Alma 17

“Sumala sa Pulong ug Gahom sa Dios”

Handurawa nga naningkamot ka sa pagsangyaw sa ebanghelyo ngadto sa usa ka grupo sa mga tawo kinsa gihulagway nga luog, magahi, ug mabangis. Mao gayod kini ang gipili nga buhaton sa mga anak nga lalaki ni Mosiah sa dihang miadto sila sa yuta sa mga Lamanite aron sa pagsangyaw sa ebanghelyo ngadto kanila. Ang Alma 17 naghulagway sa tabang nga nadawat ni Ammon gikan sa Dios samtang nagsugod siya sa iyang pangalagad taliwala sa mga Lamanite sa yuta sa Ishmael. Kini nga leksiyon makatabang kanimo sa pag-ila sa tabang ug kalig-on nga gihatag sa Ginoo kanimo sa lisod nga mga sitwasyon nga imong giatubang.

Tabangi ang mga tigkat-on nga masabtan ang konteksto ug sulod [content]. Ang konteksto ug sulod [content] sa mga kasulatan mahimong maglakip sa daghang mga linya sa istorya mahitungod sa may kalabotan nga mga tawo ug mga panghitabo. Tabangi ang mga estudyante nga makasabot ug makahimo og koneksiyon tali niini nga mga asoy aron mas mailhan nila ang doktrina, mga baroganan, ug dinasig nga mga mensahe sa mga tagsulat.

Pagpangandam sa estudyante: Ikonsiderar ang pagdapit sa mga estudyante sa pagtambong nga andam sa pagpakigbahin ug paghisgot sa pipila ka kasagarang mga problema o mga hagit nga giatubang sa mga tin-edyer ug nganong nagkinahanglan sila sa tabang ug kalig-on sa Dios sa ilang kinabuhi. Mahimong maghunahuna sab sila sa mga higayon nga nakadawat sila sa tabang sa Dios sa ilang kinabuhi.

Posible nga mga Kalihokan sa Pagkat-on

Ang atong panginahanglan sa tabang sa Dios

Tabangi ang mga estudyante sa paghunahuna og mga pananglitan sa mga higayon nga ang mga tin-edyer nagkinahanglan og tabang o kalig-on sa Dios sa ilang mga kinabuhi. Ang mosunod nga mga senaryo mahimong makatabang niini, o ang mga estudyante mahimong makahimo og laing mga senaryo.

Gibati ni Luci ang panginahanglan sa paghinulsol ug pag-usab sa paagi sa pagpuyo sa iyang kinabuhi, apan ang tanan nga iyang gipaningkamotan nga usbon ingon og walay kausaban.

Si Guillermo mibati nga nadasig sa pagserbisyo og misyon, apan ang iyang mga ginikanan nasuko tungod kay nagkinahanglan sila sa iyang tabang sa negosyo sa pamilya.

• Unsa ang pipila ka mga paagi nga ang Dios makatabang kang Luci o Guillermo?

• Unsa ang pipila ka mga paagi nga sila makatinguha sa o makaila sa Iyang tabang?

Ikonsiderar ang pagpakita sa mosunod nga parapo. Hatagi ang mga estudyante og igong panahon sa pagpamalandong ug pagsulat sa ilang mga journal sa pagtuon.

Paggahin og kadiyot sa pagpamalandong ug pagsulat diha sa imong journal sa pagtuon mahitungod sa unsang paagi imong gibati nga labing nagkinahanglan ka sa tabang o kalig-on sa Dios diha sa imong kinabuhi. Unsa ang pipila ka mga paagi nga imong gilaoman nga ang Dios makatabang kanimo? Samtang magtuon ka sa Alma 17 karon, pangitaa ang mga paagi nga imong mailhan ug madapit ang kalig-on sa Dios sa imong kinabuhi.

Ang mga anak nga lalaki ni Mosiah

Ipasabot ngadto sa mga estudyante nga sa sunod nga duha ka semana, sila magtuon mahitungod sa misyonaryo nga panaw sa upat ka anak nga lalaki ni Mosiah ngadto sa mga Lamanite. Aron matabangan ang mga estudyante nga makakita kon giunsa paghaom niining misyonaryo nga panaw diha sa kinatibuk-ang konteksto sa basahon ni Alma, ikonsiderar ang pagpamubo sa mosunod nga parapo.

Ang Mga Kapitulo 1–16 sa Alma nag-asoy sa mga panghitabo sa kinabuhi ni Alma sulod sa unang 14 ka tuig sa pagmando sa mga maghuhukom. Sa Alma 17–27, atong nahibaloan ang mahitungod sa misyonaryo nga panaw sa mga anak nga lalaki ni Mosiah ngadto sa mga Lamanite atol sa samang yugto sa panahon. Ang Alma 17 nagsugod kang Alma ug sa iyang mga higala, ang mga anak nga lalaki ni Mosiah, nagkita sa unang higayon human sila nagkabulag sulod sa 14 ka tuig (tan-awa sa Alma 17:2–4; 27:16). Ang mga ngalan sa mga anak nga lalaki ni Mosiah mao sila si Ammon, Aaron, Omner, ug Himni.

Ikonsiderar ang pagbahin sa klase ngadto sa upat ka grupo. Ihatag ang matag grupo og usa sa mosunod nga mga tudling sa kasulatan aron tun-an. Ang mga miyembro gikan sa matag grupo mahimo dayon nga motaho ngadto sa nahabilin sa klase kon unsay ilang nakit-an.

Basaha ang mosunod nga mga bersikulo, mangita sa mahinungdanon nga mga detalye mahitungod sa misyon nila ni Ammon, Aaron, Omner, ug Himni.

• Ang ilang rason sa pag-adto: Mosiah 28:1–3

• Ang saad nga ilang nadawat: Mosiah 28:5–7

• Unsa ang ilang gibuhat aron mahimong instrumento sa mga kamot sa Ginoo: Alma 17:2–3, 9–12

• Ang mga tawo nga ilang gisangyawan: Alma 17:13–15

• Unsa ang mipatigbabaw kanimo mahitungod sa mga anak nga lalaki ni Mosiah gikan niini nga mga bersikulo?

• Unsa nga ebidensiya ang imong nakit-an sa tabang o kusog sa Dios nga naglihok sa ilang mga kinabuhi? Ikonsiderar ang pagmarka niini nga ebidensiya diha sa imong mga kasulatan.

Ammon ug Hari Lamoni

Sa wala pa magbulag kini nga mga misyonaryo aron sa pagsangyaw sa ebanghelyo sa lain-laing mga dapit, si Ammon mitudlo ug mipanalangin kanila. Dayon miadto si Ammon sa yuta nga gitawag og Ishmael. Sa dihang misulod siya niana nga yuta, nadakpan siya ug gidala sa atubangan sa hari, kansang ngalan mao si Lamoni (tan-awa sa Alma 17:17–20).

Basaha ang Alma 17:21–25, mangita sa tanyag nga gihimo ni Ammon ngadto ni Hari Lamoni. Mahimo usab nimong tan-awon ang bidyo nga “Si Ammon Nahimong Sulugoon ni Hari Lamoni” (3:47), anaa sa ChurchofJesusChrist.org.

• Sa unsang paagi kaha nga ang pag-ingon ni Ammon sa hari nga “Ako mahimo nga imong sulugoon” (Alma 17:25) nagtugot kang Ammon nga mahimong mas epektibo nga misyonaryo?

Samtang si Ammon ug ang uban nga mga sulugoon sa hari nagbantay sa mga panon, nakasugat sila og lisod nga sitwasyon.

Mahimo nimong dapiton ang pipila ka andam nga mga estudyante sa pagduol sa atubangan sa lawak [room] aron magpuli-puli sa pagbasa og kusog sa mosunod nga mga bersikulo samtang ang uban sa klase magsubay diha sa ilang mga kasulatan.

Basaha ang Alma 17:26–39, ug pangitaa kon unsay reaksiyon ni Ammon niini nga sitwasyon. Mahimo usab nimong tan-awon ang “Si Ammon Nanalipod sa mga Panon ni Hari Lamoni” gikan sa time code 0:00 hangtod sa 3:10. Kini nga bidyo anaa sa ChurchofJesusChrist.org.

• Sa unsang paagi nga ang pagsalig ni Ammon niini nga sitwasyon may kalabotan sa saad nga gihatag sa Ginoo ngadto sa amahan ni Ammon, nga si Mosiah, diha sa Mosiah 28:7?

• Kon anaa pa ka didto, unsay imong mahunahuna mahitungod ni Ammon?

Basaha ang Alma 18:1–3, mangita kon unsay gisulti sa ubang mga sulugoon nga Lamanite kang Hari Lamoni mahitungod niini nga kasinatian.

• Giunsa paghulagway sa mga sulugoon sa hari si Ammon?

Bisan og ang mga sulugoon sa hari naglisod sa paghulagway nganong si Ammon nakahimo sa pagpreserbar sa mga panon sa hari sa ingon ka milagroso nga paagi, sila nakaamgo nga siya adunay magamit nga gahom nga labaw pa kay sa mahimo sa usa ka mortal nga tawo.

Gikan sa kasinatian ni Ammon, atong makat-onan nga ang Ginoo mohatag sa Iyang kusog ug gahom ngadto sa Iyang mga sulugoon kinsa naningkamot sa pagbuhat sa Iyang kabubut-on.

Dihang hapit na matapos ang iyang 14 ka tuig nga misyon, si Ammon namalandong sa kalig-on ug sa gahom nga gihatag sa Dios kaniya sa tibuok niyang panahon nga nag-alagad sa mga Lamanite.

Basaha ang Alma 26:12, mangita sa unsay gisulti ni Ammon mahitungod sa tinubdan sa iyang kusog.

Ikonsiderar ang pagbahin sa klase ngadto sa tulo ka grupo ug pag-assign sa matag grupo og usa sa mosunod nga mga pangutana nga hisgotan. Ang matag grupo mahimong magbuhat og lista sa daghang mga tubag nga ilang mahunahunaan sulod sa usa o duha ka minuto ug dayon ipakigbahin ang ilang mga tubag ngadto sa klase.

Sa laing paagi, mahimo nimong isulat ang mga pangutana sa nagkalain-laing mga bahin sa pisara. Mahimong moadto sa pisara ang mga estudyante ug maglista og mga tubag sa usa o daghan pa sa mga pangutana hangtod nga ang matag pangutana adunay daghang mga tubag nga gisulat niini. Mahimo dayong hisgotan isip usa ka klase ang mga tubag sa mga estudyante.

• Unsa ang pipila ka mga ehemplo sa mga sitwasyon diin kita nagkinahanglan sa tabang o kalig-on sa Ginoo sa atong mga kinabuhi?

• Unsa ang pipila ka mga paagi nga ang Ginoo mahimong makapanalangin kanato sa Iyang tabang o kusog?

• Unsa ang imong mahimo aron sa pagdapit o paggamit sa tabang o kalig-on sa Dios sa imong kinabuhi?

Dapita ang mga estudyante sa paghunahuna mahitungod sa unsay ilang nakat-onan mahitungod sa Dios karon nga makatabang kanila sa ilang personal nga mga kinabuhi. Dapita sila sa pagrekord sa ilang mga hunahuna ug espirituhanong mga impresyon diha sa ilang mga journal sa pagtuon. Awhaga sila sa pagtinguha og tabang gikan sa Langitnong Amahan aron makahimo sa mga butang nga dili nila mahimo sa ilang kaugalingon.

Komentaryo ug Background nga Impormasyon

Unsaon nako pagdawat ang gahom o tabang nga gitanyag sa Dios kanako?

Si Presidente Russell M. Nelson mipakigbahin og daghang mga paagi nga atong mahuptan ang gahom sa Manluluwas diha sa atong mga kinabuhi:

Mamulong ako kon unsaon nato nga madawat nato sa atong mga kinabuhi ang gahom sa atong Ginoo ug Agalon, si Jesukristo.

Sugdan nato pinaagi sa pagkat-on mahitungod Kaniya. …

Samtang kita mopundar og panahon sa pagkat-on mahitungod sa Manluluwas ug sa Iyang maulaong sakripisyo, maagni kita sa pag-apil sa laing importanting elemento sa paggamit sa Iyang gahom: mopili kita sa pagbaton og [hugot nga pagtuo] diha Kaniya ug mosunod Kaniya. …

Ang hugot nga pagtuo kang Jesukristo moduso kanato sa pagbuhat og mga butang nga dili unta nato buhaton. Ang hugot nga pagtuo nga modasig kanato sa paglihok naghatag kanato og dugang paagi nga makagamit sa Iyang gahom.

Madugangan usab nato ang gahom sa Manluluwas diha sa atong kinabuhi kon mohimo kita og sagradong mga pakigsaad ug tukma nga motuman niana nga mga pakigsaad. …

Lain nga elemento nga madawat nato ang gahom sa Manluluwas sa atong kinabuhi mao ang pagdangop Kaniya uban sa pagtuo. Ang ingon niana nga pagdangop nagkinahanglan og makugihon, nakatutok nga paningkamot. …

Kon mokab-ot kamo alang sa gahom sa Ginoo diha sa inyong kinabuhi uban sa samang paningkamot sa tawo nga hapit na malumos nga naningkamot nga makaginhawa, ang gahom gikan ni Jesukristo inyong maangkon. Kon ang Manluluwas masayod nga gusto gayod ninyong modangop Kaniya—kon Iyang mabati nga ang inyong labing dakong tinguha mao ang pagdawat sa Iyang gahom nganha sa inyong kinabuhi—magiyahan kamo sa Espiritu Santo aron masayod kon unsa gayod ang kinahanglan ninyong buhaton.

Kon maningkamot kamo sa espirituhanong paagi nga labaw pa sa inyong nabuhat sukad, nan ang Iyang gahom modagayday nganha kaninyo …

Ang ebanghelyo ni Jesukristo puno sa Iyang gahom, nga maanaa sa matag matinguhaong nangita nga anak sa Dios. Kini ang akong pagpamatuod nga kon modawat kita sa Iyang gahom nganha sa atong kinabuhi, Siya ug kita magmaya. (Russell M. Nelson, “Pagdawat sa Gahom ni Jesukristo diha sa Atong Kinabuhi,” Liahona, Mayo 2017, 39–42)

Dugang nga mga Kalihokan sa Pagkat-on

Alma 17:2–4. “Sila naghatag ngadto sa ilang kaugalingon ngadto sa tuman nga pag-ampo, ug pagpuasa”

Mahimong makabenepisyo ang mga estudyante gikan sa mas lawom nga pagtuon sa Alma 17:2–4. Human mabasa kini nga mga bersikulo, mahimo nimong dapiton ang mga estudyante sa pag-ila sa mga baroganan nga ilang nakat-unan gikan niini. Usa ka kamatuoran nga mahimong maila sa mga estudyante mao ang samtang magtuon kita sa pulong sa Dios, mag-ampo, ug magpuasa, makadawat kita sa espiritu sa panagna ug pagpadayag ug makatudlo uban sa gahom.

Kon ang mga leksiyon gikan niini nga semana kinahanglang ihiusa, mahimo nimong gamiton kini nga mga bersikulo aron sa pagtabang sa pagpaila sa mga estudyante sa mga asoy ni Ammon nga nagtudlo kang Hari Lamoni sa Alma 18 ug kang Aaron nga nagtudlo sa amahan ni Lamoni diha sa Alma 22. Mahimong tun-an sa mga estudyante kadtong mga asoy ug mangita og ebidensya nga si Ammon ug Aaron napuno sa “espiritu sa pagpanagna, ug espiritu sa pagpadayag” ug nagtudlo “uban sa gahom ug pagtugot sa Dios” (bersikulo 3).

Ang mga saad sa Ginoo

Ikonsiderar ang pagtabang sa mga estudyante sa pagbutang sa ilang pagsalig sa Dios pinaagi sa pagtudlo kon sa unsang paagi gituman sa Ginoo ang Iyang mga saad ngadto kang Mosiah ug sa iyang mga anak nga lalaki. Mahimong magsulat ang mga estudyante diha sa ilang journal sa pagtuon nga adunay ulohan nga “Ang mga Saad sa Ginoo ngadto sa mga Anak nga lalaki ni Mosiah.”

Samtang magtuon ang mga estudyante sa Alma 17–27 sa umaabot nga mga adlaw, mahimo nila nga matino ang mga higayon nga ang Dios mituman sa Iyang mga saad gikan sa Mosiah 28:7 ug Alma 17:11, ug mahimo nilang irekord kini nga mga higayon sa ilang mga journal sa pagtuon. Pipila ka mga ehemplo sa katumanan niini nga mga saad naglakip sa Alma 17:34–38; 19:22–23; 20:20–30; 22:22–26; 23:5–6; ug 26:27–31.

Human magtuon sa Alma 27, mahimong maghisgot ang mga estudyante kon sa unsang paagi natuman ang mga saad sa Ginoo ug giunsa Niya pagtuman ang Iyang mga saad kanato karon.