Alma 34:17–41

Kini nga Kinabuhi Mao ang Panahon sa Pagpangandam sa Pagsugat sa Dios

Nakahunahuna ka na ba kon unsa kaha ang mahimamat ang Langitnong Amahan human niining kinabuhia? Si Amulek mipahinumdom sa mga Zoramite nga “kini nga kinabuhi mao ang panahon … sa pagpangandam sa pagsugat sa Dios” (Alma 34:32) ug nangamuyo kanila nga dili maglangay sa adlaw sa ilang paghinulsol. Kini nga leksiyon gituyo aron sa pagtabang kanimo sa imong mga paningkamot sa pagpangandam sa pagsugat sa Dios.

Tabangi ang mga estudyante nga makakita kon sa unsang paagi ang mga baroganan sa ebanghelyo mitudlo kanila ngadto ni Jesukristo. Kon magtudlo sa doktrina ug sa mga baroganan sa ebanghelyo, ikonektar kini nga mga kamatuoran ngadto sa Langitnong Amahan ug ni Jesukristo. Paghatag og mga ehemplo kon sa unsang paagi ang pagsunod sa mga baroganan sa ebanghelyo makatabang sa mga estudyante nga makagamit sa gahom, kaluoy, ug grasya sa Manluluwas. Dasiga sila sa paglihok uban sa hugot nga pagtuo ug pagpili sa pagsunod niini nga mga kamatuoran.

Pagpangandam sa estudyante: Dapita ang mga estudyante sa pagbasa sa Alma 34:32 ug sa paghunahuna og mga paagi nga sila makasunod sa tambag diha sa bersikulo. Mahimo nilang isulat ang pipila ka mga paagi sa ilang pagpangandam sa pagbalik ngadto sa presensiya sa Dios ug ang mga kausaban nga ilang mahimo nga makatabang nila nga mas maandam.

Posible nga mga Kalihokan sa Pagkat-on

Ang kamahinungdanon sa pagpangandam

Paghunahuna og usa ka butang nga kinahanglan nimong pangandaman sa imong kinabuhi, sama sa usa ka pasulit, usa ka panaysay, o usa ka kalihokan sa atletika.

Ikonsiderar ang pagdapit sa mga estudyante sa paghisgot sa mosunod nga mga pangutana kauban ang usa ka pares o sa gamay nga grupo.

• Unsa ang pipila ka mga estratehiya nga imong gigamit sa pagtabang kanimo nga maandam?

• Unsa ang pipila ka mga butang nga nakahimo o makapahimo nga malisod sa pagpangandam?

Hinumdomi nga si Alma ug Amulek misangyaw ngadto sa usa ka grupo sa mga Zoramite kinsa gisalikway sa ilang mga sinagoga tungod sa ilang kakabos. Kini nga mga Zoramite wala motuo kaniadto ni Jesukristo (tan-awa sa Alma 31:16), busa si Alma ug Amulek miawhag kanila sa paghimo og luna diha sa ilang mga kasingkasing alang sa pagpamatuod sa Manluluwas aron motubo (tan-awa sa Alma 32:27–28; 34:4–6). Samtang nagtudlo niini nga mga tawo, si Amulek mipakigbahin og usa ka butang nga kinahanglan natong tanan nga pangandaman.

Basaha ang Alma 34:32, mangita sa unsay gitudlo ni Amulek.

Mahimo nimong isulat diha sa pisara ang mosunod nga gipabag-an nga letra [bolded] nga pamahayag. Dasiga ang mga estudyante sa pagmarka sa mga pulong niini nga kamatuoran diha sa bersikulo 32.

Gikan sa mga pagtulun-an ni Amulek, atong nakat-onan nga kini nga kinabuhi mao ang panahon alang sa atong pagpangandam sa pagsugat sa Dios.

• Unsa ang pipila ka mga kinaiya ug mga pamatasan nga imong gilaoman sa usa ka tawo kinsa nangandam sa pagsugat sa Dios?

Hatagi ang mga estudyante og panahon sa pagsukod sa kaugalingon pinaagi sa pagkonsiderar sa mosunod nga mga ideya. Dili kinahanglan nga ipakigbahin sa mga estudyante ang ilang mga hunahuna.

Paggahin og kadiyot sa pagpamalandong sa imong mga pagbati mahitungod sa pagbalik ngadto sa presensiya sa Dios. Ikonsiderar kon naningkamot ka ba nga takos nga makabalik sa Iyang presensiya ug unsa ang makabalda kanimo gikan niana nga tumong. Samtang magpadayon ka sa pagtuon, paghunahuna og mga paagi nga imong magamit ang mga pagtulun-an sa Alma 34 aron matabangan ka nga mas maandam sa pagsugat sa Dios.

Mga paagi nga kita makapangandam sa pagsugat sa Dios

Daghan sa mga pagtulun-an ni Amulek diha sa Alma 34 makatabang kanato nga makasabot unsaon nato sa pagpangandam karon sa pagsugat sa Dios.

Dapita ang mga estudyante sa pagtuon sa mosunod nga mga bersikulo, mangita sa mga pagtulun-an nga makatabang kanato sa pagpangandam sa pagsugat sa Dios. Bahina ang mga estudyante ngadto sa gagmay nga mga grupo ug i-assign ang matag grupo og piho nga mga bersikulo aron dungan nga pagatun-an. Pananglitan, ang usa ka grupo mahimong magtuon sa mga bersikulo 17–27, ang lain mahimong magtuon sa 28–34, ug ang lain mahimong magtuon sa 37–41.

• Alma 34:17–27

• Alma 34:28–29

• Alma 34:30–31

• Alma 34:33–34

• Alma 34:37–39

• Alma 34:40–41

Hisgoti uban sa mga estudyante unsay ilang nakat-onan samtang sila nagtuon niini nga mga bersikulo. Ang mosunod nga mga pangutana mahimong gamiton isip kabahin niini nga panaghisgotan.

• Unsa ang gitudlo ni Amulek niini nga mga bersikulo nga makatabang kanimo sa pagpangandam sa pagsugat sa Dios?

• Sa unsang paagi nga ang pagsunod niini nga mga pagtulun-an makatabang kanato nga mahimong mas andam nga takos sa pagbalik ngadto sa presensiya sa Dios?

• Unsa ang imong nakat-onan mahitungod sa kinaiya ug mga tinguha sa Langitnong Amahan ug ni Jesukristo gikan sa mga bersikulo nga imong gitun-an?

Ang mga ehemplo sa mga tubag nga mahatag sa mga estudyante sa miaging pangutana naglakip nga ang Dios daling duolon, bisan asa pa kita o unsa ang gusto natong ipangutana (tan-awa sa mga bersikulo 17–27). Mahimo usab nilang ipasabot kon unsa kadali ang pagpanalangin sa Manluluwas kanato kon kita maghinulsol (tan-awa sa bersikulo 31).

Ayaw paglangay sa imong paghinulsol

Tan-awa ngadto sa pamahayag ni Amulek sa bersikulo 33: “Dili maglangay sa adlaw sa inyong paghinulsol hangtod sa kataposan.” Ikonsiderar ang pagmarka niini nga hugpong sa mga pulong diha sa imong mga kasulatan.

• Ngano kaha nga makatintal man alang sa pipila ka mga tawo nga maglangay-langay sa paghinulsol?

Basaha ang Alma 34:33–35, mangita sa mga rason ngano nga si Amulek miawhag nga dili kita maglangan sa atong paghinulsol.

Mahimong makatabang ang pagdapit sa mga estudyante sa pag-ila sa mga pangutana o kabalaka sa usa ka tawo human mabasa kini nga mga bersikulo. Ikonsiderar ang paglista sa mga tubag sa mga estudyante diha sa pisara. Samtang magtuon ang mga estudyante sa mosunod nga mga kapanguhaan, mahimong ilang ilhon ang mga pagtulun-an nga makatabang sa pagsulbad niadtong mga pangutana o mga kabalaka.

Gitudloan kita nga ang paghinulsol mahitabo didto sa kalibotan sa mga espiritu (tan-awa sa Doktrina ug mga Pakigsaad 138:31, 33, 58). Apan ang mga propeta sa kasulatan ug sa ulahing mga adlaw mihatag og gibug-aton kon unsa ka importante nga kita maghinulsol dinhi sa mortalidad. Si Elder Melvin J. Ballard [1873–1939] sa Korum sa Napulog Duha ka Apostoles mihatag niini nga giya:

Mas sayon ang pagbuntog ug pag-alagad sa Ginoo kon ang unod ug ang espiritu tipunon nga usa. Kini ang panahon diin ang katawhan mas makaimpluwensya ug makaapekto. … Kining kinabuhia mao ang panahon sa paghinulsol. (Melvin J. Ballard: Crusader for Righteousness (1966), 212–13; gikutlo ni Dallin H. Oaks sa, “Malimpyo Pinaagi sa Paghinulsol,” Liahona, Mayo 2019, 94)

• Unsa ang natabang sa mga bersikulo 33–35 ug niini nga pamahayag diha kanimo nga masabtan kon nganong kinahanglang dili kita maglangay sa atong paghinulsol?

Ang paghinulsol usa ka importante nga bahin sa pagpangandam sa pagbalik ngadto sa presensiya sa Dios. Hinumdomi nga mahigugmaon nga gihatag sa Dios ang kaluoy ngadto sa mga naningkamot nga maghinulsol, bisan pa man og naglisod sila sa pagbuntog sa pipila ka sala.

Si Elder Neil L. Andersen sa Korum sa Napulog Duha ka Apostoles mitudlo:

Usahay diha sa atong paghinulsol, diha sa atong matag adlaw nga paningkamot nga mahimong mas mahisama ni Kristo, atong makita ang atong mga kaugalingon nga pabalik-balik nga nanlimbasog sa sama nga mga kalisdanan. …. Ayaw pagpakawala sa paglaom. Kon kamo naningkamot ug nanglimbasog sa paghinulsol, kamo anaa sa proseso sa paghinulsol. (Neil L. Andersen, “Paghinulsol …. Aron Ako Moayo Kaninyo,” Liahona, Nob. 2009, 42)

Sa dili pa ipangutana ang mosunod nga mga pangutana, dapita ang mga estudyante sa paghanduraw nga aduna silay higala kinsa naglikay sa paghinulsol tungod sa nagkalainlaing mga rason, sama sa kaulaw o kakulang sa tinguha nga mag-usab.

Mahimong makatabang sa mga estudyante ang paghan-ay sa ilang mga hunahuna pinaagi sa pagtubag sa mga pangutana diha sa ilang mga journal sa pagtuon sa dili pa kini hisgotan nga mga pangutana isip usa ka klase.

• Unsa ang imong mapakigbahin gikan sa mga pagtulun-an ni Amulek diha sa Alma 34:30–38 nga makatabang sa usa ka tawo kinsa natintal sa paghulat hangtod sa kaulahian sa kinabuhi nga maghinulsol ug magbag-o?

• Ngano sa imong hunahuna nga ang paghinulsol takos, bisan pa sa mga rason niining tawhana sa dili pagbuhat niini?

• Unsa ang imong nahibaloan mahitungod sa Langitnong Amahan ug ni Jesukristo nga makadasig niini nga tawo sa paghinulsol sa dili madugay ug sa kanunay?

Pagpamatuod sa mga kamatuoran nga imong nahisgotan karon ug sa tabang nga ikahatag sa Manluluwas ngadto sa mga estudyante samtang sila maningkamot nga mahimong mas andam sa pagsugat sa Dios.

Pamalandongi unsa ang imong nakat-onan ug gibati karon mahitungod sa pagpangandam sa pagsugat sa Dios ug sa dili paglangay-langay sa paghinulsol. Hunahunaa ang mga aksiyon nga gusto nimong buhaton tungod sa imong natun-an karon. Irekord ang imong mga hunahuna ug mga impresyon diha sa imong journal sa pagtuon.

Komentaryo ug Background nga Impormasyon

Unsaon nako pagbuntog ang tinguha sa paglangay sa akong paghinulsol?

Unsa kaha kon mahadlok ko nga maghinulsol tungod kay dili ko gusto nga ang kamatuoran makapasakit sa akong mga minahal?

Si Elder Matthew L. Carpenter sa Seventy mipasabot:

Sa akong pagtambag sa uban nga nagtinguhang maghinulsol, natingala ko nga ang katawhan nga anaa sa pagpakasala maglisod sa paghimo og hustong mga desisyon. … Sa kasagaran makadungog ko nilang mopakigbahin sa ilang kahadlok nga basin kon mahibaloan sa ilang mga minahal ang ilang nahimo, mohunong sila sa paghigugma kanila o biyaan sila. Kon kining hunahunaa ang ilang sundon, hukman nila nga itago lang kini ug ilangay ang ilang paghinulsol. Sayop ang ilang gibati nga mas maayong dili maghinulsol karon aron dili nila madugangan ang kasakit sa ilang mga gimahal. Sa ilang hunahuna mas maayo nga mag-antos human niining kinabuhia kay sa mohimo sa proseso sa paghinulsol karon. Mga kaigsoonan, dili gayod maayong ideya nga ilangay ang inyong paghinulsol. Ang kaaway kanunayng mogamit sa kahadlok aron mapugngan kita sa diha-diha nga paglihok gamit ang atong pagtuo kang Jesukristo.

Kon ang mga minahal mag-atubang og kamatuoran bahin sa masalaypong kinaiya, samtang dako ang ilang samad, sa kasagaran gusto silang motabang sa tawo nga tinuorayng naghinulsol aron mausab ug makig-uli sa Dios. Sa katinuod, ang espiritwal nga pagkaayo mas mopaspas kon motug-an ang nakasala ug palibotan siya niadtong nahigugma kaniya ug motabang niya sa pagbiya sa iyang mga sala. (Matthew L. Carpenter, “Buot Ka Bang Maayo?” Liahona, Nob. 2018, 102–3)

Alma 34:34. Unsay buot ipasabot nga ang “mao nga espiritu” makaangkon sa akong lawas inigkamatay nako?

Ang mga espiritu nagdala uban kanila gikan sa yuta sa ilang mga kinaiya sa pagsunod o pagsupak ngadto sa mga butang sa katarong (tan-awa sa Alma 34:34). Sila adunay sama nga mga gana ug mga tinguha nga diha kanila samtang sila nagpuyo pa sa yuta.

Dugang nga mga Kalihokan sa Pagkat-on

Alternatibo nga pagsugod: Ang imong upat ka minuto

Mahimong basahon sa mga estudyante ang mga parapo 3–11 sa pakigpulong ni Elder Stevenson (“Ang Inyong Upat ka Minuto,” Liahona, Mayo 2014, 84–86).

Alternatibo nga pagsugod: Andam na ba mo?

Si Elder Jack N. Gerard sa Seventy mipakigbahin og usa ka kasinatian sa dihang kinahanglan niyang palandongon kon andam na ba siya nga mosugat sa Dios. Mahimong basahon sa mga estudyante ang unang tulo ka parapo sa pakigpulong ni Elder Gerard (“Karon ang Panahon,” Liahona, Nob. 2018, 107–9).

• Unsa nga mga hunahuna, mga pagbati, o mga pangutana ang tingali anaa diha kanimo nianang higayona?

• Sa imong hunahuna sa unsang paagi ang paglahutay sa maong kasinatian makapausab sa paagi sa tawo sa pag-atubang sa kinabuhi?

Alma 34:31. Diha-diha nga kahupayan

Dapita ang mga estudyante sa pagmarka sa pulong nga “diha-diha” sa bersikulo 31. Mahimong itandi sa mga estudyante kini nga pulong sa tentasyon nga bation sa uban nga maglangay-langay sa ilang paghinulsol, sama sa gihulagway sa mga bersikulo 33–34. Tabangi ang mga estudyante nga makasabot nga kon ang mga indibidwal mopili sa paghinulsol ug mobalik ngadto sa Manluluwas, ang Iyang Pag-ula mahimong moepekto dayon sa ilang mga kinabuhi. Ikonsiderar ang pagdirekta sa mga estudyante sa dugang nga mga asoy sa Manluluwas nga milihok dayon sa higayon nga ang mga indibidwal moduol ngadto Kaniya, sama sa Alma 36:16–21; Mateo 8:2–3; 14:25–31; 20:30–34; o Juan 5:2–9.