Alma 32

“Makapalig-on sa Inyong Hugot nga Pagtuo”

Daghang nagkalainlaing mga butang ang magamit sa pagtabang kanato nga makasabot sa ebanghelyo ni Jesukristo. Samtang si Alma mitudlo sa mga Zoramite, iyang gitandi ang pulong sa Dios ngadto sa usa ka binhi nga atong itanom sa atong mga kasingkasing nga sa kataposan mahimong “usa ka kahoy magtubo ngadto sa kinabuhi nga walay kataposan” (Alma 32:41). Kini nga leksiyon gituyo aron sa pagtabang kanimo sa pagtanom sa pulong sa Dios diha sa imong kasingkasing ug sa pag-alima sa imong pagpamatuod niini.

Itudlo ang sagradong kinaiya sa espirituhanong mga kasinatian. Pahinumdomi ang mga estudyante sa sagradong kinaiya sa espirituhanong mga kasinatian. Kinahanglan nga dili gayod mobati ang mga estudyante nga napugos sa pagpakigbahin sa ilang mga pagbati o mga kasinatian. Dasiga sila sa pagpakigbahin og personal nga mga kasinatian sa tukma nga paagi kon giaghat sa Espiritu.

Pagpangandam sa estudyante: Dapita ang mga estudyante sa pagpangutana sa usa ka minahal nga adunay pagpamatuod sa ebanghelyo ni Jesukristo kon unsay nakatabang kaniya sa pagdawat o paglig-on niini.

Posible nga mga Kalihokan sa Pagkat-on

Mga Pagtandi

Ipakita ang mosunod nga dili kompleto nga mga kapahayag. Mahimo kang mopili og lain-laing mga kapahayag nga makapaikag sa imong mga estudyante, apan ikonsiderar ang paggamit sa kataposang pagtandi aron makatabang sa pagbalhin ngadto sa unod [content] sa leksiyon.

Ang paghimo og mga pagtandi mahimong epektibo nga paagi sa pagtudlo ug pagkat-on sa ebanghelyo ni Jesukristo. Sulati ang mosunod nga mga blangko. Pagmamugnaon ug tan-awa kon adunay labaw pa sa usa ka paagi aron makompleto nimo ang mga kapahayag.

• Ang kinabuhi sama sa tungod kay .

• Ang mga smartphone sama sa tungod kay .

• Ang pag-angkon og pagpamatuod sama sa tungod kay .

Samtang sila si Alma ug Amulek nag-alagad taliwala sa mga Zoramite, usa ka grupo sa mga tawo ang mipahayag og kabalaka nga sila dili makasimba sa Dios tungod kay sila gisalikway sa ilang mga dapit simbahanan tungod sa ilang kakabos (tan-awa sa Alma 32:5). Samtang kita nasayod nga ang Ginoo klaro nga mitudlo sa kamahinungdanon sa pagtambong sa Iyang Simbahan sa Igpapahulay, si Alma mitubag pinaagi sa pagtudlo niadtong kinsa wala tugoti sa pagtambong sa Simbahan og importante nga mga kamatuoran mahitungod sa pagsimba nga mahitabo sa atong mga kasingkasing, dili igsapayan sa atong pisikal nga lokasyon.

Basaha ang unang kapahayag sa Alma 32:28, dayon basaha ang bersikulo 41 ug pangitaa ang pagtandi nga gigamit ni Alma nga mahimo usab nga magamit nimo.

• Unsa nga mga pagkaparehas ang imong nakita tali sa pagpatubo og usa ka kahoy nga mamunga og prutas gikan sa usa ka binhi ug sa pagpatubo sa imong pagpamatuod ni Jesukristo ug sa Iyang mga pagtulun-an?

Kon dili sigurado ang mga estudyante kon unsa ang pagpamatuod, tabangi sila nga makasabot nga kini mao ang “kasayoran ug espirituhanon nga saksi nga gihatag pinaagi sa Espiritu Santo” (Giya ngadto sa mga Kasulatan, “Pagpamatuod,” scriptures.ChurchofJesusChrist.org).

Ang pagtandi ni Alma sa pulong sa Dios ngadto sa usa ka binhi mahimong magamit sa pag-angkon og pagpamatuod sa bisan unsa nga aspeto sa ebanghelyo. Apan si Alma sa kaulahian mipasabot nga kini nga pagpamatuod kang Jesukristo nga siya milaom nga kadtong mga Zoramite motanom sa ilang mga kasingkasing (tan-awa sa Alma 33:22–23).

• Ngano nga ang pagtuo sa Manluluwas usa ka importante nga “binhi” nga itanom sa imong kasingkasing?

Paggahin og panahon sa paghunahuna mahitungod sa kasamtangan nga kalig-on sa imong kinatibuk-ang pagpamatuod kang Jesukristo ug sa Iyang mga pagtulun-an. Usab, pamalandongi kon aduna bay piho nga mga aspeto sa imong pagpamatuod nga gusto nimong palig-onon sama sa gugma sa Langitnong Amahan alang kanimo o sa katinuod sa Unang Panan-awon ni Joseph Smith. Samtang magpadayon ka sa pagtuon karon, pangitaa ang mga kamatuoran nga makatabang nimo nga mas makasabot unsaon pag-angkon o pagpalig-on sa imong pagpamatuod.

Ikonsiderar ang pagbahin sa mga estudyante ngadto sa gagmay nga mga grupo ug paghatag sa matag estudyante og kopya sa mosunod nga handout. Dapita ang mga estudyante sa pagbasa ug paghisgot sa mga materyal ubos sa ulohan nga “Pagtanom sa binhi” isip usa ka grupo. Mahimong mapuslanon ang pag-assign og usa ka estudyante gikan sa matag grupo nga mahimong lider sa panaghisgotan.

Mahimo dayon nimong isagol ang mga grupo ug ipahisgot sa mga estudyante ang mga materyal ubos sa ulohan nga “Pag-alima sa binhi” uban sa ilang bag-ong grupo.

Pagtanom ug Pag-alima sa Pulong sa Dios diha sa Atong mga Kasingkasing

Manwal sa Magtutudlo sa Basahon ni Mormon (2024)—“Alma 32: ‘Pagpaklig-on sa Inyong Hugot nga Pagtuo’”

Pagtanom sa binhi

Basaha ang Alma 32:21–23, 26–30, ug markahi ang mga pulong ug mga hugpong sa mga pulong nga makatabang kanimo nga makasabot kon unsaon pagsugod sa pagpatubo sa usa ka pagpamatuod.

Ipakigbahin sa imong grupo ang mga pulong ug mga hugpong sa mga pulong nga mipatigbabaw diha kanimo ug ngano. Dayon hisgoti ang mosunod nga mga pangutana:

• Unsa sa imong hunahuna ang gipasabot sa “makahatag og luna” diha sa imong kasingkasing alang sa Manluluwas ug sa Iyang mga pagtulun-an?

• Unsay makapalisod sa mga tawo sa pagbuhat niini?

• Sumala sa mga bersikulo 28–30, unsay mahitabo kon kita mohatag og luna diha sa atong mga kasingkasing alang ni Jesukristo ug sa Iyang mga pagtulun-an?

Pagsulat og usa ka kapahayag [sentence] nga katingbanan sa unsay imong nakat-onan gikan niini nga mga bersikulo mahitungod sa pagtabang sa imong pagpamatuod sa sinugdanan nga mga yugto niini.

Pag-alima sa binhi

Si Alma mitudlo nga ang pagtanom sa binhi ug ang pagdiskobre nga kini maayo mao lamang ang unang bahin sa pagpatubo og pagpamatuod. Basaha ang Alma 32:37–43, mangita og mga pagtulun-an nga makatabang nimo nga masabtan kon unsaon pagtabang ang usa ka pagpamatuod nga magpadayon sa pagtubo.

Ipakigbahin sa imong grupo ang mga pulong ug mga hugpong sa mga pulong nga mipatigbabaw diha kanimo ug ngano. Dayon hisgoti ang mosunod nga mga pangutana:

• Unsa ang imong nakat-onan gikan sa mga bersikulo 38–40 mahitungod sa unsay mahitabo kon dili nato panumbalingon ang pulong sa Dios nga nagtubo sa atong mga kasingkasing?

• Unsa ang pipila ka mga ehemplo kon sa unsang paagi ang usa ka tawo mahimong dili manumbaling sa iyang pagpamatuod kang Jesukristo ug sa Iyang mga pagtulun-an?

• Unsa ang pipila ka mga paagi nga imong maalima ang imong pagpamatuod kang Jesukristo ug sa Iyang ebanghelyo aron sa pagtabang niini nga motubo nga mas lig-on?

Pagsulat og usa ka kapahayag [sentence] nga katingbanan sa unsay imong nakat-onan gikan niini nga mga bersikulo mahitungod sa pagpalig-on sa usa ka pagpamatuod nga mitubo na diha sa sulod kanimo.

© 2024 by Intellectual Reserve, Inc. All rights reserved.

Human matapos sa mga estudyante ang pagtuon ug paghisgot sa miaging mga bersikulo uban sa ilang mga grupo, pagpasiugda og panaghisgotan sa klase mahitungod sa unsay ilang nakat-onan. Mahimo kang mopili og pipila ka mga pangutana gikan sa handout aron hisgotan isip usa ka klase aron masiguro nga ang mga estudyante makasabot sa mga konsepto nga gitudlo niini nga mga bersikulo. Dapita ang pipila ka mga estudyante sa pagpakigbahin sa ilang mga usa ka kapahayag [sentence] nga katingbanan gikan sa matag seksiyon sa handout.

Isip kabahin niini nga panaghisgotan, siguroa nga ang mga kamatuoran nga susama sa mosunod nahisgotan: Kon kita mohatag og luna diha sa atong mga kasingkasing alang ni Jesukristo ug sa Iyang mga pagtulun-an, nan ang atong pagpamatuod magsugod sa pagtubo (tan-awa sa Alma 32:28–30); Samtang kita makugihon nga moalima sa pulong sa Dios diha sa atong mga kasingkasing, ang atong pagpamatuod ni Jesukristo ug sa Iyang ebanghelyo magpadayon sa pagtubo (tan-awa sa Alma 32:37, 40–42).

Imong pagpamatuod

Aron matabangan ka nga makakita kon sa unsang paagi ang pagtandi ni Alma may kalabotan sa imong pagpamatuod kang Jesukristo ug sa Iyang ebanghelyo, pagdrowing og dayagram sama sa mosunod ngadto sa imong journal sa pagtuon. Ihikyad ang imong hulagway sa tibuok panid aron adunay luna nga masulatan sa ubos sa matag yugto sa pagtubo.

Ipakita o drowinga kini nga mga hulagway diha sa pisara aron kopyahon sa mga estudyante ngadto sa ilang journal sa pagtuon.

Paggahin og kadiyot sa pagtandi sa imong pagpamatuod sa Manluluwas ug sa Iyang mga pagtulun-an ngadto sa pagtubo sa usa ka kahoy nga mamunga og prutas. Pagpili og pipila ka mga aspeto sa ebanghelyo ni Jesukristo, ug isulat ang matag usa ubos sa mga yugto sa pagtubo nga imong gibati nga labing maayo nga nagrepresentar sa imong pagpamatuod karon niadtong mga dapita.

Sama pananglit, ang usa ka tawo mahimong mosulat og “Si Jesukristo buhi” ubos sa kahoy nga mamunga og prutas ug “gahom sa pagkapari” ubos sa binhi. Kana nga tawo mahimo dayon nga mosulat sa ubang mga aspeto sa ebanghelyo sa Manluluwas, sama sa “usa ka buhi nga propeta,” “buhat sa templo,” “ang Basahon ni Mormon,” ug “pag-ampo,” ubos sa mga yugto sa pagtubo nga nagrepresentar sa iyang pagpamatuod sa matag usa niadtong mga dapita.

Ikonsiderar ang paggamit sa drowing diha sa pisara aron ipakigbahin ang pagtubo sa parte sa imong pagpamatuod gikan sa usa ka binhi ngadto sa usa ka kahoy. Pagbantay nga dili mogamit og talagsaon nga mga ehemplo nga tingali lisod sa mga estudyante nga i-relate. Tabangi sila nga makakita nga ang makanunayon nga pagtubo pinaagi sa mga kasinatian uban sa Espiritu modala ngadto sa dugang nga hugot nga pagtuo ug mas lig-on nga pagpamatuod sa paglabay sa panahon. Mahimo usab nimong dapiton ang mga estudyante sa pagpakigbahin og susama nga proseso mahitungod sa bahin sa ilang pagpamatuod.

Paghimo og plano kon unsaon nimo pagpaningkamot nga magamit ang mga pagtulun-an ni Alma diha sa imong kinabuhi. Mahimo nimong hunahunaon kon unsa ang mahimo nimong buhaton aron “makahatag og luna” diha sa imong kasingkasing ug kinabuhi nga moturok ang usa ka aspeto sa imong pagpamatuod. Mahimo usab nimong ikonsiderar kon unsaon nimo “pag-alima” ang mga bahin sa imong pagpamatuod nga nagsugod na sa pagtubo. Irekord ang imong mga hunahuna, mga impresyon, ug mga tumong diha sa imong journal sa pagtuon.

Komentaryo ug Background nga Impormasyon

Unsaon nako nga makapalambo og dugang nga hugot nga pagtuo diha kang Jesukristo ug sa Iyang ebanghelyo?

Si Elder Richard G. Scott (1928–2015) sa Korum sa Napulog Duha ka Apostoles mitudlo:

Ang lig-on nga pagpamatuod dili matukod diha sa huyang nga pundasyon. Busa, ayaw pagpakaaron-ingnon nga nagtuo kamo sa usa ka butang kon dili kamo sigurado niini. Tinguhaa nga makadawat og saksi nga nagpamatuod. Pakigbisog sa hugot nga pag-ampo, pagpuyo nga matarong, ug pagpangayo og espirituhanong pagkompirma. … Ipahibalo sa inyong Amahan sa Langit ang inyong mga pagbati, inyong mga panginahanglan, inyong mga kabalaka, inyong mga paglaom ug mga pangandoy. Pakigsulti Kaniya uban ang hingpit nga pagsalig, nasayod nga Siya maminaw ug motubag. Dayon pagmapailobong mopadayon sa inyong kinabuhi sa pagbuhat sa mga butang nga inyong nahibaloan nga sakto, maglakaw uban sa pagsalig nga gipalambo pinaagi sa hugot nga pagtuo ug pagkamatarong, mapailobong naghulat sa tubag nga moabot sa paagi ug sa panahon nga gikonsiderar sa Ginoo nga labing angay. (Richard G. Scott, “The Power of a Strong Testimony,” Ensign, Nob. 2001, 88)

Si Presidente Henry B. Eyring sa Unang Kapangulohan mipasabot:

Ang pagpamatuod nagkinahanglan og pag-amuma pinaagi sa pag-ampo diha sa hugot nga pagtuo, ang pagkagutom alang sa pulong sa Dios diha sa kasulatan, ug ang pagkamasulundon sa kamatuoran nga atong nadawat. Adunay kakuyaw nianang pagpasagad sa pag-ampo. Adunay kakuyaw ngadto sa atong pagpamatuod nianang panagsang pagtuon ug pagbasa sa mga kasulatan. Kini ang gikinahanglan nga mga sustansiya alang sa atong pagpamatuod. (Henry B. Eyring, “Usa ka Buhing Pagpamatuod,” Liahona, Mayo 2011, 127)

Dugang nga mga Kalihokan sa Pagkat-on

Alma 32:28. “Motandi sa pulong ngadto sa usa ka binhi”

Pangutan-a ang mga estudyante kon hain sa mosunod ang ilang gibati nga labing maayong pagtandi sa pagpalambo og pagpamatuod sa pulong sa Dios. (Walay sakto o sayop nga tubag.) Dayon, dapita ang mga estudyante sa pagpakigbahin sa ubang mga pagtandi nga ilang gihunahuna.

1. Pagbaktas ngadto sa tumoy sa usa ka tungason nga bukid.

2. Pagtukod og balay o uban pang dagkong proyekto.

3. Pagpadulong ngadto sa usa ka layo nga biyahe.

Dapita ang mga estudyante sa pagtuon sa Alma 32:28–43 sa gagmay nga mga grupo, mohunong kanunay aron sa pagpasabot kon sa unsang paagi ang pagtandi ni Alma may kalabotan sa pagtubo sa pagpamatuod sa pulong sa Dios.

Alma 32:37. “Moalima niini uban ang dako nga pag-amping”

Ikonsiderar ang pagdala og pipila ka mga binhi ug usa ka gamay nga kaang nga puno sa uga nga yuta ngadto sa klase. Samtang nagbasa ang mga estudyante sa pagtandi nga gihimo ni Alma diha sa bersikulo 28, dapita ang pipila ka estudyante nga ang matag usa kanila magtanom og binhi diha sa kaang. Dayon samtang magbasa ang mga estudyante sa mga bersikulo 37–43, dapita sila sa paglista og mga butang nga makatabang sa mga binhi nga motubo.

Sa mosunod nga pipila ka mga adlaw o mga semana, ikonsiderar ang pagtugot sa duha o tulo ka estudyante matag panahon sa klase sa pagpakigbahin sa daklit og butang nga bag-o lang nilang nahimo aron sa pag-alima sa ilang pagpamatuod sa pulong sa Dios. Ang matag estudyante nga mopakigbahin mahimo dayong mobubo og gamay nga tubig sa kaang, makabalhin sa kaang ngadto sa usa ka dapit nga mas hayag, o mobuhat og laing butang aron moalima sa mga binhi.

Pagpaubos

Aron mahatagan ang mga estudyante og biswal nga pagsabot sa mga tawo nga gitudloan ni Alma diha sa kapitulo 32, ikonsiderar ang pagpakita sa bidyo nga “Si Alma Nagtudlo sa mga Kabos mahitungod sa Pagpaubos” (2:33). Dayon dapita ang mga estudyante sa pagbasa sa mga bersikulo 13–16 ug sa paghisgot og mga paagi nga kita makapili nga magmapainubsanon nga dili pugson nga magmapainubsanon.