“Alma 34:1–17: Ang Walay Kinutoban ug Walay Kataposan nga Pag-ula ni Jesukristo,” Manwal sa Magtutudlo sa Basahon ni Mormon (2024)
“Alma 34:1–17,” Manwal sa Magtutudlo sa Basahon ni Mormon
Alma 34:1–17
Ang Walay Kinutoban ug Walay Kataposan nga Pag-ula ni Jesukristo
Nakahunahuna na ba ka sukad kon unsa kaha ang imong kinabuhi kon wala si Jesukristo ug ang Iyang Pag-ula? Gitudloan ni Amulek ang mga Zoramite nga ang tanang mga tawo matig-a, mapukan, ug mahisalaag kung wala ang walay kinutoban ug walay kataposan nga sakripisyo sa Anak sa Dios. Kini nga leksiyon gituyo aron sa pagtabang kanimo nga makasabot kon sa unsang paagi si Jesukristo makapanalangin kanimo pinaagi sa Iyang walay kinutoban ug walay kataposan nga maulaong sakripisyo.
Pagtakda og taas nga mga gilaoman. Kon mahibaloan sa mga estudyante nga aduna kay taas nga mga gilauman kanila isip mga tigkat-on, sila sa kasagaran maningkamot nga makab-ot kadto nga mga gilaoman. Ang ubang mga estudyante usahay malinga sa usa ka kaedad o sa usa ka elektronik nga aparato [device]. Kanunay nga maghatag og malumo ug mahigugmaong pagtul-id kon kini o uban pang makabalda nga mga kinaiya mahitabo. Ang pagbuhat sa ingon makatabang sa tibuok klase nga makasabot sa imong mga gilaoman ug makahatag og dugang nga mga kahigayonan sa mga estudyante nga makabaton og makahuloganong mga kasinatian.
Pagpangandam sa estudyante: Dapita ang mga estudyante sa pagpangita ug pagtuon sa mga kasulatan nga makatabang nila nga mas makasabot sa Pag-ula ni Jesukristo. Ang Giya ngadto sa mga Kasulatan mahimong mapuslanon nga mga kapanguhaan.
Posible nga mga Kalihokan sa Pagkat-on
Sa unsang paagi malahi ang kinabuhi?
Ikonsiderar ang pagpakita sa mosunod nga dili kompleto nga pangutana. Dapita ang mga estudyante sa pagpakigbahin og mga ehemplo kon sa unsang paagi mahimong lahi ang ilang kinabuhi kon wala ang pipila ka mga tawo o mga butang nga ilang gisaligan pag-ayo. Aron matabangan ang mga estudyante sa paghunahuna og mga ehemplo, pagdala og pipila ka mga butang o mga hulagway sa mga butang nga imong gihatagan og gibug-aton.
Sa unsang paagi kaha malahi ang kinabuhi kon wala …?
Paghunahuna og pipila ka mga paagi nga imong matubag kini nga pangutana sa mga tawo o mga butang nga imong gisaligan. Pananglitan, mahimo nimong hunahunaon kon sa unsang paagi kaha malahi ang imong kinabuhi kon wala ang usa ka partikular nga tawo, pipila ka teknolohiya o mga himan nga kanunay nimong gigamit, o usa ka kalihokan nga ikaw malingaw.
Human ipakigbahin sa mga estudyante ang pipila sa ilang mga tubag, ikonsiderar ang pagpakita sa mosunod nga hulagway ug ipahiuyon ang miaging pamahayag sa pag-ingon: Sa unsang paagi kaha malahi ang kinabuhi kon wala si Jesukristo ug ang Iyang Pag-ula?
Dapita ang mga estudyante sa pagpamalandong kon unsaon nila pagtubag kini nga pangutana ug sa paghimo og lista diha sa ilang mga journal sa pagtuon sa mga paagi nga mahimong lahi ang ilang kinabuhi kon wala si Jesukristo ug ang Iyang Pag-ula. Makabaton sila og kahigayonan sa pagpakigbahin sa ilang mga tubag niini nga pangutana unya sa leksiyon.
Amulek mipamatuod ngadto sa mga Zoramite mahitungod ni Jesukristo
Tingali imong mahinumduman nga si Alma ug si Amulek misangyaw taliwala sa mga Zoramite, kinsa mituo nga “walay Kristo” (Alma 31:16). Human matapos ni Alma ang iyang mga mensahe nga narekord diha sa Alma 32–33, si Amulek mipakigbahin sa iyang kaugalingong pagpamatuod sa Manluluwas.
Basaha ang Alma 34:1–10, mangita sa unsay gipakigbahin ni Amulek mahitungod ni Jesukristo ug sa Iyang Pag-ula.
Ang Alma 34:9–10 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas dali ra nimo kining makit-an. Mahatagan ka og kahigayonan sa sunod nga leksiyon sa pagpraktis sa paggamit sa doktrina nga gitudlo niini nga tudling ngadto sa usa ka pangutana o sitwasyon.
-
Hain nga mga pulong o mga hugpong sa mga pulong mahitungod ni Jesukristo ug sa Iyang Pag-ula ang imong nakita nga makahuloganon kaayo? Ngano man?
-
Unsa ang imong nakat-onan gikan niini nga mga bersikulo kon nganong kinahanglan nato si Jesukristo sa pag-ula alang kanato?
-
Unsaon nimo pagpamubo sa mga pagtulun-an ni Amulek diha sa Alma 34:8–10 isip usa ka pamahayag sa kamatuoran?
Tingali nakaila ka og usa ka kamatuoran nga susama sa mosunod: Kon wala ang walay kinutoban ug walay kataposan nga Pag-ula ni Jesukristo, ang tanang katawhan mahisalaag sa kahangtoran.
-
Ngano nga ang tanang mga tawo “dili makalikay nga mamatay” o mahisalaag sa kahangtoran kon wala si Jesukristo ug ang Iyang Pag-ula?
Ikonsiderar ang paghangyo sa mga estudyante sa paghunahuna og pipila ka mga paagi nga sila personal nga mahisalaag kon wala si Jesukristo ug ang Iyang Pag-ula. Usa ka paagi sa pagbuhat niini mao ang pagdapit kanila sa pagtuon sa 2 Nephi 9:6–12, mangita sa mga pagtulun-an nga naghulagway kon nganong nagkinahanglan kita og Manluluwas.
Walay kinutoban ug walay kataposan
Ikonsiderar ang pagmarka sa mga pulong nga “walay kinutoban ug walay kataposan” sa kataposan sa bersikulo 10 ug kopyaha ang mosunod nga dayagram diha sa imong journal sa pagtuon:
Ikonsiderar ang pagdrowing niini nga dayagram diha sa pisara aron kopyahon sa mga estudyante.
-
Unsa sa imong hunahuna ang gipasabot nga ang Pag-ula ni Jesukristo walay kinutoban ug walay kataposan?
Si Presidente Russell M. Nelson mipakigbahin sa mosunod nga mga panabot:
Ang Iyang Pag-ula walay kinutoban—walay kataposan. Kadto sab walay kinutoban diin ang tanang katawhan maluwas gikan sa walay kataposan nga kamatayon. Wala kini kinutoban gumikan sa dili masukod Niya nga pag-antos. … Kadto walay kinutoban sa gidak-on—kinahanglan kadtong pagahimoon gayod. Ug ang grasya sa Pag-ula molugway dili lamang sa walay kinutobang gidaghanon sa katawhan, apan ngadto usab sa walay kinutobang gidaghanon sa mga kalibotan nga Iyang gilalang. Kadto walay kinutoban sa bisan unsang tawhanong pangsukod o mortal nga pagsabot. (Russell M. Nelson, “The Atonement,” Ensign, Nob. 1996, 35)
-
Unsa ang natabang niini nga pamahayag diha kanimo nga nakat-onan o gibati mahitungod ni Jesukristo ug sa Iyang maulaong sakripisyo?
Sa unsang paagi kini adunay kalabotan diha kanimo?
Isip kabahin sa mosunod nga pagpasabot, mahimong makatabang ang pagpakigbahin sa pamahayag ni Elder Michael John U. Teh sa Seventy nga makita sa “Komentaryo ug Background” nga seksiyon.
Samtang ang Manluluwas makapanalangin sa walay kinutoban nga gidaghanon sa mga tawo pinaagi sa Iyang Pag-ula, Siya usab personal nga makapanalangin nimo. Ikonsiderar ang pag-update sa dayagram diha sa imong journal sa pagtuon aron susama tan-awon sa mosunod:
Ang mosunod nga kalihokan makatabang sa mga estudyante nga mas makasabot kon sa unsang paagi ang Manluluwas personal nga makapanalangin kanila tungod sa Iyang Pag-ula. Ipakita o iprinta ang mosunod nga mga kapanguhaan ug hatagi ang mga estudyante og panahon sa pagtuon niini nga mag-inusara o sa mga grupo. Dapita ang mga estudyante sa pag-ila sa mga pulong o sa mga hugpong sa mga pulong gikan niini nga mga kapanguhaan nga naghulagway kon sa unsang paagi si Jesukristo personal nga makapanalangin kanila pinaagi sa Iyang Pag-ula.
Agi og dugang sa mga kasulatan ug mga pamahayag diha sa lista, mahimong mangita ang mga estudyante og lain nga mga kasulatan o ubang mga pamahayag sa mga lider sa Simbahan.
Si Presidente Tad R. Callister, kanhi Kinatibuk-ang Presidente sa Sunday School, mitudlo:
Dihay okasyon, nakahimamat ko og buotan nga mga Santos kinsa naglisod sa pagpasaylo sa ilang kaugalingon, kinsa inosente apan sayop nga mibutang og kinutoban sa matubsanong mga gahom sa Manluluwas. Wala tuyoa, ilang giusab ang walay kinutoban nga Pag-ula ngadto sa adunay kinutoban nga sa usa ka paagi dili makatabang sa ilang piho nga sala o kahuyang. Apan kini usa ka walay kinutoban nga Pag-ula tungod kay kini naglakip ug naglangkob sa matag sala ug kahuyang, ingon man usab sa matag abuso o kasakit nga nahimo sa uban. (Tad R. Callister, “Ang Pag-ula ni Jesukristo,” Liahona, Mayo 2019, 86)
Hisgoti uban sa mga estudyante unsay ilang nakat-onan ug gibati gikan sa ilang mga pagtuon. Dapita sila sa pagpakigbahin og piho nga mga pulong o mga hugpong sa mga pulong nga ilang nakit-an nga naghulagway kon sa unsang paagi si Jesukristo personal nga makapanalangin kanila pinaagi sa Iyang Pag-ula. Pananglitan, ang mga estudyante mahimong mopasabot sa mga hugpong sa mga pulong nga sama sa “siya modala sa kaluwasan ngadto sa tanan kinsa motuo diha sa iyang ngalan” (Alma 34:15); ang “Dios … nag-andam og paagi aron kita makalingkawas gikan sa … kamatayon ug impyerno” (2 Nephi 9:10); o “Ako, ang Ginoo, dili na mahinumdom [sa mga nahinulsolan na nga mga sala]” (Doktrina ug mga Pakigsaad 58:42).
Human niini nga diskusyon, itudlo ang mga estudyante ngadto sa lista nga ilang gihimo diha sa ilang mga journal sa pagtuon mahitungod kon unsa kaha ang ilang kinabuhi kon wala si Jesukristo ug ang Iyang Pag-ula. Mahimong i-update sa mga estudyante ang ilang mga lista base sa unsay ilang nakat-onan. Dapita ang mga estudyante sa pagpakigbahin sa ilang mga lista ngadto sa usa ka pares o diha sa tibuok klase. Hangyoa ang mga estudyante sa pagpakigbahin sa butang nga ilang gidugang sa ilang lista tungod sa unsay ilang nakat-onan karon. Mahimo usab nila nga ipakigbahin ang usa ka butang nga naapil na nila sa ilang lista nga mas mahinungdanon alang kanila tungod sa unsay ilang nakat-onan, dayon ipasabot kon ngano.
Pagpamatuod sa mga kamatuoran nga imong nahisgotan. Dasiga ang mga estudyante sa pagbuhat sa bisan unsa nga mga pag-aghat nga ilang nadawat atol sa leksiyon.