Alma 32–35

Kinatibuk-ang Pagpasabot

Samtang si Alma mitudlo sa mga Zoramite, iyang gitandi ang pulong sa Dios ngadto sa usa ka binhi nga atong itanom sa atong mga kasingkasing nga sa kataposan mahimong “usa ka kahoy magtubo ngadto sa kinabuhi nga walay kataposan” (Alma 32:41). Ang mga kabos taliwala sa mga Zoramite nangutana kaniya kon sa unsang paagi “sila kinahanglan mosugod sa pagbansay sa ilang hugot nga pagtuo” (Alma 33:1), ug siya mitudlo kanila nga sila makaampo ug makasimba sa tanang dapit. Siya ug si Amulek mipamatuod kang Jesukristo, ug si Amulek mitudlo nga ang tanang mga tawo matig-a, mapukan, ug mahisalaag kon wala ang walay kinutoban ug walay kataposang sakripisyo ni Kristo. Si Amulek nangamuyo sa mga Zoramite nga dili maglangay sa adlaw sa ilang paghinulsol.

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang kinahanglan nga andamon daan alang sa matag leksiyon.

Alma 32

Katuyoan sa leksiyon: Kini nga leksiyon gituyo sa pagtabang sa mga estudyante sa pagtanom sa pulong sa Dios diha sa ilang mga kasingkasing ug sa pag-alima sa ilang pagpamatuod niini.

• Pagpangandam sa estudyante: Dapita ang mga estudyante sa pagpangutana sa usa ka minahal nga adunay pagpamatuod sa ebanghelyo ni Jesukristo kon unsay nakatabang kaniya sa pagdawat o paglig-on niini.

• Sulod [Content] nga ipakita: Ang tulo ka pamahayag nga adunay mga blangko sa sinugdanan sa leksiyon

• Handout: “Pagtanom ug Pag-alima sa Pulong sa Dios diha sa Atong mga Kasingkasing”

• Hulagway: Ang mga yugto sa pagtubo sa usa ka kahoy

• Sugyot sa pagtudlo pinaagi sa videoconference: Human mabasa sa mga estudyante ang Alma 32:28, ipa-obserbar kanila nga nagtanom ka og pipila ka mga binhi sa usa ka kaang nga uga ang yuta. Dayon samtang magbasa ang mga estudyante sa mga bersikulo 37–43, dapita sila sa paglista og mga butang nga makatabang niadtong mga binhi nga motubo. Sa pagsugod sa matag leksiyon sa videoconference sa sunod nga pipila ka semana, dapita ang duha o tulo ka estudyante sa pagpakigbahin sa daklit og butang nga bag-o lang nilang nahimo aron sa pag-alima sa ilang pagpamatuod sa pulong sa Dios. Sa higayon nga ang matag estudyante mopakigbahin, buhata ang usa ka butang nga makatabang nga moalima sa mga binhi nga imong gitanom, sama sa pagbubo og gamay nga tubig o pagbalhin sa kaang ngadto sa usa ka dapit nga adunay dugang kahayag.

Alma 33

Katuyoan sa leksiyon: Kini nga leksiyon makapalawom sa pagsabot sa mga estudyante sa mga lakang nga ilang mahimo aron pagbansay og dugang nga hugot nga pagtuo diha kang Jesukristo.

• Pagpangandam sa estudyante: Dapita ang mga estudyante sa pagbasa sa Alma 33 diha sa balay ug sa pagpili og bersikulo o grupo sa mga bersikulo nga gusto nilang mas masabtan.

• Sulod [Content] nga ipakita: Ang tulo ka opsiyon alang sa pagpangandam sa leksiyon, mahimong gipakita o gikopya diha sa pisara

• Handout: “Mga Ideya sa Pagpangandam sa Leksiyon”

• Sugyot sa pagtudlo pinaagi sa videoconference: Dapita ang mga estudyante sa pagpalong sa ilang sound ug mga kamera samtang mangandam sila sa ilang mga leksiyon. Human sa gitakdang oras, hangyoa sila sa pag-on og balik sa ilang mga camera ug sound ug ibutang sila sa mga breakout room. Pagdapit og usa o duha ka andam nga mga estudyante sa matag breakout room sa pagtudlo sa ilang mga leksiyon.

Alma 34:1–17

Katuyoan sa leksiyon: Kini nga leksiyon gituyo aron matabangan ang mga estudyante nga makasabot kon sa unsang paagi si Jesukristo makapanalangin kanila pinaagi sa Iyang walay kinutoban ug walay kataposan nga maulaong sakripisyo.

• Pagpangandam sa estudyante: Dapita ang mga estudyante sa pagpangita ug pagtuon sa mga kasulatan nga makatabang nila nga mas makasabot sa Pag-ula ni Jesukristo. Ang Giya ngadto sa mga Kasulatan mahimong mapuslanon nga mga kapanguhaan.

• Hulagway: Jesukristo sa Getsemani

• Sulod nga ipakita: Dayagram mahitungod sa Pag-ula ni Jesukristo

• Bidyo: “Ang Pag-ula ni Jesukristo” (11:46; tan-awa sa time code 3:59 hangtod sa 4:27)

• Sugyot sa pagtudlo pinaagi sa videoconference: Ikonsiderar ang pagpahiuyon sa kalihokan sa pagtuon sa kataposan sa leksiyon aron maapil ang nagkalainlaing mga kasulatan o mas bag-o nga mga pamahayag gikan sa mga lider sa Simbahan.

Doktrinal nga Kahanas: Alma 34:9–10

Katuyoan sa leksiyon: Kini nga leksiyon makatabang sa mga estudyante sa pagsag-ulo sa pakisayran ug sa mahinungdanon nga hugpong sa mga pulong sa kasulatan sa Alma 34:9–10, mapasabot ang doktrina nga gitudlo niini nga mga bersikulo, ug magamit ang mga baroganan sa pag-angkon og espirituhanong kahibalo sa tinud-anay nga mga senaryo gamit niini nga tudling sa kasulatan.

• Pagpangandam sa estudyante: Ikonsiderar ang pagdapit sa mga estudyante sa paghunahuna kon sa unsang paagi ang mga kamatuoran nga gitudlo sa Alma 34:9–10 ug ang mga baroganan sa pag-angkon og espirituhanong kahibalo makatabang sa mga tawo kinsa mibati nga dili sila mapasaylo sa ilang mga sala.

• Sugyot sa pagtudlo pinaagi sa videoconference: Atol sa kalihokan sa pagbansay sa paggamit, ikonsiderar ang pagbahin sa mga estudyante ngadto sa tulo ka breakout room ug i-assign ang matag grupo sa pagtutok sa usa sa mga baroganan sa pag-angkon og espirituhanong kahibalo. Mahimong ilista sa mga estudyante gikan sa matag grupo ang tanang mga paagi nga ilang gihunahuna nga kini nga baroganan makatabang ni Olive sa iyang sitwasyon. Dayon dapita ang mga sakop sa matag grupo sa pagreport unsay ilang gihisgotan ngadto sa tibuok klase.

Alma 34:17–41

Katuyoan sa leksiyon: Kini nga leksiyon gituyo aron sa pagtabang sa mga estudyante sa ilang mga paningkamot sa pag-andam sa pagsugat sa Dios.

• Pagpangandam sa estudyante: Dapita ang mga estudyante sa pagbasa sa Alma 34:32 ug sa paghunahuna og mga paagi nga sila makasunod sa tambag diha sa bersikulo. Mahimo nilang isulat ang pipila ka mga paagi sa ilang pagpangandam sa pagbalik ngadto sa presensiya sa Dios ug ang mga kausaban nga ilang mahimo nga makatabang nila nga mas maandam.

• Sugyot sa pagtudlo pinaagi sa videoconference: Samtang ang mga estudyante moila sa mga baroganan gikan sa Alma 34:17–41, ikonsiderar ang paggamit sa whiteboard nga function aron tugotan sila sa pagsulat sa mga baroganan nga ilang nakaplagan.