“Alma 39: ‘Wad-a diha sa Imong Kaugalingon Kini nga mga Butang,’” Manwal sa Magtutudlo sa Basahon ni Mormon (2024)
“Alma 39,” Manwal sa Magtutudlo sa Basahon ni Mormon
Alma 39
“Wad-a diha sa Imong Kaugalingon Kini nga mga Butang”
Sa tibuok panahon, si Satanas nagpatuo sa daghang tawo nga ang sekswal nga relasyon sa gawas sa kaminyoon dalawaton. Ang Langitnong Amahan ug si Jesukristo mihatag kanato sa balaod sa kaputli alang sa atong panalipod, kalinaw, ug kalipay. Si propeta Alma mahigugmaong mitambag sa iyang anak nga lalaki nga si Corianton sa pagbiya ug paghinulsol sa iyang mga sala, lakip ang usa ka paglapas sa balaod sa kaputli. Kini nga leksiyon makatabang kanimo nga makasabot sa kabug-at sa sekswal nga sala ug kon unsaon sa pagbatok sa tentasyon sa paglapas sa balaod sa kaputli.
Tabangi ang mga tigkat-on nga makasabot ug magtinguha sa pagkakabig. Ang pagkakabig usa ka padayon nga proseso sa pagbag-o ug espirituhanong kalamboan nga atong gipakita pinaagi sa matarong nga mga paningkamot sa tibuok natong mga kinabuhi. Pangita og mga kahigayonan sa paghatag og mga kasinatian diin ang mga estudyante makaila, makahigugma, ug makasunod ni Jesukristo ug sa Iyang gipahiuli nga ebanghelyo.
Pagpangandam sa estudyante: Dapita ang mga estudyante sa paghunahuna mahitungod sa unsay ilang nahibaloan bahin sa balaod sa kaputli, unsay ilang gibati mahitungod niini, ug bisan unsa nga mga pangutana nga tingali aduna sila.
Posible nga mga Kalihokan sa Pagkat-on
Ang balaod sa kaputli
Ikonsiderar ang pagsulat sa mosunod nga mga pamahayag diha sa pisara. Bag-oha o pagdugang og mga pamahayag nga tingali mas makaandam sa imong mga estudyante sa pagkat-on mahitungod sa balaod sa kaputli.
Basaha ang mosunod nga mga pamahayag ug tinoa kon hain sa mosunod ang labing maayo nga nagrepresentar sa imong mga pagbati:
-
Dili ako mouyon - Kasagaran dili ako mouyon - Kasagaran mouyon ako - Ako mouyon
-
Ang mga kabatan-onan sa Ang Simbahan ni Jesukristo sa mga Santos sa Ulahing mga Adlaw klaro nga nakasabot sa balaod sa kaputli, o sa balaod sa Ginoo sa sekswal nga kaputli.
-
Sila nakasabot nganong mahinungdanon kini ug nganong gusto sa Ginoo nga ato kini nga puy-an.
-
Mahimong lisod ang pagsunod sa balaod sa kaputli sa kalibotan karon.
-
Ang mga kabatan-onan sa Simbahan nasayod unsaon pagbatok sa tentasyon ug pagpabilin sa ilang mga kaugalingon nga putli sa sekswal nga paagi.
Dapita ang mga estudyante sa pagpakigbahin kon miuyon ba sila o wala mouyon sa mga pamahayag sa ibabaw ug ngano.
Ang balaod sa kaputli mao ang balaod sa Ginoo sa sekswal nga kaputli. Ang pagsunod sa balaod sa kaputli nagpasabot sa pagpabilin sa imong kaugalingon nga limpyo sa hunahuna, pulong, ug binuhatan, lakip ang pagpalayo sa bisan unsa nga pornograpiya. Nagpasabot usab kini sa paglikay sa bisan unsang sekswal nga relasyon sa wala pa ang kaminyoon ug hingpit nga pagkamatinud-anon sa imong asawa o bana sa panahon sa kaminyoon. “Sama sa ubang mga kalapasan sa balaod sa kaputli, ang homosekswal nga kalihokan usa ka bug-at nga sala. Sukwahi kini sa mga katuyoan sa tawhanong sekswalidad” (Gospel Topics, “Chastity,” topics.ChurchofJesusChrist.org).
Paggahin og kadiyot sa pagpamalandong sa imong pagsabot ug mga pagbati mahitungod sa balaod sa kaputli. Unsay imong mga pangutana? Nganong mahinungdanon man kini kanimo? Unsa nga mga tentasyon mahitungod sa kaputli ang imong giatubang? Samtang magtuon ka niini nga leksiyon, pangitaa ang mga tubag sa imong mga pangutana ug ang tabang sa pagbuntog sa imong mga tentasyon.
Gitambagan ni Alma ang iyang anak nga lalaki nga si Corianton
Ang Alma 39 mao ang una sa upat ka kapitulo nga naglangkob sa tambag, mga sugo, ug mga pagtulun-an gikan ni Alma ngadto sa iyang anak nga lalaki nga si Corianton. Si Corianton miuban sa iyang amahan ug igsoon nga lalaki nga si Shiblon sa pagsangyaw sa ebanghelyo taliwala sa mga Zoramite. Atol niini nga misyon, bisan pa niana, si Corianton nakahimo og pipila ka bug-at nga mga sala.
Basaha ang Alma 39:1–5, mangita sa mga sayop nga nahimo ni Corianton ug unsay gibati ni Alma ug sa Ginoo mahitungod niini. (Ang pulong nga babaye nga nagbaligya sa iyang dungog diha sa bersikulo 3 nagpasabot sa usa ka imoral nga babaye o pampam.)
Dapita ang mga estudyante sa pagpakigbahin sa mga pulong o mga hugpong sa mga pulong sa kasulatan nga nagpaila kon unsay gibuhat ni Corianton ug unsay gibati ni Alma ug sa Ginoo mahitungod niini.
Aron matabangan ka sa pagpamalandong ngano nga ang paglapas sa balaod sa kaputli “makapayugot” sa usa ka amahan ug sa usa ka propeta (Alma 39:3) ug usa ka “salawayon diha sa panan-aw sa Ginoo” (Alma 39:5), mahimong makatabang ang pagsabot sa mga panalangin sa paghupot niini. Basaha ang mahitungod sa mga panalangin ug gahom sa “Ang pagsunod sa balaod sa kaputli” diha sa pahina 26 sa Alang sa Kalig-on sa mga Kabatan-onan: Usa ka Giya sa Paghimo og mga Pagpili (booklet, 2022).
Tugoti ang mga estudyante nga ipakigbahin ang unsay ilang nakaplagan.
-
Sa unsang paagi nga ang pagsunod sa balaod sa kaputli nag-andam kanato sa pagdawat og dagkong mga panalangin gikan sa Ginoo niini nga kinabuhi ug sa sunod?
Ikonsiderar ang paglista sa mosunod nga duha ka pangutana diha sa pisara ug dapita ang mga estudyante nga magtinabangay nga magpares o sa gagmay nga mga grupo aron sa pagpangita og mga tubag diha sa mga kasulatan. Dayon hisgoti ang sunod nga duha ka pangutana isip usa ka klase.
-
Unsa ang mahitabo kon ang usa ka tawo dili maghinulsol sa sekswal nga sala? (Alma 39:7–9)
-
Unsa ang kasagarang mataligam-an nga sangpotanan sa paglapas sa balaod sa kaputli? (Alma 39:11–13)
-
Base sa unsay imong nakat-onan, nganong ang usa ka ginikanan, propeta, ug ang Ginoo adunay ingon ka lig-on nga mga pagbati mahitungod sa kaputli?
-
Sa unsang paagi nga ang balaod sa kaputli nagpakita sa gugma sa Dios alang sa Iyang mga anak?
“Ayaw na pagsunod sa mga tinguha nga daotan sa imong mga mata”
Agi og dugang sa pagtudlo sa iyang anak nga lalaki mahitungod sa kabug-at sa sekswal nga sala, gitudloan usab ni Alma si Corianton unsaon paglikay sa paghimo sa samang mga sayop sa umaabot.
Irebyo ang Alma 39:9 ug Alma 39:13, mangita sa mga pulong o mga hugpong sa mga pulong nga makatabang kanimo sa pagbatok sa tentasyon ug sa pagsunod sa balaod sa kaputli. (Ang hugpong sa mga pulong nga “wad-a diha sa imong kaugalingon” sa bersikulo 9 nagpasabot sa pagpugong sa kaugalingon o kahanas sa pagdumala sa kaugalingon.)
Ang Alma 39:9 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas dali ra nimo kining makit-an. Mahatagan ka og kahigayonan sa sunod nga leksiyon sa pagpraktis sa paggamit sa doktrina nga gitudlo niini nga tudling ngadto sa usa ka pangutana o sitwasyon.
Dapita ang mga estudyante sa pagpakigbahin sa unsay ilang nakaplagan.
-
Unsa nga baroganan ang gitudlo ni Alma kang Corianton niini nga mga bersikulo?
Usa ka posibleng baroganan gikan niini nga mga bersikulo mao ang samtang kita mogamit sa pagpugong sa kaugalingon ug modangop sa Ginoo, atong mabuntog ang tentasyon sa paglapas sa balaod sa Dios sa kaputli.
Ang pagpugong sa kaugalingon ug pagdangop sa Ginoo aron mabuntog ang tentasyon usahay lisod. Makatabang ang paghunahuna og nagkalainlaing mga paagi sa pagbuhat niini ug dayon pagsunod sa mga pag-aghat gikan sa Espiritu kon unsa ang labing makatabang diha kanimo.
Sa dili pa buhaton ang mosunod nga kalihokan, ikonsiderar ang pagdapit sa kabatan-onan sa pagbinayloay og mga ideya [brainstorm] sa mga paagi nga sila makadangop ngadto sa Ginoo ug makabuntog sa mga tentasyon sa paglapas sa balaod sa kaputli. Mahimo dayon nilang buhaton ang duha sa mosunod aron pagkompirma o pagdugang sa ilang mga ideya.
Ikonsiderar ang paglista sa mosunod diha sa pisara. Ikonsiderar ang pagtangtang sa bidyo gikan sa lista ug pangutan-a ang klase human sa ilang pagtuon kon gusto ba nila kining tan-awon.
-
Basaha ang nahabilin nga tambag bahin sa sekswal nga kaputli diha sa Alang sa Kalig-on sa mga Kabatan-onan: Usa ka Giya sa Paghimo og mga Pagpili (tan-awa sa “sekswal nga kaputli” diha sa seksiyon sa “Unsa man kaha ang gitudlo mahitungod sa … ?”). Alang sa dugang nga tambag gikan sa mga sakop sa Korum sa Napulog Duha ka Apostoles, ikonsiderar ang pagbasa sa “Kita Nagtuo sa Pagkaputli” (David A Bednar, Liahona, Mayo 2013, 41–44).
-
Pangita og mga kasulatan nga imong gibati nga makapalig-on kanimo batok sa mga tentasyon sa paglapas sa balaod sa kaputli. Mahimo ka usab nga maglista og mga himno, o mga kanta sa Primary nga mahimo nimong dangpan alang sa kalig-on kon matintal.
-
Paglista og mga paagi nga mahimo nimong paningkamotan nga “mobalik sa Ginoo” uban sa imong “hunahuna, gahom, ug kusog” (Alma 39:13). Ilakip ang unsay imong nahimo kaniadto nga imong gibati nga nakapalig-on kanimo.
-
Isulat ang tambag nga imong nadawat gikan sa mga ginikanan ug mga lider sa Simbahan nga makatabang nimo batok sa tentasyon.
-
3:59
Human sa pipila ka minuto, ikonsiderar ang pagdapit og pipila ka mga estudyante sa pagpakigbahin sa ilang mga ideya ug sa unsang paagi kini nga mga ideya makatabang kanila sa pagbuntog sa tentasyon. Kon imong gibati nga ang imong klase mahimong maglisod sa dayag nga paghisgot niini nga hilisgotan, dapita ang mga estudyante sa pagpakigbahin sa ilang mga hunahuna nga dili magpaila diha sa usa ka piraso nga papel. Tigoma ang mga papel ug basaha kini ngadto sa klase.
Personal nga pagpamalandong
Paggahin og kadiyot sa pagpamalandong nganong gusto nimo nga magpabiling putli sa sekswal nga paagi. Dayon irekord ang mga lakang nga imong buhaton aron padayong mosunod sa balaod sa Ginoo sa kaputli. Ikonsiderar kon unsa kaha ang gidasig sa Espiritu Santo nga imong buhaton, ug irekord ang bisan unsang dugang nga mga hunahuna diha sa imong journal sa pagtuon. Kon ikaw o imong kaila nakalapas sa balaod sa kaputli, hinumdomi nga si Jesukristo “[mianhi] aron sa pagkuha sa mga sala sa kalibotan” (Alma 39:15) ug mopasaylo sa tanan kinsa sinsero nga maghinulsol ug mobiya sa ilang mga sala (tan-awa sa Mosiah 26:30, Alma 39:9).
Ikonsiderar ang paghatag sa imong pagpamatuod.