Pag-angkon og Espirituhanong Kahibalo, Bahin 4

Pagpangita og mga Tubag sa Espirituhanong mga Pangutana

Usahay, mahimo kang adunay espirituhanong mga pangutana o mga kabalaka mahitungod sa doktrinal, personal, sosyal, o makasaysayanon nga mga hilisgotan. Kon aduna kay mga pangutana o mga kabalaka, mahimo nimong lihukon inubanan sa hugot nga pagtuo, susihon ang mga konsepto ug mga pangutana inubanan sa mahangtorong panglantaw, ug tinguhaon ang dugang nga panabot pinaagi sa balaanong gitudlo o gipili nga mga tinubdan. Kini nga leksiyon gituyo aron sa pagtabang kanimo sa pagrebyo sa mga baroganan sa pag-angkon og espirituhanong kahibalo.

Pagtudlo sa mga baroganan sa pag-angkon og espirituhanong kahibalo. Ang pagkat-on ug pagrebyo niini nga mga baroganan makatabang sa mga estudyante sa pagtubag kon motungha ang espirituhanong mga pangutana. Ang kanunay nga pagrebyo niini makapahimo sa mga estudyante nga mas mapuy-an ug magamit kini nga mga baroganan kada adlaw.

Pagpangandam sa estudyante: Mahimong dapiton ang mga estudyante sa paghunahuna mahitungod sa espirituhanong mga pangutana nga anaa na kanila o anaa sa pagkakaron ug unsay ilang nabuhat sa pagpangita og mga tubag sa ilang mga pangutana.

Posible nga mga Kalihokan sa Pagkat-on

Mga hagit sa hugot nga pagtuo

Basaha ang mosunod nga mga senaryo.

Mahimo nimong pilion ang paggamit sa usa o daghan pa sa gisugyot nga mga senaryo o paghimo og imong kaugalingon aron ipakigbahin sa klase. Ikonsiderar nga papilion ang mga estudyante og usa ka senaryo nga buhaton samtang nagpadayon ang leksiyon o i-assign ang mga senaryo ngadto sa gagmay nga mga grupo ug ipahisgot kanila ang mga pangutana atol sa leksiyon.

Si Ashlyn usa ka batan-ong babaye kinsa nakadungog og butang nga nakapasamok kaniya mahitungod sa Simbahan gikan sa usa ka higala. Iyang gibati nga ang kasayoran gitago gikan kaniya ug nga siya gibakakan pinaagi sa wala pagsulti niini nga mga butang sa sayo pa sa iyang kinabuhi. Nagsugod siya sa pagpakigsulti sa uban nga nasuko usab, ug nakabasa siya og negatibo nga komentaryo bahin sa hilisgotan.

Si Hugo nakakat-on mahitungod sa usa ka mahagiton nga doktrinal nga hilisgotan sa seminary ug miadto sa internet aron makat-on pa. Nakakita siya og mga tinubdan nga kritikal sa Simbahan kalabot niini nga hilisgotan. Tungod sa kakuryuso, mitan-aw siya og bidyo nga negatibong naghulagway sa mga pagtulun-an sa Simbahan mahitungod sa hilisgotan. Kini nga kasinatian nakapapangutana kaniya sa katinuod sa Simbahan sa unang higayon sa iyang kinabuhi.

• Unsay imong bation niini nga mga sitwasyon?

• Unsaon kaha nimo pagtubag?

Ang pagbaton og wala matubag nga espirituhanong mga pangutana mahitungod sa doktrinal, personal, sosyal, o makasaysayanon nga mga hilisgotan mahimong lisod. Hunahunaa ang ingon nga mga pangutana nga mahimong aduna ka ug ikonsiderar ang pagsulat niini alang niini nga leksiyon.

Adunay mga butang nga imong makat-onan ug mabuhat nga makatabang kanimo sa pagtubag sa mga pangutana o kabalaka uban sa kaligdong ug hugot nga pagtuo. Samtang magtuon ka niini nga leksiyon, hunahunaa kon sa unsang paagi ang kasayoran nga imong nakat-onan makatabang nimo sa pagtubag sa imong kaugalingong mga pangutana nga mga may pagsalig sa Langitnong Amahan ug ni Jesukristo.

Mga baroganan sa pag-angkon og espirituhanong kahibalo

Ang mosunod nga mga baroganan makagiya kanimo sa imong mga paningkamot sa pagdawat og direksiyon ug pagsabot kalabot sa espirituhanong mga pangutana:

• Lihok inubanan sa hugot nga pagtuo.

• Susihon ang mga konsepto ug mga pangutana inubanan sa mahangtorong panglantaw.

• Tinguhaon ang dugang nga panabot pinaagi sa balaanong gitudlo o gipili nga mga tinubdan.

Mahimo nimong pilion nga ipahiangay kini nga leksiyon, depende kon unsa ka pamilyar ang imong mga estudyante sa mga baroganan sa pag-angkon og espirituhanong kahibalo. Sama pananglit, kon duna kay pipila ka mga estudyante nga pamilyar sa mga baroganan apan ang uban wala, mahimo nimong hangyoon kadtong mga pamilyar sa pagpasabot niini ngadto sa klase. Kon ang tanan nimong mga estudyante bag-o pa niini nga mga baroganan, kinahanglan ka nga mogahin og dugang nga panahon sa pagpaila sa mga baroganan. Mahimo kang motan-aw sa “Pag-angkonog EspirituhanongKahibalo,” Mga Bahin 1, 2, ug 3 gikan sa sinugdanan niini nga manwal.

Lihokon inubanan sa hugot nga pagtuo

Basaha ang mosunod nga mga senaryo. Mahimo usab nimong basahon ang mga parapo 5–7 diha sa seksiyon nga “Pag-angkon og Espirituhanong Kahibalo” sa Mahinungdanon nga Dokumento sa Doktrinal nga Kahanas (2022) sa dili pa basahon ang mga senaryo o tan-awon ang bidyo.

Usa ka paagi sa pagrebyo sa mga parapo nga gihisgotan sa miaging kapahayag mao ang pagbutang sa mga estudyante ngadto sa mga grupo nga tag-upat. Dapita ang tulo sa mga sakop sa grupo sa pagbasa og kusog sa usa sa tulo ka parapo ngadto sa grupo. Dayon dapita ang ikaupat nga sakop sa grupo sa pagpamubo sa gibasa sa laing tulo.

Mahimo nimong ipatubag sa mga estudyante ang mosunod nga mga pangutana base sa senaryo nga ilang gipili sa ibabaw.

Human mahibaloan unsa ang iyang gibuhat, nasuko pag-ayo si Ashlyn nga mihunong siya sa pagsalmot sa simbahan. Sulod sa kapin sa usa ka tuig, gidistansiya niya ang iyang kaugalingon sa Simbahan. Sa kadugayan, gipangutana siya sa usa ka suod nga higala kon nganong mihunong siya sa pagsalmot. Siya [suod nga higala] mipakigbahin og pakigpulong sa kinatibuk-ang komperensiya uban kaniya [Ashlyn] nga sa iyang hunahuna makatabang ug midapit kaniya sa pag-ampo mahitungod sa unsay iyang nabasa.

Gitago ni Hugo ang iyang mga pagduhaduha ug mga kabalaka sa iyang kaugalingon apan nagpadayon sa pagsalmot sa simbahan. Apan ang iyang mga pagbati sa kalibog wala mawala. Sa usa ka punto, siya adunay kusog kaayo nga pagbati nga siya kinahanglan nga makigsulti sa iyang mga ginikanan bahin sa iyang mga kabalaka. Mao kadto ang unang espirituhanong pagbati nga iyang nailhan sukad sa iyang kasinatian sa internet.

• Sa unsang paagi nimo makita si Ashlyn ug Hugo nga naglihok o wala molihok inubanan sa hugot nga pagtuo?

• Unsa kaha ang imong masulti nga mahimong makadasig kanila sa pagbalik ngadto sa Dios agig tubag sa ilang mga hagit?

• Unsa nga mga kasulatan ang makatabang sa usa ka tawo nga molihok inubanan sa hugot nga pagtuo kon siya adunay pangutana nga dili dali matubag?

Mahimo nimong hatagan og panahon ang mga estudyante sa pagpangita og mga kasulatan agig tubag sa miaging pangutana. Kini nga mga kasulatan mahimong maglakip sa 2 Nephi 31:20 ug Mga Panultihon 3:5–6. Human ang igong panahon, mahimo na dayon silang mopakigbahin sa usa ka tawo nga naglingkod duol kanila. Sa laing paagi, mahimo nilang isulat diha sa pisara ang mga bersikulo nga ilang nakaplagan ug ang ubang mga klasmeyt makabasa sa mga bersikulo nga dili sila pamilyar. Mahimo dayong ipakigbahin sa mga estudyante ang ilang nakat-onan gikan sa mga kasulatan nga nakaplagan sa ilang mga klasmeyt.

Susihon ang mga konsepto ug mga pangutana inubanan sa mahangtorong panglantaw

Usa ka paagi sa pagrebyo sa mosunod nga mga parapo mao ang pagbutang sa mga estudyante ngadto sa gagmay nga mga grupo ug dapita ang matag estudyante diha sa grupo sa pagbasa sa tanang tulo ka parapo. Dayon dapita sila sa pagpakigbahin og usa ka linya diha sa ilang grupo nga labing nakadani kanila gikan sa mga parapo.

Rebyoha ang mga parapo 8–10 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas.

• Sa unsang paagi nga ang pagsusi sa mga konsepto ug mga pangutana inubanan sa mahangtorong panglantaw nakatabang ni Ashlyn o Hugo sa dihang ang ilang mga pagduhaduha unang mitungha?

• Sa unsang paagi kini makatabang kanila sa ilang mga kahimtang karon?

• Unsa ang gusto nimong masabtan ni Hugo o ni Ashlyn mahitungod sa Dios ug sa Iyang plano niining puntoha sa ilang mga kinabuhi?

Mahimong usa kini ka maayong dapit nga tugtan ang mga estudyante sa pagbansay sa paggamit sa mga kasulatan. Mahimo kang magpapangita sa mga estudyante og mga kasulatan nga nagsuporta sa ilang mga tubag sa miaging pangutana. Sama pananglit, kon hisgotan sa usa ka estudyante nga ang Langitnong Amahan dili kanunay mohatag kanato og kompleto nga tubag sa usa ka higayon, siya mahimong mogamit sa 2 Nephi 28:30 aron pagsuporta niana nga pamahayag.

Tinguhaa ang dugang nga panabot pinaagi sa balaanong gitudlo nga mga tinubdan

Rebyoha ang mga parapo 11–12 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas.

Usa ka paagi sa pagrebyo sa mga parapo nga gihisgotan sa miaging kapahayag [sentence] mao ang pagdapit og duha ka estudyante sa pagbasa og kusog sa mga parapo ngadto sa klase. Dayon pagdapit og usa ka boluntaryo sa pagsulat diha sa pisara samtang ang mga estudyante mopakigbahin og nagkalain-laing balaanong gitudlo nga mga tinubdan nga ilang nadunggan nga gihisgotan.

Basaha ang mosunod nga mga senaryo.

Nakahukom si Ashlyn nga basahon ang pakigpulong sa kinatibuk-ang komperensiya nga girekomendar kaniya sa iyang higala. Samtang nagbasa siya, gibati niya ang kalinaw ug katagbawan nga lahi kaayo sa iyang gibati sa dihang nagbasa og negatibong komentaryo mahitungod sa Simbahan. Gibati niya ang usa ka personal nga pasalig nga adunay kamaayo ug kamatuoran sa iyang gibasa. Sa kadugayan, pinaagi sa pag-ampo ug matinud-anong pagtuon, gibati niya nga nalig-on ang iyang pagpamatuod, bisan og aduna pa siyay wala matubag nga mga pangutana.

Si Hugo nakigsulti sa iyang mga ginikanan ug nakakaplag nga sila maluluy-on kaayo ug masinabtanon mahitungod sa iyang mga kabalaka. Ila siyang gipaila sa Gospel Topics [Mga Hilisgotanan sa Ebanghelyo] nga kapanguhaan sa Gospel Library, ug dungan sila nga nagbasa mahitungod sa mga hilisgotan nga nakapabalaka kaniya. Nakakaplag siya og kahupayan sa pagkahibalo nga adunay propetekanhong mga tubag nga iyang mapangita alang sa mga tubag sa iyang mga pangutana.

• Gikan sa unsa nga mga tinubdan ang matag tawo diha sa mga senaryo nakakuha og kasayoran? Unsang mga tinubdan ang kasaligan? Ngano o nganong dili?

  Samtang adunay balaanong gitudlo nga mga tinubdan nga klarong gipasabot, sama sa mga kasulatan, mga propeta, ug ang Espiritu Santo, adunay ubang kasaligan nga mga tinubdan nga nagpunting usab kanato ngadto kang Jesukristo ug nahisubay sa mga pagtulun-an sa mga propeta sa modernong adlaw.

• Unsa nga kalainan ang nahimo niini sa dihang sila si Ashlyn ug Hugo midangop ngadto sa balaanong gitudlo nga mga tinubdan?

• Unsa nga balaanong gitudlo nga mga tinubdan nga ikaw mapasalamaton? Ngano man?

Hunahunaa kon unsay imong nakat-onan karon ug sa unsang paagi kini mahimong makatabang sa espirituhanong mga pangutana o mga hagit nga anaa kanimo o sa uban. Ikonsiderar ang pagsulat diha sa imong journal sa unsay imong nakat-onan nga mahimong makatabang kanimo sa pagpangita og kalinaw ug pagsabot. Dapita ang impluwensiya sa Langitnong Amahan sa pagdasig kanimo samtang ikaw mamalandong ug magsulat.

Ikonsiderar ang pagdapit og pipila ka mga boluntaryo sa pagpakigbahin sa pipila sa ilang mga panabot ngadto sa klase. Pagpamatuod sa mga kamatuoran nga imong nahisgotan karon ug dasiga ang mga estudyante sa paggamit niini nga mga baroganan kon mag-atubang sila og espirituhanong mga pangutana.

Komentaryo ug Background nga Impormasyon

Sa unsang paagi makatabang ang Dios niadtong mibati nga ang ilang hugot nga pagtuo diha Kaniya o sa Iyang ebanghelyo nagmahuyang?

Si Presidente Dieter F. Uchtdorf mitudlo:

Akong nakat-onan sa akong kinabuhi nga kita dili kinahanglan nga “mas maayo” sa bisan unsang butang aron makasugod nga mahimong tawo nga tuyo sa Dios nga kita mamahimo.

Ang Dios modawat kaninyo kon unsa kamo karon ug magsugod sa pagtrabaho uban kaninyo. Ang inyong gikinahanglan mao lang ang andam nga kasingkasing, tinguha nga motuo, ug pagsalig sa Ginoo. …

Samtang kamo mogamit og gamay nga pagtuo ug magsugod sa inyong paglakaw isip malinawon nga sumusunod sa atong Ginoong Jesukristo, ang inyong kasingkasing mausab [tan-awa sa 1 Samuel 10:9]. Ang inyong tibuok nga pagkatawo mapuno sa kahayag [tan-awa sa Mateo 6:22].

Ang Dios motabang kaninyo nga mahimong mas labaw pa kay sa posible ninyong mahunahunaan. Ug inyong mabantayan nga ang ebanghelyo ni Jesukristo tinuoray gayod nga nakahatag og benepisyo sa inyong kinabuhi. Makabenepisyo kini. (Dieter F. Uchtdorf, “Nakabenepisyo Kaayo Kini!,” Liahona, Nob. 2015, 23)

Dugang nga mga Kalihokan sa Pagkat-on

Paggamit sa istorya ni Jacob ug Sherem sa pagtudlo mahitungod sa pagkaandam sa pag-atubang sa pagpanglingla

Mahimo nimong gamiton kini nga istorya sa pagpakita og pipila ka baroganan nga may kalabotan sa panginahanglan sa pag-angkon og espirituhanong kahibalo. Mahimong basahon sa mga estudyante ang Jacob 7:1–4, mangita kon unsay ilang mahibaloan mahitungod ni Sherem. Ikonsiderar ang paglista diha sa pisara sa unsay ilang makit-an. Ngano kaha nga mahinungdanon nga masabtan ang kadto nga mga detalye? Human gikompronta ni Jacob ug gilibog si Sherem, ang mga tawo nakahibalo nga si Sherem nalingla ug naglingla kanila. Basaha ang Jacob 7:23, mangita alang sa mga panabot bahin sa pagbatok sa malimbungon nga mga impluwensiya. Mahimo nimong pangutan-on ang mga estudyante kon sa unsang paagi ang mga kasulatan nakatabang kanila nga makalikay sa pagpanglingla.

Pagkaandam sa dili pa motungha ang mga hagit sa hugot nga pagtuo

Ang mga baroganan sa pag-angkon og espirituhanong kahibalo dili lamang makatabang sa mga higayon o mga sitwasyon diin ang hugot nga pagtuo gihagit apan makatabang usab sa paglig-on sa hugot nga pagtuo sa bisan unsang oras. Mahimo nimong pangutan-on ang mga estudyante kon sa unsang paagi ang mga baroganan sa pag-angkon og espirituhanong kahibalo makatabang kanila sa dili pa moabot ang hagit sa ilang hugot nga pagtuo. Ikonsiderar ang pagdapit sa mga estudyante sa pagbasa sa Alma 32:37–38, mangita kon sa unsang paagi ang analohiya sa liso niini nga mga bersikulo mahimong may kalabotan sa paggamit sa mga baroganan sa pag-angkon og espirituhanong kahibalo sa dili pa ang mga hagit sa hugot nga pagtuo (ang kainit sa adlaw) motungha.

Unahon ang mga butang nga importante

Sa pag-atubang sa mga hagit sa hugot nga pagtuo, tabangi ang mga estudyante nga mapadayon ang pagtutok sa makapakabig nga mga baroganan sa ebanghelyo. Ang mosunod nga kinutlo makatabang sa pagtudlo niini nga ideya.

Samtang nagserbisyo isip miyembro sa Seventy, si Elder Lawrence E. Corbridge mipakigbahin sa mosunod nga panabot:

“Sugdi pinaagi sa pagtubag sa nag-unang mga pangutana. Adunay nag-una nga mga pangutana ug adunay ikaduha nga mga pangutana. Tubaga og una ang nag-una nga mga pangutana. Dili tanang pangutana managsama ug dili tanang kamatuoran managsama. Ang nag-una nga mga pangutana mao ang labing importante. Ang tanan nga uban mas menos. Adunay pipila lamang ka nag-una nga pangutana. Akong hisgotan ang upat niini.

1. Aduna bay usa ka Dios kinsa mao ang atong Amahan?

2. Si Jesukristo ba mao ang Anak sa Dios, ang Manluluwas sa kalibotan?

3. Si Joseph Smith usa ba ka propeta?

4. Ang Simbahan ni Jesukristo sa mga Santos sa Ulahing mga Adlaw mao ba ang gingharian sa Dios dinhi sa yuta?

“Sa sukwahi, ang ikaduha nga mga pangutana walay kataposan. …

“Kon tubagon ninyo ang nag-unang mga pangutana, ang ikaduhang mga pangutana matubag usab” (Lawrence E. Corbridge, “Stand Forever,” [debosyonal sa Brigham Young University, Ene. 22, 2019], 2–3, speeches.byu.edu).