Alema 23

Latou Te “Lei Pauu Ese Lava”

Mafaufau i le tele o malosiaga i le lalolagi i aso nei o loo saili e lepeti lou faatuatua ma toso ese oe mai le Alii. O le a se mea e mafai ona e faia e tu mausali ai ma puipuia lenei mea ia aua nei tupu? E mafai ona tatou aoao mai faataitaiga a le faitau afe o sa Lamana o e na “faaliliuina i le Alii” ma “sa lei pauu ese lava” (Alema 23:6). O le faamoemoega o lenei lesona o le fesoasoani lea ia te oe ia manao ia liua atoatoa atili i le Alii ma faailoa mai soo se faalavefau i lena liua.

Uunaia ai o tagata aoao e taumafai e mulimuli ia Iesu Keriso. Fesoasoani i tagata aoao ia malamalama a o latou taumafai e ola ai i le talalelei a Iesu Keriso, e mafai ona latou avea atili e faapei o le Faaola ma maua le olioli faateleina i lo latou avea ai ma soo.

Sauniuniga a le tagata aoga: Valaaulia tagata aoga e o mai saunia e faasoa mai o latou manatu i le uiga o le “liua i le Alii” (Alema 23:6) ma pe aisea e taua tele ai le liua ia te Ia. E mafai ona latou tagai i le O le Taiala i Tusitusiga Paia i lalo o le “Liliuga, Liliu Mai” pe afai latou te manaomia le fesoasoani.

Gaoioiga e Ono Mafai Ona Aoao Ai

Tu malosi

O lenei lesona ma le lesona o loo i le Alema 24 e mafai ona galulue faatasi e fesoasoani ai i tagata aoga ia faaloloto lo latou liua. O lenei lesona e mafai ona fesoasoani i tagata aoga e faailoa ai faafitauli i lo latou liua; o le lesona e sosoo ai ua faamoemoe e fesoasoani ia i latou e faatoilalo na faafitauli.

Mafaufau e valaaulia ni volenitia se toalua e fai le gaoioiga lenei. Faamanatu atu ia i latou e aua nei faigata tele.

Afai e mafai, tu i le vae e tasi mo le 30 sekone. Mafaufau e uiga i le faigata o le tu ai pea pe afai e tulei oe e se tasi a o e tu i le vae e tasi.

Ia tu i vae e lua ma mafaufau i le sili atu ona faigofie le tumau ai o le tu i luga pe a tulei oe e se tasi.

E i ai taimi, e faatusatusa ai e tusitusiga paia le faamaoni i le Alii i le tutu mausali ai (tagai Mosaea 4:11; Alema 1:25) ma le liliu ese mai le Alii [e faatusa] i le pauu (tagai 2 Nifae 18:15; Helamana 5:12).

• O a nisi o mafuaaga e pauu ese ai tagata mai ia Iesu Keriso ma Lana Ekalesia?

Atonu e te manao e faaali atu nei fesili ina ia mafai ai e tagata aoga ona mafaufau loloto i ai.

Manatunatu loloto i fesili nei:

• Afai e tatau ona faaauau pea ona e ola i le ala ua e i ai nei, pe e te lagona o le a e latalata atili atu i le Alii ma Lana Ekalesia pe amata ona e pau ese? Aisea?

• O le a se mea ua e iloa e uiga i le Alii ma Lana Ekalesia e te le manao ai e te pau ese?

A o e suesue e uiga i tagata o e “sa lei pauu ese lava” (Alema 23:6), vaavaai mo ni malamalamaaga ma saili le taitaiga mo lou olaga e ala i le tatalo i le Tama Faalelagi ma le musumusuga a le Agaga Paia.

Faaliliuina i le Alii

Ina ua mavae lona liua, sa folafola atu e le tupu o sa Lamana le saolotoga faalelotu i le laueleele ina ia mafai ai e atalii o Mosaea ona talai atu ma le saogalemu le talalelei.

Faitau le Alema 23:3–5, ma vaavaai mo aafiaga o le talaiga i tagata.

Mafaufau e fesili atu po o a fasifuaitau e tulaga ese i au tagata aoga.

E i ai taimi, e toe ta’u mai ai e tusitusiga paia ia fasifuaitau e taua mo i tatou ia malamalama ai. Faitau le Alema 23:6–13, 15, ma vaavaai mo fasifuaitau o loo ta’u mai ai le mafuaaga na “lei pauu ese [ai] lava” le faitau afe o i latou nei na liua (fuaiupu 6). Mafaufau e faailoga ia fasifuaitau o loo ta’ua soo.

Valaaulia tagata aoga e faasoa mai mea na latou maua. “Faaliliuina i le Alii” o loo toe ta’ua i le Alema 23:6, 8, 13, ma “tuu i lalo auupega o lo latou fouvale” ma “tuu i lalo auupega o lo latou fouvale” o loo i le Alema 23:7, 13, i le faasologa lena.

O se upumoni e tasi e mafai ona tatou aoao mai nei fuaiupu e faapea, a o tatou liua i le Alii ma tuu i lalo a tatou auupega o le fouvale, e mafai ona tatou tutu atu ma le faamaoni ia te Ia.

• O le a le uiga o le “faaliliuina i le Alii”? (Alema 23:6). (Afai e aoga, mafaufau e suesue le “Liliuga, Liliu Mai” i le O le Taiala i Tusitusiga Paia po o le the Topical Guide).

• Aisea e taua ai le liua “i le Alii” nai lo i se faifeautalai po o se aoaoga faapitoa?

Faaali atu se ata o le Faaola a o e valaaulia tagata aoga e fai mea nei.

Mafaufau i mea ua e iloa e uiga i le Faaola ma mafaufau loloto pe aisea e te manao ai ia avea ma tumau ai i le liua ia te Ia i lou olaga atoa. Mafaufau e faitau nisi o fuaiupu nei e fesoasoani ai ia te oe:

• Ioane 14:6

• Ominae 1:26

• Helamana 5:12

• Eteru 12:27

Valaaulia tagata aoga e faasoa mai o latou manatu ma mea na latou maua.

• O le a se mea na fesoasoani ia te oe ma isi e te iloa e liua atili ai i le Alii?

O le tuu i lalo o a tatou auupega o le fouvale

Ina ia liua moni i le Alii ma ia le pauu ese lava, e tatau ona tatou naunau e lafoai a tatou auupega o le fouvale. O auupega a sa Lamana o le fouvale sa o ni auupega moni ma o ni auupega faafaatusa foi. Ae mo i tatou, o nei auupega e foliga mai ua na o ni faafaatusa.

Mafaufau e tusi faamatalaga nei i luga o le laupapa.

Na aoao mai Elder David A. Bednar o le Korama a Aposetolo e Toasefululua e faapea o a tatou auupega o le fouvale e mafai ona pei o le “manatu faapito, faamaualuga, ma le le usiusitai” (“Faaliliuina i le Alii,” Liahona, Nov. 2012, 108). Na aoao mai Elder Dale G. Renlund o le Korama a Aposetolo e Toasefululua e faapea o a tatou auupega e mafai ona pei o le “manaoga patino e feteenai ma le taula atu ai i le Faaola ma mulimuli ai i le ala o feagaiga” (“Tautinoga Mausali ia Iesu Keriso,” Liahona, Nov. 2019, 22).

O le faamoemoega o le gaoioiga lenei o le fesoasoani lea i tagata aoga e faailoa mai faataitaiga o auupega o le fouvale lea e talafeagai ma o tatou aso. Fuafua e vaevae le vasega i ni vaega toalaiti. A uma ua lava se taimi, valaaulia vaega taitasi e filifili se tagata e sau i le laupapa ma tusi se ata ma faaigoa se auupega o le fouvale a o tuuina atu faapuupuu mai e se isi tagata aoga ni nai tali a le vaega i fesili nei. A o latou faasoa mai, vaavaai mo auala e faamalo atu ai i tagata aoga i le faia o tusitusiga paia ia talafeagai ma o tatou aso, ma faafetai atu ia i latou mo a latou taumafaiga.

Tusi ni ata o auupega faigofie se lua (pelu, tao, po o isi auupega) i lau api talaaga mo suesuega po o luga o se fasipepa. I tafatafa po o luga o auupega taitasi, tusi ai se faataitaiga patino ma moni o se uiga po o se faatinoga e feteenai ma le talalelei a Iesu Keriso atonu o i ai i se talavou i o tatou aso. Mo se faataitaiga, o se tasi o loo tauivi ma le faamaualuga atonu e le faalogo i fautuaga a ona matua pe atonu foi e lagonaina ua matutua perofeta ma ua le toe maua se fesootaiga. Pe e mafai foi e se isi tagata ona faia ni agasala patino ona ua manatu o ia o poloaiga a le Atua ua matua pulepuletutū lava.

• E mafai faapefea e nei uiga po o faatinoga ona aafia ai le liua o lenei tagata i le Alii?

• E mafai faapefea e le lafoaiina po o le tuueseina o nei uiga po o faatinoga ona fesoasoani i se tasi ia liua atili ai i le Alii?

O au auupega o le fouvale

Mafaufau e valaaulia tagata aoga e fai le gaoioiga lenei i a latou api talaaga mo suesuega.

Ina ia faaiuina lenei lesona, saili le fesoasoani a le Tama Faalelagi e ala i le Agaga Paia e faailoa mai ai po o a auupega o le fouvale atonu o loo iai ia te oe. Afai e te faailoa maia se tasi, mafaufau e tusi i lau api talaaga mo suesuega ma tusi se ata o se auupega i ona tafatafa.

Mafaufau loloto po o le a se mea e mafai ona e faia e tuu ai i lalo au auupega o le fouvale ma pe faapefea e lena tautinoga ona fesoasoani ia te oe ia liua i le Alii ma lē pa’ū ese ai lava.

Mafaufau e molimau atu i mataupu faavae na aoaoina i lenei lesona.

Manatu ma Talaaga o Faamatalaga

Alema 23:6. O le a le uiga o le faaliliuina i le Alii?

Matamata le “Faaliliuina i le Alii” mai le faailo taimi 10:43 i le 11:41 e vaai ai i le faamalamalamaga a Elder David A. Bednar o le Korama a Aposetolo e Toasefululua.

Matamata le “Ia Liua Outou” mai le faailo taimi 0:48 i le 3:21 ma le “Ia Saoloto Outou” mai le faailo taimi 6:43 i le 8:52 e vaai ai i faataitaiga o le liuaina.

O a faamanuiaga e mafai ona oo mai pe a tatou tuuese a tatou auupega o le fouvale?

Na aoao mai Elder Patrick Kearon o le Fitugafulu:

Tatou te maua le faamalologa ma le toomaga pe a tau lava ina tatou tuu atu i tatou lava i aao o le Fomai Sili, o lo tatou Faaola, o Iesu Keriso. E tatau ona tatou lafoai a tatou auupega o le fouvale (ma ua tatou iloa uma lava na auupega). E tatau ona lafoai a tatou agasala, faasausili, ma le faamaualuga. E tatau ona lafoai lo tatou manao e mulimuli i le lalolagi, ma le manao e faaaloalogia ma viia e le lalolagi. E tatau ona tuu lo tatou faasagatau i le Atua ae tuu atu i ai o tatou loto atoa ia te Ia, e aunoa ma se mea e taofia. Ona mafai lea ona Ia faamaloloina i tatou. Ona Ia mafai lea ona faamamaina i tatou mai le au oona o le agasala. (Partick Kearon, “O Mai Ia Te Au ma le Loto Atoa, Ona Faamaloloina ai Lea o Outou,” Liahona, Nov. 2010, 51–52)

O le a le uiga o le igoa Aneti-Nifae-Liae?

O le igoa Aneti-Nifae-Liae e mafai ona faailoa mai ai le tuufaatasia o e tupuga mai ia Nifae ma i latou o e na mulimuli ia te ia faatasi ma isi fanau a Liae: “O le igoa ‘Aneti’ o le ‘Aneti-Nifae-Liae’ atonu o se faauigaga faa-Aikupito o le nty ‘o ia o, o le tasi o.’ O lea, nai lo le i ai o le lagona ‘faasagatau,’ o loo i ai le uiga ‘o lē e tasi o Nifae ma Liae’” (Stephen D. Ricks, “Anti-Nephi-Lehi,” i le Dennis L. Largey, ed., Book of Mormon Reference Companion [2003], 67).

Gaoioiga Faaopoopo e Aoao Ai

O se isi amataga

O se isi auala e amata ai le lesona, faasoa atu se tala musuia e uiga i se tasi sa tumau faamaoni i le Alii ma Lana Ekalesia e ui i le tetee, e pei o le tala i le “E Moni, A ea?” mai le faailo taimi 0:00 i le 1:26. Fai atu i tagata aoga e mafaufau loloto po o le a se mea e mafai ona fesoasoani ia i latou e tumau faamaoni ai i le Alii ma Lana talalelei i o latou olaga atoa, e ui lava i faafitauli.

Liua

Afai o le a manuia tagata aoga mai le suesueina atili e uiga i le liua ma pe faape’i ona foliga, mafaufau e faasoa atu le vitio mai ia Elder Bednar faapea foi ma se tasi po o vitio uma e lua o loo faapupula mai ai faataitaiga o le liua mai le vaega o “Manatu ma Talaaga o Faamatalaga”. Valaaulia tagata aoga e faasoa mai foi ni faataitaiga o le liua i le Alii o loo latou iloaina. Fai atu ia i latou e fuafua ni faatinoga e mafai ona latou faia ina ia liua atili ai i latou lava i le Alii .

Saolotoga faaletapuaiga

Ua faamamafa mai e taitai o le Ekalesia le taua o le saolotoga o tapuaiga i o tatou aso. Afai o le a manuia tagata aoga mai le suesueina atili e uiga i lenei autu taua, mafaufau e valaaulia tagata aoga e suesue le Alema 23:1–7 ma faasoa mai po o a faamanuiaga na oo mai ona o le tuuina atu o le saolotoga o tapuaiga i sa Lamana. Fai atu i tagata aoga e faasoa mai pe aisea e finagalo ai le Alii ia tatou maua le saolotoga faaletapuaiga ma mea o loo aoao mai e lena mea e uiga ia te Ia. Mafaufau e matamata le “O Le A le Saolotoga o Tapuaiga?” (4:06) po o le “Faasaoina o le Saolotoga o Tapuaiga” (8:44), ma valaaulia tagata aoga e mafaufau i mea e mafai ona latou faia e faasaoina ai le saolotoga faaletapuaiga i o latou nuu ma pe mafai faapefea e lenei mea ona fesoasoani i le galuega a le Alii e agai ai i luma. (Tagai foi Ronald A. Rasband, “Ia Faamaloloina le Lalolagi,” Liahona, Me 2022, 91–94.)