Վարդապետության սերտում. Ալմա 41.10

«Ամբարշտությունը երբեք երջանկություն չի եղել»

տխուր երիտասարդի նկար

Ալմա 41.10 հատվածից սովորեցիք, որ «ամբարշտությունը երբեք երջանկություն չի եղել»։ Այս դասը կօգնի ձեզ մտապահել Ալմա 41.10 հատվածի վարդապետության սերտման հղումն ու հիմնական արտահայտությունը, բացատրել վարդապետությունը և իրական կյանքի իրավիճակներում կիրառել հոգևոր գիտելիքներ ձեռք բերելու սկզբունքները։

Օգնեք ուսանողներին դառնալ ակտիվ մասնակիցներ։ Ուսանողներն ակտիվ են, երբ մտքով և սրտով ներգրավվում են ավետարանը սովորելու գործընթացում։ Ահա ակտիվ մասնակցությունը խթանելու մի քանի եղանակ․ օգնեք ուսանողներին բացահայտել ավետարանի ճշմարտությունների կարևորությունը, խրախուսեք նրանց հարցեր տալ ու պատասխաններ փնտրել, առաջարկեք նրանց կիսվել իրենց գաղափարներով, փորձով ու զգացողություններով և զարգացնել սուրբ գրությունների ուսումնասիրության հմտությունները, ժամանակ տրամադրել խորհելու և աղոթելու համար։

Ուսանողի նախապատրաստում․ ուսանողներին առաջարկեք մատապահել Ալմա 41.10 հատվածը։

Հնարավոր ուսումնական վարժություններ

Վարդապետության սերտման այս հատվածի դասը նախատեսված է անցկացնել «Ալմա 41» դասից հետո, որը Ալմա 34.9–10 վարդապետության սերտման հատվածի ուսումնասիրման համատեքստային դասն է։ Եթե վարդապետության սերտման այս դասն անհրաժեշտ է տեղափոխել մեկ այլ շաբաթ, համոզվեք, որ այդ շաբաթ կուսուցանվի նաև համապատասխան համատեքստային դասը:

Մտապահեք և բացատրեք

Խրախուսեք ուսանողներին վարդապետության սերտման հնարավորինս շատ հատվածներ մտապահել։

Օգտագործեք ստորև ներկայացվող վարժությունները կամ որևէ այլ արդյունավետ միջոց, որով ուսանողներին կօգնեք մտապահել Ալմա 41.10 հատվածի հղումն ու հիմնական սուրբգրային արտահայտությունը և բացատրեք այդ հատվածում ուսուցանվող վարդապետությունը։

Ուսանողներին բաժանեք զույգերի: Առաջին ուսանողին հանձնարարեք բարձրաձայն ասել առաջին բառը՝ «ամբարշտություն»։ Երկրորդ ուսանողին հանձնարարեք բարձրաձայն ասել առաջին և երկրորդ բառերը՝ «ամբարշտությունը երբեք»։ Շարունակեք ամեն անգամ բառ ավելացնել և վերջում՝ հղումը, մինչև վերջին ուսանողն ասի ամբողջ արտահայտությունն ու հղումը․ «ամբարշտությունը երբեք երջանկություն չի եղել (Ալմա 41.10)»։

Ուսանողներին առաջարկեք այս գործընթացը կրկնել մի քանի անգամ՝ յուրաքանչյուր անգամ փոխելով առաջին ուսանողին։

Մտածեք այնպիսի իրավիճակի մասին, երբ ինչ-որ մեկին օգտակար կլինի Ալմա 41.10 հատվածում ուսուցանվող վարդապետությունը։ Ապա բացատրեք, թե վարդապետությունն ինչպես կարող է օգնել տվյալ իրավիճակում։

Ուսանողներին կարող եք առաջարկել զրուցել միմյանց հետ՝ իրենց մտածած իրավիճակի մասին կիսվելով դասընկերների հետ։ Իրավիճակի մասին կիսվելուց հետո մյուս դասընկերը կարող է բացատրել, թե Ալմա 41.10 հատվածի ճշմարտություններն ինչպես կարող են օգնել։

Գործնական կիրառում

Դասարանը բաժանեք երեք ուսանողից բաղկացած խմբերի: Յուրաքանչյուր ուսանողի խնդրեք հոգևոր գիտելիքներ ձեռք բերելու որևէ սկզբունք ընտրել և Վարդապետության սերտման հիմնական փաստաթղթում կարդալ իր սկզբունքին համապատասխանող պարբերությունը (2022)։ Երբ ուսանողներն ավարտեն, առաջարկեք նրանց իրենց խմբին բացատրել սկզբունքը։ Համապատասխանեցման հետևյալ վարժությունը կարող է օգնել ուսանողներին վերհիշել սովորածը։ Համապատասխանեցման վարժության պատասխաններն են՝ (1) B, F, (2) C, E, և (3) A, D։

Վարդապետության սերտման հիմնարար փաստաթղթում (2022) վերանայեք հոգևոր գիտելիքներ ձեռք բերելու հետևյալ երեք սկզբունքներից յուրաքանչյուրը։ Հետո A–F արտահայտությունները կցեք համապատասխան սկզբունքին։ Յուրաքանչյուր սկզբունքի հետ կապված երկու արտահայտություն կա։

1. «Գործեք հավատքով»

2. «Քննեք հասկացություններն ու հարցերը հավերժության հեռանկարով»

3. «Մեծացրեք հասկացողությունը աստվածայնորեն սահմանված աղբյուրների միջոցով»

1. «Առաջին Նախագահությունը և Տասներկու Առաքյալների Քվորումը՝ այսօր երկրի վրա Տիրոջ մարգարեները, ճշմարտության կենսական աղբյուր են հանդիսանում։

2. «Երբ մենք ձգտում ենք զարգացնել մեր հասկացողությունը և լուծել մտահոգությունները, կարևոր է, որ ապավինենք այն վկայությանը, որն արդեն իսկ ունենք Հիսուս Քրիստոսի մասին»։

3. «Մենք պիտի դիտարկենք [հարցերը] փրկության ծրագրի և Փրկչի ուսմունքների համատեքստում»։

4. «Անվստահելի աղբյուրները տարբերելը և դրանցից խուսափելը կարող է պաշտպանել մեզ ապատեղեկատվությունից և նրանցից, ովքեր փորձում են ոչնչացնել հավատքը»։

5. «Մենք փնտրում ենք Սուրբ Հոգու օգնությունը, որպեսզի տեսնենք բաներն այնպես, ինչպես Տերն է տեսնում»։

6. Երբ շարունակում ենք պատասխաններ փնտրել, մենք պետք է ապրենք հավատքով՝ վստահելով, որ մենք, ի վերջո, կստանանք մեր փնտրած պատասխանները»։

Եթե հոգևոր գիտելիքներ ձեռք բերելու սկզբունքները վերանայելու համար ուսանողներին բաժանել եք խմբերի, օգտակար կլինի պահպանել խմբերը։

Ցուցադրեք հետևյալ սցենարը, որպեսզի ուսանողները կարողանան միասին աշխատելու ընթացքում օգտվել դրանից։

Կառլոսը, որը Եկեղեցու անդամ է, դժվարանում է հասկանալ Աստծո պատվիրանները պահելու կարևորությունը։ Նա վերջերս ասել է ձեզ. «Ես գիտեմ շատ մարդկանց, որոնք խախտում են պատվիրանները և, կարծես, հիանալի կյանքով են ապրում։ Ինչպե՞ս կարող եք ասել, որ երջանիկ լինելու համար պետք է պահել պատվիրանները»։ Դուք տեսնում եք Կառլոսի հարցի անկեղծությունը, բայց զգում եք, որ պատասխանելու համար ձեզ ժամանակ է հարկավոր, որպեսզի հավաքեք ձեր բոլոր մտքերը։ Երկուսդ էլ համաձայնում եք նրա հարցի մասին ավելի մանրամասն խոսել հաջորդ օրը։

Օգտագործելով այն, ինչ սովորել և զգացել եք Ալմա 41.10 հատվածի և հոգևոր գիտելիքներ ձեռք բերելու սկզբունքների ուսումնասիրությունից՝ պատրաստվեք քննարկելու Կառլոսի հարցը։

Ձգտեք մեծացնել հասկացողությունը աստվածայնորեն սահմանված աղբյուրների միջոցով

1. Սուրբ գրություններն աստվածային աղբյուրներ են, որոնք կարող են օգնել մեզ պատասխանել մեր հարցերին։ Կարդացեք Ալմա 41.10 հատվածը և գտեք վարդապետության սերտման առնվազն մեկ այլ հատված, որը կարող է օգնել ձեզ պատասխանել։

   Ուսանողները կարող են աշխատել իրենց խմբերում՝ գտնելով և քննարկելով վարդապետության սերտման լրացուցիչ հատվածներ, որոնք կարող են օգնել Կառլոսին։ Օգտակար հատվածներ են 2 Նեփի 2.25, 27 և Մոսիա 2.41 հատվածները։

2. Մտածեք, թե լրացուցիչ տեղեկության համար ինչ աղբյուրներ կառաջարկեիք Կառլոսին վերանայել։ Կարող եք նույնիսկ բացատրել, թե հոգևոր հարցերի առումով ինչով է աղբյուրը հուսալի։

Հասկացություններն ու հարցերը քննեք հավերժության հեռանկարով

Խմբերի ուսանողներից յուրաքանչյուրը կարող է ինքնուրույն պատասխանել հետևյալ հարցերից մեկին, ապա իր պատասխաններով կիսվել խմբի հետ։

Օգնեք ուսանողներին բացահայտել, թե ինչ եզրահանգումներ կարող է ունենալ Կառլոսը։ Եթե ուսանողներն օգնության կարիք ունենան, կարող եք կիսվել ստորև բերվածներից մեկով կամ մի քանիսով․ Կառլոսը կարող է մտածել, որ պատվիրաններն արգելում կամ սահմանափակում են իր ընտրության կարողությունը։ Նա կարող է սխալմամբ մտածել, որ երջանկություն կարելի է գտնել ժամանակավոր հաճույքներում։

Հետևյալ հարցերը կարող են օգնել ձեզ բացահայտել Կառլոսի եզրահանգումները․

• Ի՞նչ եզրահանգումներ կարող է ունենալ նա պատվիրանների կամ երջանկության մասին։

• Ավետարանի ո՞ր ուսմունքներն են վերաբերում կամ պատասխանում նրա հարցին։

• Ըստ ձեզ՝ Կառլոսն ի՞նչ պետք է իմանա Երկնային Հոր, Նրա ծրագրի և այն մասին, թե Նա ինչպես է վարվում Իր զավակների հետ։

Գործեք հավատքով

Խմբերի ուսանողներին կարելի է առաջարկել ինքնուրույն բացահայտել պատվիրանները, հետո միանալ և կիսվել իրենց օրինակներով։ Նրանք կարող են միասին աշխատել և ներկայացնել առաջարկներ, թե Կառլոսն ինչպես կարող է գործել հավատքով՝ կամ ավելի մեծ հասկացողություն փնտրելով կամ պատվիրաններին հետևելու ծրագիր կազմելով։

Կառլոսը կարող է հավատքով գործել, երբ ձգտի ավելի լավ հասկանալ Երկնային Հոր պատվիրանները։ Պատվիրանների կարևորությունը ավելի խորությամբ հասկանալու ձգտումը և պատվիրանները պահելու որոշման կայացումը նույնպես նշանակում է հավատքով գործել։ Ընտրեք առնվազն երկու պատվիրան և պարզեք, թե դրանք պահելն ինչպես կարող է օգնել Կառլոսին երջանկություն զգալ, կամ դրանք խախտելն ինչպես կարող է թշվառության հանգեցնել։ Կարող եք կիսվել նաև, թե պահելով այդ պատվիրանները ինչպես եք երջանկության հասել։

Ուսանողներին առաջարկեք կիսվել իրենց պատրաստածով։ Եթե ժամանակ մնա, կարող եք դասարանին առաջարկել մտածել, թե Կառլոսը ինչ տարբեր եղանակներով կարող էր արձագանքել։ Ապա առաջարկեք ուսանողներին միանալ իրենց խմբերին և համապատասխանեցնել իրենց ծրագրերը։ Ուսանողները կարող են դերախաղով ներկայացնել դասարանի առաջ կամ իրենց խմբերում։ Դերախաղի ժամանակ նրանք կարող են նաև տեքստային հաղորդագրություններ գրել միմյանց։

Վարդապետության սերտման կրկնություն

Ստորև ներկայացվող կրկնությունը կարելի է անել հետագա դասերից մեկի ժամանակ։ Ուսանողներին հարցրեք՝ արդյոք կարող են հիշել Ալմա 41.10 հատվածի հիմնական սուրբգրային արտահայտությունը։ Անհրաժեշտության դեպքում հիշեցրեք նրանց մտապահելու վարժությունը, որը կատարել են այս դասի սկզբում։ Ուսանողներին առաջարկեք կրկնել հղումը և հիմնական արտահայտությունն այնքան, մինչև մտապահեն դրանք։