Alma 53

Pagtuman sa Atong mga Pakigsaad

Kitang tanan nag-atubang og mga pagsulay niini nga kinabuhi nga makatental kanato sa paglapas sa atong mga pakigsaad sa Dios. Ang katawhan ni Ammon mihatag kanato og gamhanang ehemplo sa pagtuman sa mga pakigsaad bisan kon nag-atubang og lisod nga mga kahimtang. Ang katuyoan niini nga leksiyon mao ang pagtabang sa pagdugang sa imong determinasyon sa pagtuman sa imong mga pakigsaad ngadto sa Dios.

Tugloi ang mga estudyante nga mahimong mga tigtuman sa pakigsaad. Ang paghimo ug pagtuman sa mga pakigsaad usa ka paagi nga atong mapakita ang atong pasalig nga mahimong mahisama ni Jesukristo. Tabangi ang mga estudyante nga makaila sa balaanong gahom, kaluoy, ug impluwensiya nga ilang madawat pinaagi sa matinud-anong paghimo ug pagtuman sa mga pakigsaad ngadto sa Langitnong Amahan.

Pagpangandam sa estudyante: Dapita ang mga estudyante sa pagpangita sa pulong nga pakigsaad diha sa Giya ngadto sa mga Kasulatan ug mangandam sa pagpakigbahin kon nganong importante ang pagtuman sa atong mga pakigsaad uban sa Dios.

Mga Posibleng Kalihokan sa Pagkat-on

Ang dalan sa pakigsaad

Ikonsiderar ang pagpakita sa mosunod nga hulagway o pagdrowing og susama niana diha sa pisara. Mahimo nimong pilion nga hatagan ang mga estudyante og mga kopya sa hulagway kaysa dapiton sila sa pagdrowing sa dalan diha sa ilang journal sa pagtuon.

Sa imong journal sa pagtuon, pagdrowing og dalan sama sa mosunod nga hulagway aron sa pagsimbolo sa atong mga kinabuhi ug sa mahinungdanon nga mga pakigsaad nga kinahanglan natong buhaton aron makabalik ngadto sa Langitnong Amahan. Imbes nga magdrowing sa mga hulagway nga naa sulod sa lingin, mahimo nimong isulat ang mga pakigsaad nga girepresentar sa matag hulagway. Sama pananglit, imbes nga idrowing ang ikaupat nga hulagway (pag-ihap gikan sa ubos), mahimo nimong isulat ang “pagtuga [endowment] sa templo” diha sa dalan.

Paghimo og marka (o pagdrowing og hulagway nga nagrepresentar sa imong kaugalingon) nga nagpakita kon asa ka kasamtangan karon sa imong personal nga dalan sa pakigsaad.

Ang Langitnong Amahan ug si Jesukristo nahigugma kanimo ug motabang kanimo sa imong mga paningkamot sa pagpabilin diha sa dalan sa pakigsaad, nga modala pabalik ngadto Kanila. Paggahin og panahon sa paghinumdom sa mga pakigsaad nga nahimo na nimo ngadto Kanila ug sa mga paagi nga imong gipaningkamotan sa pagtuman niadto nga mga pakigsaad. (Kon makatabang ang pagrebyo sa mga pakigsaad nga atong gihimo sa bunyag ug ang pagbag-o [renew] pinaagi sa sakramento, basaha ang Mosiah 18:8–10 ug Moroni 4:3.)

Isip kabahin sa unang press conference ni Presidente Russell M. Nelson isip bag-ong gitawag nga propeta, siya mitudlo:

Karon, ngadto sa matag miyembro sa Simbahan moingon ko, pabilin diha sa dalan sa pakigsaad. Ang inyong pasalig nga mosunod sa Manluluwas pinaagi sa paghimo og mga pakigsaad uban Kaniya ug dayon [ang] pagtuman niadto nga mga pakigsaad moabli sa pultahan ngadto sa tanang espirituhanong mga panalangin ug pribilehiyo nga mahimong maanaa sa mga lalaki, babaye, ug mga bata bisan asa. (Russell M. Nelson, “Samtang Dungan Kita nga Magpadayon sa Unahan,” Liahona, Abr. 2018, 7)

• Unsa ang pasabot diha kanimo sa “pagpadayon diha sa dalan sa pakigsaad”?

• Unsa nga mga panalangin ang ihatag sa Langitnong Amahan ug ni Jesukristo niadtong mopadayon diha sa dalan sa pakigsaad?

Mahimo nimong isulat ang mga butang sama sa “kinabuhing dayon,” “mahimong mahisama sa Dios,” “mga pamilya sa kahangtoran,” ug uban pa sa kataposan sa imong pagdrowing sa dalan.

Sa sukdanan nga 1 ngadto sa 5 (nga ang 1 walay determinasyon o pagresolba ug ang 5 isip lig-on nga determinasyon o pagresolba), pamalandongi ang imong mga tubag sa mosunod nga mga pangutana:

• Unsa ka kadeterminado sa pagtuman sa mga pakigsaad nga nahimo na nimo uban sa Dios? Ngano man?

• Unsa ka kadeterminado sa paghimo og mga pakigsaad uban Kaniya nga anaa pa sa imong umaabot? Ngano man?

Samtang magtuon ka karon, pagtinguha og tabang gikan sa Langitnong Amahan aron mas makasabot ug magtinguha sa paghimo ug pagtuman sa mga pakigsaad uban Kaniya.

Ang katawhan ni Ammon

Ipakita ang usa ka hulagway sa mga tawo ni Ammon nga naglubong sa ilang mga hinagiban.

Sa Alma 24, usa ka grupo sa mahinulsulon nga mga Lamanite nga nailhan isip katawhan ni Ammon mihimo og usa ka talagsaon nga pakigsaad uban sa Dios sa pagpanalipod kanila gikan sa pagbalik ngadto sa ilang kaniadto nga mga sala human malimpyohan sa Manluluwas.

Basaha ang Alma 53:10–12 aron sa pagrebyo sa ilang pakigsaad (o panumpa).

• Sumala sa bersikulo 11, unsa ang ilang andam nga buhaton aron sa pagtuman sa ilang pakigsaad?

Sa wala madugay, sa dihang ang gamhanang kasundalohan sa Lamanite misulong sa mga Nephite, si Kapitan Moroni ug ang iyang mga kasundalohan napugos sa usa ka makalilisang nga gubat. Basaha ang Alma 53:13 ug ang mosunod nga pamahayag ni Elder Richard G. Scott (1928–2015) sa Korum sa Napulog Duha ka Apostoles, mangita sa lisod nga desisyon nga giatubang sa mga katawhan ni Ammon.

Ang katawhan ni Ammon anaa sa usa ka lisod nga panahon sa ilang espirituhanong kinabuhi. Nagmatinud-anon sila sa ilang pakigsaad nga dili na mogamit og mga hinagiban. Apan nakasabot sila nga ang mga amahan responsable sa pagpanalipod sa ilang mga pamilya. Kana nga panginahanglan daw igo na aron mahatagan og konsiderasyon nga dili tumanon ilang pakigsaad. (Richard G. Scott, “Personal nga Kalig-on pinaagi sa Pag-ula ni Jesukristo,” Liahona, Nob. 2013, 82)

Tan-awa ang imong drowing sa dalan sa pakigsaad. Tali sa kon asa ka karon anaa sa dalan ug sa umaabot nga mga pakigsaad nga gidapit sa Manluluwas kanimo sa paghimo, ilista ang mga sitwasyon nga makatental sa mga tin-edyer sa paglapas sa mga pakigsaad nga ila nang nahimo ug makabalda kanila sa paghimo og umaabot nga mga pakigsaad, lakip ang mga pakigsaad sa templo.

Pagdapit og mga boluntaryo sa paglista og mga sitwasyon o sa pagdrowing og mga babag nga ilang gihunahuna diha sa dalan sa pisara.

Samtang nagpadayon ka sa pagtuon, pamalandongi kon sa unsang paagi ang Manluluwas makatabang kanimo sa pagpadayon dili igsapayan asa ka man nahimutang ug ang mga hagit nga imong giatubang karon.

Ang tambag ni propeta Helaman

Basaha ang Alma 53:14–15; 56:7–8, mangita sa tambag ni propeta Helaman ngadto sa katawhan ni Ammon. (AngAlma 56 usa ka sulat nga gisulat ni Helaman ngadto kang Kapitan Moroni nga nagpasabot sa sitwasyon.)

• Unsaon nimo pagpamubo sa imong nakat-onan mahitungod sa mga pakigsaad uban sa Dios?

Tingali nakakat-on ka sa mga kamatuoran sama sa kon kita mopili sa pagtuman sa atong mga pakigsaad ngadto sa Langitnong Amahan ug ni Jesukristo, Sila motabang kanato ug molig-on kanato ug kon kita mopili sa paglapas sa atong mga pakigsaad ngadto Kanila, mawala kanato ang giandam nga mga panalangin.

Si Elder Scott mipasabot giunsa sa Dios pagpanalangin ang katawhan ni Ammon tungod sa pagtuman sa ilang mga pakigsaad.

Ang ilang mapainubsanon, tibuok kinabuhi nga pasalig sa pagsalikway sa ilang sala mas nakatabang sa pagpanalipod sa ilang pamilya kay sa bisan unsa nga ilang mahimo sa panggubatan. Ang ilang pagtugyan wala mohikaw nila sa mga panalangin. Nakapalig-on kini kanila ug nakapanalangin nila ug sa umaabot nga mga henerasyon. (Richard G. Scott, “Personal nga Kalig-on pinaagi sa Pag-ula ni Jesukristo,” Liahona, Nob. 2013, 83)

Ikonsiderar ang pagdapit sa mga estudyante sa pagbinayloay og ideya [brainstorm] sa mga tubag sa mosunod nga mga pangutana nga magpares o diha sa mga gagmay nga grupo. Dayon dapita ang matag grupo sa pagsulat og tubag diha sa pisara tapad sa dalan sa pakigsaad.

• Unsa ang pipila ka mga paagi kaha nga ang Ginoo maglig-on ug magpanalangin kanimo samtang ikaw maningkamot sa paghimo ug pagtuman sa imong mga pakigsaad?

• Sa unsang paagi nga ang imong pagtuman sa mga pakigsaad makapalig-on sa imong relasyon sa Ginoo?

Duha ka libo ka batan-ong mga lalaki ang misulod sa usa ka pakigsaad

Ang katawhan ni Ammon kinsa mihimo sa pakigsaad misunod sa tambag ni Helaman nga dili mogamit og mga hinagiban. Usa ka paagi nga gipanalanginan sila sa Ginoo mao ang pagpili sa ilang mga anak sa paghimo ug pagtuman sa ilang kaugalingong pakigsaad. Sa umaabot nga mga kapitulo atong makat-onan nga gigamit sa Dios kining nagtuman sa pakigsaad nga mga batan-ong lalaki sa milagrosong paagi sa pagpanalipod sa ilang mga pamilya ug sa mga Nephite.

Basaha ang Alma 53:16–22. Markahi ang mga hiyas ug mga paghulagway niining batan-ong mga lalaki nga makatabang kanila sa pagtuman sa mga pakigsaad. (Mahimong makatabang ang pagkahibalo nga ang pulong nga kaligdong mahimong nagpasabot sa pagkakalmado, pagkaseryoso, o pagkamahunahunaon.)

• Unsa nga mga hiyas ang imong namatikdan niining batan-ong mga lalaki nga makatabang sa mga batan-on karon sa pagtuman sa ilang mga pakigsaad?

• Sa imong hunahuna sa unsang paagi ang kalig-on sa ilang mga ginikanan sa pagtuman sa mga pakigsaad mahimong nakaapekto niining batan-ong mga lalaki?

• Kinsa ang imong nailhan nga usa ka talagsaong ehemplo diha kanimo sa pagtuman sa mga pakigsaad?

Ang imong dalan sa pakigsaad

Irekord diha sa imong journal sa pagtuon ang imong nakat-onan o gibati karon nga makadugang sa imong determinasyon nga magpabilin sa dalan balik sa Langitnong Amahan ug ni Jesukristo. Mahimo nimong ilakip ang bisan unsang mga tentasyon o mga pagkabalda nga imong giatubang sa imong dalan sa pakigsaad ug sa unsang paagi ang imong determinasyon ug ang imong pagsalig sa Ginoo makatabang nimo sa pagbuntog niini.

Ikonsiderar ang paghatag og pagpamatuod kon giunsa ka pagnapanalangin sa Dios tungod sa paghimo ug pagtuman sa mga pakigsaad ngadto Kaniya.

Komentaryo ug Background nga Impormasyon

Unsa ang makatabang nako sa pagtuman sa akong mga pakigsaad kon kini lisod?

Si Sister Linda K. Burton, kanhi Kinatibuk-ang Presidente sa Relief Society, mitudlo:

Sa tanang rason nga kita kinahanglang mas makugihon sa atong pagtuman sa pakigsaad, kini nga rason mas makapadasig kay sa tanan—gugma. …

Nganong ang Manluluwas andam sa pagtuman sa Iyang pakigsaad sa Amahan ug pagtuman sa Iyang balaang misyon sa pagtubos alang sa mga sala sa kalibotan? Tungod kini sa Iyang gugma alang sa Iyang Amahan ug sa Iyang gugma alang nato. …

… Ang pagtuman sa pakigsaad usa ka pagpahayag sa atong gugma sa Pag-ula sa atong Manluluwas ug Manunubos ug sa hingpit nga gugma sa atong Amahan sa Langit. (Linda K. Burton, “Ang Gahom, Kalipay, ug Gugma sa Pagtuman sa Pakigsaad,” Liahona, Nob. 2013, 113–114)

Si Presidente M. Russell Ballard sa Korum sa Napulog Duha ka Apostoles mipakigbahin:

Usahay matental kita nga tugotan ang atong mga kinabuhi nga mas madumala pinaagi sa kasayon kay sa pakigsaad. Dili kanunay sayon ang pagsunod sa mga sumbanan sa ebanghelyo ug pagbarog alang sa kamatuoran ug pagpamatuod sa Pagpahiuli. … Apan walay espirituhanon nga gahom sa pagkinabuhi pinaagi sa kasayon. Ang gahom moabot samtang kita motuman sa atong mga pakigsaad. (M. Russell Ballard, “Like a Flame Unquenchable,” Ensign, Mayo 1999, 86)

Si Elder D. Todd Christofferson sa Korum sa Napulog Duha ka Apostoles mipasabot:

The Power of Covenants

In times of distress, let your covenants be paramount and let your obedience be exact.

Ang balaanong mga pakigsaad makahimo og lig-on nga mga Kristiyano. Ako moawhag sa matag usa nga magmahimong sarang ug dawata ang tanang mga ordinansa sa priesthood nga inyong mahimo ug dayon magmatinud-anong motuman sa mga saad nga inyong gihimo pinaagi sa pakigsaad. Sa mga panahon sa kalisdanan, himoa ang inyong mga pakigsaad nga labing mahinungdanon ug himoa ang inyong pagkamasulundon nga eksakto. Dayon makapangayo kamo diha sa pagtuo, nga walay pagduhaduha, sumala sa inyong panginahanglan, ug ang Dios motubag. Iya kamong paluyohan samtang kamo magbuhat, ug magbantay. Sa Iyang kaugalingong panahon ug paagi Siya motuyhad sa iyang kamot nganha kaninyo, mag-ingon, “Ania Ako.” (D. Todd Christofferson, “Ang Gahom sa mga Pakigsaad,” Liahona, Mayo 2009, 22)

Standing in Holy Places

A young woman reflects on the blessings of walking the covenant path as she makes her journey to the temple.

Dugang nga mga Kalihokan sa Pagkat-on

Alma 53:9. “Mga panagsumpaki … taliwala sa ilang mga kaugalingon”

Isulat diha sa pisara ang mosunod: Mga Korum sa Pagkapari, Mga Klase sa Young Women, Mga Ward o mga Branch, ug mga Pamilya. Dayon pangutan-a kon unsa ang posibleng makabahin niini nga mga grupo ug unsa nga makuyaw nga mga kahimtang ang mahimong moresulta.

Dapita ang mga estudyante sa pagbasa sa Alma 53:8–9. Tabangi sila nga makaila og baroganan sama sa mosunod: Kon ang mga miyembro sa Simbahan sa Ginoo mabahin, nan atong gibutang ang atong mga kaugalingon sa makuyaw nga mga kahimtang. Awhaga ang mga estudyante sa pagpakigbahin kon unsay ilang mahimo aron malikayan ang pagbahin-bahin diha sa ilang kaugalingong mga klase, korum, ug mga pamilya.

Pagtuman sa atong pakigsaad sa bunyag

Sa pagsugod sa leksiyon, ikonsiderar ang pagdapit sa mga estudyante sa pagbasa sa Mosiah 18:8–10; Moroni 4:3; 5:2. Hisgoti ug ilista diha sa pisara ang piho nga mga saad nga atong gihimo ngadto sa Dios sa dihang kita bunyagan ug dayon bag-ohon kon kita moambit sa sakramento.

Dayon dapita ang mga estudyante sa pagpili og usa niini nga mga saad ug sa paghunahuna og duha ka babag nga mahimong atubangon sa usa ka tin-edyer sa inyong dapit samtang naningkamot siya sa pagtuman niana nga saad. Dapita ang mga estudyante sa pagpangita diha sa tibuok leksiyon kon sa unsang paagi ang ehemplo sa mga katawhan ni Ammon makatabang sa usa ka tin-edyer sa usa niadto nga mga sitwasyon.