Ալմա 40

Հոգիների աշխարհը և Հարությունը

Երբ Կորիանթոնի հայրը հորդորեց նրան ապաշխարել, Կորիանթոնը որոշ հարցեր ուներ Աստծո ծրագրի և այն մասին, թե ինչ է տեղի ունենում մեզ հետ մահից հետո։ Նրա հայրը՝ Ալման, պատասխանեց նրա հարցերին և վկայեց Երկնային Հոր ծրագրում Հիսուս Քրիստոսի կենտրոնական դերի մասին։ Այս դասը կօգնի ձեզ ավելի խորությամբ գնահատել այն, ինչ Փրկիչն արել է ձեզ համար և հնարավորություն կտա բացատրել, թե ինչ է տեղի ունենում, երբ մենք մահանում ենք։

Օգնեք ուսանողներին կենտրոնանալ Հիսուս Քրիստոսի վրա։ Ավետարանի ճշմարտություններին առնչվող մանրամասները նկարագրելիս ուսուցիչները կարող են ակամա չափազանց շատ ժամանակ ծախսել։ Արդյունքում նրանք կարող են բաց թողնել հնարավորությունը՝ օգնելու ուսանողներին լիարժեք ծանոթանալ Փրկչին և սիրել Նրան։ Ժամանակ հատկացրեք, որպեսզի ուսուցանեք և վկայեք Հիսուս Քրիստոսի զորության, սիրո և ողորմածության, ինչպես նաև Երկնային Հոր փրկության ծրագրում Նրա կենտրոնական դերի մասին։

Ուսանողի նախապատրաստում․ ուսանողներին առաջարկեք մտածել այն հարցերի շուրջ, թե ինչ է տեղի ունենում մարդու մահից հետո և պատրաստվել կիսվելու։

Հնարավոր ուսումնական վարժություններ

Հարցեր

Քույր Ըբարթոոյի կյանքից ստորև ներկայացվող պատմությունը կարող է օգնել ուսանողներին պատրաստվել ուսումնասիրելու Ալմա 40 գլուխը։ Որպես այլընտրանք՝ ուսանողները կարող են գրատախտակին գրել մահից հետո կյանքի մասին ունեցած որոշ հարցեր։

Սփոփող միության գերագույն նախագահության խորհրդական քույր Ռեյնա Ի․ Ըբարթոն կիսվել է անձնական փորձով՝ խոսելով մեզ հետաքրքրող այն հարցերի մասին, թե ինչ է տեղի ունենում, երբ մենք մահանում ենք։ Դիտեք «Գերեզմանը հաղթանակ չունի» տեսանյութի 4:21-5:13 հատվածը, որը հասանելի է ChurchofJesusChrist.org կայքում կամ կարդացեք ստորև բերված խոսքերը․

Երբ ես ինը տարեկան էի, կորցրեցի իմ ավագ եղբորը ավերիչ երկրաշարժի ժամանակ։ Քանի որ դա տեղի ունեցավ անսպասելի, որոշ ժամանակ պահանջվեց, որպեսզի ես կարողանայի ընկալել կատարվածը։ Վիշտը համակել էր ինձ, և ես ինքս ինձ հարցնում էի. «Ի՞նչ պատահեց եղբորս հետ։ Ո՞րտեղ է նա: Ո՞ւր գնաց նա: Ես երբևէ նորից կտեսնե՞մ նրան»։

Այդ ժամանակ ես չգիտեի Աստծո փրկության ծրագրի մասին և ցանկանում էի իմանալ, թե որտեղից ենք մենք գալիս, որն է կյանքի նպատակը, և ինչ է տեղի ունենում մեզ հետ մահից հետո։ Չէ՞ որ բոլորս էլ նույն հարցերն ենք ունենում, երբ կորցնում ենք սիրելիին կամ կյանքում դժվարություններ ենք ունենում։ (Ռեյնա Ի. Ըբարթո, «Գերեզմանը հաղթանակ չունի», Լիահոնա, մայիս 2021 թ․, 86)։

Ալմայի որդի Կորիանթոնը նույնպես մտահոգություններ ուներ մահից հետո կյանքի մասին։

Կարդացեք Ալմա 40.1 հատվածը և փնտրեք, թե ինչ մտահոգություն ուներ Կորիանթոնը։

• Ըստ ձեզ՝ նա ինչո՞ւ կարող էր մտահոգվել այդ հարցի վերաբերյալ։

Հիշեք, որ Կորիանթոնը խախտել էր Աստծո պատվիրաններն ու մաքրաբարոյության օրենքը։ Գուցե նա իր ընտրությունների պատճառով էր մտահոգվում, թե ինչ վիճակում է հայտնվելու այս կյանքից հետո։ Ալման Կորիանթոնին ուսուցանեց վարդապետությունը, որպեսզի օգնի նրան հաղթահարել մտահոգությունները և ապաշխարել։ Պատասխանը, որ Ալման տվել էր Կորիանթոնի մտահոգություններին, կարող է օգնել նաև նրանց, ովքեր ունեն քույր Ըբարթոյի հարցերի նման հարցեր։

Ավելի ուշ քույր Ըբարթոյին ուսուցանեցին միսիոներները, որոնք օգնեցին նրան գտնել իր հարցերի պատասխանները։ Պատկերացրեք, որ դուք այդ միսիոներներից մեկն եք և պատրաստվում եք ուսուցանել նրան։ Ստորև ներկայացված նյութերի օգնությամբ պատրաստեք կարճ բացատրություն, որը կօգնի պատասխանել քույր Ըբարթոյի հարցերին։

Դասարանը բաժանեք զույգերի, որպեսզի պատրաստվեն ուսուցանել որպես միսիոներներ։ Յուրաքանչյուր զույգի հանձնարարեք ուսումնասիրել կամ հոգիների աշխարհը, կամ հարությունը՝ տրամադրելով նրանց համապատասխան աշխատաթերթը։

Ուսանողները կարող են պատկերացնել, որ պատրաստվում են ուսուցանել քույր Ըբարթոյին, ուստի որպես այլընտրանք կարող են փնտրել դասարանի անդամների հարցերի պատասխաններ։

Հոգիների աշխարհը

Մորմոնի Գիրք. Ուսուցչի ձեռնարկ (2024). «Ալմա 40․ Հոգիների աշխարհը և Հարությունը»

Կարդացեք Ալմա 40.6–7, 11–14 հատվածները և գտեք, թե Ալման ինչ ուսուցանեց Կորիանթոնին։ Ապա օգտագործեք հետևյալ նյութերը, որոնք կօգնեն ձեզ պատրաստվել ուսուցմանը։

• Վարդապետություն և Ուխտեր 138.11–13, 18–22, 57

• Սուրբ գրքերի ուղեցույց, «Դրախտ», scriptures.ChurchofJesusChrist.org

Առաջին Նախագահությունից նախագահ Դալլին Հ. Օուքսն ուսուցանել է.

Սուրբ գրություններից սովորում ենք, որ մեր մարմնական մահից հետո, մենք, որպես հոգիներ, շարունակում ենք ապրել հոգիների աշխարհում: Սուրբ գրությունները նաև սովորեցնում են, որ հոգիների աշխարհը բաժանված է՝ այս կյանքում արդար ապրած կամ արդարակյաց մարդկանց և ամբարիշտ մարդկանց միջև: Սուրբ գրությունները նաև նկարագրում են, թե ինչպես են հավատավոր հոգիներից ոմանք ավետարանը ուսուցանում նրանց, ովքեր ամբարիշտ կամ ըմբոստ կյանքով են ապրել (տես Ա Պետրոս 3.19, Վարդապետություն և Ուխտեր 138.19–20, 29, 32, 37)։ (Դալլին Հ. Օուքս, «Ապավինիր Տիրոջը», Լիահոնա, նոյեմբեր 2019 թ․, 26)

Պատրաստվեք բացատրելու հետևյալ հարցերի պատասխանները․

• Ի՞նչ է տեղի ունենում մեր հոգիների հետ, երբ մահանում ենք։

• Ի՞նչ է տեղի ունենում մեր հոգիների հետ դրախտում։ Ի՞նչ է տեղի ունենում մեր հոգիների հետ այն վայրում, որը Ալման անվանում է «արտաքին խավար», որը սակայն նաև հոգիների բանտ (Ա Պետրոս 3.19) կամ դժոխք են (2 Նեփի 9.12) անվանում։

• Դրախտի և բանտի մասին իմանալն ինչպե՞ս կարող է օգնել մեզ ավելի մեծ երախտագիտություն ունենալ Փրկչի հանդեպ։

• Հոգիների աշխարհի մասին մեր գիտելիքն ինչպե՞ս կարող է օրհնել մեզ մեր մահկանացու կյանքում։

Ուսուցանելիս անպայման հստակեցրեք, որ մահվան և հարության միջև արդարների հոգիները բնակվում են դրախտում, իսկ ամբարիշտների հոգիները՝ հոգիների բանտում։ Կիսվեք, թե այս ճշմարտության ըմբռնումն ինչպես է ազդում այս կյանքում ձեր կատարած ընտրությունների վրա։

© 2023 by Intellectual Reserve, Inc. All rights reserved.

Հարություն

Մորմոնի Գիրք. Ուսուցչի ձեռնարկ (2024). «Ալմա 40․ Հոգիների աշխարհը և Հարությունը»

Կարդացեք Ալմա 40.2–5, 23–24 հատվածները և գտեք, թե ինչ էր ուսուցանել Ալման Կորիանթոնին։ Ապա օգտագործեք հետևյալ նյութերը, որոնք կօգնեն ձեզ պատրաստվել ուսուցմանը։

• Ալմա 11.42–45

• Սուրբ գրքերի ուղեցույց, «Հարություն», scriptures.ChurchofJesusChrist.org

Առաջին Նախագահությունից նախագահ Դալլին Հ. Օուքսն ուսուցանել է.

Զատիկի այս օրերին մենք տոնում ենք Հարության իրողությունը։ Այն մեզ ուժ և հեռանկար է տալիս դիմակայելու մահկանացու կյանքի մարտահրավերներին, որոնց բախվում ենք մենք և մեր հարազատները, օրինակ՝ ֆիզիկական, մտավոր և էմոցիոնալ տկարություններին, որ մեզ հետ են ի ծնե կամ ձեռք ենք բերում մահկանացու կյանքի ընթացքում: Հարության շնորհիվ մենք գիտենք, որ այդ մահկանացու տկարությունները ժամանակավոր են: (Դալլին Հ․ Օուքս, «Մեծ ծրագիրը», Լիահոնա, մայիս 2020 թ., 94–95)։

Պատրաստվեք բացատրելու հետևյալ հարցերի պատասխանները․

• Ի՞նչ է հարությունը: Ո՞վ է հարություն առնելու:

• Ըստ Ալմա 40.2–3 հատվածի՝ ի՞նչն է հնարավոր դարձնում Հարությունը։

• Հարության մասին մեր գիտելիքն ինչպե՞ս կարող է օրհնել մեզ մեր մահկանացու կյանքում։

Ուսուցանելիս անպայման հստակեցրեք, որ Հիսուս Քրիստոսի հարության շնորհիվ մենք նույնպես հարություն ենք առնելու։ Նշեք մեկ պատճառ, որով երախտապարտ եք հարության խոստման համար։

© 2023 by Intellectual Reserve, Inc. All rights reserved.

Եթե ուսանողները լրացուցիչ օգնության կարիք ունենան, օգտագործեք հետևյալ տեսանյութը՝ հասկանալու համար, թե ինչ է տեղի ունենում մեր մահից հետո։

Կարող եք դիտել «Ի՞նչ է տեղի ունենում մեր մարմինների և հոգիների հետ, երբ մենք մահանում ենք» տեսանյութը (4:19), որը հասանելի է ChurchofJesusChrist.org կայքում, և փնտրեք այլ ճշմարտություններ, որոնք կարող եք բացատրել ուսուցանելիս։

Երբ ուսանողներն ավարտեն պատրաստվելը, առաջարկեք նրանց ուսուցանել մի քանի այլ ուսանողի, որոնք այլ թեմա են պատրաստել։ Անհրաժեշտության դեպքում կարող եք օգնել նրանց ուսուցանելու ժամանակ։

Երբ ուսանողներն ավարտեն ուսուցանել իրենց դասերը, կարող եք դասարանի հետ կարճ քննարկում անցկացնել՝ օգտագործելով հետևյալ հարցերից մի քանիսը կամ բոլորը։

• Ինչո՞ւ է ձեզ համար կարևոր այն, ինչ սովորեցիք հոգիների աշխարհի և հարության մասին։

• Ինչպե՞ս է այդ գիտելիքն ազդում Երկնային Հոր և Հիսուս Քրիստոսի հանդեպ ունեցած ձեր զգացմունքների վրա:

• Ի՞նչ հարցեր ունեիք, որոնց պատասխանները այսօր ստացաք։

• Ո՞ր հարցերի պատասխաններն եք ցանկանում շարունակել փնտրել:

Ուսանողներին հիշեցրեք, որ մենք դեռ չունենք բոլոր պատասխանները, և որ չպատասխանված հարցեր ունենալը նորմալ է։ Առաջարկեք նրանց պատասխաններ փնտրելիս հետևել հոգևոր գիտելիքներ ձեռք բերելու սկզբունքներին։

Կարող եք կիսվել ձեր վկայությամբ Հարության պարգևի և այն խաղաղության մասին, որը Հիսուս Քրիստոսի Քավության շնորհիվ մենք կարող ենք ստանալ հոգիների աշխարհում։

Բացատրական և պատմական տեղեկություններ

Ալմա 40.16–20 Ի՞նչ է Առաջին հարությունը։

Տասներկու Առաքյալների Քվորումից երեց Բրյուս Ռ. Մակքոնկին (1915–85) ուսուցանել է.

Այս հարության առավոտ հարություն առնողները երկնային մարմիններով են հարություն առնում և պետք է երկնային փառք ժառանգեն․ նրանք Քրիստոսի առաջնապտուղներն են։ Այս հարության երեկո հարություն առնողները երկրային մարմիններով են հարություն առնում և հետևաբար պետք է ժառանգեն այդ արքայությունը․ նրանք նկարագրվում են որպես Քրիստոսինը այդ հարության ժամանակ։ Մինչ այժմ հարություն առածները երկնային մարմիններ են ստացել, երկրային էակների ի հայտ գալը չի սկսվի մինչև Երկրորդ Գալուստը (Վարդապետություն և Ուխտեր 76.50–80, 88.95–99) (Բրյուս Ռ. Մակքոնկի, Նոր Կտակարանի վարդապետական մեկնաբանությունը [1965], 1:196)։

Ալմա 40.21–22 Ի՞նչ է նշանակում «բերվել կանգնելու Աստծո առաջ»։

Տասներկու Առաքյալների Քվորումից երեց Դ. Թոդ Քրիստոֆերսոնն ուսուցանել է.

Իր Քավության ու Հարության միջոցով Հիսուս Քրիստոսը հաղթեց Անկման բոլոր գործոնները: Ֆիզիկական մահը կլինի ժամանակավոր, և նույնիսկ հոգևոր մահը կունենա ավարտ, քանի որ մենք բոլորս հետ կբերվենք Աստծո ներկայության մեջ, առնվազն ժամանակավորապես, որպեսզի դատվենք: Մենք կարող ենք ամբողջապես ապավինել ու վստահել Նրա զորությանը, որը կհաղթահարի ամեն բան ու մեզ կշնորհի հավերժական կյանք: (Դ. Թոդ Քրիստոֆերսոն, «Հիսուս Քրիստոսի Հարությունը», Լիահոնա, մայիս 2014 թ․, 112)

Ալմա 40.23 Ի՞նչպիսին կլինի հարություն առած մարմինը։

Յոթանասունից Երեց Փոլ Վ. Ջոնսոնը ուսուցանել է.

Հարությունը հնարավորություն է տալիս, որ մարդու հոգին ու մարմինը նորից միավորվեն, միայն թե այդ ժամանակ մարդու մարմինը կլինի անմահ ու կատարյալ և ենթակա չի լինի ցավի, հիվանդության կամ այլ խնդիրների [տես Ալմա 11.43]։ …

Մեզանից յուրաքանչյուրն ունի ֆիզիկական, մտավոր և զգացմունքային սահմանափակումներ ու թուլություններ։ Այդ խնդիրները, որոնց մի մասը թվում է անհաղթահարելի, ի վերջո կլուծվեն։ Այդ խնդիրներից և ոչ մեկը մեզ չի անհանգստացնի մեր հարությունից հետո։ (Փոլ Վ. Ջոնսոն, «Եւ մահն այլեւս չի լինիլ», Լիահոնա, մայիս 2016 թ․, 121–22)

Օժանդակ ուսումնական վարժություններ

Իրադարձությունների հաջորդականությունը

Օգնեք ուսանողներին իմանալ, թե ինչ է տեղի ունենալու յուրաքանչյուրի հետ մահից հետո, ինչը կարող է օգնել նրանց հավերժության տեսանկյուն ունենալ և կարող է վերացնել մահվան հետ կապված որոշ վախեր։ Կարող եք թերթիկների վրա գրել մահ, հոգիների աշխարհ, հարություն և վերջին դատաստան բառերը և դրանք անկանոն ձևով փակցնել գրատախտակին։ Ուսանողներին առաջարկեք կարդալ Ալմա 40.6–7, 11–14, 21–23 հատվածները և խնդրեք գրատախտակին փակցված իրադարձությունները դասավորել ըստ հերթականության։ Կարող եք նաև քննարկել, թե ինչ են նշանակում իրադարձությունները, և դրանցից յուրաքանչյուրն ինչ դեր ունի Երկնային Հոր ծրագրում։

Գիտելիք ապաշխարության մասին

Ալմա 40.11–26 հատվածներում ներկայացված Ալմայի խոսքերը կարող են օգնել ուսանողներին հասկանալ դեպի Փրկիչը գալու և այս կյանքում մեր մեղքերն ապաշխարելու կարևորությունը։ Կարող եք գրատախտակին գրել Արդար (Ապաշխարող) և Ամբարիշտ (Չապաշխարող) բառերը և առաջարկել ուսանողներին Ալմա 40.11–26 հատվածներում փնտրել ու գրատախատակին գրել բառեր կամ արտահայտություններ, որոնք Ալման օգտագործել էր այս խմբերից յուրաքանչյուրին պատկանող մարդկանց վիճակը նրանց մահից հետո նկարագրելու համար։ Հետո դասարանին առաջարկեք վերլուծել «Ինչպե՞ս կարող են այս ուսմունքները ոգեշնչել մեզ ապաշխարել» հարցը։

(Այն կօգնի ուսանողներին հասկանալ, որ Փրկչի միջոցով դեռևս հույս կա իրենց այն հարազատների համար, որոնք հեռացել են կյանքից առանց ապաշխարելու։ Ուսանողներին կարող եք առաջարկել կարդալ և քննարկել Ա Պետրոս 3.18–20, 4.6 և Վարդապետություն և Ուխտեր 138.29–37 հատվածները:)

Ձեռք բերել հոգևոր գիտելիքներ

Կարող եք օգտագործել Ալմա 40 հատվածը, որը կօգնի ուսանողներին վերանայել հոգևոր գիտելիքներ ձեռք բերելու սկզբունքները։ Սկսեք՝ օգնելով ուսանողներին գտնել Ալմայի հարցը Ալմա 40.1–3, 9 հատվածներում, ապա առաջարկեք նրանց գտնել այն հատվածները, որոնք բացատրում են, թե ինչպես էր Ալման հավատքով գործում (Ալմա 40.5–6), քննում իր հարցը հավերժության հեռանկարով (Ալմա 40.9–13, 23–26) և աստվածայնորեն սահմանված աղբյուրներ փնտրում ավելի լավ ընկալման համար (Ալմա 40.3)։

Օգնեք ուսանողներին կիրառել իրենց սովորածը՝ առաջարկելով նրանց վերլուծել «Ինչպե՞ս կարող եք ձեր հարցերի պատասխանները փնտրելիս հետևել հոգևոր գիտելիքներ ձեռք բերելու սկզբունքները կիրառելու Ալմայի օրինակին» հարցը։

Հարցեր, որոնց պատասխանում է Ալման

Կարող եք ուսանողներին հանձնարարել ուսումնասիրել Ալմա 40 գլխի հատվածների մի խումբ և առաջարկել նրանց այդ հատվածներում գտնել հոգիների աշխարհի և հարության մասին այն հարցերը, որոնց Ալման պատասխանում է։ Այնուհետև ուսանողները կարող են կիսվել իրենց գտած հարցերով և պատասխաններով։