Alma 53–63

Kinatibuk-ang Pagpasabot

Ang katawhan ni Ammon mihatag kanato og gamhanang ehemplo sa pagtuman sa mga pakigsaad bisan kon nag-atubang og lisod nga mga sangpotanan. Atol sa panahon sa dakong gubat, ang ilang mga anak nga lalaki gipangulohan ni Helaman ngadto sa mga kadaogan nga nakaluwas og daghang mga kinabuhi. Kining batan-ong mga sundalo misunod sa “matag pulong sa sugo nga walay pagkasayop,” nagbutang sa “ilang pagsalig diha sa Dios sa kanunay” (Alma 57:21, 27). Sa wala madugay si Pahoran, labaw nga maghuhukom sa mga Nephite, sayop nga giakosahan nga nagpasagad sa mga kasundalohan sa gubat ug kinahanglang mopili kon unsaon sa pagtubag.

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang kinahanglan nga andamon daan alang sa matag leksiyon.

Alma 53

Katuyoan sa leksiyon: Ang katuyoan niini nga leksiyon mao ang pagtabang nga madugangan ang determinasyon sa mga estudyante sa pagtuman sa ilang mga pakigsaad sa Dios.

• Pagpangandam sa estudyante: Dapita ang mga estudyante sa pagpangita sa pulong nga pakigsaad diha sa Giya ngadto sa mga Kasulatan ug mangandam sa pagpakigbahin kon nganong importante ang pagtuman sa atong mga pakigsaad uban sa Dios.

• Mga hulagway nga ipakita: Usa ka grapika nga naghulagway sa dalan sa pakigsaad; usa ka hulagway sa katawhan ni Ammon nga naglubong sa ilang mga hinagiban

• Sugyot sa pagtudlo pinaagi sa videoconference: Ikonsiderar ang pagdapit og usa ka matinud-anong miyembro sa lokal nga ward o branch sa pagtambong sa klase o sa pagrekord og usa ka bidyo sa mubo nga pagpakigbahin kon sa unsang paagi siya gipanalanginan sa Ginoo tungod sa pagtuman sa iyang mga pakigsaad ngadto Kaniya. Siguroha nga makadawat og pagtugot gikan sa imong koordinator o administrador sa programa ug lokal nga mga lider sa pagkapari sa dili pa ipaabot ang pagdapit.

Alma 56

Katuyoan sa leksiyon: Kini nga leksiyon gituyo aron matabangan ang mga estudyante nga makasabot nga samtang sila maisogon nga mogamit og hugot nga pagtuo kang Jesukristo, ang Ginoo mopanalangin kanila sa Iyang gahom.

• Pagpangandam sa estudyante: Ikonsiderar ang pagdapit sa mga estudyante sa paghunahuna og usa ka batan-on o grupo sa kabatan-onan kinsa mipakita og dakong hugot nga pagtuo sa Ginoo bisan pa sa lisod nga mga hagit.

• Handout: “Ang Sitwasyon nga Giatubang sa 2,000 ka mga Bataon nga Kasundalohan”

• Sugyot sa pagtudlo pinaagi sa videoconference: Ikonsiderar ang pagpakita sa kalihokan sa pagpares alang sa klase. Kon ang usa ka estudyante nakahibalo sa saktong tubag, dapita siya sa paggamit sa drowing nga feature aron makonektar ang saktong pakisayran ngadto sa gipamubo [summary] o sa pagpasulat sa ilang mga tubag gamit ang chat nga feature.

Alma 57

Katuyoan sa leksiyon: Kini nga leksiyon gidisenyo aron matabangan ang mga estudyante nga maningkamot sa pagsunod sa mga sugo sa Dios nga walay pagkasayop.

• Pagpangandam sa estudyante: Dapita ang imong mga estudyante sa paghunahuna og mga ehemplo sa pagkamasulundon sa Manluluwas ngadto sa Langitnong Amahan ug sa pagpamalandong unsay ilang nakat-onan gikan niadtong mga ehemplo.

• Sugyot sa pagtudlo pinaagi sa videoconference: Hatagi og panahon ang mga estudyante sa pagkompleto sa duha sa tulo ka kalihokan nga gimarkahan og A, B, ug C. Ibutang sila sa gagmay nga mga grupo diha sa mga breakout room, ug dapita ang matag estudyante sa pagpakigbahin ngadto sa ilang grupo og panabot gikan sa usa sa mga kalihokan nga ilang gipili. Dayon isagol ang mga breakout room, ug dapita ang matag estudyante sa pagpakigbahin ngadto sa ilang bag-ong grupo og usa ka panabot gikan sa laing kalihokan nga ilang gipili. Ihiusa pagbalik ang klase, ug dapita ang mga estudyante sa pagpakigbahin og usa ka butang nga makahuluganon nga ilang nakat-onan gikan sa laing sakop sa klase.

Alma 59–61

Katuyoan sa leksiyon: Kini nga leksiyon makadasig sa mga estudyante nga mahimong mas mahisama ni Jesukristo samtang sila mosanong sa mga sayop sa uban inubanan ang dugang nga gugma ug pailob.

• Pagpangandam sa estudyante: Dapita ang mga estudyante sa pagtambong sa klase nga andam sa pagpakigbahin kon unsay nakapalisod sa pagsunod sa mga pagtulun-an sa Manluluwas nga makita diha sa 3 Nephi 11:29–30 apan nganong takos man ang pagsunod niadto nga mga pagtulun-an.

• Sugyot sa pagtudlo pinaagi sa videoconference: Sa pagsugod sa leksiyon, ikonsiderar ang pagpakita sa pamahayag ni Elder David A. Bednar sa Korum sa Napulog Duha ka Apostoles. Dayon dapita ang mga estudyante sa paggamit sa chat nga feature sa pagsulat og dugang nga mga rason nga tingali kita masilo.

Rebyo 16 sa Doktrinal nga Kahanas

Katuyoan sa leksiyon: Kini nga leksiyon makatabang sa mga estudyante sa paggamit sa mga kamatuoran gikan sa tudling sa doktrinal nga kahanas sa ikaduhang bahin sa Basahon ni Mormon ngadto sa ilang mga kinabuhi.

• Pagpangandam sa estudyante: Dapita ang mga estudyante sa pagtambong nga andam sa pagpakigbahin sa bisan unsang mga panalangin o mga benepisyo nga ilang namatikdan gikan sa pagpaningkamot sa paggamit sa mga kasulatan diha sa ilang mga kinabuhi.

• Sulod [Content] nga ipakita: “Doktrinal nga Kahanas sa Basahon ni Mormon: Alma–Moroni”

• Sugyot sa pagtudlo pinaagi sa videoconference: Hatagi ang mga estudyante og igong panahon sa pagbuhat sa mga lakang A, B, ug C aron sa paggamit sa mga tudling sa doktrinal nga kahanas sa senaryo nga ilang gipili. Dapita ang mga estudyante sa paggamit og thumbs-up nga icon o i-type ang “andam na” diha sa chat kon andam na sila sa pagpakigbahin sa ilang mga ideya ngadto sa klase. Ang mga estudyante mobati nga mas masaligon sa pagpakigbahin kon sila hatagan og igong panahon sa pagpangandam.