“Sukda ang Imong Nakat-onan 5: Mosiah 18–Alma 16,” Manwal sa Magtutudlo sa Basahon ni Mormon (2024)
“Sukda ang Imong Nakat-onan 5,” Manwal sa Magtutudlo sa Basahon ni Mormon
Sukda ang Imong Nakat-onan 5
Kini nga leksiyon gituyo aron sa pagtabang kanimo sa pagtimbang-timbang sa mga tumong nga imong gitakda ug sa paglambo nga imong nasinati hangtod karon atol sa imong pagtuon sa Basahon ni Mormon.
Pagtabang sa mga estudyante sa pagdawat ug pagtahod sa usag usa. Pagmugna og mga kasinatian nga nagtugot sa mga estudyante nga magkuha og kalig-on gikan sa usag usa ug gikan sa ilang managsamang tinguha sa paghupot sa pag-ayo, grasya, ug kalinaw sa Manluluwas. Samtang pagailhon sa mga estudyante kon unsa ang anaa sila nga managsama, mahimo silang mas lagmit nga motampo sa mabination nga mga paagi.
Pagpangandam sa estudyante: Mahimong dapiton ang mga estudyante sa pagpangita og kasulatan diha sa Mosiah 18–Alma 16 mahitungod sa Pag-ula ni Jesukristo nga makahuluganon ngadto kanila.
Posible nga mga Kalihokan sa Pagkat-on
Kini nga leksiyon gituyo aron sa pagtabang sa mga estudyante sa pagsukod sa mga tumong nga ilang gitakda, sa ilang abilidad sa pagpasabot sa mga pagtulun-an sa Basahon ni Mormon, o sa unsang paagi nga ang ilang mga kinaiya, mga tinguha, ug abilidad sa pagsunod sa ebanghelyo nausab. Ang pagtuon sa klase sa Mosiah 18 hangtod sa Alma 16 mahimong mihatag og gibug-aton sa mga kamatuoran gawas niadtong anaa sa mosunod nga mga kalihokan. Kon mao, ang mga kalihokan mahimong ipahiangay sa paglakip niadtong mga kamatuoran.
Paglantaw sa kaniadto, pagpadayon sa unahan
Ikonsiderar ang pagpakigbahin og personal nga kasinatian sa pagbaklay [hike] o pagbisikleta, pagkakita sa imong paglambo, ug pagpadayon sa imong destinasyon. Kon mahimo, ipakigbahin ang mga hulagway sa imong pagsuroy-suroy [outing]. Mahimo usab nga dapiton ang mga estudyante sa pagpakigbahin sa ilang kaugalingong susama nga mga kasinatian.
Paghunahuna og usa ka higayon nga ikaw nagbaklay [hike], nagbisikleta, o nagbiyahe nga medyo layo. Samtang nagtan-aw ka sa unahan ug nagsugod sa pagbiyahe, mahimo nga gibati nimo nga gamay ra ang imong pag-uswag. Unsa ang mahitabo kon mogahin ka sa makadiyot sa paglantaw og balik kon diin ka kaniadto? Lagmit makamatikod ka nga nakabiyahe ka og mas layo pa kay sa imong naamgohan.
-
Unsa ang kaayohan sa pagkahibalo kon asa ka gikan ug asa ka paingon?
Ang atong kinabuhi mahimong ikatandi ngadto sa usa ka panaw. Ang pagpamalandong kon asa ka ug asa ka paingon sa usa ka panaw mahimong sama sa matag karon ug unya nga pagpamalandong sa imong mga tumong alang sa imong personal nga kalamboan.
-
Sa unsang paagi nakaayo kanimo ang paggahin og panahon sa pagtimbang-timbang sa imong mga tumong ug pag-uswag?
Kini nga leksiyon makatabang kanimo sa pagtimbang-timbang sa pag-uswag nga imo nang nahimo sa imong panaw isip usa ka disipulo ni Jesukristo. Tinguhaa ang pagdasig sa Espiritu Santo samtang mamalandong ka sa imong pag-uswag.
Pagkahimong usa ka disipulo ni Jesukristo
Kini nga kalihokan gituyo aron sa pagtabang sa mga estudyante sa pagpamalandong sa unsa na ang ilang natun-an sa Basahon ni Mormon. Gidisenyo usab kini aron sa pagtabang sa mga estudyante nga makahunahuna og mga tumong nga mahimo nilang buhaton aron sa pagdumala sa ilang pagtuon ug pagkat-on sa nahabilin sa Basahon ni Mormon. Mahimo nimong ipakita o i-drowing diha sa pisara ang usa ka yano nga hulagway sama sa anaa sa ubos ug isulti ang mga instruksiyon nga nagsunod. Ikonsiderar ang pagpahiangay sa kalihokan kon gikinahanglan aron sa pagtabang sa mga estudyante nga makabaton og makahuluganong mga kasinatian samtang namalandong sila sa ilang pagkat-on. Dasiga ang mga estudyante sa pag-ila og mga bersikulo sa kasulatan gikan sa Basahon ni Mormon nga nagsuporta sa ilang mga tubag.
Pagdrowing og dalan nga nagrepresentar sa dalan sa pakigsaad ug sa imong panaw isip disipulo ni Jesukristo. Ilakip ang celestial nga gingharian sa kataposan sa dalan. I-drowing ang imong kaugalingon sa tunga sa dalan.
I-rebyo unsay imong natun-an diha sa Basahon ni Mormon ug ang imong mubo nga mga sulat sa journal sa pagtuon aron sa pagtabang kanimo sa paghinumdom unsay imong nakat-onan. Sa luyo sa imong gidrowing nga imong kaugalingon, isulat unsay imong nakat-onan atol sa imong pagtuon sa unang katunga sa Basahon ni Mormon nga nakatabang kanimo nga mahimong disipulo ni Jesukristo. Mahimo nimong ilakip ang kahibalo nga imong naangkon, mga kinaiya o mga tinguha nga imong gipalambo, o mga buhat nga imong nahimo.
Kon mahuman na ang mga estudyante, tugoti sila sa pagpakigbahin. Mahimong anaa kay mga estudyante nga buot molista sa pipila sa ilang mga tubag diha sa pisara luyo sa tawo diha sa dalan. Mahimo dayon nimong sugdan ang usa ka kinatibuk-ang diskusyon pinaagi sa ilang pagpakigbahin sa bisan unsa nga ilang gibati nga labing makahuluganon. O mahimo nimong pangutan-on ang mga estudyante mahitungod sa kahibalo nga ilang naangkon nga mas makapasabot na sila og maayo karon, mga kinaiya o mga tinguha nga ilang gibati nga napahiuyon o nausab tungod sa unsay ilang nakat-onan, o mga pamatasan nga ilang gigamit sa ilang kinabuhi gikan sa Basahon ni Mormon. Mahimo usab nimong itudlo ang usa sa mga tubag nga gisulat diha sa pisara ug dapita ang mga estudyante sa pagpakigbahin sa piho nga mga tudling sa kasulatan o mga asoy nga nakapadasig sa ilang tubag. Mahimo usab nimong hangyoon ang andam nga mga estudyante sa pagpili og tubag diha sa pisara nga dili ilaha ug sa pagpakigbahin kon nganong nakadani kini kanila. Dasiga ang mga estudyante nga dili mopakigbahin og bisan unsa nga personal o pribado.
Human makapakigbahin ang mga estudyante, pahunahunaa sila kon unsa nga dugang nga kahibalo ang ilang gilaoman nga maangkon samtang magpadayon sila sa pagtuon sa Basahon ni Mormon. Mahimo nimong ipakigbahin ang mosunod nga mga instruksiyon ug ipadugang sa mga estudyante sa ilang panid sa ilang journal sa pagtuon.
Tan-awa pag-usab ang hulagway diha sa imong journal sa pagtuon. Diha sa dalan sa atubangan sa hulagway nga nagrepresentar kanimo, isulat ang mga lihok nga gusto nimong buhaton o ipadayon samtang naningkamot ka nga mahimong sama ni Jesukristo.
-
Unsa pa ang imong gilaoman nga makat-onan samtang magtuon ka sa sunod nga katunga sa Basahon ni Mormon?
-
Unsay imong gilaoman nga imong mahibaloan, bation, o buhaton sa kataposan niining tuiga isip resulta sa imong pagtuon sa ikaduhang katunga sa Basahon ni Mormon?
Pagsinati og usa ka kausaban sa kasingkasing
Kini nga kalihokan makatabang sa mga estudyante sa pagpamalandong sa mga paagi sa ilang pagsinati og usa ka kausaban sa kasingkasing.
Bag-ohay lang nimong nabasa ang bahin sa daghang mga tawo nga nakasinati og kausaban sa kasingkasing. Alang sa pipila, sama ni Alma nga Batan-on ug sa mga anak nga lalaki ni Mosiah, ang kausaban diha-diha dayon ug talagsaon. Alang sa uban, sama ni Amulek ug sa katawhan ni Limhi, ang ilang kausaban sa kasingkasing nahitabo sa paglabay sa panahon.
Si Alma nangutana sa mga katawhan sa Zarahemla, “Kamo nakasinati ba niining dako nga kausaban diha sa inyong mga kasingkasing?” (Alma 5:14). Ug kon mao, “kamo mibati ba karon sa mao?” (Alma 5:26). Pamalandongi ang pag-uswag sa imong kaugalingong kausaban sa kasingkasing. Lisod ba usahay ang pag-ila kon sa unsang paagi ang Ginoo mahimong nagtabang kanimo nga mag-usab? Sa unsa nga mga paagi imong nakita ang imong kaugalingon sa pipila ka mga asoy nga imong gitun-an?
Basaha ang Alma 5:14–19, 26–29, ug mainampoong pamalandongi ang mga pangutana ni Alma.
Mahimong narekord nimo ang imong mga tubag sa mga pangutana ni Alma diha sa imong journal sa pagtuon sa una nimong pagtuon niadtong mga bersikulo. Itandi ang imong gisulat kaniadto ngadto sa kon unsaon nimo pagtubag ang mga pangutana karon. Unsay imong nabantayan? Unsa sa imong hunahuna ang gusto sa imong Amahan sa Langit nga imong mailhan, mabati, o mabuhat human sa pagtandi sa imong mga tubag?
Ikonsiderar ang pagrekord sa imong bag-ong mga tubag o sa imong mga gibati mahitungod sa imong pag-uswag.
Tabangi ang mga estudyante nga makasabot nga usahay mahimong lisod ang pagtan-aw sa personal nga paglambo. Pangita og mga kahigayonan sa pagtabang sa indibidwal nga mga estudyante nga makakita sa ilang paglambo ug pag-uswag. Kon nakamatikod ka og mga paagi nga ang usa ka estudyante nakasinati og kausaban sa kasingkasing, ipakigbahin kana kaniya.
Pagpasabot sa doktrina sa Pag-ula ni Jesukristo
Ang mosunod nga kalihokan makatabang sa mga estudyante nga makabansay sa pagpasabot sa doktrina sa Pag-ula ni Jesukristo. Usa ka paagi sa pagtabang sa mga estudyante sa pagbuhat niini mao ang pagtugot kanila nga magtinabangay nga magpares. Ang matag estudyante mahimong mosulat og sitwasyon o pangutana diin ang pagsabot sa Pag-ula sa Manluluwas makatabang. Human masulat ang sitwasyon o pangutana, mahimong magbayloay ang mga estudyante og mga papel ug dayon magsulat og tubag. Kon mahuman na sila sa pagsulat, mahimong makapakigbahin ang mga estudyante sa ilang mga tubag sa usag usa.
Pagsulat og senaryo o sitwasyon diin ang pagkahibalo mahitungod sa Pag-ula ni Jesukristo makatabang sa usa ka tawo. Sama pananglitan, ang usa ka batan-ong babaye naghunahuna kon mapasaylo ba siya, o ang usa ka batan-ong lalaki mibati nga nag-inusara sa iyang mga pagsulay. O, imbes nga usa ka sitwasyon, mahimo nimong isulat ang usa ka pangutana nimo o sa uban mahitungod sa Pag-ula sa Manluluwas.
Hunahunaa kon unsay imong nakat-onan mahitungod sa Pag-ula ni Jesukristo pinaagi sa pagtuon sa Basahon ni Mormon. Tan-awa ang mga kasulatan nga imong gimarkahan o mubo nga mga sulat diha sa imong journal sa pagtuon. Mahimong nakamarka ka og pipila ka mga kasulatan o naghimo og mubo nga mga sulat gikan sa imong pagtuon sa Mosiah 26 o Alma 7 (tan-awa usab sa 2 Nephi 9; Mosiah 14–16).
Isulat kon unsay imong isulti isip tubag sa sitwasyon o pangutana. Ipasabot kon sa unsang paagi ang pagsabot sa doktrina sa Pag-ula ni Jesukristo makatabang diha sa sitwasyon o makatubag sa pangutana. Sulayi ang paggamit og usa o sobra pa nga mga tudling gikan sa Basahon ni Mormon.
Ikonsiderar ang pagpakigbahin sa imong pagpamatuod ug pagdapit sa mga estudyante sa pagpamatuod sa Pag-ula ni Jesukristo.