Alma 37

“Pinaagi sa Gagmay ug Yano nga mga Butang”

Usahay ang atong mga problema daw dako kaayo ug komplikado nga kita maghunahuna nga ang mga solusyon kinahanglan sab nga dako ug komplikado. Hinoon, gitudloan ni Alma ang iyang anak nga lalaki nga si Helaman nga ang Ginoo sa kasagaran mogamit og gagmay ug yano nga mga butang sa pagbuhat og dagkong mga butang, sama sa pagtugot sa mga kasulatan sa pagtudlo “sa agianan nga [kita] kinahanglan mopanaw” diha sa atong mga kinabuhi (Alma 37:40). Kini nga leksiyon gituyo aron sa pagtabang kanimo sa paggamit sa hugot nga pagtuo kang Jesukristo samtang ikaw nagtuon sa Iyang pulong diha sa mga kasulatan.

Pagdasig og inadlaw-adlaw nga pagtuon sa kasulatan. Ang inadlaw-adlaw nga personal nga pagtuon sa kasulatan naghatag og makanunayon nga kahigayonan sa mga estudyante nga makat-on sa ebanghelyo, makapalambo og pagpamatuod, ug makadungog sa tingog sa Ginoo. Usahay ang mga estudyante tingali mobati nga nawad-an og kadasig o nagkinahanglan og kadasig nga mas magtuon sa kanunay. Pangita og mga kahigayonan sa pagpamatuod sa mga pulong sa Ginoo ug sa pagdasig sa mga estudyante sa pagtuon sa mga kasulatan adlaw-adlaw.

Pagpangandam sa estudyante: Dasiga ang mga estudyante samtang naghimo sila og inadlaw nga pagtuon sa kasulatan sa pagpamalandong sa mga panalangin nga gidala niini sa ilang mga kinabuhi, ilabi na kon sa unsang paagi kini nakatabang kanila nga maduol ngadto kang Kristo.

Posible nga mga Kalihokan sa Pagkat-on

Ang kamahinungdanon sa gagmay ug yano nga mga butang

Isulat ang mga pulong nga gagmay ug yano diha sa pisara.

• Unsa ang pipila ka gagmay ug yano nga mga butang nga makahimo og dagko nga kalainan diha sa imong kinabuhi?

Ikonsiderar ang pagpakita og mga hulagway o paghisgot sa mga ehemplo, sama sa sepilyo, sa usa ka mensahe sa text, sa pag-ehersisyo, o sa yanong pagbuhat sa pagserbisyo.

Sa laing paagi, mahimo nimong pangutan-on ang mga estudyante kon aduna ba silay gagmay nga mga butang nga adunay dakong epekto sa ilang mga kinabuhi, sama sa usa ka hulagway sa pamilya, sa usa ka telepono, o sa usa ka pitaka. Dapita sila sa pagpakita kon unsa kini ug ipakigbahin ang dakong epekto niini.

Sumala sa narekord sa Alma 37, gitugyan ni Alma kang Helaman ang usa ka importante nga responsibilidad nga gigamit sa Ginoo aron sa dakong pag-impluwensiya sa mga anak sa Dios. Basaha ang Alma 37:1–2, 5–7 aron makita kon unsa kadto ug nganong importante kaayo kini.

Kon gusto ka nga makakita og bidyo nga nagpakita niini nga mga bersikulo, tan-awa ang “Si Alma Nagtambag sa Iyang Anak nga mga Lalaki” gikan sa time code 3:15 hangtod sa 5:05, anaa sa ChurchofJesusChrist.org. Sunda ang asoy diha sa imong mga kasulatan.

Usa ka kamatuoran nga atong makat-onan diha sa Alma 37 mao nga ang Ginoo naggamit sa mga kasulatan aron pagdala sa kaluwasan ngadto sa daghang mga tawo.

• Ngano sa imong hunahuna nga ang Ginoo migamit sa mga kasulatan aron sa pagtabang sa mga tawo sa pagtukod og hugot nga pagtuo kang Jesukristo ug sa pagduol ngadto Kaniya alang sa kaluwasan?

Samtang magpadayon ka sa imong pagtuon, palandonga kini nga mga pangutana: Sa unsang paagi ang mga kasulatan makatabang sa pagdala sa mga tawo ngadto ni Jesukristo ug sa Iyang kaluwasan? Unsaon nako sa pagtuon aron makadawat niining dagkong mga panalangin?

Kon wala nimo gibati nga nakadawat ka og dagkong mga panalangin pinaagi sa pagtuon sa kasulatan, tinguhaa ang giya sa Espiritu Santo aron mahibaloan kon unsay kinahanglan nimong ilhon o bag-ohon.

Ikonsiderar ang pagbahin sa mga estudyante ngadto sa mga grupo o magpares ug i-assign sila sa usa sa mosunod nga mga kalihokan. Kon makompleto na, dapita ang mga estudyante sa pagpakigbahin sa unsay ilang nakat-onan. Depende sa oras ug mga panginahanglan sa klase, ikonsiderar ang pagbuhat sa duha ka kalihokan isip usa ka klase.

Kalihokan A: Dakong gahom sa mga kasulatan

Gipahinumdoman ni Alma si Helaman mahitungod sa mga paagi nga ang mga kasulatan adunay dakong epekto sa mga Nephite ug mga Lamanite. Basaha ang Alma 37:8–10, 14, mangita sa milagrosong mga panalangin nga gidala sa Ginoo pinaagi sa mga kasulatan. Ikonsiderar ang pagmarka niini nga mga panalangin o ilista kini diha sa imong journal sa pagtuon.

• Hain niini nga mga panalangin ang mahinungdanon nganha kanimo? Ngano man?

Ikonsiderar ang pagsulat sa mga panalangin nga gihisgotan sa mga estudyante diha sa pisara.

Si Alma mitudlo nga ang mga kasulatan “mipatubo sa panumdoman niini nga katawhan” (Alma 37:8). Si Elder D. Todd Christofferson sa Korum sa Napulog Duha ka Apostoles mipasabot bahin niini nga panalangin:

Ang mga kasulatan mopatubo sa atong panumduman pinaagi sa pagtabang kanato nga kanunayng mahinumdom sa Ginoo ug sa atong relasyon ngadto Kaniya ug sa Amahan. Kini nagpahinumdom kanato kon unsa ang atong nasayran sa atong kinabuhi sa wala pa sa yuta. Ug kini nagpatubo sa atong panumdoman sa laing bahin pinaagi sa pagtudlo kanato kabahin sa kapanahonan, katawhan, ug mga panghitabo, nga kita mismo wala makasinati. (D. Todd Christofferson, “Ang Panalangin sa Kasulatan,” Liahona, Mayo 2010, 33)

• Kanus-a nga ikaw o ang uban nga imong kaila nakasinati og usa niini nga mga panalangin sa pagtuon sa kasulatan?

• Sa unsang paagiha sa imong hunahuna ang mga kasulatan nagdala kanato “sa kasayoran sa Ginoo … ug sa pagmaya diha kang Jesukristo”? (Alma 37:9)

Ikonsiderar ang pagpakigbahin og personal nga kasinatian o bidyo sa usa ka tawo nga naghulagway niini.

Kalihokan B: Ang Liahona ug ang mga pulong ni Kristo

Human sa paghatag kang Helaman og dugang nga tambag, gipahisama ni Alma ang mga pulong ni Kristo ngadto sa usa ka piho nga gagmay ug yano nga butang nga gigamit ni Lehi ug sa iyang pamilya: ang Liahona. Pamalandongi ang unsay imong nahibaloan mahitungod sa Liahona.

Pagpakita og hulagway sa Liahona, sama sa mosunod nga hulagway. Ikonsiderar ang pagdapit sa mga estudyante sa pagpakigbahin sa unsay ilang nahibaloan mahitungod sa Liahona.

Basaha ang Alma 37:38–46 mangita og gagmay ug yano nga mga butang nga kinahanglang buhaton sa pamilya ni Lehi aron ang Liahona makagiya kanila.

Aron matabangan ka sa paghunahuna kon sa unsang paagi ang mga pagtulun-an ni Alma mahitungod sa Liahona magamit sa pagtuon sa kasulatan, paggahin og gamay nga panahon sa paghulagway sa mosunod:

1. Pagtuon sa mga kasulatan uban sa hugot nga pagtuo sa Dios (tan-awa sa Alma 37:40). Unsay nakapalahi niini sa ubang matang sa pagtuon?

2. Aron mahimong “tapulan” ug makalimot sa “pagbansay sa … hugot nga pagtuo ug kakugi” pinaagi sa pagtuon sa kasulatan (Alma 37:41).

Ikonsiderar ang pagdapit sa mga estudyante sa pagpakigbahin og mga kasinatian nga nakatabang kanila nga makakita kon sa unsang paagi magamit sa Ginoo ang mga kasulatan isip “tigtultol” nga “motudlo sa agianan nga [kita] kinahanglan mopanaw” diha sa atong kinabuhi (Alma 37:38, 40).

Personal nga pagtuon sa kasulatan

Pamalandongi ang imong kasamtangang personal nga mga tumong, mga kinaiya, ug mga kasinatian sa pagtuon sa kasulatan. Irekord sa imong journal kon unsa nga gagmay nga mga kausaban ang mahimo nimong himoon aron sa pagtugot sa Ginoo nga mopanalangin kanimo sa dagkong mga paagi. Ang mosunod mao ang pipila ka mga sugyot:

Tun-i ang mga kasulatan nga mangita alang sa dugang nga “kasayoran sa Ginoo” o aron “pagmaya diha kang Jesukristo” (Alma 37:9).

• Kini mahimong maglakip sa pagpangita og mga pakisayran kabahin ni Jesukristo, sa Iyang mga tahas, ug sa Iyang misyon. Sa imong pag-ila niini nga mga pakisayran mahimo nimong hunahunaon kon sa unsang paagi si Jesukristo mihimo og susama nga mga tahas diha sa imong kinabuhi. Mahimo nimong irekord ang mga pagpahayag sa pasalamat diha sa journal o sa Gospel Library nga app samtang makaplagan nimo kini.

Ipakita ang hugot nga pagtuo sa Dios samtang magtuon ka (tan-awa sa Alma 37:40).

• Kini mahimong maglakip sa pagpangita og mga paagi sa pagbuhat sa unsay imong gitun-an ug moduol ngadto kang Kristo. Mahimo kang kanunay nga magtinguha sa pagtubag sa pangutana nga “Sa unsang paagi ang unsay akong gitun-an makatabang kanako sa pagduol ngadto kang Kristo aron makadawat sa Iyang mga panalangin ug makasunod sa Iyang ehemplo?” Mahimo nimong irekord ang imong mga tubag sa usa ka journal.

Tinoa kon unsaon nimo sa paglikay nga mahimong “tapulan” ug makalimot sa “pagbansay sa [imong] hugot nga pagtuo ug kakugi” diha sa imong pagtuon (Alma 37:41).

• Kini mahimong maglakip sa pagpili og makanunayon nga oras kada adlaw aron pagtuon sa imong mga kasulatan. Mahimo usab nimong dapiton ang usa ka sakop sa pamilya o higala aron pag-follow up kanimo kanunay mahitungod sa imong mga paningkamot sa pagtuon sa kasulatan. Kon anaa, mahimo ka nga magbutang og usa ka pahinumdom sa kalendaryo sa usa ka telepono o uban pang digital nga aparato matag adlaw.

Taposa ang klase pinaagi sa pagpakigbahin og mga paagi nga ang Ginoo nagdala og dagkong mga butang diha sa imong kinabuhi pinaagi sa imong pagtuon sa mga kasulatan.

Komentaryo ug Background nga Impormasyon

Nganong importante ang pagtuon sa mga kasulatan sa matag adlaw?

Si Presidente Russell M. Nelson mitudlo sa mosunod:

Kon kamo wala magtinguha sa Ginoo pinaagi sa inadlaw-adlaw nga pag-ampo ug pagtuon sa ebanghelyo, inyong gitugotan ang inyong kaugalingon nga madutlan sa mga pilosopiya nga tingali makapadani apan dili tinuod. Bisan ang matinud-anon nga mga Santos mahimong maligas tungod sa kanunay nga pagtugtog sa banda sa Babelonia.

Akong mga kaigsoonan, ako mohangyo kaninyo sa paggahin og panahon alang sa Ginoo! Himoang lig-on ang inyong kaugalingong espirituwal nga pundasyon ug makasugakod sa pagsulay sa taas nga panahon pinaagi sa pagbuhat niadtong mga butang nga magtugot sa Espiritu Santo nga magauban kaninyo kanunay. (Russell M. Nelson, “Paggahin og Panahon alang sa Ginoo,” Liahona, Nob. 2021, 120)

Inadlaw nga pagbasa sa pulong sa Dios importante alang sa espirituhanong kaluwasan, ilabi na niining panahon sa nagkagrabe nga kaguliyang. Samtang kita magbusog sa mga pulong ni Kristo matag adlaw, ang mga pulong ni Kristo mosulti nato unsaon sa pagtubag sa mga kalisod nga wala nato mahunahunai nga atong atubangon. (Russell M. Nelson, “Paminaw Kaniya,” Liahona, Mayo 2020, 90)

Unsaon nako pagkaplag og panahon alang sa pagtuon sa kasulatan sa akong nagkapuliki nga kinabuhi?

Si Elder Richard G. Scott (1928–2015) sa Korum sa Napulog Duha ka Apostoles mitudlo:

Ayaw patuo sa bakak ni Satanas nga kamo walay panahon sa pagtuon sa kasulatan. Pilia nga makagahin og panahon sa pagtuon niini. Ang pagbusog sa pulong sa Dios matag adlaw mas importante kay sa katulog, eskwelahan, trabaho, salida sa telebisyon, mga video game, o social media. Tingali kinahanglan ninyong i-organisar og usab ang inyong mga prayoridad aron makagahin og panahon sa pagtuon sa pulong sa Dios. Kon mao, buhata kini! (Richard G. Scott, “Himoa ang Paggamit sa Pagtuo nga Inyong Unang Prayoridad,” Liahona, Nob. 2014, 93)

Dugang nga mga Kalihokan sa Pagkat-on

Alternatibo nga pagsugod

Isip usa ka alternatibo nga pagsugod sa leksiyon, ikonsiderar ang pagpanghatag og gagmay nga piraso sa papel ug dapita ang mga estudyante sa pagsulat og bisan unsang mga babag nga ilang giatubang sa pagtuon sa mga kasulatan nga dili magpaila. Human makolekta ang mga papel, dapita ang pipila ka mga estudyante sa pagsulat sa mga babag diha sa pisara samtang basahon nimo kini og kusog. Dapita ang mga estudyante sa pagpangita og mga butang sa leksiyon karon nga mahimong makatabang sa usa ka tawo sa pagbuntog niini nga mga babag.

Alma 37:21–32. Alternatibo nga mga baroganan mahitungod sa sala ug paghinulsol

Tungod kay adunay daghang mga baroganan nga makita diha sa Alma 37:21–32, ikonsiderar ang pagdapit sa mga estudyante sa pagbasa niini nga mga bersikulo ug sa pagpangita og baroganan nga makatabang kanato karon. Pipila niini nga mga baroganan mahimong maglakip sa mosunod: si Satanas nagabuhat sa tago; dili nato matago ang atong mga sala gikan sa Dios; ug ang sala mosangpot ngadto sa pag-antos ug espirituhanong kalaglagan. Kon motutok ka niini nga mga baroganan, mahimong makatabang ang paghatag og gibug-aton sa gugma ug tinguha sa Dios alang sa atong paghinulsol.