Alema 32

“Faamalosia Lou Faatuatua”

E tele meafaitino eseese e mafai ona faaaoga e fesoasoani tatou te malamalama ai i le talalelei a Iesu Keriso. A o aoao atu e Alema sa Sorama, sa ia faatusaina le afioga a le Atua i se fatu e mafai ona tatou totoina i o tatou loto lea e mafai ona avea ma se “se laau e puna a’e i le ola tumau-faavavau” (Alema 32:41). O lenei lesona ua faamoemoe e fesoasoani ia te oe e toto le afioga a le Atua i lou loto ma faafailele lau molimau e uiga i ai.

Aoao atu le natura paia o aafiaga faaleagaga. Faamanatu i tagata aoga le natura paia o aafiaga faaleagaga. E le tatau lava ona lagona e tagata aoga le faamalosia e faasoa mai o latou lagona po o aafiaga. Uunaia i latou e faasoa atu ma le talafeagai ni aafiaga patino pe a uunaia ai e le Agaga.

Sauniuniga a le tagata aoga: Valaaulia tagata aoga e fesili i se tasi e pele ia te ia o loo i ai se molimau o le talalelei a Iesu Keriso, po o le a se mea na fesoasoani ia te ia e maua pe faamalosia ai.

Gaoioiga e Ono Mafai Ona Aoao Ai

Faatusatusaga

Faaali atu fuaiupu lē mae’a nei. E mafai ona e filifilia ni fuaiupu eseese o le a fiafia i ai au tagata aoga, ae mafaufau e faaaoga le faatusatusaga mulimuli e fesoasoani ai e sui i le anotusi o le lesona.

O le faia o faatusatusaga e mafai ona avea o se auala lelei e aoao atu ai ma aoaoina ai le talalelei a Iesu Keriso. Faatumu ia avanoa nei. Ia fatufatua’i ma vaai pe sili atu ma le tasi se auala e mafai ona e faaumaina ai fuaiupu.

• O le olaga e faapei o se auā .

• O telefoni poto e faapei o auā .

• O le mauaina o se molimau e faapei o auā .

A o auauna atu Alema ma Amoleka i sa Sorama, sa faaalia e se vaega o tagata le popolega faapea sa le mafai ona latou tapuai i le Atua talu ai ua tuliesea i latou mai o latou nofoaga o tapuaiga ona o lo latou mativa (tagai Alema 32:5). E ui ua tatou iloa ua manino le aoao mai e le Alii le taua o le auai atu ai i Lana Ekalesia i le Sapati, ae sa tali atu Alema e ala i le aoaoina o i latou o e sa le faatagaina ona auai, i upumoni taua o le Ekalesia e uiga i tapuaiga ia e mafai ona tupu i o tatou loto, e tusa lava po o a o tatou nofoaga faaletino.

Faitau le laina muamua o le Alema 32:28, ona faitau lea o le fuaiupu 41 ma vaavaai mo se faatusatusaga na faaaoga e Alema e mafai foi ona faatatau ia te oe.

• O a ni mea e tutusa ai o e vaaia i le va o le totoina o se laau fua mai se fatu ma le faaolaina o lau molimau ia Iesu Keriso ma Ana aoaoga?

Afai e le o mautinoa e tagata aoga po o le a le molimau, fesoasoani ia latou malamalama e faapea “o le poto ma le faamaoniga faaleagaga e tuuina mai e le Agaga Paia” (O le Taiala i Tusitusiga Paia “Molimau,” scriptures.ChurchofJesusChrist.org,” ).

O le faatusatusaga a Alema o le afioga a le Atua i se fatu e mafai ona faaaoga i le mauaina o se molimau i so o se vaega o le talalelei. Ae na faamatala mulimuli ane e Alema e faapea o se molimau ia Iesu Keriso na ia faamoemoe o le a totoina e sa Sorama i o latou loto (tagai Alema 33:22–23).

• Aisea e avea ai le talitonu i le Faaola o se “fatu” taua e toto i lou loto?

Faaalu sina taimi e mafaufau ai e uiga i le malosi o i ai nei o lau molimau aoao ia Iesu Keriso ma Ana aoaoga. Ma le isi, mafaufau loloto pe o i ai ni vaega patino o lau molimau e te manao e faamalosia e pei o le alofa o le Tama Faalelagi mo oe po o le moni o le Uluai Faaaliga a Iosefa Samita. A o faaauau pea ona e suesue i le asō, vaavaai mo upumoni ia e mafai ona fesoasoani ia te oe e malamalama atili ai pe faapefea ona maua pe faamalosia ai lau molimau.

Mafaufau e vaevae tagata aoga i ni vaega toalaiti ma tuu atu i tagata aoga taitoatasi se kopi o lenei pepa e tufa atu. Valaaulia tagata aoga e faitau ma talanoaina faatasi o se vaega ia le anomea i lalo o le ulutala o le “Totoina o le fatu”. Atonu e aoga le tofi o se tagata aoga se toatasi mai vaega taitasi e avea ma taitai o talanoaga.

Ona mafai lea ona e faafefiloiina ia vaega ma tuu tagata aoga e talanoaina ma a latou vaega fou ia anomea i lalo o le ulutala o le “Faafaileleina o le fatu”.

Totoina ma le Faafaileleina o le Afioga a le Atua i o Tatou Loto

Tusi Lesona a le Faiaoga o le Tusi a Mamona (2024)—“Alema 32: ‘Faamalosi Lou Faatuatua’”

Totōina o le fatu

Faitau le Alema 32:21–23, 26–30, ma faailoga upu ma fasifuaitau e fesoasoani ia te oe e malamalama ai i le ala e amata ai ona tapue se molimau.

Faasoa atu i lau vaega upu ma fasifuaitau na tumatila ia te oe ma pe aisea. Ona talanoaina lea o fesili nei:

• O le a sou manatu i le uiga o le “tuu se avanoa” i lou loto mo le Faaola ma Ana aoaoga?

• O le a se mea e mafai ona faigata ai i tagata ona faia lenei mea?

• E tusa ai ma fuaiupu 28–30, o le a se mea e mafai ona tupu pe a tatou faaavanoa se vaega o tatou loto mo Iesu Keriso ma Ana aoaoga?

Tusi se aotelega e tasi le fuaiupu o mea sa e aoaoina mai nei fuaiupu e uiga i le fesoasoani ai i lau molimau i ona laasaga amata.

Faafaileleina o le fatu

Na aoao mai Alema o le totoina o le fatu ma le iloaina e lelei ua na o le vaega muamua lea o le tapueina o se molimau. Faitau le Alema 32:37–43, vaavaai mo aoaoga e fesoasoani ia te oe e malamalama ai pe faapefea ona fesoasoani i se molimau ia faaauau pea ona tuputupu ae.

Faasoa atu i lau vaega upu ma fasifuaitau na tumatila ia te oe ma pe aisea. Ona talanoaina lea o fesili nei:

• O le a se mea na e aoaoina mai fuaiupu 38–40 e uiga i le mea e tupu pe afai tatou te faatuatuanai i le afioga a le Atua lea sa tuputupu ae i o tatou loto?

• O a nisi o faataitaiga o le ala e mafai ai e se tasi ona faatuatuanai i lana molimau ia Iesu Keriso ma Ana aoaoga?

• O a nisi o auala e mafai ona e faafaileleina ai lau molimau ia Iesu Keriso ma Lana talalelei e fesoasoani ai ia tuputupu ae malosi?

Tusi se aotelega e tasi le fuaiupu o mea sa e aoaoina mai nei fuaiupu e uiga i le faamalosia o se molimau ua uma ona tuputupu ae i totonu ia te oe.

© 2023 by Intellectual Reserve, Inc. Ua taofia aiā tatau uma.

A uma ona suesue ma talanoaina e tagata aoga ia fuaiupu na muamua atu ma a latou vaega, fai se talanoaga faalevasega e uiga i mea sa latou aoaoina. E mafai ona e filifili ni nai fesili mai le pepa e tufa atu e talanoaina o se vasega e faamautinoa ai ua malamalama tagata aoga i manatu o loo aoaoina i nei fuaiupu. Valaaulia ni nai tagata aoga e faasoa mai a latou aotelega e tasi le fuaiupu mai vaega taitasi o le pepa e tufa atu.

I le avea ai ma se vaega o lenei talanoaga, ia mautinoa o upumoni e talitutusa ma upumoni o loo ta’ua: Afai tatou te tuu se avanoa i o tatou loto mo Iesu Keriso ma Ana aoaoga, ona amata lea ona tuputupu ae la tatou molimau (tagai Alema 32:28–30); A o tatou tausia ma le filiga le afioga a le Atua i o tatou loto, o le a faaauau pea ona tuputupu ae a tatou molimau ia Iesu Keriso ma Lana talalelei (tagai Alema 32:37, 40–42).

Lau molimau

Ina ia fesoasoani ia te oe ia iloa pe faapefea ona fesootai le faatusatusaga a Alema i lau molimau ia Iesu Keriso ma Lana talalelei, tusi se ata e pei o lenei i lau api talaaga mo suesuega. Fofola faalautele lau ata i le isi itu o le itulau ina ia i ai se avanoa e tusi ai i lalo o laasaga tatuputupu taitasi o le tuputupu ae.

Faaali atu pe tusi ata nei i luga o le laupapa mo tagata aoga e kopi i totonu o a latou api talaaga mo suesuega.

Faaalu sina taimi e faatusatusa ai lau molimau i le Faaola ma Ana aoaoga i le tuputupu ae o se laau fua. Filifili ni nai vaega o le talalelei a Iesu Keriso, ma tusi na vaega taitasi i lalo o laasaga o le tuputupu ae lea e te lagona e sili ona avea ma faatusa o lau molimau o i ai nei i na vaega.

Mo se faataitaiga, e mafai e se tagata e toatasi ona tusi le “O loo soifua Iesu Keriso” i lalo o le laau fua ma le “mana o le perisitua” i lalo o le fatu. Ona mafai lea e lena tagata ona tusi isi vaega o le talalelei a le Faaola, e pei “o se perofeta soifua,” “galuega o le malumalu,” “o le Tusi a Mamona,” ma le “tatalo,” i lalo o tulaga o le tuputupu ae lea e faatusa i lana molimau i na vaega taitasi.

Mafaufau e faaaoga le ata o loo i luga o le laupapa e faasoa atu ai le tuputupu ae o se vaega o lau molimau mai se fatu i se laau. Ia faaeteete ia aua nei faaaogaina ni faataitaiga e seasea ona tupu lea e ono faigata mo tagata aoga ona fesootai i ai. Fesoasoani ia latou iloa o le tuputupu ae mausali e ala i aafiaga ma le Agaga e taitai atu ai i le faateleina o le faatuatua ma se molimau malosi atu i le aluga o taimi. E mafai foi ona e valaaulia tagata aoga e faasoa mai se faagasologa talitutusa e uiga i se vaega o a latou molimau.

Fai se fuafuaga mo le auala o le a e taumafai ai e faaaoga aoaoga a Alema i lou olaga. E mafai ona e mafaufau i se mea e mafai ona e faia e “tuu ai se avanoa” i lou loto ma le olaga mo se vaega o lau molimau e tatupu a’e ai. E mafai foi ona e mafaufau pe mafai faapefea ona e “faafaileleina” vaega o lau molimau lea ua amata ona tatuputupu ae. Tusi faamaumau ou manatu, uunaiga, ma sini i lau api talaaga mo suesuega.

Manatu ma Talaaga o Faamatalaga

E faapefea ona ou atinaeina atili le faatuatua ia Iesu Keriso ma Lana talalelei?

Na aoao mai Elder Richard G. Scott (1928–2015) o le Korama a Aposetolo e Toasefululua:

E le mafai ona fausia se molimau malosi i luga o se faavae vaivai. O le mea lea, aua e te faafoliga e te talitonu i se mea pe a e le mautinoaina. Saili ia maua se molimau e faamaonia ai. Tauivi i le tatalo malosi, ola amiotonu, ma ole atu mo se faamautinoaga faaleagaga. … Ta’u atu i lou Tama i le Lagi ou lagona, o mea e te manaomia, o ou atugaluga, o ou faamoemoega ma ou moomooga. Talanoa ia te Ia ma le mautinoa atoatoa, ia iloa o le a Ia faafofoga ma tali mai. Ona e alu atu ai lea ma le onosai ma faia mea ua e iloa e sa’o, ma savali ma le mautinoa lea e fanau mai i le faatuatua ma le amiotonu, ma faatalitali ma le onosai mo le tali o le a oo mai i le auala ma le taimi ua silafia e le Alii e matua talafeagai. (Richard G. Scott, “The Power of a Strong Testimony,” Ensign, Nov. 2001, 88)

Na faamalamalama mai e Peresitene Henry B. Eyring o le Au Peresitene Sili:

O le molimau e manaomia ai le faafailelega a le tatalo o le faatuatua, o le galala mo le upu a le Atua i tusitusiga paia, ma le usiusitai i le upumoni ua tatou mauaina. E i ai le tulaga matautia i le faatalale i le tatalo. E i ai le tulaga matautia i a tatou molimau i le na o le suesue ma le faitauina o tusitusiga paia ae le o i ai le loto. O ni meaai ia e tatau ai mo a tatou molimau. (Henry B. Eyring, “O Se Molimau Ola,” Liahona, Me 2011, 127)

Matamata le vitio “Manao e Faateleina Lou Faatuatua?” (1:01).

Gaoioiga Faaopoopo e Aoao Ai

Alema 32:28. “Faatusatusa le upu i se fatu”

Fesili i tagata aoga po o le fea o mea nei latou te lagona o le faatusatusaga sili lea i le atiina ae o se molimau i le afioga a le Atua. (E leai se tali e sa’o pe sese.) Ona valaaulia lea o tagata aoga e faasoa mai nisi faatusatusaga latou te mafaufau i ai.

1. Savali sopo i le tumutumu o se mauga tifato.

2. Fausiaina o se fale po o se isi galuega faatino tele.

3. Alu i se malaga umi.

Valaaulia tagata aoga e suesue le Alema 32:28–43 i ni vaega toalaiti, ma taofi soo e faamatala mai pe faapefea ona fesootai le faatusatusaga a Alema i le atiina a’e o se molimau i le afioga a le Atua.

Alema 32:37. “Faafaileleina ma le faaeteete tele”

Mafaufau e aumai i le vasega ni fatu se tele ma se ulo laitiiti e tasi e tumu i le palapala matutu. A o faitau e tagata aoga le faatusatusaga na faia e Alema i le fuaiupu 28, valaaulia ni nai tagata aoga ina ia taitasi ma toto se fatu i le ulo. Ma a o faitau e tagata aoga fuaiupu e 37–43, valaaulia i latou e lisi mea e fesoasoani e ola ai fatu.

I nai aso po o vaiaso e sosoo ai, mafaufau e tuu atu i ni tagata aoga se toalua pe toatolu i vasega taitasi se taimi puupuu e faasoa mai ai se mea na latou faia talu ai nei e faafailele ai a latou molimau i le afioga a le Atua. Ona mafai lea e tagata aoga taitasi o e o loo faasoa mai ona faaopoopo sina vai i le ulo, ave le ulo i se nofoaga e sili atu le malamalama, pe faia se isi mea e faafailele ai fatu.

Lotomaualalo

Ina ia tuu atu i tagata aoga se malamalamaaga vaaia o tagata na aoao e Alema i le mataupu 32, mafaufau e faaali le vitio “Ua Aoao e Alema e Matitiva e uiga i le Lotomaualalo” (2:33). Ona valaaulia lea o tagata aoga e faitau fuaiupu 13–16 ma talanoaina auala e mafai ona tatou filifili ai ia lotomaualalo e aunoa ma le faamalosia ia lotomaualalo.