“Alma 59–61: Pagpili nga Dili Masilo,” Manwal sa Magtutudlo sa Basahon ni Mormon (2024)
“Alma 59–61,” Manwal sa Magtutudlo sa Basahon ni Mormon
Alma 59–61
Pagpili nga Dili Masilo
Nakasuway ka ba sukad nga nasayop sa pagsabot sa mga binuhatan sa usa ka tawo? Napasakitan ka ba sa uban tungod sa ilang mga kasaypanan? Si Pahoran, labaw nga maghuhukom sa mga Nephite, nag-atubang niini nga hagit ug kinahanglan nga mopili unsaon sa pagtubag. Kini nga leksiyon makadasig nimo nga mahimong mas mahisama ni Jesukristo samtang motubag ka sa mga sayop sa uban sa dugang nga gugma ug pailob.
Tabangi ang mga tigkat-on sa pag-ila sa Kristohanong mga hiyas. Ang mga kasulatan naglangkob og daghang mga asoy sa matinud-anong mga lalaki ug mga babaye kinsa mipakita sa mga hiyas ni Jesukristo sa paagi sa ilang pagpakabuhi. Tabangi ang mga estudyante nga makat-on mahitungod sa Manluluwas pinaagi sa pag-ila kon giunsa pagsunod sa uban ang Iyang ehemplo ug pagpalambo niini nga mga kinaiya. Dasiga ang mga estudyante sa pagpangita og mga paagi nga ilang mapalambo ang Kristohanong mga hiyas sa ilang kaugalingong kinabuhi.
Pagpangandam sa estudyante: Dapita ang mga estudyante sa pagtambong sa klase nga andam sa pagpakigbahin kon unsay nakapalisod sa pagsunod sa mga pagtulun-an sa Manluluwas nga makita diha sa 3 Nephi 11:29–30 apan nganong takos man ang pagsunod niadto nga mga pagtulun-an.
Mga Posibleng Kalihokan sa Pagkat-on
Kanus-a ka natental nga mobati nga nasilo?
Ikonsiderar ang pagsulat sa pulong nga nasilo diha sa pisara.
Usahay, mahimo kita nga matental nga mobati nga nasilo. Si Elder David A. Bednar sa Korum sa Napulog Duha ka Apostoles milista sa pipila ka rason nga ang mga miyembro misulti kaniya nga sila nasilo:
“Usa ka tawo misulti diha sa Sunday School nga nakapasilo kanako. …”
“Niini nga branch wala gyoy nanangad o nangumusta kanako. Morag ko’g walay labot. …”
“Wala ko makauyon sa tambag nga gihatag sa bishop kanako. …”
Daghang mga hinungdan sa pagkasilo ang gipangsulti–gikan sa wala magkasinabot kabahin sa doktrina tali sa mga dagko ngadto sa pagpanaway, pagpalagot, ug wala magpaapil ang mga batan-on. (David A. Bednar, “Ug Walay Makapasilo Kanila,” Liahona, Nob. 2006, 89)
-
Unsa ang ubang mga rason nga kita mahimong matental nga mobati nga nasilo?
-
Sa unsang paagi nga ang pagkasilo makaapektar kanato?
Pamalandongi ang mosunod nga mga pangutana:
-
Kanus-a ka natental nga mobati nga nasilo? Giunsa nimo pag-reak? Ngano man?
-
Sa unsang paagi ang imong gibati ug gibuhat nakaapekto sa imong relasyon sa uban ug sa Ginoo?
Samtang magpadayon ka sa pagtuon, pagtinguha og inspirasyon sa pagpangita og mga panabot ug kamatuoran nga mahimong makatabang kanimo niini nga mga sitwasyon.
Mga sulat ni Moroni
Human makahibalo nga ang kasundalohan ni Helaman kulang og mga tawo ug mga suplay aron sa pagpanalipod sa mga Nephite gikan sa usa ka dako nga kasundalohan sa Lamanite, si Kapitan Moroni mipadala og sulat ngadto ni Pahoran, ang labaw nga maghuhukom sa mga Nephite. Gihangyo ni Moroni si Pahoran sa pagpadala og mga dugang pagpalig-on ngadto sa kasundalohan ni Helaman. Walay tabang nga miabot, ug ang kasundalohan ni Helaman nagpadayon sa pag-antos. Sa kasamtangan, usa ka Lamanite nga kasundalohan ang misakop sa Nephihah, laing siyudad diin si Moroni nagpaabot nga makadawat og mga dugang pagpalig-on (tan-awa sa Alma 59:9).
Dapita ang mga estudyante sa pagpakigbahin kon unsa kaha ang ilang gibati o unsa kaha ang ilang mahimo kon sila ang anaa sa posisyon ni Moroni.
Si Moroni nasuko ug misulat og laing sulat ngadto ni Pahoran. Basaha sa Alma 60:5–11, 30 aron makita ang bahin sa mensahe ni Moroni.
-
Unsa ang imong nakita sa sulat ni Moroni nga mahimong makapasilo kang Pahoran?
Pagpili ni Pahoran
Imbes nga basahon ang mosunod nga parapo, ikonsiderar ang paghangyo sa usa ka estudyante nga pamilyar sa istorya sa pagpakigbahin kon nganong si Pahoran wala magpadala og dugang nga mga pagpalig-on ngadto sa kasundalohan ni Moroni.
Ang wala mahibaloi ni Moroni mao nga usa ka grupo sa daotang mga Nephite nga nakig-uban sa mga Lamanite misukol batok ni Pahoran, hinungdan nga milayas siya alang sa iyang kinabuhi. Ang mga rebelde mikontrolar sa kaulohan nga dakbayan sa Zarahemla. Si Pahoran usa ka matarong nga tawo kinsa naningkamot sa pagpundok og mga pwersa aron sa pagbawi sa Zarahemla (tan-awa sa Alma 61:1–8).
-
Kon ikaw si Pahoran, sa unsang paagi kaha ka nga matental sa pagtubag sa sulat ni Moroni?
-
Sa unsang paagi nga ang reaksiyon ni Pahoran nakaapekto sa sitwasyon?
Ang Alma 61 naglangkob sa tubag ni Pahoran ngadto kang Moroni. Basaha ang Alma 61:9, 17–21 aron makita kon giunsa niya pagtubag.
-
Unsay nakapadani nimo sa tubag ni Pahoran?
-
Unsa nga mga hiyas ang imong nakita kang Pahoran nga nagpahinumdom kanimo ni Jesukristo?
Si Elder Bednar mipakigbahin og mahinungdanon nga kamatuoran nga atong makat-onan gikan niini nga asoy. (Mahimo nimong irekord ang bahin niini nga pamahayag diha sa imong mga kasulatan tupad sa Alma 61:9.)
Ang masilo usa ka pagpili nga himoon nato; dili kini usa ka kondisyon nga ipahamtang o ipamugos sa atoa sa usa ka tawo o sa usa ka butang. …
… Ang usa ka butang, panghitabo, o sulti mahimong makapasilo, apan kamo ug ako makapili nga dili masilo—ug sa pinulongan ni Pahoran, “kini walay sapayan.” (David A. Bednar, “Ug Walay Makapasilo Kanila,” Liahona, Nob. 2006, 90–91)
-
Unsaon nimo pagpasabot ang mosunod nga kamatuoran ngadto sa usa ka tawo? Makapili kita nga dili masilo sa mga pulong ug mga binuhatan sa uban.
-
Ngano sa imong hunahuna ang Langitnong Amahan ug si Jesukristo gusto nga atong masabtan kini nga kamatuoran?
Ang mga pagtulun-an ug ehemplo ni Jesukristo
Ang Manluluwas mao ang hingpit nga ehemplo niini nga kamatuoran.
Aron matabangan ang mga estudyante sa pagpamalandong sa mga pagtulun-an ug ehemplo ni Jesus, ikonsiderar ang pagdapit kanila sa paghisgot sa mosunod uban sa usa ka pares o diha sa gamay nga grupo:
-
Basaha ang mga pagtulun-an ni Jesukristo sa 3 Nephi 11:29–30 ug Mateo 5:43–48. Unsa ang imong nakat-onan gikan sa Iyang mga pagtulun-an?
-
Paghunahuna og ehemplo sa Manluluwas nga mitubag uban sa pailob ug gugma sa mga sayop ug mga kahuyang sa uban. Ngano nga importante kanimo nga mahibalo nga ang Manluluwas mapailobon ug mahigugmaon ug dili dali masilo?
Pagdapit og pipila ka mga grupo sa pagpakigbahin og importanteng mga bahin sa unsay ilang gihisgotan. Samtang sila mopakigbahin, pasalamati sila sa ilang mga hunahuna. Ikonsiderar ang pagpangutana nganong importante ang unsay ilang nakat-onan ug makatabang nila sa ilang kinabuhi. Kon mapuslanon, mahimo usab nimong dapiton ang mga estudyante sa paghunahuna og usa ka ehemplo sa usa ka tawo nga ilang nailhan kinsa, sama sa Manluluwas ug ni Pahoran, mapailobon ug mahigugmaon sa uban imbes nga mobati nga nasilo. Mahimong ipakigbahin sa mga estudyante kon kinsa ang ilang gihunahuna ug unsay ilang nakat-onan gikan sa ilang mga ehemplo.
Ikonsiderar ang pagdapit sa mga estudyante sa hilom nga pagpamalandong o pagsulat sa ilang mga hunahuna mahitungod sa mosunod nga pangutana:
-
Sa unsang paagi nga ang mga ehemplo ni Pahoran ug sa Manluluwas makatabang nimo sa sitwasyon diin ang usa ka tawo misulti o mihimo og butang nga makapasakit kanimo o sa usa ka minahal?
Ang tabang sa Ginoo
Ang pagsunod sa ehemplo sa Manluluwas sa dili pagkasilo mahimong lisod. Si Elder Bednar mipasabot sa tabang nga mahimong makab-ot nato kon dili nato bation nga paigo ang atong kalig-on sa pagbuntog sa mga pagbati sa pagkasilo.
Pinaagi sa makapalig-ong gahom sa Pag-ula ni Jesukristo, kamo ug ako mapanalanginan sa paglikay ug pagbuntog batok sa pagkasilo. …
Ang kapasidad sa pagbuntog sa pagkasilo morag dili nato mahimo. … Ang mismong kinaiya sa Pag-ula sa Manunubos ug ang katuyoan sa gipahiuling Simbahan gitumong sa pagtabang kanato nga makadawat mismo niini matang sa espirituhanong kalig-on. (David A. Bednar, “Ug Walay Makapasilo Kanila,” Liahona, Nob. 2006, 90–91)
-
Unsa ang imong nakat-onan gikan sa mga komento ni Elder Bednar?
-
Unsa kaha ang mahimo sa usa ka tawo aron mangayo og tabang gikan sa Manluluwas kon matental siya nga mobati nga nasilo?
Paggahin og pipila ka minuto sa pagsulat og usa ka sulat sa imong umaabot nga kaugalingon. Unsa nga tambag ang imong ihatag sa imong kaugalingon kon unsaon pagtubag kon adunay mosulti o mobuhat og butang nga makapasakit o makapasilo? Ilakip ang imong nakat-onan gikan sa Manluluwas ug ni Pahoran nga imong magamit niana nga sitwasyon. Ilakip usab kon unsaon nimo sa pagtinguha og tabang sa Ginoo.
Pagdapit og pipila ka mga boluntaryo sa pagpakigbahin og bahin sa ilang gisulat. Ipamatuod nga ang Manluluwas makatabang kanato kon kita dili mobati nga paigo ang atong kalig-on sa pagtubag uban sa pailob ug gugma.