Alma 20–22

“Unsa Ang Akong Buhaton Aron Ako Makaangkon [og]… Kinabuhing Dayon”

Unsa ang makatabang kanimo sa pagtinguha sa pagsunod sa Dios labaw sa tanan? Ang amahan ni Hari Lamoni kaniadto usa ka daotan nga tawo, apan human makakat-on sa importante nga mga kamatuoran mahitungod sa plano sa kaluwasan sa atong Manluluwas ug sa Langitnong Amahan, nagsugod ang mahinungdanon nga pagkausab sa iyang mga tinguha. Kini nga leksiyon makatabang kanimo sa pagtinguha sa mga butang sa Dios labaw pa sa bisan unsa nga ikatanyag sa kalibotan.

Pagpamatuod kang Jesukristo. Pangita og mga kahigayonan sa pagpamatuod sa gahom, kaluoy, ug impluwensiya sa Ginoo sa atong kinabuhi. Dasiga ang mga estudyante sa pagpangutana, “Unsa ang gitudlo niini nga tudling sa kasulatan mahitungod ni Jesukristo nga makatabang kanako nga makasabot ug makasalig sa Iyang mga pagtulun-an ug Pag-ula?”

Pagpangandam sa estudyante: Dapita ang mga estudyante sa pagbasa sa Alma 20 ug 22, mangita kon sa unsang paagi nausab ang amahan ni Hari Lamoni niini nga mga kapitulo. Ipahunahuna nila ang posibleng mga rason alang niana nga kausaban.

Posible nga mga Kalihokan sa Pagkat-on

Andam ka ba?

Namatikdan ba nimo sukad nga ang pipila ka piho nga mga kahimtang makaimpluwensiya sa imong kaandam sa pagbuhat og usa ka butang—o sa dili pagbuhat og usa ka butang?

Pananglitan, paghunahuna og mga sitwasyon diin ikaw andam sa pagbuhat sa mosunod. Dayon hunahunaa ang mga kahimtang nga makapahimo kanimo nga dili kaayo andam sa pagbuhat niini.

Ikonsiderar ang pagbahin sa mga estudyante ngadto sa gagmay nga mga grupo ug pag-assign sa matag grupo sa paghisgot sa usa sa mosunod nga mga buhat. Dayon ang mga sakop sa matag grupo mahimong mopakigbahin sa ilang mga tubag ngadto sa klase.

• Paglimpyo sa imong kwarto.

• Pagbasa og libro.

• Paglakaw og layo.

Dapita ang mga estudyante sa paghimo og pipila ka pagtimbang-timbang sa kaugalingon pinaagi sa pagsulti sa mosunod nga mga instruksiyon. Ayaw hangyoa ang mga estudyante sa pagpakigbahin sa ilang mga tubag sa mga pangutana.

Ang pipila ka butang makapadasig kanato sa pagsunod sa Dios.

Paggahin og panahon sa paghunahuna mahitungod sa imong mga tinguha sa pagsunod sa Dios. Kon gibati nimo ang tinguha sa pagsunod Kaniya, unsay nakatabang nimo nga mobati niana nga tinguha? Kon ikaw sa pagkakaron walay tinguha sa pagsunod Kaniya, unsa sa imong hunahuna ang nakatampo niadto nga mga pagbati?

Karon imong makat-onan ang mahitungod sa usa ka tawo kansang tinguha sa pagsunod sa Dios miuswag pag-ayo sulod sa mubo nga panahon. Samtang magtuon ka, hatagig pagtagad kon unsay hinungdan niini nga kausaban. Pangita og mga pagtulun-an nga makatabang nimo nga makabaton og mas dakong tinguha sa pagsunod sa Dios ug makadawat sa mga panalangin nga Siya lamang ang makatanyag kanimo.

Si Ammon ug Lamoni nakigkita sa amahan ni Lamoni

Ipamubo ang mosunod nga impormasyon aron matabangan ang mga estudyante nga maandam sa pagtuon sa mga panghitabo sa Alma 20. Pag-amping nga dili mogahin og dakong panahon niini nga bahin sa leksiyon. Gusto nimo nga ang mga estudyante adunay igong panahon sa pagtuon sa asoy ni Aaron nga nagtudlo sa amahan ni Lamoni diha sa Alma 22.

Samtang si Ammon nagserbisyo ug nagtudlo sa katawhan ni Hari Lamoni didto sa yuta sa Ishmael, ang Ginoo mipadayag ngadto ni Ammon nga si Aaron ug ang uban gikan sa ilang grupo nabilanggo sa yuta sa Middoni. Si Ammon ug ang hari mihimo og mga plano sa pagbiyahe didto aron sa pagluwas kang Aaron ug sa uban. Sa ilang pagpaingon, sila nagkakita sa amahan ni Lamoni, kinsa mao ang hari sa tibuok yuta (tan-awa sa Alma 20:1–8).

Mahimong mapuslanon ang pagdapit og duha o tulo ka andam nga estudyante sa pagbasa sa mosunod nga mga bersikulo samtang ang ubang mga sakop sa klase magsubay diha sa ilang mga kasulatan.

Basaha ang Alma 20:13–28, mangita sa pakighinabi nga nahitabo tali ni Ammon, Lamoni, ug sa amahan ni Lamoni.

• Sa unsang paagi nimo namatikdan ang mga tinguha sa amahan ni Lamoni nga nausab sa tibuok niyang pakighinabi ni Ammon ug Lamoni?

• Unsa ang pipila sa mga butang nga nakatampo sa maong kausaban?

Ikonsiderar ang pagmarka diha sa bersikulo 23 kon unsay andam nga ihatag sa amahan ni Lamoni kon si Ammon moluwas sa iyang kinabuhi. Mahimo nimong itandi ang iyang reaksiyon niini nga bersikulo sa iyang reaksiyon sa ubang mga bersikulo nga imong tun-an unya sa leksiyon.

Aaron nagtudlo sa amahan ni Lamoni

Human si Aaron ug kadtong uban kaniya gipagawas gikan sa bilanggoan, si Ammon mibalik ngadto sa yuta sa Ishmael uban ni Hari Lamoni. Ang Espiritu migiya ni Aaron sa pagbisita sa amahan ni Lamoni sa yuta sa Nephi (tan-awa sa Alma 22:1).

Basaha ang Alma 22:2–6, mangita sa mga pangutana sa amahan ni Lamoni samtang nakigkita ni Aaron.

• Unsa kaha ang imong ipakigbahin mahitungod sa Langitnong Amahan ug sa Iyang plano agig tubag sa mga pangutana sa hari diha sa mga bersikulo 5–6?

Basaha ang Alma 22:7–14 ug pangitaa kon giunsa pagtubag ni Aaron ang mga pangutana sa hari. Timan-i nga ang pulong nga takos sa bersikulo 14 nagpasabot nga “aron makab-ot o angayan.”

• Unsa ang nakat-onan sa hari mahitungod sa Dios ug sa Iyang plano nga lagmit nakaapekto sa iyang panglantaw mahitungod sa kinabuhi?

• Sa unsang paagi nga ang pagtuo ug pagsabot sa mga pagtulun-an ni Aaron mahitungod sa Dios ug sa Iyang plano makaimpluwensiya kanato?

Basaha ang Alma 22:15–18, mangita sa unsay gitinguha ug andam nga buhaton sa hari human siya natudloan ni Aaron.

Sa dili pa hisgotan ang sunod nga duha ka pangutana, ikonsiderar ang pagdapit og pipila ka mga estudyante sa pagsulat sa ilang paborito nga mga hugpong sa mga pulong gikan niini nga mga bersikulo diha sa pisara. Mahimo dayon nimong pangutan-on ang mga estudyante kon ang bisan unsa sa mga hugpong sa mga pulong naghulagway sa usa ka butang nga ilang gibati kaniadto o kon aduna ba silay mga pangutana. Dapita ang mga estudyante nga buot mopakigbahin sa ilang mga pangutana o mga kasinatian. Sultihi ang mga estudyante nga dili ipakigbahin ang bisan unsang butang nga personal kaayo o pribado.

• Unsa nga mga pulong o mga hugpong sa mga pulong ang nakatabang nimo nga makita nga ang mga tinguha sa hari nausab gikan sa panahon sa iyang pakigkita ni Ammon ug Lamoni sa dalan paingon sa Middoni?

• Unsa ang gisulti sa hari sa mga bersikulo 15 ug 18 nga andam niyang biyaan?

• Base sa unsay imong nakat-onan gikan sa imong pagtuon sa Alma 20 ug 22, unsa ang pipila sa mga hinungdan nga nakatampo sa kausaban nga nasinati sa hari?

Usa ka kamatuoran nga atong makat-onan gikan niini nga asoy mao nga kon atong masabtan ang atong panginahanglan kang Jesukristo, ang atong tinguha sa pagsunod Kaniya ug sa pagdawat sa mga panalangin nga Iyang ikatanyag kanato molambo.

• Ngano sa imong hunahuna nga ang pagkasabot sa atong panginahanglan sa Manluluwas adunay dako nga epekto sa atong mga tinguha ug mga lihok?

• Unsa ang makatabang o nakatabang nimo nga mas masabtan ang imong panginahanglan ni Jesukristo?

Sa unsang paagi nga ang atong matarong nga mga tinguha makaapekto kanato

Ang kasinatian sa hari kang Aaron adunay lawom nga epekto ngadto sa hari ug sa iyahang katawhan. Ang hari, iyang asawa, iyang tibuok panimalay, ug daghan pang mga Lamanite nakabig ngadto sa Ginoo ug nagmatinud-anon ngadto Kaniya sa tibuok nilang kinabuhi (tan-awa sa Alma 22:23; 23:6).

Hunahunaa pagbalik kon unsa ang giingon sa hari nga gitinguha niya diha sa mga bersikulo 15–18. Kini naglakip

• sa mga panalangin sa kinabuhing dayon (mga bersikulo 15, 18);

• nga “matawo sa Dios, nakaangkon niining daotan nga espiritu nga malangkat gikan sa [iyang] dughan” (bersikulo 15);

• nga makadawat sa Espiritu Santo (bersikulo 15);

• nga mapuno sa kalipay (bersikulo 15); ug

• aron makaila sa Dios (bersikulo 18).

Ilista diha sa pisara ang mga tinguha sa hari kon wala pa kini mahimo. Imbes nga mangutana sa sunod nga pangutana, ikonsiderar ang pagdapit sa mga estudyante sa pagsulat og mubo nga paghulagway diha sa ilang mga journal sa pagtuon sa matang sa tawo nga sila mamahimo sulod sa 5 o 10 ka tuig kon sila kanunay nga magtinguha niini nga mga butang nianang panahona.

Mahimo dayong ipakigbahin sa mga estudyante ang ilang mga panabot ngadto sa klase.

• Unsa sa imong hunahuna ang kalainan nga mahimo sa imong kinabuhi sa kanunay nga pagtinguha niini nga mga butang?

• Unsa kaha ang kinahanglan natong biyaan o usbon aron maangkon kini nga mga panalangin?

Pamalandongi kon unsa ang imong nakat-onan ug gibati samtang ikaw nagtuon karon. Ikonsiderar kon unsay imong mahimo aron mas hingpit nga magtinguha sa mga panalangin nga gusto sa Langitnong Amahan nga ihatag diha kanimo. Hunahunaa kon unsa ang kinahanglan nimong buhaton o biyaan aron makadawat niini nga mga panalangin. Irekord ang imong mga hunahuna ug espirituhanong mga impresyon diha sa imong journal sa pagtuon.

Hatagi ang mga estudyante og igong panahon sa pagrekord sa ilang mga hunahuna ug mga impresyon diha sa ilang mga journal sa pagtuon. Ikonsiderar ang pagdapit og pipila ka mga estudyante nga buot mopakigbahin sa klase sa pipila sa ilang gisulat nga dili kaayo personal.

Komentaryo ug Background nga Impormasyon

Sa unsang paagi nako masinati ang “hingpit nga kalipay” (Alma 22:15) nga gihulagway sa amahan ni Lamoni?

Si Presidente Russell M. Nelson mitudlo:

Kon motan-aw kita diha sa kalibotan ug mosunod sa mga pormula niini sa kalipay, dili gayod kita makaila og hingpit nga kalipay. Ang dili matarong mahimong mosinati og daghang mga emosyon ug mga pagbati, apan dili gayod sila makasinati og hingpit nga kalipay! Ang hingpit nga kalipay usa ka gasa alang sa matinud-anon. Mao kini ang gasa nga moabot gikan sa tinuyo nga paningkamot sa pagpuyo og matarong nga kinabuhi, sama sa gitudlo ni Jesukristo.

Siya mitudlo kanato unsaon sa pagkaangkon og hingpit kalipay. Kon mopili kita sa Langitnong Amahan nga maoy atong Dios ug kon atong mabati ang Pag-ula sa Manluluwas nga miepekto sa atong kinabuhi, mapuno kita sa kalipay. (Russell M. Nelson, “Hingpit nga Kalipay ug Espirituhanon nga Pagsugakod,” Liahona, Nob. 2016, 84)

Unsa ang makatabang nako sa pag-ila sa akong panginahanglan kang Jesukristo?

Si Presidente Ezra Taft Benson (1899–1994) mitudlo:

Ingon nga ang tawo dili magtinguha og pagkaon hangtod nga gutomon siya, dili usab siya magtinguha sa kaluwasan ni Kristo hangtod nga masayod siya nganong nagkinahanglan siya ni Kristo.

Walay usa ang igo ug tukma nga nasayod nganong gikinahanglan niya si Kristo hangtod nga iyang masabtan ug madawat ang doktrina sa Pagkapukan ug ang epekto niini sa tanang katawhan. Ug walay laing basahon sa kalibotan nga mas mipasabot niining mahinungdanong doktrina sama sa Basahon ni Mormon. (Ezra Taft Benson, “The Book of Mormon and the Doctrine and Covenants,” Ensign, Mayo 1987, 85)

Sa unsang paagi nausab ang amahan ni Lamoni gikan sa iyang unang pakighinabi ni Ammon ngadto sa panahon nga gitudloan siya ni Aaron?

Samtang nagserbisyo isip sakop sa Seventy, si Elder Terence M. Vinson mitudlo:

Dugang nga mga Kalihokan sa Pagkat-on

Pagkat-on gikan sa mga ehemplo ni Ammon ug Aaron sa pagpaambit sa ebanghelyo

Mahimong mapuslanon ang pagdapit sa mga estudyante sa pagtutok sa unsay ilang makat-onan mahitungod sa pagpaambit sa ebanghelyo ngadto sa uban gikan sa mga pagtudlo ni Ammon diha sa Alma 18:24–39 ngadto ni Hari Lamoni ug gikan sa mga pagtudlo ni Aaron diha sa Alma 22:1–14 ngadto sa amahan ni Hari Lamoni. Ikonsiderar ang pagdapit sa mga estudyante sa paghisgot sa pipila o sa tanan sa mosunod nga mga pangutana isip kabahin niini nga diskusyon:

Unsa nga mga kamatuoran ang gitutokan ni Ammon ug Aaron samtang nagtudlo? Ngano nga kadto nga mga kamatuoran mahinungdanon nga itudlo niadtong nagkat-on mahitungod sa ebanghelyo?

Unsa ang imong makat-onan gikan sa paagi nga sila si Ammon ug Aaron mitubag sa mga pangutana nga gipangutana kanila nga makatabang kanimo samtang ikaw magtudlo sa uban mahitungod sa ebanghelyo?

Alma 22:14. “Tawo … dili takos sa bisan unsa alang sa iyang kaugalingon”

Aron matabangan ang mga estudyante nga mas makasabot sa pagtulun-an ni Aaron nga ang tawo dili takos sa bisan unsa alang sa iyang kaugalingon, ikonsiderar ang pagpakigbahin sa mosunod ni Elder Dale G. Renlund sa Korum sa Napulog Duha ka Apostoles: “Dili ka gayod makaangkon og panalangin—kana nga ideya dili tinuod—apan kinahanglan nga takos ikaw niini. Ang atong kaluwasan moabot lamang pinaagi sa maayong mga buhat ug grasya ni Jesukristo” (“Magamadagayaon [Buhong] sa mga Panalangin,” Liahona, Mayo 2019, 71).

Ang mga estudyante mahimo usab nga motan-aw sa “Magamadagayaon [Buhong] sa mga Panalangin“ gikan sa time code 0:00 hangtod sa 1:14, anaa sa ChurchofJesusChrist.org, aron makakita og dugang nga mga ideya gikan ni Elder Renlund mahitungod niini nga hilisgotan.

Alma 22:18. Pagbiya sa atong mga sala aron makaila sa Dios

Ikonsiderar ang paghisgot sa mainampoong deklarasyon sa hari diha sa bersikulo 18 nga iyang biyaan ang tanan niyang mga sala aron makaila sa Dios. Mahimo nimong dapiton ang mga estudyante sa paghunahuna kon sa unsang paagi ang paghinulsol sa atong mga sala makatabang kanato nga mas hingpit nga makaila sa Dios. Ikonsiderar ang pagdapit kanila sa paghunahuna mahitungod sa mga sala nga gusto nilang “biyaan” o hinulsolan aron makadawat sa mga panalangin nga gusto sa Dios nga ihatag diha kanila. Pangutan-a ang mga estudyante kon unsay kinahanglan nilang buhaton aron mabuntog kadtong mga sala.