Alema 29

O Manaoga o o Tatou Loto

E mafai faapefea ona e iloa pe o ogatusa ou manaoga mo lou olaga ma mea e finagalo ai le Alii mo oe? I le Alema 29 o loo faamaumauina ai le manao o le loto o Alema ma lona manatunatu pe o ogatusa ona manaoga ma mea e finagalo ai le Atua mo ia. O lenei lesona e mafai ona fesoasoani ia te oe e iloilo ai ou lava manaoga ma faaogatusa ma le finagalo o le Alii.

Fausia le faatuatua ia Iesu Keriso. Pe a sauniuni e aoao atu, fesili ifo ia te oe lava, “Mai upumoni uma e mafai ona faamamafaina i lenei poloka o mau, o le fea o le a sili ona fesoasoani i au tagata aoga e faalatalata atili atu ai i le Tama Faalelagi ma le Faaola?” Saili le musumusuga a le Agaga Paia ia malamalama atili ai po o le fea upumoni o le talalelei o le a sili ona ausia ai lena faamoemoega.

Sauniuniga a le tagata aoga: Mafaufau e valaaulia tagata aoga e faitau le Alema 29:1–6 ma mafaufau loloto i mea ua latou aoaoina e uiga i manaoga.

Gaoioiga e Ono Mafai Ona Aoao Ai

Moomooga mo lo’u olaga

Mafaufau e faaali atu se ata o oe lava o se tamaitiiti ma faasoa atu au tali i fesili nei. E mafai foi ona e valaaulia ni nai tagata aoga e aumai ni ata o i latou lava o ni tamaiti laiti ma tali ia fesili.

I se isi faiga, i le tele o aganuu e i ai fagogo po o tala e fesiligia ai se tasi po o le a le mea e sili ona latou moomoo pe mananao i ai. O nisi faataitaiga e aofia ai le moomoo i luga o se fetu, talosagaina o moomooga mai se taulaitu po o se aitu, po o le faia o se moomooga a o feula le moligao o le asofanau. Atonu e te manao e faasino i se tasi o nei tala masani ma fesili atu, “Afai sa mafai ona e moomoo mo se tasi o ou manaoga silisili, mata o le a lena mea?”

• A o e laitiiti, o a nisi o ou manaoga silisili?

• O lea la ua e matua, ua faapefea ona suia ou manaoga? E mafai faapefea ona suia ou manaoga i le lumanai?

I le tasi itu o se itulau i lau api talaaga mo suesuega, tusi ai i lalo nisi o ou manaoga mo lou olaga. (O le a e faaaogaina le isi itu i se taimi mulimuli ane o le lesona.)

• E faapefea e o tatou manaoga ona aafia ai o tatou olaga?

A o tatou tuputupu ae ma matutua i le talalelei ma latalata atili atu i le Atua, o nisi o o tatou manaoga e ono suia ma ogatusa atili ma mea e finagalo ai o Ia mo i tatou.

• E mafai faapefea ona tatou iloa pe o ogatusa o tatou manaoga ma mea e finagalo ai le Atua mo i tatou?

A o e suesueina lenei lesona, mafaufau loloto i ou manaoga. Vaai ia iloa manaoga e ogatusa ma manaoga o le Atua ma i latou atonu e manaomia ona faaleleia pe suia.

Faaogatusa o tatou manaoga ma le finagalo o le Alii

I le Alema 29, na faamaumau ai e Alema se tasi o ona manaoga. Faitau le Alema 29:1–2, ma vaavaai mo mea na ia faamatalaina.

• Aisea na manao ai Alema e avea ma se agelu? O le a se mea ua ta’u atu e lena mea ia te oe e uiga ia te ia?

• O le a se mea ua e iloa e uiga i le olaga tuai o Alema atonu na musuia ai lona manao e avea ma se agelu? (tagai Mosaea 27:11–17).

Afai e manaomia, fesoasoani i tagata aoga ia malamalama i le aafiaga o Alema ma se agelu e pei ona tusia i le Mosaea 27. O se tasi o auala e mafai ona e faia ai lenei mea o le faaali atu lea o le ata lenei ma fai atu i tagata aoga e faasoa mai mea latou te manatua e uiga i le tala o loo faaalia ai.

O le malamalama i le faatatauga o fuaiupu e mafai ona tatou maua ai se malamalamaaga faaopoopo. I mataupu i luma atu o le Alema 29, na poloaiina ai e le Alii ia Amona e aumai Aneti-Nifae-Liae e nonofo faatasi ma sa Nifae mo lo latou puipuiga (tagai Alema 27:4–12). Na tuuina atu e sa Nifae ia Aneti-Nifae-Liae le laueleele o Seasona e faamautu ai ma folafola atu e puipuia i latou. Sa mulimuli sa Lamana amioleaga ia Aneti-Nifae-Liae ma amata ai se taua. Sa puipuia e sa Nifae i latou lava ma o latou aiga e faasaga ia sa Lamana. O le taunuuga, “sa tai sefulu o afe o sa Lamanā na fasiotia ma [faataapeape] solo … ma sa i ai foi se fasiga tele i totonu o le nuu o Nifae” (Alema 28:2–3).

• E mafai faapefea e lenei faatatauga ona fesoasoani e te malamalama ai pe aisea na manao ai Alema e valaau atu ma le lototoa i tagata ia salamo ma taofia le faanoanoa?

Faitau le Alema 29:3–6, ma vaavaai mo mea na malamalama i ai Alema e uiga i manaoga.

Mafaufau e fesili atu i tagata aoga po o a mea na latou aoaoina. E mafai e tagata aoga ona faasoa mai ni lesona po o mataupu faavae eseese. Afai e le ta’ua e tagata aoga, fai atu ia i latou e aotele mai mea na aoao mai e Alema i le fuaiupu 4.

O se tasi o mataupu faavae atonu na e faailoa maia e faapea e faatagaina i tatou e le Atua e faia filifiliga e faavae i o tatou manaoga.

Mafaufau e valaaulia tagata aoga e faailoga i a latou tusitusiga paia ia upu autu po o fasifuaitau i le fuaiupu 4 e faailoa mai ai lenei upumoni.

• Aisea e taua ai ona tatou malamalama i lenei mataupu faavae?

Ina ia fesoasoani ia te oe e faatusatusa ou manaoga i le finagalo o le Alii, lisi i le isi itu o le itulau i lau api talaaga mo suesuega mea e finagalo ai le Alii mo Ana fanau. E mafai ona e faitauina nisi o fuaitau nei e fatu ai le lisi lenei:

• Mataio 22:37–40

• Ioane 17:3

• 3 Nifae 12:48

• Mataupu Faavae ma Feagaiga 6:6

• Aperaamo 3:25

• Mose 1:39

Valaaulia tagata aoga e faasoa mai mea na latou tusia. O nisi o faataitaiga e mafai ona tatou faalogo ma iloa ai le Faaola (tagai Mataio 17:5; Ioane 17:3; 3 Nifae 11:3–7), faaali atu lo tatou usiusitai (tagai Aperaamo 3:25), fai Lana galuega (tagai Mataupu Faavae ma Feagaiga 6:6), alofa i isi (tagai Levitiko 19:18; Mataio 22:37–40), faaipoipo ma fai aiga (tagai Mataupu Faavae ma Feagaiga 131:1–4; Kenese 1:22), lagona le olioli (tagai 2 Nifae 2:25), ma maua le ola e faavavau faatasi ma Ia (tagai Mose 1:39).

Vaai i itu uma e lua o lau itulau. Ia maitau e finagalo le Alii ia tatou faatotonugalemu o tatou manaoga i le alofa ma auauna atu ia te Ia ma o tatou uso a tagata. Mafaufau loloto po o le a le lelei o le ogatusa o ou manaoga ma le finagalo o le Atua mo oe.

E ui ina sa lelei lona manao e faasoa atu le talalelei, ae sa iloa e Alema o le manao e faasoa atu le talalelei e pei o se agelu i le lalolagi atoa sa lei ogatusa atoatoa ma le nofoaga ma le auala na valaauina ai o ia e le Atua e auauna atu ai. Mafaufau e vase lalo o soo se fasifuaitau i le Alema 29:3–6 o loo faaalia ai na manao Alema e faaogatusa ona manaoga ma le finagalo o le Atua.

• O le a sou manatu i le uiga o le faamalieina i mea ua atofaina mai e le Alii mo i tatou?

• Aisea, e pei ai o Alema, e te manatu e tatau ona tatou saili e faaogatusa o tatou manaoga ma le finagalo o le Alii?

• E mafai faapefea ona tatou faaogatusa o tatou manaoga ma le finagalo o le Atua pe a mafai ona tatou ono maua se valaauga e auauna atu i se ala e ese mai i lo tatou lava manao?

Mulimuli ane i le mataupu, sa faamalamalama atu ai e Alema e faapea e lei manaomia ona avea o ia ma se agelu e tautala atu i le lalolagi atoa ona o le a aoao atu e le Atua atunuu uma i Lona atamai ma le taimi tatau (tagai Alema 29:7–8). Faitau le Alema 29:9, 13, ma vaavaai mo mea na mitamita ai Alema atoa ma ona lagona a o ia faaogatusa ona manaoga ma le finagalo o le Atua.

O le taua o manaoga

Tuu atu se avanoa mo tagata aoga e faaloloto ai lo latou malamalama e uiga i manaoga. E mafai ona e tuuina i luga fesili nei ma faatonuga i itu uma o le potuaoga. E mafai e tagata aoga ona faapotopoto latalata i le fesili latou te fiafia e aoao i ai, mulimuli i faatonuga, ma talanoaina tali latou te maua i le fesili i ni vaega toalaiti. E mafai ona fai soo lenei mea ina ia mafai ai e tagata aoga ona suesue e sili atu ma le tasi le fesili.

E mafai faapefea ona ou faateleina lo’u manao e mulimuli i le Alii?

A o e mafaufau loloto i lenei fesili, atonu e fesoasoani le mafaufau i faataitaiga a tagata o e na faaliliuina i le Alii. O nisi tagata e mafai ona e suesueina o Enosa (tagai Enosa 1:1–7), o le nuu o le Tupu o Peniamina (tagai Mosaea 5:1–5), ma le Tupu o Lamonae (tagai Alema 22:15–16).

O le a se mea e tatau ona ou manao i ai i lo’u olaga?

A o e saili atu i faaaliga mo lenei fesili, suesue i faataitaiga o mea sa mananao ai isi po o mea sa faamoemoe le Alii o le a latou mananao i ai (tagai Roma 10:1; 3 Nifae 19:7–9; Mataupu Faavae ma Feagaiga 6:6–8).

O a nisi mea o aoao mai e tusitusiga paia e uiga i o tatou manaoga?

Atonu e aoga le suesue i le “Manao” i le Taiala mo Autu po o le polokalama o le Potutusi o le Talalelei. Pe faitau nisi o fuaiupu nei: Salamo 37:4; Faataoto 10:24; Enosa 1:12; Alema 41:5; Mataupu Faavae ma Feagaiga 18:38; 137:9.

Valaaulia tagata aoga e faasoa mai mea na latou aoaoina. Mafaufau e fesili atu pe i ai se tagata aoga e i ai se fesili latou te mananao i le vasega e fesoasoani i ai. Ia saili faatasi i tusitusiga paia ma faasoa atu aafiaga ma molimau e mafai ona fesoasoani e tali ai so o se fesili e fesiligia.

Faaalu sina taimi e mafaufau loloto ai pe faapefea ona faatatau lenei lesona ia te oe. Tusi i lau api talaaga mo suesuega mea e mafai ona e faia e faamalosia ai ou manaoga amiotonu ma saili le fesoasoani a le Alii e faaogatusa ai so o se isi manaoga ma Lona finagalo.

Manatu ma Talaaga o Faamatalaga

E mafai faapefea e manaoga ona aafia ai lo’u olaga?

Sa aoao mai Peresitene Dallin H. Oaks o le Au Peresitene Sili:

E faatonutonu e manao mea tatou te faamuamua, e fatufatuina e mea e faamuamua a tatou filifiliga, ma o filifiliga e faalagolago i ai a tatou amioga. O manao tatou te faatinoina e iloa ai lo tatou suiga, o mea ua tatou ausia ma tagata e avea ai i tatou. (Dallin H. Oaks, “Manao,” Liahona, May 2011, 44)

Na aoao mai Elder Neal A. Maxwell (1926-2004) o le Korama a Aposetolo e Toasefululua:

O le mea tatou te naunau lava i ai, i le gasologa o taimi, o le mea lava lena o le a avea ai i tatou, ma tatou maua i le faavavau. …

… Ua na o le aotauina ma le aoaoina o o tatou manaoga e mafai ai ona avea ma mea tatou te faamoemoe i ai nai lo o tatou fili! (Neal A. Maxwell, “According to the Desire of [Our] Hearts,” Liahona, Nov. 1996, 21, 22)

E mafai faapefea ona ou maua le faamoemoe pe a le faataunuuina ou manaoga amiotonu i lenei olaga?

Atonu e te manao e matamata le vitio “O Mea Lelei e Oo Mai” (4:55), lea na faasoa mai ai e Elder Jeffrey R. Holland o le Korama a Aposetolo e Toasefululua se aafiaga e mafai ona fesoasoani ia i tatou e maua ai le faamoemoe pe a le tuuina mai o tatou manaoga amiotonu i lenei olaga.

Gaoioiga Faaopoopo e Aoao Ai

Alema 27:1–12. Usitaia o le taitaiga a le Alii

Faamanatu atu i tagata aoga o nisi o sa Lamana na osofaia le nuu o Aneti-Nifae-Liae, o e na osia se feagaiga e aua le tau. Sa uunaia e Amona ma ona uso le tupu o Aneti-Nifae-Liae e laveai lona nuu mai le faafanoga e ala i le sailia o le saogalemu faatasi ma sa Nifae.

Valaaulia tagata aoga e faitau le Alema 27:6–12, vaavaai mo mataupu faavae e mafai ona fesoasoani ia i latou e faia ai ni faaiuga atamai. E faavae i mea ua latou aoaoina, valaaulia tagata aoga e saunia se lauga puupuu pe fuafua se vitio puupuu e mafai ona latou tuuina i luga i auala e faia ai faaiuga musuia.

Alema 28:11–12. Mauaina o le filemu pe a oo mai le oti

Faamalamalama atu e faitau afe tagata na maliliu i taua i le va o sa Nifae ma sa Lamana. Valaaulia tagata aoga e faitau le Alema 28:11–12, vaavaai mo ni uiga na faaalia e sa Nifae i le maliliu ai o e pele ia i latou, ma matamata i le vitio lenei o loo faamatala mai ai e Peresitene Russell M. Nelson le auala tatou te maua ai le filemu pe a oo mai le oti.

Valaaulia tagata aoga e talanoaina mea sa latou aoaoina e ono fesoasoani ia i latou e maua ai le filemu.

O tulaga faataitai e uiga i le faaogatusa o o tatou manaoga i le finagalo o le Atua

A uma ona suesue e tagata aoga le Alema 29:3–6, e mafai ona latou filifili se tasi o tulaga faataitai nei ma saunia se tali. O a latou tali e tatau ona aofia ai ia le itiiti ifo ma le tasi se mau mai fuaiupu sa latou suesueina i le lesona ma so o se aafiaga e ono fesoasoani ai.

E talitonu se tamaitai talavou e faamalosia e le Atua Lona finagalo ia i tatou ma e leai sa tatou filifiliga i le ala e ola ai i o tatou olaga.

O se alii talavou agavaa e manao e auauna atu i se misiona talai ae ua lagona le le fiafia ona o se tulaga faafomai o le a le faatagaina ai o ia e faatino lea manao.

Ua manao ma le faamaoni se tamaitai talavou e fai le mea sa’o ae o loo tauivi e pulea manatu amioletonu.