Alma 13

“Nga Kamo Mahimo nga Makasulod Niana nga Kapahulayan”

Niini nga kinabuhia, kita adunay daghang mga kabalaka ug mga kasamok. Ang Ginoo anaa aron sa pagtabang kanato ug nagtinguha nga kita makasulod ngadto sa Iyang kapahulayan. Si Alma mipasabot nga ang Ginoo mi-orden og mga halangdon nga pari [high priest] aron sa pagtudlo sa mga sugo ug sa pagbuhat sa mga ordinansa aron ang mga tawo makasulod ngadto sa kapahulayan sa Ginoo. Kini nga leksiyon makatabang kanimo nga makasabot unsay buot ipasabot nga makasulod ngadto sa kapahulayan sa Ginoo ug unsaon nimo sa pagbuhat sa ingon.

Pagtabang sa mga estudyante nga makasabot sa mga simbolo nga nagpunting kang Jesukristo. Ang mga kasulatan puno sa mga simbolo nga nagpunting kang Jesukristo. Pagpangutana aron matabangan ang mga estudyante nga makaila niini nga mga simbolo, ug itudlo ngadto sa propetikanhong komentaryo kon anaa. Hisgoti kon unsa ang gitudlo sa mga simbolo mahitungod sa Manluluwas.

Pagpangandam sa estudyante: Ikonsiderar ang pagdapit sa mga estudyante sa paghunahuna kon sa unsang paagi sila napanalanginan pinaagi sa usa ka lider sa Simbahan o pinaagi sa pag-apil sa usa ka ordinansa sa ebanghelyo.

Posible nga mga Kalihokan sa Pagkat-on

Ang kapahulayan sa Ginoo

Ang katuyoan sa mosunod nga kalihokan mao ang pag-andam sa mga estudyante sa pagsabot sa kapahulayan sa Ginoo. Ikaw ug ang mga estudyante mahimong magpakigbahin og mga kasinatian sa pagkakuha og kaayohan gikan sa kapahulayan.

• Kanus-a ang higayon nga nakabenepisyo ka sa kapahulayan?

Ang mga kasulatan sa kasagaran naghisgot sa kapahulayan sa Ginoo. Ang kapahulayan sa Ginoo nagpasabot sa “kahingpitan sa iyang himaya” (Doktrina ug mga Pakigsaad 84:24). Ang kapahulayan sa Ginoo nagpasabot usab sa “kalipay sa kalinaw ug kagawasan gikan sa kagul-anan ug kasamok. Ang Ginoo nagsaad sa mao nga kapahulayan ngadto sa iyang mga matinud-anon nga sumusunod sa panahon niini nga kinabuhi. Siya usab nag-andam og usa ka dapit sa kapahulayan alang kanila sa umaabot nga kinabuhi” (Giya ngadto sa mga Kasulatan, “Kapahulayan,”scriptures.ChurchofJesusChrist.org).

Ang pagbaton og kalinaw ug kagawasan gikan sa kagul-anan ug kasamok wala magpasabot nga ang kinabuhi walay mga pagsulay. Basaha ang Mateo 11:28–30, mangita sa unsay gitudlo sa Ginoo mahitungod sa Iyang kapahulayan atol sa mga kalisdanan sa kinabuhi.

Hatagi ang mga estudyante og panahon sa pagpamalandong kon sa unsang paagi sila makabenepisyo gikan sa kapahulayan sa Ginoo karon sa ilang mga kinabuhi. Mahimo pa gani nila nga irekord ang pipila sa ilang mga hunahuna diha sa ilang journal sa pagtuon.

Hunahunaa ang imong kasamtangang kahimtang.

• Sa unsang paagi ka makabenepisyo gikan sa pagsinati sa kapahulayan sa Ginoo?

Gidapit ni Alma ang mga katawhan sa Ammonihah sa paghinulsol ug sa dili pagpatig-a sa ilang mga kasingkasing aron sila mapasaylo ug makasulod ngadto sa kapahulayan sa Ginoo (tan-awa sa Alma 12:33–37). Samtang magtuon ka sa Alma 13, pangitaa kon unsay gihatag sa Ginoo aron sa pagtabang kanimo nga makasulod ngadto sa Iyang kapahulayan niini nga kinabuhi ug sa kinabuhi nga moabot.

Ikonsiderar ang pagbahin sa klase sa katunga, ipabuhat sa usa ka katunga ang pagtuon sa Alma 13:1–2, 6 mahitungod sa mga lider sa pagkapari ug sa laing katunga ang pagtuon sa Alma 13:16 mahitungod sa mga ordinansa sa pagkapari. Mahimong makatabang kini sa mga estudyante nga mailhan dayon ang duha ka baroganan ug ilista kini sa pisara sa dili pa ninyo kini hisgotan isip usa ka klase. Ang laing paagi mao ang pag-andam og content gikan sa matag baroganan nga tun-an sa mga estudyante nga magpares o sa mga grupo sa dili pa itaho ang ilang nakat-onan ngadto sa ubang mga estudyante. Mahimong maghatag kini og panahon sa paghisgot sa Alma 13:27–30 sa ulahi sa leksiyon.

Ang mga lider sa pagkapari nagtabang kanato nga makasulod ngadto sa kapahulayan sa Ginoo

Ang mga tawo sa Ammonihah mikonsiderar sa ilang mga kaugalingon nga “sunod sa kapunongan sa tinuohan ni Nehor” (Alma 14:16). Tungod niini, sila mituo nga sila maluwas nga wala ang Pag-ula ni Jesukristo, ug ilang gipulihan ang pagkapari og usa ka sayop nga kapunongan nga gitawag ni Alma nga “pagpanapi sa mga pari” (tan-awa sa Alma 1:3–4, 12, 16). Aron matul-id ang ilang sayop nga mga pagtuo, gitudloan sila ni Alma kon sa unsang paagi “ang Ginoong Dios mi-orden og mga pari, sunod sa iyang balaan nga kapunongan” (Alma 13:1).

Basaha ang Alma 13:1–2, 6, mangita kon nganong ang Ginoo mi-orden sa mga lider sa pagkapari.

• Unsa ang pipila ka mga rason nganong ang Ginoo mitawag og mga lider sa pagkapari?

Gikan niini nga mga bersikulo, atong makat-onan nga ang Manluluwas nagtawag og mga lider sa pagkapari aron sa pagtabang kanato nga motan-aw ngadto Kaniya alang sa katubsanan ug sa pagtudlo sa Iyang mga sugo aron kita makasulod ngadto sa Iyang kapahulayan.

Si Elder Dale G. Renlund sa Korum sa Napulog Duha ka Apostoles mitudlo:

Tungod sa Iyang maulaong sakripisyo, si Jesukristo adunay gahom ug awtoridad sa pagtubos sa tanang katawhan. Aron daling magamit ang Iyang matubsanong gahom, Iyang gidelegar ang usa ka bahin sa Iyang gahom ug awtoridad ngadto sa mga tawo dinhi sa yuta. Kining gidelegar nga gahom ug awtoridad gitawag nga pagkapari [priesthood]. (Dale G. Renlund, “Ang Priesthood ug ang Matubsanong Gahom sa Manluluwas,” Liahona, Nob. 2017, 64)

• Unsa ang matabang niini nga kinutlo nga imong masabtan kon nganong ang Dios nagpadayon sa pagtawag sa mga tawo sa paghupot sa pagkapari sa atong panahon?

Ang mga halangdon nga pari [high priest] nga gihisgotan ni Alma “gitawag ug giandam gikan sa katukuran sa kalibotan … tungod sa ilang naghingapin nga hugot nga pagtuo ug maayo nga mga buhat” (Alma 13:3). Sa samang higayon, ang uban “nagdumili sa pagdawat sa Espiritu sa Dios tungod sa katig-a sa ilang mga kasingkasing” (Alma 13:4).

Ang ubang mga lider sa Simbahan, sama sa mga lider sa Relief Society, Young Women, ug Sunday School, nag-alagad nga adunay nadelegar nga awtoridad sa pagkapari. Nag-alagad uban sa mga lider sa pagkapari, nagtabang sila sa paggiya sa mga indibidwal ug mga pamilya sa pagduol ngadto kang Kristo.

Aron matubag ang mosunod nga pangutana, mahimong maghimo ang mga estudyante og lista isip usa ka klase o motubag diha sa gagmay nga mga grupo. Mahimo usab nimong ikonsiderar ang pagdapit og lokal nga lider sa Simbahan sa pagtambong sa klase ug sa pagpakigbahin kon unsay iyang gibuhat aron sa pagtabang sa uban nga motan-aw kang Jesukristo.

• Unsa ang pipila ka mga paagi nga ang mga lider sa Simbahan nagtabang kanato nga motan-aw kang Jesukristo ug makasulod ngadto sa Iyang kapahulayan?

Ang mga ordinansa sa pagkapari makatabang nato nga makasulod ngadto sa kapahulayan sa Ginoo

Gihisgotan ni Alma ang matarong nga mga ehemplo sa mga halangdon nga pari [high priest] ug sa unsang paagi sila “gibalaan” (Alma 13:11) ug “nahimo nga putli ug nakasulod ngadto sa kapahulayan sa Ginoo nga ilang Dios” (Alma 13:12). Gihisgotan dayon ni Alma sa piho si Melchizedek isip usa ka ehemplo sa usa ka matarong nga lider sa pagkapari. Timan-i nga ang mga katawhan ni Melchizedek sa sinugdanan mga dautan sama sa katawhan sa Ammonihah (tan-awa sa Alma 8:9; 13:17).

Basaha ang Alma 13:14–19, mangita kon giunsa pag-alagad ni Melchizedek ang iyang mga katawhan.

• Unsa nga mga pagkaparehas ang imong namatikdan tali ni Melchizedek ug ni Jesukristo?

• Sumala sa bersikulo 16, unsa ang usa ka katuyoan sa mga ordinansa sa pagkapari?

Gikan sa bersikulo 16 atong nakat-onan nga ang mga ordinansa sa pagkapari makatabang kanato nga mohangad ngadto kang Jesukristo alang sa kapasayloan sa mga sala aron makasulod kita ngadto sa Iyang kapahulayan.

Mahimong makatabang ang pagpakita og mga hulagway sa nagkalain-laing mga ordinansa sa pagkapari nga gibuhat ug hisgoti kon sa unsang paagi kini makatabang kanato nga “molantaw ngadto sa Anak sa Dios” (Alma 13:16). Tabangi ang mga estudyante sa pagpamalandong sa ilang pag-apil sa mga ordinansa ug sa unsang paagi ilang gibati ang kapahulayan sa Manluluwas.

Si Presidente Russell M. Nelson mitudlo kon sa unsang paagi ang pipila ka mga ordinansa sa pagkapari makatabang kanato sa pagtan-aw ngadto kang Jesukristo.

Ang mahinungdanon nga mga ordinansa sa ebanghelyo nagsimbolo sa Pag-ula. Ang bunyag pinaagi sa pagpaunlod usa ka simbolo sa kamatayon, paglubong, ug Pagkabanhaw sa Manluluwas. Ang pagpaambit sa sakramento nagbag-o sa mga pakigsaad sa bunyag ug nagbag-o usab sa atong panumduman sa gisamaran nga lawas ug gipaagas nga dugo sa Manluluwas nga Iyang giula alang kanato. Ang mga ordinansa sa templo nagsimbolo sa atong pakig-uli ngadto sa Ginoo ug nagbugkos sa mga pamilya hangtod sa kahangtoran. (Russell M. Nelson, “The Atonement,” Ensign, Nob. 1996, 35)

• Unsa ang imong nakat-onan gikan ni Presidente Nelson mahitungod sa mga ordinansa sa pagkapari?

• Kanus-a ka mibati nga duol sa Manluluwas pinaagi sa pag-apil sa ordinansa sa pagkapari?

Nga kamo mahimo nga makasulod ngadto sa Iyang kapahulayan

Sama sa mga pari nga gihulagway diha sa Alma 13:1–19, si Alma makugihong naninguha sa pagtabang sa mga tawo sa pagpangandam nga makasulod ngadto sa kapahulayan sa Ginoo. Siya mipahinumdom kanila nga ang Ginoo sa dili madugay moabot (tan-awa sa Alma 13:21–26). Si Alma nagtinguha nga adunay “dako nga kabalaka gani ngadto sa kasakit, nga [sila] mopatalinghog sa [iyang] mga pulong” (Alma 13:27).

Basaha ang Alma 13:27–30, mangita sa unsay gidapit ni Alma nga buhaton sa mga tawo.

• Hain sa mga pagdapit ni Alma (pagpili og piho nga pagdapit) sa imong hunahuna ang makatabang kanato nga makasulod ngadto sa kapahulayan sa Ginoo?

  Mahimo usab nimong dapiton ang mga estudyante sa pagpangutana og bisan unsa nga ilang mahunahunaan mahitungod sa mga pagtulun-an ni Alma ug magtinabangay isip usa ka klase sa pagtubag niini.

  Ang mosunod nga pangutana gituyo alang sa personal nga pagpamalandong. Dapita ang mga estudyante sa pagbuhat sa pagdapit nga ilang gibati nga labing makatabang nila ug sa paghunahuna kon sa unsang paagi ang pagbuhat sa ingon makatabang nila nga makadawat sa kapahulayan sa Ginoo.

• Unsa ang imong nakat-onan gikan sa Alma 13 nga makatabang kanimo sa imong kinabuhi karon?

Tinguhaa ang giya sa Espiritu Santo aron mahibalo unsay imong mahimo sa paggamit sa unsay imong nakat-onan aron makasulod sa kapahulayan sa Ginoo.

Hunahunaa nga nakig-istorya ka sa usa ka higala nga nabalaka bahin sa usa ka problema nga iyang giatubang. Unsa ang imong ipakigbahin sa imong higala gikan sa imong pagtuon sa Alma 13 aron matabangan siya nga makasulod ngadto sa kapahulayan sa Ginoo? Ilakip ang labing menos usa ka bersikulo gikan sa Alma 13 sa imong tubag.

Komentaryo ug Background nga Impormasyon

Unsaon nako nga makasulod ngadto sa kapahulayan sa Dios?

Si Presidente Joseph F. Smith (1838–1918) mitudlo kon sa unsang paagi kita makasulod ngadto sa kapahulayan sa Dios samtang ania sa mortalidad:

Ang karaang mga propeta namulong kabahin sa “pagsulod ngadto sa kapahulayan sa Dios” [tan-awa sa Alma 12:34; Doktrina ug mga Pakigsaad 84:23–24]; unsa may buot ipasabot niini? Sa akong hunahuna, nagpasabot kini sa pagsulod ngadto sa kahibalo ug gugma sa Dios, ang pagbaton og hugot nga pagtuo diha sa iyang katuyoan ug sa iyang plano, sa ingon nga matang nga kita nasayod nga kita husto, ug nga kita wala mangita og lain pa, wala kita mahasol sa matag hangin sa tuluhoan, o pinaagi sa lipatlipat sa mga tawo nga batid sa pagmugnag kasaypanan. … Ang tawo kinsa nakaabot niana nga ang-ang sa hugot nga pagtuo diha sa Dios nga ang tanang pagduhaduha ug kahadlok gikuha gikan kaniya, siya nakasulod ngadto sa “kapahulayan sa Dios.” (Mga Pagtulun-an sa Mga Presidente sa Simbahan: Joseph F. Smith [1998], 66–67)

Unsa ang katuyoan sa pagkapari?

Dugang nga mga Kalihokan sa Pagkat-on

Alma 13:3–5. Gi-orden nang daan

Dapita ang mga estudyante sa pagpakigbahin sa unsay ilang nahibaloan mahitungod sa premortal nga kinabuhi ug sa doktrina sa gi-orden nang daan [foreordination]. Ikonsiderar ang pagdapit kanila sa pagtuon sa Alma 13:3–5, mangita kon sa unsang paagi ang doktrina sa pagkapari may kalabotan sa doktrina sa gi-orden nang daan ug nganong ang ubang mga indibidwal wala tawga o wala gi-orden daan. Tabangi ang mga estudyante nga makasabot nga ang doktrina sa gi-orden nang daan magamit sa parehong mga lalaki ug mga babaye (tan-awa sa Mga Pagtulun-an sa Mga Presidente sa Simbahan: Spencer W. Kimball [2006], 269–71).

Alma 13:28. “Dili matintal labaw niana nga kamo makalahutay”

Ikonsiderar ang pagpakita sa hugpong sa mga pulong nga “dili kita matintal labaw sa unsay atong malahutay” ug hangyoa ang mga estudyante sa pagpakigbahin kon unsay ilang gihunahuna kon ilang basahon kini nga pamahayag. Dapita sila sa pagbasa sa Alma 13:28, mangita kon unsay kinahanglan natong buhaton aron kini nga pamahayag mahimong tinuod. Mahimo usab nga makabenepisyo ang mga estudyante gikan sa pagbasa o pag-cross-reference niini nga tudling sa ilang mga kasulatan ngadto sa 1 Mga taga-Corinto 10:13; 3 Nephi 18:15; o Doktrina ug mga Pakigsaad 10:5.

Mahimo nimong gamiton ang pipila sa mosunod nga mga pangutana aron matabangan ang mga estudyante nga madugangan ang ilang pagsabot: Unsa sa imong hunahuna ang gipasabot sa “magbantay ug mag-ampo sa kanunay”? Ngano sa imong hunahuna nga kita kinahanglan nga magpaubos sa atong mga kaugalingon ug magbantay ug mag-ampo sa kanunay aron makasukol sa bisan unsang tentasyon nga moabot kanato? Sa unsang paagi ang pagsabot niini nga kamatuoran makapausab sa imong panglantaw ug pagsanong sa mga pagsulay ug mga tentasyon?

Ehemplo ni Alma isip usa ka lider sa pagkapari

Mahimong makabenepisyo ang mga estudyante gikan sa paghisgot kon sa unsang paagi si Alma nahimong ehemplo sa mosunod nga baroganan: ang Manluluwas mitawag og mga lider sa pagkapari aron sa pagtabang kanato nga motan-aw ngadto Kaniya alang sa katubsanan ug sa pagtudlo sa Iyang mga sugo aron kita makasulod ngadto sa Iyang kapahulayan.

Basaha ang Alma 8:9–10, 30–32; 12:34–37; 13:27, mangita sa mga pulong ug mga hugpong sa mga pulong nga naghulagway kon giunsa ni Alma pagpakita og ehemplo sa baroganan.

Mahimo usab nga maghisgot ang mga estudyante mahitungod sa mga lider sa Simbahan nga ilang nailhan kinsa nagpakita og ehemplo sa baroganan.