Ang pagtabang niadtong nag-antos mao ang sentro sa mortal nga pagpangalagad ni Jesukristo. Si Alma ug Amulek adunay sama nga tumong human milagrosong giluwas gikan sa bilanggoan pinaagi sa kamot sa Dios. Kini nga leksiyon makatabang kanimo nga makahupot [access] sa makaayo nga gahom nga anaa pinaagi ni Jesukristo.
Pagdapit og makugihon nga pagkat-on. Tabangi ang mga estudyante nga makasabot nga ang pagkat-on sa ebanghelyo wala himoa nga usa ka walay gibuhat [passive] nga kasinatian. Nagkinahanglan kini og mainampingong pagpangatarongan, pagtuon, pag-ampo, ug paglihok. Makatabang ka sa imong mga estudyante pinaagi sa paghimo og mga kasinatian nga makadasig kanila sa pag-apil sa mga diskusyon, pagpakigbahin sa ilang mga kasinatian, ug pagpangutana.
Pagpangandam sa estudyante: Dapita ang mga estudyante sa pagbasa sa ideya alang sa pamilya nga pagtuon sa kasulatan ubos sa Alma 15:1–12 diha sa latid [outline] sa pagtuon “Hunyo 24–30. Alma 13–16: ‘Makasulod ngadto sa Kapahulayan sa Ginoo’” sa Dali, Sunod Kanako—Alang sa mga Indibidwal ug mga Pamilya: Basahon ni Mormon 2024.
Posible nga mga Kalihokan sa Pagkat-on
Pisikal ug espiritwal nga sakit
Ang mosunod gituyo aron makatabang sa pagpangandam sa mga estudyante sa pag-ila sa mga sintomas, o epekto, sa sala. Mahimo nimong pilion ang mga medikal nga kondisyon nga mas pamilyar sa mga estudyante kaysa sa anaa sa lista kon gikinahanglan.
Susiha ang mosunod nga listahan sa mga medikal nga kondisyon. Pamalandongi ang mga sintomas niini ingon man ang bisan unsang mga pagtambal nga gigamit sa pag-alim o pag-ayo niini.
Sakit sa kasingkasing
Kanser
Nabali nga bukog
Unsa kaha ang mahitabo kon ang usa ka tawo nagtambal lamang sa mga sintomas niini nga mga kondisyon nga wala magtinguha nga masabtan ang nagpahiping mga problema?
Kon ipaila ang mosunod nga parapo ug posible nga mga pangutana, ayaw tinguhaa o tugoti ang mga estudyante nga ibutyag ang personal nga mga sala.
Sama sa pisikal nga mga sakit, ang sala—o espirituwal nga sakit—aduna say mga sintomas. Pamalandongi kon unsa kaha ang pipila sa mga sintomas sa sala, ug paggahin og panahon sa paghunahuna mahitungod sa kondisyon sa imong espirituhanong kahimtang. Ang mosunod nga mga pangutana makatabang kanimo sa pagbuhat niini.
Sa unsang paagi kaha nga ang sala makaapekto sa atong mga pagbati mahitungod sa atong mga kaugalingon ug makaimpluwensiya sa atong relasyon sa uban?
Samtang magtuon ka, paminawa ang Espiritu Santo nga motudlo kanimo kon sa unsang paagi mas makagamit ka sa makaayo nga gahom ni Jesukristo aron mapalambo ang imong espirituhanong kaayohan.
Kondisyon ni Zeezrom
Human ang milagrosong pagkaluwas gikan sa bilanggoan sa Ammonihah pinaagi sa kamot sa Dios, si Alma ug Amulek mibiyahe ngadto sa Sidom (tan-awa sa Alma 15:1–2). Samtang didto sa Sidom, sila nangalagad niadtong kinsa gipapahawa sa Ammonihah tungod sa pagtuo sa ilang mensahe ni Jesukristo. Usa ka tawo nga ilang gialagaran mao si Zeezrom.
Ikonsiderar ang pag-apud-apod sa mosunod nga handout alang sa mga estudyante. Mahimo silang magtinabangay diha sa gagmay nga mga grupo, gamit ang Alma 15:4–12 aron sa pag-ila kon unsa ang mga sintomas ni Zeezrom ug pagtino sa resita nga makaayo kaniya.
Espirituhanong Sakit
Imahe
doctor note
Basaha ang mga kasulatan nga nalista ubos sa “Mga Sintomas.” Ubos niini, ilista ang bisan unsang mga pulong o mga hugpong sa mga pulong nga naghulagway sa kondisyon ni Zeezrom.
Unsaon kaha nimo paghulagway ang kondisyon ni Zeezrom, lakip na ang iyang espirituhanong kaayohan?
Unsa ang imong nahinumduman mahitungod ni Zeezrom nga nakapahimo kaniya nga mobati niini?
Ikonsiderar ang pagdapit og usa ka estudyante aron mopakigbahin og pipila ka istorya sa kagahapon ni Zeezrom. Ang mosunod nga mga bersikulo mahimong makatabang: Alma 10:31; 11:21–22; 12:1, 7–8. Mahimo usab nimong ikonsiderar ang pagpakigbahin sa pamahayag ni Presidente Ezra Taft Benson diha sa seksiyon sa “Komentaryo ug Background nga Impormasyon”.
Ang pisikal nga sakit dili kanunay may kalabotan sa sala (tan-awa sa Juan 9:2–3). Hatagi og pagtagad ang gibati ni Zeezrom nga kahasol sa konsensya diha sa Alma 14:6. Samtang ang pagsinati og kahasol sa konsensya dili makalingaw, aduna kini katuyoan. Si Elder David A. Bednar sa Korum sa Napulog Duha ka Apostoles mipasabot sa katuyoan niini nga mga pagbati. Tan-awa ang bidyo nga “Kita Nagtuo sa Pagkaputli” gikan sa time code 13:15 hangtod sa 13:49, anaa sa ChurchofJesusChrist.org, o basaha ang teksto sa ubos.
Imahe
Elder David A. Bednar
Kitang tanan nakasinati sa kasakit nga may kalabotan sa pisikal nga sakit o samad. Kon kita anaa sa kasakit, kita magtinguha og kahupayan ug mapasalamaton sa tambal nga makatabang sa paghupay sa atong pag-antos. Ikonsiderar ang sala isip espirituhanong samad nga makapahasol sa konsensya o, sama sa gihulagway ni Alma sa iyang anak nga si Corianton, “pagbasol sa tanlag” (Alma 42:18). Ang epekto sa kahasol ngadto sa konsensya sama ka sakit ngadto sa atong lawas—usa ka pasidaan sa kakuyaw ug proteksiyon sa dugang kadaot. (David A. Bednar, “Kita Nagtuo sa Pagkaputli,” Liahona, Mayo 2013, 44)
Sumala ni Elder Bednar, unsa ang usa sa mga katuyoan sa kahasol sa konsensya [guilt]?
Sa unsang paagi kaha kini makapausab sa atong pagtan-aw o panglantaw sa pagbati nga sad-an human nakahimo og sayop?
Sa unsa nga mga paagi sa imong hunahuna ang mga sintomas ni Zeezrom sama sa “usa ka pasidaan sa kakuyaw ug proteksiyon sa dugang kadaot”?
Pagkaayo pinaagi sa gahom ni Jesukristo
Basaha pag-ayo ang mahitungod sa pagkaayo ni Zeezrom diha sa Alma 15:4–12. Mahimo nimong tan-awon ang bidyo nga “Si Zeezrom Naayo ug Gibunyagan” (2:42), anaa sa ChurchofJesusChrist.org. Samtang magbasa ka, hatagig pagtagad ang mga detalye nga nakatampo sa pagkaayo ni Zeezrom. Ikonsiderar ang pagsulat og mubo nga mga sulat niining mga detalye ubos sa “Resita” nga bahin sa sulat sa imong doktor.
Unsa nga mga baroganan o kamatuoran ang atong makat-onan gikan sa pagkaayo ni Zeezrom?
Usa ka baroganan nga atong makat-onan gikan niini nga mga bersikulo mao nga samtang kita magpakita og hugot nga pagtuo diha kang Jesukristo, kita mamaayo.
Unsa nga ebidensiya ang imong nakita niini nga mga bersikulo ni Zeezrom nga nagpakita og hugot nga pagtuo diha kang Jesukristo sa wala pa ug human siya naayo?
Sa unsa nga paagi kita makapakita og hugot nga pagtuo diha kang Jesukristo sa samang paagi?
Si Elder David A. Bednar mipasabot kon sa unsang paagi kita makapakita og hugot nga pagtuo. Tan-awa ang bidyo nga “Kita Nagtuo sa Pagkaputli” gikan sa time code 13:49 hangtod sa 14:17, anaa sa ChurchofJesusChrist.org, o basaha ang teksto sa ubos.
Imahe
Elder David A. Bednar
Ang Manluluwas sa kanunay gitawag nga Labing Maayo nga Magtatambal, ug kini nga titulo simbolikanhon ug literal nga mahinungdanon. … Gikan sa Pag-ula sa Manluluwas mabati ang makahupay nga tambal nga makaayo sa atong espirituhanong mga samad ug makatangtang sa kahasol sa konsensya. Apan, kining tambal magamit lang pinaagi sa mga baroganan sa hugot nga pagtuo kang Ginoong Jesukristo, paghinulsol, ug makanunayong pagkamasulundon. Ang mga resulta sa kinasingkasing nga paghinulsol mao ang kalinaw sa konsensya, kahupayan, ug espirituhanong kaayohan ug pagbag-o. (David A. Bednar, “Kita Nagtuo sa Pagkaputli,” Liahona, Mayo 2013, 44)
Kinahanglan nga makamugna ang mga estudyante og pipila ka klaro nga mga tubag sa unang pangutana agig pagpangandam alang sa kataposang kalihokan sa leksiyon. Samtang imong hisgotan kini nga pangutana ngadto sa klase, mahimo nimong ilista diha sa pisara ang mga ideya sa mga estudyante. Tabangi sila nga makamugna og nagkalain-laing mga ideya.
Ang laing duha ka pangutana mahimong gamiton isip follow-up nga mga pangutana isip kabahin niini nga diskusyon.
Unsa ang pipila ka mga paagi nga atong magamit ang makaayo nga mga gahom sa Langitnong Amahan ug ni Jesukristo?
Ngano sa imong hunahuna nga “Labing Maayo nga Magtatambal” ang angay nga titulo alang sa Manluluwas? Ngano sa imong hunahuna nga Siya makahimo sa pag-ayo kanato?
Kon makabenepisyo ang mga estudyante gikan sa pipila ka mga kasulatan nga nagkumpirma nga si Kristo adunay gahom nga makaayo, ikonsiderar ang pagpakigbahin sa pipila sa mosunod: Mga Salmo 30:2; 147:3; Isaias 53:5.
Kanus-a ka (o kanus-a ang usa ka tawo nga imong nailhan) nakasinati sa pag-ayo sa Manluluwas?
Bisan og dili kitang tanan nag-antos sama ni Zeezrom, kitang tanan adunay mga problema ug makasinati og pag-antos nga ang Manluluwas makatabang kanato sa pagsagubang. Paghunahuna og pipila ka mga epekto sa mga sala o mga sayop nga mahimong masinati sa mga tin-edyer ug sa unsang paagi sila nagkinahanglan sa makaayo nga gahom sa Manluluwas.
Ikonsiderar ang paglista diha sa pisara sa mga ideya sa mga estudyante. Mahimo sab silang magtinabangay nga magpares o sa gagmay nga mga grupo aron magbinayloay og mga ideya ug dayon magpakigbahin og mga ideya isip usa ka klase.
Paghimo og laing resita sa doktor aron pagtabang sa usa ka tawo. Basaha ang 3 Nephi 9:13–14, ug gamita ang imong nakat-onan karon aron paghimo og resita. Mahimo nimong ipakisayran ang Alma 15. Ipakigbahin kon sa unsang paagi si Jesukristo makatabang ug kon unsa kaha ang pagpakita og hugot nga pagtuo diha Kaniya. Siguroha nga makompleto ang mosunod nga dili kompleto nga pamahayag:
Kon ang usa ka tawo mibati og [ilista ang mga sintomas sa sala] … , mao nga kinahanglan nilang hinumdoman nga [ilista ang resita o mga tambal] …
Pahinumdomi ang mga estudyante nga kitang tanan nagkinahanglan sa atong Langitnong Amahan ug ni Jesukristo ug sa pag-ayo nga Ilang ikahatag kanato. Ipamatuod nga ang pagpakita og hugot nga pagtuo ug ang pagtuo kang Jesukristo kanunay nga makatabang kanato. Ikonsiderar ang pagdapit sa mga estudyante sa pagpakigbahin sa unsay ilang nakat-onan o unsay mipatigbabaw kanila gikan sa ilang pagtuon karon.