Rebyo 15 sa Doktrinal nga Kahanas

Sabta ug Ipasabot

Tungod kay ang ebanghelyo ni Jesukristo hilabihan kamahinungdanon, ang Langitnong Amahan nagtinguha sa tanan Niyang mga anak nga mahibalo sa mga kamatuoran niini. Ang pagkat-on sa pagpasabot sa mga kamatuoran sa ebanghelyo sa imong kaugalingong mga pulong makatabang sa pagtino sa imong pagsabot. Kini nga leksiyon makatabang sa pagdugang sa imong pagsabot ug sa imong abilidad sa pagpasabot sa mga kamatuoran nga makita diha sa mga tudling sa doktrinal nga kahanas gikan sa Basahon ni Mormon.

Pagbansay sa pagpasabot sa mga kamatuoran sa ebanghelyo.Hatagi og mga kahigayonan ang mga estudyante sa pagpasabot, pagpakigbahin, ug pagpamatuod sa mga kamatuoran sa ebanghelyo. Samtang sila mopakigbahin, ang mga estudyante makaangkon og mas lawom nga pagpamatuod sa unsay ilang gipahayag. Pinaagi sa gahom sa Espiritu Santo, ang mga pulong sa mga estudyante mahimo usab nga adunay dakong epekto sa kasingkasing ug hunahuna niadtong naminaw.

Pagpangandam sa estudyante: Dapita ang mga estudyante sa paghunahuna og usa ka butang nga ilang nasabtan pag-ayo, sama sa usa ka kalingawan, paugnat sa kusog [sport], o asignatura [subject] sa eskwelahan. Ipahunahuna nila kon unsa ang nakatabang kanila nga makabaton og ingon ka lawom nga pagsabot, ug dapita sila sa pagpakigbahin sa ilang mga hunahuna.

Mga Posibleng Kalihokan sa Pagkat-on

Ang usa ka leksiyon sa tudling sa doktrinal nga kahanas mahimong kinahanglan nga itudlo puli niini nga leksiyon sa pagrebyo. Tan-awa ang eskedyul sa pagtudlo nga gihatag sa direktor o koordinitor sa area o rehiyon aron maseguro nga matudlo ang matag leksiyon sa tudling sa doktrinal nga kahanas samtang anaa sa sesyon ang seminary.

Sayop nga pagsabot

Ikonsiderar ang pagsulat sa pulong nga sayop nga pagsabot diha sa pisara ug dapita ang mga estudyante sa pagpakigbahin unsay mosantop sa ilang hunahuna kon sila maghunahuna niini nga pulong. Dayon ipakigbahin ang mga pamahayag sa ubos. Isip alternatibo, ikonsiderar ang pagpakigbahin og usa ka kasinatian nga imong nasinati ang usa ka sayop nga pagsabot.

Ang mosunod nga mga asoy ni Elder Joseph B. Wirthlin (1917–2008) sa Korum sa Napulog Duha ka Apostoles ug ni Brother Bradley R. Wilcox, Ikaduhang Magtatambag sa Kinatibuk-ang Kapangulohan sa Young Men, naghulagway sa pipila ka kataw-anan nga mga sayop nga pagsabot. Samtang magtuon ka niini, pamalandongi ang imong mga kasinatian sa mga sayop nga pagsabot.

Ako nakahinumdom sa dihang usa sa among anak nga babaye nakig-blind date. Siya andam na ug nagpaabot alang sa iyang kasabot nga moabot sa dihang mibagting ang doorbell. Milakaw sulod ang usa ka lalaki nga ingon og mas tigulang og gamay, apan siya naningkamot nga magmatinahuron. Iyang kining gipaila-ila ngari kanako ug sa akong asawa ug sa uban nga mga igsoon, dayon iyang gisul-ob ang iyang coat ug migawas sa pultahan. Kami mitan-aw samtang siya misakay sa sakyanan, apan ang sakyanan wala molarga. Sa wala madugay ang among anak nga babaye migawas sa sakyanan ug, namula ang nawong, midagan balik sa balay. Ang lalaki nga iyang gituohan nga iyang ka blind date sa tinud-anay mianha aron sa pagkuha sa usa sa lain namong anak nga babaye kinsa miuyon nga mahimong tigbantay sa bata alang kaniya ug sa iyang asawa. (Joseph B. Wirthlin, “Bisan Unsa ang Mahitabo, ug Dawata Kini,” Liahona, Nob. 2008, 27)

Makausa nagpadala ko og mensahe sa akong anak nga babaye ug umagad nga lalaki gamit ang voice-to-text nga feature sa akong cellphone. Miingon ko, “Kumusta, kamong duha. Sigurado nga gihigugma ko kamo. ” Ang ilang nadawat, “Nasilag ko ninyong duha. Kinahanglan higugmaon ko kamo.” Dili ba makapakurat kon unsa ka sayon nga ang usa ka positibo ug maayo og intensiyon nga mensahe mahimong masayop og sabot? (Bradley R. Wilcox, “Ang Pagkatakos Dili ang Pagkawalay Tatsa,” Liahona, Nob. 2021, 61)

Samtang ang ubang mga sayop nga pagsabot mahimong kataw-anan, ang mga sayop nga pagsabot sa mga kamatuoran mahitungod ni Jesukristo, sa Iyang ebanghelyo, ug sa atong mahangtorong kaluwasan mahimong mosangpot sa seryoso nga mga sangpotanan.

Kon ang mga estudyante nagkinahanglan og tabang sa pagtubag sa sunod nga mga pangutana, ikonsiderar ang pagpakita og lista sa mga kamatuoran nga gitudlo sa mga tudling sa doktrinal nga kahanas nga gigamit niini nga leksiyon, sama niadtong mahitungod sa Pag-ula ni Jesukristo o sa mga sugo.

• Unsa ang pipila sa mga pagtulun-an o mga kamatuoran sa Manluluwas nga dali ra nga masaypan og sabot karon?

• Sa unsang paagi nga ang sayop nga pagsabot sa mga kamatuoran mahitungod ni Jesukristo, sa Iyang plano, o sa Iyang ebanghelyo makaimpluwensiya sa atong kinabuhi karon ug sa umaabot?

Mga tudling sa doktrinal nga kahanas

Usa ka katuyoan sa doktrinal nga kahanas mao ang pagtabang kanimo nga makahibalo sa doktrina sa Manluluwas ug makahimo sa pagpasabot niini ngadto sa uban. Kini nga matang sa kahibalo labaw pa sa taphaw nga impormasyon. Kini usa ka lawom nga pagsabot ug abilidad sa paggamit sa doktrina diha sa imong kinabuhi ug mga kahimtang. Kini nga pagsabot makatabang nimo sa pagpasabot sa doktrina sa Manluluwas nga klaro kaayo igo nga kadtong imong gipasabot niini kalagmitan dili masayop sa pagsabot niini.

Basaha ang mahinungdanon nga hugpong sa mga pulong sa kasulatan sa doktrinal nga kahanas sa mosunod nga tsart. Ikonsiderar ang pagtimaan kon hain nga mga kamatuoran ang imong gibati nga imong nasabtan og maayo ug hain ang buot nimong mas masabtan pa.

Ipakita ang mosunod nga tsart, o paghatag og mga kopya niini alang sa mga estudyante.

Doktrinal nga Kahanas sa Basahon ni Mormon: Alma–Moroni

Manwal sa Magtutudlo sa Basahon ni Mormon (2024)

Pakisayran sa Kasulatan	Mahinungdanon nga Hugpong sa mga Pulong sa Kasulatan
Pakisayran sa Kasulatan Alma 7:11–13	Mahinungdanon nga Hugpong sa mga Pulong sa Kasulatan “Ug siya magpadayon, mag-antos sa mga sakit ug mga kasakit ug mga pagtintal sa matag matang.”
Pakisayran sa Kasulatan Alma 34:9–10	Mahinungdanon nga Hugpong sa mga Pulong sa Kasulatan “Kinahanglan gayod nga adunay pag-ula nga pagahimoon, … usa ka walay kinutoban ug walay kataposan nga sakripisyo.”
Pakisayran sa Kasulatan Alma 39:9	Mahinungdanon nga Hugpong sa mga Pulong sa Kasulatan “Ayaw na pagsunod sa mga tinguha nga daotan sa imong mga mata.”
Pakisayran sa Kasulatan Alma 41:10	Mahinungdanon nga Hugpong sa mga Pulong sa Kasulatan “Ang pagkadaotan dili mahitabo nga kalipay.”
Pakisayran sa Kasulatan Helaman 5:12	Mahinungdanon nga Hugpong sa mga Pulong sa Kasulatan “Diha sa lig-on nga sukaranan sa atong Manunubos … nga kamo kinahanglan gayod motukod sa inyong tukuranan.”
Pakisayran sa Kasulatan 3 Nephi 11:10–11	Mahinungdanon nga Hugpong sa mga Pulong sa Kasulatan “Ako mituman sa kabubut-on sa Amahan sa tanan nga mga butang gikan sa sinugdanan.”
Pakisayran sa Kasulatan 3 Nephi 12:48	Mahinungdanon nga Hugpong sa mga Pulong sa Kasulatan “[Pagmahingpit] sama nga Ako ingon, o ang inyong Amahan kinsa atua sa langit hingpit.”
Pakisayran sa Kasulatan 3 Nephi 27:20	Mahinungdanon nga Hugpong sa mga Pulong sa Kasulatan “Duol ngari kanako ug magpabunyag … aron kamo mahimo nga pagasantoson pinaagi sa pagdawat sa Espiritu Santo.”
Pakisayran sa Kasulatan Ether 12:6	Mahinungdanon nga Hugpong sa mga Pulong sa Kasulatan “Kamo dili makadawat og saksi hangtod human sa pagsulay sa inyong hugot nga pagtuo.”
Pakisayran sa Kasulatan Ether 12:27	Mahinungdanon nga Hugpong sa mga Pulong sa Kasulatan “Kon ang mga tawo moduol ngari kanako … niana Ako mohimo sa mahuyang nga mga butang nga mahimo nga malig-on ngadto kanila.”
Pakisayran sa Kasulatan Moroni 7:45–48	Mahinungdanon nga Hugpong sa mga Pulong sa Kasulatan “Ang gugma nga putli mao ang tiunay nga gugma ni Kristo.”
Pakisayran sa Kasulatan Moroni 10:4–5	Mahinungdanon nga Hugpong sa mga Pulong sa Kasulatan “Mangutana sa kinasingkasing, uban sa tinuod nga katuyoan, nga may hugot nga pagtuo kang Kristo … [ug] pinaagi sa gahom sa Espiritu Santo kamo mahimo nga masayod sa kamatuoran sa tanan nga mga butang.”

© 2024 by Intellectual Reserve, Inc. All rights reserved.

Pagdugang sa pagsabot

Pagpili og usa sa mga tudling sa doktrinal nga kahanas nga gusto nimong mas masabtan pa, ug gamita kini sa pagkompleto sa mosunod nga kalihokan. Kon itugot sa panahon, ikonsiderar ang pagsubli niini nga kalihokan sa lahi nga tudling sa doktrinal nga kahanas.

Ipakita o ihatag sa mga estudyante ang mosunod nga mga instruksiyon. Ikonsiderar ang pagtugot sa mga estudyante sa pagtrabaho nga magpares-pares o diha sa gagmay nga mga grupo.

Handurawa nga gihangyo ka sa pagtudlo sa bag-ong kinabig o grupo sa mga bata nga anaa sa Primary ang pangedaron mahitungod niini nga tudling. Pag-andam og tulo- ngadto sa lima- ka minuto nga pakigpulong o leksiyon aron makatabang nga mapalawman ang pagsabot sa mga kamatuoran nga gitudlo niini nga tudling. Mahimong makatabang ang pagtubag sa mosunod nga mga pangutana alang sa imong kaugalingon sa dili pa mamalandong kon unsaon nimo sa pagtudlo ang mga kamatuoran ngadto sa uban.

• Ilha ang mahinungdanon nga mga pulong ug hugpong sa mga pulong, ilabina kadtong mahimong masaypan og pagsabot. Ikonsiderar ang pagpangita sa mga kahulogan o pagpangita og mga cross-reference diha sa mga kasulatan nga makatabang sa pagklaro sa tudling. Ngano nga kining mahinungdanon nga mga pulong o mga hugpong sa mga pulong hilabihan ka importante?

• Sa unsang paagi nga kini nga tudling sa kasulatan nagkonektar ngadto sa Manluluwas? Unsa ang imong nakat-onan gikan o mahitungod Kaniya? Sa unsang mga paagi nga Siya usa ka ehemplo sa mga kamatuoran niini nga tudling?

• Unsa nga mga butang ang mahimo nimong gamiton o ipakita aron makatabang sa pagpasabot sa mensahe niini nga kasulatan?

Ikonsiderar ang pagpatudlo sa mga estudyante sa ilang mga leksiyon sa usag usa nga magparesan o diha sa gagmay nga mga grupo. Mahimo usab nimong dapiton ang usa o duha ka mga estudyante sa pagpakigbahin ngadto sa tibuok klase. Tugoti ang mga estudyante sa paghisgot kon unsay ilang nakat-onan ug gibati gikan niini nga kasinatian. Pagpamatuod sa kamahinungdanon sa pagsabot sa mga kamatuoran diha sa mga tudling sa doktrinal nga kahanas.