Alma 33

Pagtudlo sa Ebanghelyo sa Manluluwas

Mibati ka ba ka sukad og tinguha nga mas mosunod sa Ginoo apan wala masayod unsay buhaton? Ang mga kabos taliwala sa mga Zoramite nangutana kang propeta Alma kon sa unsang paagi “sila kinahanglang mosugod sa pagbansay sa ilang hugot nga pagtuo” (Alma 33:1). Importante nga masabtan sa tanang disipulo ni Jesukristo ang tubag ni Alma. Kini nga leksiyon makapalawom sa imong pagsabot sa mga lakang nga imong mahimo sa pagbansay og dugang nga hugot nga pagtuo diha kang Jesukristo.

Hatagi ang mga estudyante og mga kahigayonan sa pagtudlo. Pangita og mga kahigayonan sa pagtugot sa mga estudyante sa pagtudlo og mga seksiyon sa mga leksiyon. Dasiga sila sa pagtan-aw sa seminary isip usa ka luwas nga dapit sa pagbansay sa pagtudlo.

Pagpangandam sa estudyante: Dapita ang mga estudyante sa pagbasa sa Alma 33 diha sa balay ug sa pagpili og bersikulo o grupo sa mga bersikulo nga gusto nilang mas masabtan.

Posible nga mga Kalihokan sa Pagkat-on

Mga pangutana kabahin sa ebanghelyo

Ikonsiderar ang pagdapit sa mga estudyante sa pagtubag sa mosunod nga pangutana uban sa usa ka pares o diha sa gagmay nga grupo.

• Kon ikaw adunay kahigayonan sa pagpangutana sa propeta sa Dios og usa o duha ka pangutana, unsa ang gusto nimong masayran? Ngano man?

Sa Alma kapitulo 32, si propeta Alma midapit sa mga Zoramite sa paglig-on sa ilang mga pagpamatuod pinaagi sa pag-alima sa pulong sa Dios diha sa ilang mga kasingkasing. Sila misanong pinaagi sa pagpangutana kaniya og pipila ka importante nga mga pangutana.

Basaha ang Alma 33:1, mangita sa mga pangutana nga ilang gipangutana sa propeta.

• Sa imong hunahuna sa unsang paagi ang usa ka tin-edyer karon usbon ang pagkasulti [reword] sa pangutana nga “sa unsa nga paagi sila kinahanglan mosugod sa pagbansay sa ilang hugot nga pagtuo”?

• Unsaon nimo pagtubag kana nga pangutana base sa unsay imong nahibaloan mahitungod sa ebanghelyo ni Jesukristo?

Ang pagbansay sa hugot nga pagtuo labaw pa kay sa yanong pagtuo kang Jesukristo. Nagbansay kita sa hugot nga pagtuo kon buhaton nato ang gihangyo sa Manluluwas ug tinuyo nga magtinguha sa pagsunod Kaniya. Gitubag ni Alma ang pangutana sa mga Zoramite pinaagi sa pagtudlo kanila og daghang mga paagi nga atong mabansay ang atong hugot nga pagtuo kang Jesukristo.

Pagpili og usa sa mosunod nga tulo ka opsiyon gikan sa tubag ni Alma nga gusto nimong mas masabtan. Pangandam nga daw magtudlo ka og lima ngadto sa pito ka minuto nga leksiyon mahitungod sa opsiyon nga imong pilion. Ikonsiderar ang paghunahuna mahitungod sa usa ka tawo nga imong kaila ug mangandam nga daw mopakigbahin ka sa leksiyon ngadto kaniya. Mahimo nimong gamiton ang pipila ka mga ideya nga gilista ubos sa “Mga Ideya sa Pagpangandam sa Leksiyon” unya sa leksiyon aron pagtabang kanimo sa pag-andam.

Pahibaloa ang mga estudyante nga aduna silay kahigayonan sa pagtudlo sa leksiyon nga ilang giandam ngadto sa gagmay nga grupo sa mga klasmeyt. Pagtanyag og mga alternatibo sa mga estudyante nga tingali mabalaka kaayo sa pagtudlo og kusog. Naglakip kini sa paghatag og latid [outline] sa ilang leksiyon o pakigtinabangay kauban ang usa ka pares nga adunay mas labaw nga kompiyansa o kasinatian. Kon imong pilion nga dili mangandam ang mga estudyante og mga leksiyon, ikonsiderar ang paggamit sa mga ideya human sa matag opsiyon sa pagtuon kon unsaon pagtudlo ang nagkalainlaing mga seksiyon sa leksiyon.

Mahimong makatabang kini sa mga estudyante kon maghatag ka og mubo nga panig-ingnan kon unsaon pag-andam og mubo nga leksiyon. O mahimo nimong dapiton ang adunay kasinatian nga mga estudyante sa pagpakigbahin og mga ideya pinaagi sa pagpangutana sama sa mosunod: “Gikan sa inyong kasinatian, unsa ang inyong unang mga lakang sa pag-andam og leksiyon?” o “Unsa man ang kasagaran nga hitsura sa usa ka plano sa leksiyon alang kaninyo?” o “Asa kamo moadto aron mangita og dugang impormasyon bahin sa inyong hilisgotan?”

Ikonsiderar ang pagsulat sa mosunod nga tulo ka opsiyon diha sa pisara nga pilian sa mga estudyante.

Opsiyon 1: Makabansay kita sa hugot nga pagtuo sa Dios pinaagi sa pagsimba Kaniya diha sa pag-ampo. Alma 33:3–11

Dugang nga mga kasulatan nga ikonsiderar: Alma 34:17–27

Kon kamo modesisyon nga tun-an ang Opsiyon 1 isip usa ka klase kay sa paandamon ang mga estudyante sa pagtudlo niini, ikonsiderar ang pagdapit sa mga estudyante sa paghimo og lista sa mga kamatuoran nga ilang nakat-onan mahitungod sa pag-ampo gikan niini nga mga bersikulo. Mahimo usab nimong hisgotan ang pipila ka sayop nga pagsabot sa mga tawo mahitungod sa pag-ampo nga gitubag ug gihusto sa mga kamatuoran gikan niini nga mga bersikulo.

Mahimong mapuslanon ang pagdapit sa mga estudyante sa pagpangita diha sa libro sa himno [hymnbook] alang sa mga hugpong sa mga pulong mahitungod sa pag-ampo nga adunay kahulugan ngadto kanila. Mahimo nilang ipakigbahin ang personal nga mga kasinatian nga gipahayag sa mga liriko.

Opsiyon 2: Makabansay kita og hugot nga pagtuo pinaagi sa pagtuo sa Anak sa Dios. Alma 33:12–18

Dugang nga mga kasulatan nga ikonsiderar: Juan 3:16; 2 Nephi 2:6–8

Kon ikaw modesisyon nga tun-an ang Opsiyon 2 isip usa ka klase kay sa paandamon ang mga estudyante sa pagtudlo niini, ikonsiderar ang pagdapit sa mga estudyante sa pagmarka sa Alma 33:14, 18. Dayon hangyoa ang mga estudyante sa pagpangita ug pagpakigbahin og paborito nga mga tudling mahitungod sa Anak sa Dios gikan sa bisan unsang basahon sa kasulatan. Mahimo silang mogamit og lista sa mga tudling sa doktrinal nga kahanas gikan sa tanang upat ka kurso isip kapanguhaan kon gikinahanglan.

Opsiyon 3: Makabansay kita sa hugot nga pagtuo pinaagi sa pagtan-aw kang Jesukristo alang sa pagkaayo. Alma 33:18–23

Dugang nga mga kasulatan nga ikonsiderar: Mga Numero 21:4–9; Helaman 8:14–15

Kon ikaw modesisyon nga tun-an ang Opsiyon 3 isip usa ka klase kay sa paandamon ang mga estudyante sa pagtudlo niini, ikonsiderar ang pagpakita sa mga hulagway gikan sa Pakete sa mga Hulagway sa Ebanghelyo nga “Moises ug ang Tumbaga nga Bitin” ug “Ang Paglansang” samtang gibasa sa mga estudyante ang mga tudling diha sa ibabaw. Dapita sila sa paghisgot sa mga rason nga ang mga tawo karon mahimong mopili sa dili pagtan-aw kang Jesukristo alang sa espirituhanong pagkaayo, ug sa mga tinubdan nga mao hinoon ang tan-awon sa mga tawo. Pangutan-a ang mga estudyante kon unsay ilang isulti ngadto sa usa ka tawo nga naghunahuna kon si Jesukristo makatabang ba gayod kanila.

Kon ang mga estudyante mangandam ug magtudlo sa leksiyon, ikonsiderar ang paghatag sa mosunod nga handout aron makatabang sa ilang pagpangandam.

Ikonsiderar usab ang paghatag sa mga estudyante og may kalabotan nga mga materyal sa seksiyon diha sa “Komentaryo ug Background nga Impormasyon” kon gikinahanglan.

Mga Ideya sa Pagpangandam sa Leksiyon

Manwal sa Magtutudlo sa Basahon ni Mormon (2024)—“Alma 33: Pagtudlo sa Ebanghelyo sa Manluluwas”

Hain nga opsiyon ang imong gipili nga pagatutokan?

Ikonsiderar ang paggamit sa pipila sa mosunod nga mga pag-aghat [prompts] aron sa pagtabang kanimo sa pag-andam sa imong latid [outline].

Mahinungdanon nga mga hugpong sa mga pulong gikan sa mga bersikulo nga mahimo nimong isugyot niadtong imong gitudloan nga markahan:

Unsa ang matabang niini nga mga bersikulo niadtong imong gitudloan aron makasabot o mobati mahitungod sa Langitnong Amahan ug ni Jesukristo:

Sa unsang paagi kini nga kamatuoran makaapekto sa mga kinabuhi niadtong imong gitudloan:

Mga leksiyon nga naggamit og usa ka butang, o maayong mga ehemplo sa mga tawo nga nagpuyo niini nga kamatuoran:

Mga pangutana nga mahimo nimong ipangutana aron matabangan kadtong imong gitudloan nga mamalandong sa unsay gitudlo ni Alma:

Mga kasinatian nga imong nasinati sa unsay gitudlo ni Alma:

Dugang nga mga kasulatan o mga pamahayag gikan sa mga lider sa Simbahan:

Unsa ang mahimo nimong idapit nga buhaton niadtong imong gitudloan tungod sa unsay ilang nakat-onan:

© 2024 by Intellectual Reserve, Inc. All rights reserved.

Dapita ang mga estudyante nga magpulipuli sa pagtudlo sa ilang mga leksiyon ngadto sa ilang mga pares o sa gagmay nga mga grupo. Pagbantay nga dili pugson ang mga estudyante kinsa nabalaka kaayo sa pagtudlo og kusog sa ilang mga leksiyon. Ikonsiderar ang pagdapit og pipila ka andam nga mga estudyante sa pagtudlo ngadto sa tibuok klase.

Ikonsiderar sa mainampoong paagi kon unsaon nimo pagpakigbahin ang imong nakat-onan ngadto sa tawo nga imong gihunahuna sa dihang imong giandam kini nga leksiyon.

Dapita ang mga estudyante sa pagpakigbahin sa ilang mga ideya gikan sa Alma 33 ngadto sa klase gamit ang mga pangutana sama sa mosunod:

• Unsa nga mga panabot ang imong naangkon mahitungod sa pagbansay og hugot nga pagtuo kang Jesukristo karon?

• Sa unsang paagi nga ang pag-andam og leksiyon mahitungod niini nakatabang nimo nga makaangkon niadto nga mga panabot?

Mahimo nimong ipakigbahin ang makahuloganon nga panabot gikan sa Alma 33 nga imong nadawat samtang nangandam ka sa pagtudlo niini.

Komentaryo ug Background nga Impormasyon

Unsa ang makatabang nako nga mas masabtan ang gasa sa pag-ampo?

Si Sister Sydney S. Reynolds, kanhi sa Kinatibuk-ang Kapangulohan sa Primary, mitudlo:

Ako nag-ampo sa daghang mga dapit. Ako nag-ampo sa baybayon, sa kabukiran, sa simbahan, sa dulaanan. Ako nag-ampo sa akong balay, sa eroplano, ug sa ospital. Ako nasayod nga makaampo ko sa Langitnong Amahan bisan kanus-a, bisan asa. Ako nasayod nga Siya nakadungog kanako. (Sydney S. Reynolds, “I Can Pray to Heavenly Father Anytime, Anywhere,” Liahona, Mayo 2003, 113)

Si Elder D. Todd Christofferson sa Korum sa Napulog Duha ka Apostoles mipakigbahin:

Ang Langitnong Amahan nakaila kanato, ug Siya mangita kanato bisan asa kita. Makapahupay nga makahibalo nga bisan asa kita, Siya makigsulti kanato kon kita mangita Kaniya pinaagi sa pag-ampo. (D. Todd Christofferson, “Friend to Friend: Seeking Him in Prayer,” Friend, Peb. 2006, 9)

Ang mga liriko sa Himno nga “Ikaw Naghunahuna Ba sa Pag-ampo?” (Mga Himno, nu. 82) naglangkob og daghang mga panalangin nga gitanyag sa Dios kanato pinaagi sa gasa sa pag-ampo.

Unsay makatabang nako nga mas masabtan ang gasa sa Anak sa Dios?

Si Presidente Henry B. Eyring sa Unang Kapangulohan mipasabot:

Usa ka Labing Bililhon nga Kabilin sa Paglaum

Si Henry B. Eyring nag-awhag nato sa pagbilin og kabilin sa paglaum alang niadtong mosunod sa atong ehemplo.

Ang atong mahigugmaong Langitnong Amahan mihatag kanato og gasa sa Iyang Hinigugmang Anak, si Jesukristo, isip atong Manluluwas. Kanang mahinungdanong gasa ug panalangin sa Pag-ula ni Jesukristo nagdala og kinatibuk-ang kabilin: sa saad nga Pagkabanhaw ug posibilidad sa kinabuhing dayon sa tanang matawo. (Henry B. Eyring, “Usa ka Labing Bililhon nga Kabilin sa Paglaom,” Liahona, Mayo 2014, 24)

Unsa ang makatabang nako nga mas masabtan ang simbolo sa bitin nga tumbaga?

Itandi ang mosunod nga duha ka hulagway samtang imong basahon ang mosunod nga mga kapanguhaan:

Si Elder Glen O. Jenson sa Seventy miingon:

Sama sa karaang Israel sa kamingawan, kita adunay mga kasinatian sa atong mortal nga mga kinabuhi nga nagpunting kanato ngadto sa Ginoo … alang sa kaayohan ug kaluwasan. Usahay Siya mopanton kanato (tan-awa sa 1 Nephi 17:41), naglaom sa pagpahumok sa atong mga kasingkasing. Apan sa matag lisod nga sitwasyon, Siya nagbarog nga andam nga maloloy-on aron pag-ayo kanato kon kita motuo lamang Kaniya. …

Atong gipakita ang atong tinguha nga mamaayo pinaagi sa paghinumdom Kaniya kanunay ug pagsunod sa Iyang mga sugo. Dili ang bitin nga tumbaga ang nagdala og kaayohan; mao kadtong hugot nga pagtuo kang Jehova ug pagkamasinugtanon sa Iyang mga pulong. (Glen O. Jenson, “Look and Live,” Ensign, Mar. 2002, 34)

Tan-awa sa “Tumbaga nga Bitin” diha sa Giya ngadto sa mga Kasulatan.

Basaha ang Juan 3:14–15; 1 Nephi 17:40–41; 3 Nephi 27:13–16.

Dugang nga mga Kalihokan sa Pagkat-on

Bidyo sa Basahon ni Mormon

Aron mahatagan ang mga estudyante og mubo, biswal nga kinatibuk-ang pagpasabot sa mga pagtulun-an ni Alma niini nga kapitulo, ikonsiderar ang pagpasalida sa bidyo nga “Si Alma Nagtandi sa Pulong sa Dios ngadto sa usa ka Binhi | Alma 32–33” gikan sa time code 5:00 hangtod sa 7:11.

Si Alma Nagtandi sa Pulong sa Dios ngadto sa usa ka Binhi | Alma 32–33

Si Alma nga Batan-on naghangyo sa katawahan sa pagbaton og igong pagtuo nga matanom ang binhi (pulong sa Dios) diha sa ilang kasingkasing. Ug ang pulong sa Dios maayo, sama sa maayo nga binhi, motubo kini ug maghimo kanilang malipayon.

Pagpamalandong sa epekto sa mga kamatuoran sa ebanghelyo diha sa atong mga kinabuhi

Usa ka paagi sa pagtabang sa mga estudyante nga makasabot kon sa unsang paagi ang mga kamatuoran sa ebanghelyo nagpanalangin sa ilang mga kinabuhi mao ang paghanduraw nila kon sa unsang paagi mahimong lahi ang ilang kinabuhi kon wala pa sila masayod sa piho nga mga kamatuoran. Pananglitan, niini nga leksiyon mahimo nimong ipangutana ang mosunod nga mga pangutana mahitungod sa katugbang nga mga kamatuoran:

• Unsa kaha ang kalainan sa kinabuhi kon nagtuo ka nga mahimo ra kitang mag-ampo matag Dominggo o sa simbahan lamang?

• Unsa kaha ang kalainan sa kinabuhi kon wala pa ka makahibalo bahin sa Anak sa Dios?

• Unsa ang imong bation kon ikaw naghunahuna nga walay paagi nga ikaw mamaayo sa imong mga sayop?