona i ai ni aoaoga o tala poo talafatu, e aoao atu foi e tusitusiga paia ia lesona ma faapupula mataupu faavae. O se tomai aoga mo le suesueina o tusitusiga paia pe a e suesueina le Tusi a Mamona o le maitauina lea pe a manino le ta’uina mai e Mamona o lona faamoemoega mo le faaaofia ai o ni tala patino i le faamaumauga. E masani ona ia faaaogaina fuaitau e pei o le “Ma ua faapea ona tatou iloa manino ai,” “ua faapea ona tatou vaai ai,” “e moni, e moni,” po o le “faauta,” e ta’u mai ai ia i tatou o loo ia faasoa mai mataupu faavae ma lesona faatasi ma i tatou (tagai Alema 24:30; 30:60; 48:17; 62:41; Helamana 3:27–28). O le faailoaina o lesona ma upumoni na faamamafaina e Mamona e mafai ona fesoasoani ia te oe e maua ai le taua faaletagata lava ia. E mafai foi ona faateleina ai le aoga o au suesuega o tusitusiga paia.
Faitau le Alema 3:26–27, ma vaavaai mo se upumoni na manao Mamona ia i tatou e aoao mai le tala o loo i le Alema 2–3. Mafaufau e faailoga mea e te mauaina.
-
O le a se mea na e mauaina?
Mafaufau e faasoa atu le faamatalaga lenei pe afai e manaomia e tagata aoga se fesoasoani e malamalama ai i upumoni o loo aoao mai i le Alema 3:26–27.
Ina ia fesoasoani ia e malamalama atili i lenei fuaitau, ia maitau o le fasifuaitau “e maua e tagata taitoatasi le totogi mai ia te ia o lē ua ia filifili e usiusitai i ai” ua valaaulia ai i tatou e vaai faalemafaufau faapea o i tatou o tagata faigaluega ma o a tatou filifiliga e iloa ai pe o lo tatou pule o le Tama Faalelagi po o Satani (tagai Alema 3:27). I le faatatauga lenei, o le upu lisi e faasino i le faalagolago atu po o le faliu atu i le tasi itu po o le isi. O le mea lea, o i latou o e faliu atu pe faalagolago atu ia Satani e le o toe mamao ae faafaigaluegaina i latou e ia ma maua le “pagatia e faavavau” (Alema 3:26). E iu lava ina faaali mai e a tatou filifiliga o le olaga pe o ai ua tatou filifilia e avea ma o tatou pule e faavavau.
Atonu e aoga le tusi o le upumoni lenei i luga o le laupapa ina ia mafai ai e tagata aoga ona faasino atu i ai i le lesona atoa.
O se tasi o upumoni mai le Alema 3:26–27 o le, o lē ua tatou filifili e usitai i ai i lenei olaga e fua i ai lo tatou fiafia po o le faanoanoa e faavavau.
Mafaufau i lou olaga ma po o ai o loo e filifili e usitai i ai. O e taumafai e mulimuli ia Iesu Keriso? Pe o e mulimuli i se isi tagata? Mafaufau loloto i fesili nei a o faaauau pea lau suesuega i le asō.
Ua saili Amiliki e avea ma tupu
I popofou o le nofoaiga a faamasino, na feagai ai Alema ma lona nuu ma se tofotofoga faigata i lo latou faatuatua ma le fiafia.
Faitau le Alema 2:1–12, ma vaavaai mo le tofotofoga na feagai ma sa Nifae.
Mafaufau e faaaofia le fautuaga e uiga i le saolotoga faaletapuaiga i le vaega o Gaoioiga Faaopoopo e Aoao ai i le vaega lenei o le lesona.
-
O le a le mea na faamoemoe Amiliki e fai pe afai e avea o ia ma tupu? (Tagai i le fuaiupu 4.)
-
Na faapefea ona tali atu sa Nifae?
-
Na faapefea ona faaalia e sa Nifae lo latou manao e mulimuli i le Faaola?
Filifiliga ma Taunuuga
Fesoasoani i tagata aoga e saili ma faasoa mai taunuuga eseese o le mulimuli i le Atua po o le tiapolo. O se tasi o auala e faia ai lenei mea o le kopi lea o le siata lenei i luga o le laupapa ma fai atu i tagata aoga e faatumu. O le isi filifiliga o le saunia lea o ni fasipepa laiti a o lei amataina le vasega e suitulaga i tupe po o “taui” (Alema 3:27). Ona aumai lea o ni taga pepa se lua po o ni pusa, ma faaigoa le tasi “Mulimuli i le Atua” a o le isi “Mulimuli i le tiapolo po o ana auauna.” Tuu atu i tagata aoga taitasi ia le itiiti ifo ma le tasi se fasipepa ma tuu atu i le afa o le vasega e faitau poloka mau taitasi o loo lisi atu i lalo. A o maua e tagata aoga ni taui eseese mai tala taitasi, valaaulia i latou e tusi mea nei i luga o a latou fasipepa ma tuu a latou taui i le koneteina talafeagai. A uma ona faia e tagata aoga, faitau leotele nisi o taui. Mafaufau e valaaulia tagata aoga e faasoa mai ni taui faaopoopo mai le mulimuli i le Atua ua latou maitauina i o latou lava olaga po o olaga o isi.
Kopi le siata lenei i lau api talaaga mo suesuega. Faitau fuaiupu o loo mulimuli mai ai, ma lisi po o a “taui” e sau mai le mulimuli i le Atua po o le tiapolo i le koluma talafeagai.
“O taui a ia o lē ua filifili o ia e usiusitai i ai” (Alema 3:27)
|
Mulimuli atu i le Atua |
Mulimuli atu ai i le tiapolo po o ana auauna |
|---|---|
Alema 2:16–18, 26–31 (Alema ma sa Nifae)
Alema 3:4, 13–14, 18–19 (o sa Amiliki)
-
O le a se mea sa e maitauina e uiga i tala nei e lua?
Manatua: O le fetuu na oo uma i ai sa Amiliki ma sa Lamana o se vavaeese mai le Atua ona o lo latou fouvale ma le le usiusitai (tagai 2 Nifae 5:20–21). O le faailoga, i lena taimi lea na faaeseina ai sa Lamana mai sa Nifae, e faapea “o paʼu o sa Lamana sa uliuli” (Alema 3:6). E taua le manatua o le natura ma foliga vaaia o lenei faailoga, e le o malamalama atoatoa i ai. Ua aoao mai perofeta o le Tusi a Mamona ma perofeta o aso nei e sese le faifai faasaga i tagata ona o le lanu o o latou paʼu (tagai Iakopo 3:9).
E faalagolago i gafatia a au tagata aoga, nai lo le tuuina atu o isi vaega e tolu o fuaiupu e sosoo ai, e mafai ona e valaaulia tagata aoga e sue isi mau o loo faamatala mai ai “taui” o le mulimuli i le Atua po o se isi tagata. E mafai ona e uunaia i latou e faaaoga fuaitau o le atamai i aoaoga faavae.
Faitau fuaitau o mau nei ma faaopoopo mea e te maua i lau siata.
A uma ona faatumu e tagata aoga a latou siata, valaaulia i latou e faasoa mai mea na latou mauaina. Fai atu i tagata aoga ni fesili tulitatao e pei o le faataitaiga lenei a o latou faasoa mai lea e fesoasoani ia i latou e faatatau mea na latou maua i tusitusiga paia i o latou olaga patino.
Faaaogaina patino
-
O le a se mea na e maitauina pe oo i ai i le olaga ua faaalia ai ia te oe le moni o le mataupu faavae o loo faaalia i le Alema 3:26–27?
Mafaufau i filifiliga o loo e faia i le taimi nei lea e fesoasoani ia te oe e mulimuli ai i le Tama Faalelagi ma Iesu Keriso. O le a faapefea ona latou taitai atu ai i le fiafia e faavavau? O e faia ni filifiliga e ono mafai ona taitai ese ai oe mai le Faaola? Filifili po o le a le mea e manaomia ona e faia ina ia e sui ai. Mafaufau pe mafai faapefea e le Tama Faalelagi ma Iesu Keriso ona faamanuiaina ma faamalosia oe a o e taumafai e faia filifiliga tonu ia o le a toe taitai atu ai oe ia i Laua.