Doktrinal nga Kahanas: Alma 39:9

“Ayaw Na Pagsunod sa mga Tinguha nga Daotan sa Imong mga Mata”

Sa imong pagtuon sa Alma 39, imong nakat-onan ang mahitungod sa kamahinungdanon sa pagsunod sa balaod sa kaputli ug unsaon sa pagbatok sa tentasyon pinaagi sa pagsalig kang Jesukristo. Kini nga leksiyon makatabang kanimo sa pagsag-ulo sa tudling sa doktrinal nga kahanas ug sa mahinungdanon nga hugpong sa mga pulong sa kasulatan alang sa Alma 39:9, mapasabot ang doktrina nga gitudlo niini nga tudling, ug magamit ang mga baroganan sa pag-angkon og espirituhanong kahibalo sa tinuod nga mga sitwasyon sa kinabuhi.

Dasiga ang mga estudyante nga tinuyo nga maningkamot aron mahimong sama ni Jesukristo. Samtang maningkamot ang mga estudyante nga mahimong mas mahisama ni Jesukristo, tabangi sila nga makaila sa mga pag-aghat gikan sa Espiritu Santo sa pag-ila sa mga paagi nga sila mahimong molambo. Dasiga ang mga estudyante nga mainampoong ikonsiderar ang piho nga mga lakang nga ilang mahimo sa ilang mga paningkamot nga mahimong mas mahisama sa Manluluwas.

Pagpangandam sa estudyante: Dapita ang mga estudyante sa pagsugod sa pagsag-ulo sa mahinungdanon nga hugpong sa mga pulong sa kasulatan sa Alma 39:9. Mahimo usab nimo silang dasigon sa pagsulay sa pagsag-ulo sa tibuok bersikulo.

Posible nga mga Kalihokan sa Pagkat-on

Kini nga leksiyon sa tudling sa doktrinal nga kahanas gidesinyo nga itudlo human sa leksiyon sa “Alma 39,” nga mao ang pangkonteksto nga leksiyon alang sa tudling sa doktrinal nga kahanas sa Alma 39:9. Kon gikinahanglang ibalhin kini nga leksiyon sa tudling sa doktrinal nga kahanas sa laing semana, seguroha nga itudlo usab ang tukma nga pangkonteksto nga leksiyon nianang semanaha.

Ipasabot ug isag-ulo

Ang mahinungdanon nga hugpong sa mga pulong sa kasulatan sa doktrinal nga kahanas sa Alma 39:9 mao ang “Ayaw na pagsunod sa mga tinguha nga daotan sa imong mga mata.” Gamita ang mosunod nga pamaagi, o lain nga imong pilion, aron makatabang kanimo sa pagsag-ulo sa pakisayran ug sa mahinungdanon nga hugpong sa mga pulong sa kasulatan.

Diha sa pisara, ikonsiderar ang pagsulat sa Alma 39:9 ug pagdrowing og usa ka paresan sa mga mata sulod sa usa ka gi-ekis nga lingin. Hatagi ang mga estudyante og pipila ka minuto sa pagtuon sa mahinungdanon nga hugpong sa mga pulong sa kasulatan, dayon dapita ang pipila ka mga estudyante sa pagduol diha sa pisara ug isulat ang hugpong sa mga pulong palibot sa drowing. Ipasaysay og kusog ang tudling sa kasulatan ug ang mahinungdanon nga hugpong sa mga pulong nga magdungan isip usa ka klase sa pipila ka mga higayon hangtod nga masag-ulo kini sa mga estudyante.

Dayon ikonsiderar ang pagdapit og pipila ka mga estudyante sa pagduol sa atubangan sa lawak tunghaan aron i-drama-drama ang mosunod nga senaryo.

Handurawa nga ikaw usa ka misyonaryo nga nagtudlo og usa ka tawo bahin sa balaod sa kaputli sa unang higayon. Daklit nga ipasabot kon unsa ang balaod sa kaputli, ug gamita ang Alma 39:9 aron sa pagpasabot unsaon sa pagtuman niini.

Pagbansay sa paggamit

Hatagi ang mga estudyante og kahigayonan sa pagrebyo sa mga baroganan sa pag-angkon og espirituhanong kahibalo sa mga parapo 5–12 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2022). Human sila makarebyo, dapita sila sa pagpili og mahinungdanon nga pulong gikan sa matag baroganan nga ilang gibati nga labing maayo nga naghulagway niini. Mahimo dayong ipakigbahin sa mga estudyante kon unsa nga pulong ang ilang gipili ug kon ngano.

Gamita ang mosunod nga senaryo, o ikonsiderar ang pagpahiangay niini aron labing matubag ang mga panginahanglan sa mga estudyante, aron matabangan ang mga estudyante nga magamit ang mga baroganan sa pag-angkon og espirituhanong kahibalo.

Nalingaw si Ivan sa paggahin og oras sa social media. Mamugnaon siya ug naggamit sa nagkalainlaing mga plataporma sa social media aron ipakigbahin ang positibo nga mga mensahe. Bisan pa, nakakita usab siya og daghang mga sulod nga dili angay ug usahay bisan pornograpiya. Sa sinugdan, nakahasol kini kaniya, apan sa paglabay sa panahon, siya nahimong mas komportable niini. Bag-ohay lang, nagtinguha na gani siya og daghan pa niini nga klase nga sulod [content]. Wala siya nabalaka karon bahin sa mga pagpili nga iyang gihimo.

Pagbinayloay og mga ideya [brainstorm] kon sa unsang paagi ang pagsabot ug paggamit sa mga baroganan sa pag-angkon og espirituhanong kahibalo makatabang ni Ivan nga makita ang mga kabalaka sa iyang mga binuhatan karon. Ang mosunod nga mga pangutana ug mga kapanguhaan mahimong makatabang.

Ikonsiderar ang pagsulat sa unang pangutana sa matag seksiyon sa ubos sa pisara ug dapita ang mga estudyante sa paghisgot sa ilang mga tubag nga magpares o sa gagmay nga mga grupo. Samtang ang mga estudyante magtinabangay isip mga grupo, paglakaw-lakaw ug pagpaminaw sa unsay ilang gihisgotan. Pagpuno og dugang nga mga pangutana ug mga kapanguhaan nga gilista sa ubos kon gikinahanglan aron sa pagtabang sa mga estudyante sa dugang nga paggamit sa mga baroganan sa pag-angkon og espirituhanong kahibalo.

Susihon ang mga konsepto ug mga pangutana inubanan sa mahangtorong panglantaw

• Sa unsang paagi masusi ni Ivan ang iyang sitwasyon uban sa mahangtorong panglantaw?

• Sa unsang paagi nga ang iyang mga paningkamot sa pagpabiling limpyo diha sa iyang mga hunahuna makahimo og kalainan sa tibuok niyang kinabuhi dinhi sa yuta ug ngadto sa sunod nga kinabuhi?

• Sa unsang paagi nga ang iyang mga paningkamot makaapekto sa iyang relasyon sa Langitnong Amahan?

Tinguhaa ang dugang nga panabot pinaagi sa balaanong gitudlo nga mga tinubdan

• Unsa ang pipila ka mga ehemplo sa balaanong gitudlo nga mga tinubdan nga makatabang ni Ivan? Sa unsang paagi makatabang ang Alma 39:9?

Kon nagkinahanglan og tabang ang mga estudyante sa pagpangita og balaanong gitudlo nga mga tinubdan, ikonsiderar ang pagpakigbahin sa mosunod nga mga kapanguhaan.

• Alang sa Kalig-on sa mga Kabatan-onan: Usa ka Giya sa Paghimo og mga Pagpili (booklet, 2022), “Unsa ang buhaton sa pagkakaron”

• Mosiah 4:30; 3 Nephi 12:28–30; Doktrina ug mga Pakigsaad 42:23; 121:45

• Ang kinatibuk-ang komperensiya nga naghisgot bahin sa sekswal nga kaputli, pornograpiya, o social media nga imong makita sa Gospel Library nga app o sa ChurchofJesusChrist.org

Lihokon inubanan sa hugot nga pagtuo 

• Unsa ang mahimo ni Ivan aron molihok inubanan sa hugot nga pagtuo ug “[dili na magsunod] sa mga tinguha nga daotan sa [iyang] mga mata”? (Alma 39:9).

• Sa unsang paagi nga ang pagpaningkamot sa pagdangop kang Kristo makatabang sa iyang mga paningkamot?

• Unsa nga doktrina gikan sa plano sa Langitnong Amahan ang makatabang kang Ivan ug ngano?

• Sa imong hunahuna sa unsang paagi ang mga baroganan sa pag-angkon og espirituhanong kahibalo makatabang ni Ivan sa pag-ila sa kapeligroso sa iyang mga binuhatan karon?

• Unsay iyang mahimo aron makahimo og malungtarong mga kabag-ohan?

Kon mahuman na ang mga grupo sa ilang panaghisgotan, dapita sila sa pagpakigbahin sa unsay ilang nakat-onan ngadto sa klase. Samtang mopakigbahin ang mga estudyante, hatagi og gibug-aton ang kamahinungdanon sa ilang mga komento. Ikonsiderar sab ang pagpangutana nga makatabang sa mga estudyante nga mag-istorya isip usa ka klase, sama sa “Nganong sa imong hunahuna importante man ang gipakigbahin sa inyong klasmeyt?” o “Sa unsang paagi nga ang paggamit sa unsay gipakigbahin sa inyong klasmeyt makatabang kang Ivan?”

Rebyo sa doktrinal nga kahanas

Atol sa umaabot nga leksiyon, ipakita sa mga estudyante ang hulagway sa usa ka paresan sa mga mata sulod sa gi-ekis nga lingin ug dapita sila sa paghinumdom hain nga tudling sa doktrinal nga kahanas ang moduyog niini. Isaysay ang mahinungdanon nga hugpong sa mga pulong sa kasulatan sa pipila ka mga higayon alang sa pagrebyo.