Sukda ang Imong Nakat-onan 6

Alma 17–Alma 52

Kini nga leksiyon gituyo aron sa pagtabang kanimo sa pagsukod sa mga tumong nga imong gitakda ug sa paglambo nga imong nasinati atol sa imong bag-ohay lang nga pagtuon sa Basahon ni Mormon.

Tabangi ang mga estudyante nga makat-on sa paghatag og bili sa pagsukod sa kaugalingon. Ang kanunay ug padayon nga pagsukod sa kaugalingon makatabang sa mga estudyante nga makakita kon sa unsang paagi sila nahimong mas mahisama sa Manluluwas. Dapita ang mga estudyante sa mainampoong pagkonsiderar kon unsay ilang nahibaloan ug unsay ilang gibati mahitungod ni Jesukristo. Dasiga sila sa kinasingkasing nga pagsukod sa ilang pag-uswag ug sa pagkonsiderar sa mga kausaban nga ilang mahimo samtang sila naningkamot sa pagsunod sa Iyang ebanghelyo.

Pagpangandam sa estudyante: Dapita ang mga estudyante sa pagtambong nga andam sa pagpakigbahin sa unsay ilang nakat-onan o sa mga paagi nga sila espirituhanong milambo sa miaging pipila ka mga semana. Mahimong makatabang nga iparebyo sa mga estudyante ang ilang journal sa pagtuon o mga mubo nga sulat diha sa ilang mga kasulatan.

Mga Posibleng Kalihokan sa Pagkat-on

Pagsukod sa paglambo

• Alang sa unsa gamiton ang mosunod nga mga himan?

Ikonsiderar ang pagpakita og mga hulagway sa mosunod nga mga himan o, kon mahimo, pagdala og pipila sa aktuwal nga mga butang.

• Sa unsang paagi nga ang matag usa niini nga mga himan bililhon ug importante?

Sama nga importante ang pagsukod sa pisikal nga kahimsog ug paglambo, importante usab ang pagsukod sa imong espirituhanong kahimsog ug pag-uswag. Kini nga leksiyon maghatag kanimo og kahigayonan sa pagbuhat niini.

Tabangi ang mga estudyante sa pagpamalandong sa ilang bag-o lang nga espirituhanong pag-uswag pinaagi sa pagpangutana sama sa mosunod. Ikonsiderar ang pagpakita niini nga mga pangutana ug dapita ang mga estudyante sa pagrekord sa ilang mga tubag diha sa ilang mga journal sa pagtuon sa dili pa ipakigbahin ang ilang mga tubag ngadto sa klase.

• Unsa ang imong nakat-onan karong bag-o nga ikaw mapasalamaton?

• Unsa nga mga kausaban ang imong namatikdan sa imong mga pagbati ug mga kinaiya karong ulahi?

• Unsa ang pipila ka mga paagi nga imong nagamit ang imong nakat-onan?

Kompletoha ang mosunod nga mga kalihokan aron sa pagsukod sa imong espirituhanong pagkat-on ug paglambo. Ikonsiderar ang paghangyo sa Langitnong Amahan sa pagtabang kanimo sa pag-ila sa pag-uswag nga imong nahimo ug sa mga dapit nga tingali kinahanglan nimong ipalambo.

Ang pagtuon sa imong klase sa Alma tingali mihatag og gibug-aton sa mga kamatuoran gawas niadtong gisukod sa mosunod nga mga kalihokan. Ipahiangay ang mosunod nga mga kalihokan aron maapil kadtong mga kamatuoran nga imong gihatagan og gibug-aton. Hinumdomi nga ang tanan nga mga ideya dili kinahanglan nga hisgotan niini nga leksiyon o itudlo sa pagkasunod-sunod nga paagi sa pagkasulat niini.

Ipasabot ang importante nga mga kamatuoran mahitungod sa plano sa kaluwasan ug sa tahas ni Jesukristo

Kini nga bahin sa leksiyon gituyo aron sa pagtabang sa mga estudyante sa pagpasabot sa mga aspeto sa plano sa kaluwasan ug sa tahas ni Jesukristo gikan sa ilang bag-ohay lang nga pagtuon sa kasulatan. Ipahiangay ang mosunod sa paagi nga makatabang sa mga estudyante nga mamalandong pag-ayo ug mapasabot unsay ilang nakat-onan base sa giunsa o unsay imong gitudlo.

Gikan sa imong pagtuon sa Alma, tingali nakakat-on ka og pipila ka mga butang nga makatabang nimo nga mas makapasabot sa mga kamatuoran mahitungod sa plano sa kaluwasan ug sa importante nga tahas ni Jesukristo.

Pagpili og usa sa mosunod nga mga kalihokan aron kompletohon.

Ikonsiderar ang pagpakita sa mosunod nga mga senaryo ug mga pangutana aron matubag sa mga estudyante.

Kalihokan 1: Ang plano sa kaluwasan

Handurawa nga usa sa imong mga higala bag-o lang namatyan og usa ka minahal.

• Naghunahuna sa pipila sa mga kamatuoran gikan sa imong bag-ong pagtuon, unsa ang imong mapakigbahin sa imong higala mahitungod sa plano sa kaluwasan? Sa unsang paagi kini makatabang kaniya? (Tan-awa sa Alma 11; 12; 40.)

Kon ang mga estudyante nagkinahanglan og tabang, ikonsiderar ang pagdirekta kanila sa piho nga mga pakisayran mahitungod sa plano sa kaluwasan, sama sa Alma 11:41–45; 12:24–25; 22:13–14; 40:11–14, 21, 23.

Kalihokan 2: Ang tahas ni Jesukristo

Hunahunaa nga nakigsulti ka sa usa ka tawo nga nagduhaduha sa imong pagtuo kang Jesukristo.

• Naghunahuna sa pipila sa mga kamatuoran gikan sa imong bag-ong pagtuon, unsa ang imong mapakigbahin niini nga tawo mahitungod sa importante nga tahas ni Jesukristo? (Tan-awa sa Alma 26; 34; 36.)

Kon ang mga estudyante nagkinahanglan og tabang, ikonsiderar ang pagdirekta kanila sa piho nga mga pakisayran mahitungod sa tahas ni Jesukristo, sama sa Alma 26:12–14, 16, 22, 35–37; 34:8–10; 36:16–21. Mahimong makatabang ang pagpahibalo sa mga estudyante nga ang mga pulong nga gipamulong ni Ammon mahitungod sa Dios diha sa Alma 26 mahimong parehong nagpasabot sa Langitnong Amahan ug ni Jesukristo.

Mobati og dugang tinguha nga mag-usab tungod ni Jesukristo

Sa imong bag-ohay lang nga pagtuon, nakakat-on ka mahitungod sa daghang mga tawo nga nausab tungod kay nakakat-on sila mahitungod ni Jesukristo.

Ikonsiderar ang pagdapit sa mga estudyante sa paghingalan sa pipila ka mga tawo nga ilang gitun-an diha sa Basahon ni Mormon kinsa nakasinati og kausaban tungod ni Jesukristo. Ang mosunod nga tulo ka mga ehemplo mahimong ipakigbahin kon gikinahanglan. Mahimong bahinon ang mga estudyante ngadto sa mga grupo ug i-assign sa pag-rebyo sa usa sa mosunod nga mga hugpong sa mga bersikulo. Dayon ang usa ka estudyante gikan sa matag grupo mahimong mopamubo kon unsay gibasa sa grupo alang sa tibuok klase.

• Mga Lamanite nga gitudloan ni Ammon: Alma 17:13–16 (kaniadto); Alma 19:33, 36 (pagkahuman)

• Amahan ni Hari Lamoni: Alma 20:8–14 (kaniadto); Alma 22:15–18 (pagkahuman)

• Alma nga Batan-on: Alma 36:6 (kaniadto); Alma 36:18, 24–26 (pagkahuman)

• Unsa ang imong namatikdan mahitungod sa ilang kaandam sa pag-usab?

Pamalandongi ang imong tinguha nga magbag-o tungod ni Jesukristo. Ang mosunod nga mga pangutana makatabang kanimo sa pagbuhat niini. Mahimo nimong ikonsiderar ang pagtubag niini diha sa imong journal sa pagtuon.

Ang mosunod nga mga pangutana mahimong ipakita, ug ang mga estudyante mahimong mopili sa pagtubag niini diha sa ilang mga journal sa pagtuon.

• Nabati ba nimo ang pipila sa samang mga tinguha nga gibati niini nga mga tawo diha sa Basahon ni Mormon? Nganong mibati ka niini nga paagi?

• Unsa sa imong hunahuna ang makadala o nagdala kanimo nga mobati niining sama nga mga tinguha?

Pagdawat og pagpadayag gikan sa Espiritu Santo

Usa ka importante nga tumong sa seminary mao ang pagtabang kanimo nga madugangan ang imong abilidad sa pagdawat og personal nga pagpadayag gikan sa Espiritu Santo.

Pamalandongi ang bag-ohay lang nga mga kasinatian nga imong nasinati nga nakadawat og personal nga pagpadayag gikan sa Espiritu Santo. Mahimo nimong rebyohon ang pipila sa mga mubo nga sulat nga imong gisulat diha sa imong mga kasulatan o journal sa pagtuon samtang ikaw nagtuon diha sa klase o sa panimalay.

Dapita ang mga estudyante sa paghisgot sa pipila ka mga paagi nga bag-o lang sila napanalanginan pinaagi sa pagdawat og personal nga pagpadayag pinaagi sa Espiritu Santo. Ang mosunod nga mga pangutana makatabang niini.

• Unsa nga mga panabot ang imong nadawat gikan sa Espiritu Santo sa imong bag-o lang nga pagtuon sa Basahon ni Mormon?

• Unsa ang natabang sa Espiritu diha kanimo nga masabtan o mabati mahitungod sa Langitnong Amahan ug ni Jesukristo?

• Unsa nga matarong nga mga binuhatan ang bag-o lang giaghat sa Espiritu Santo nga imong buhaton?

Dasiga ang mga estudyante sa pagpadayon sa pagtinguha ug pagbuhat sa personal nga pagpadayag gikan sa Espiritu Santo.

Dugang nga mga Kalihokan sa Pagkat-on

Usa ka alternatibong paagi sa pagsugod sa leksiyon

Ikonsiderar ang pagpakita og hulagway sa dashboard sa usa ka sakyanan nga makita ang tanang mga timailhan sa mga suga [indicator lights]. Tabangi ang mga estudyante nga makasabot nga ang mga timailhan sa dashboard sa sakyanan naghatag og mahinungdanon nga impormasyon kon sa unsang paagi naglihok ang sakyanan ug mga pasidaan kon adunay abirya. Mahimong nganlan sa mga estudyante ang kahulogan ug katuyoan sa daghang mga simbolo nga gipakita diha sa dashboard sa sakyanan kutob sa ilang mahimo. Ipasabot nga, sama sa mga simbolo sa dashboard sa sakyanan, ang mga leksiyon nga Sukda ang Imong Nakat-onan sa seminary makatabang kanila nga makahibalo kon kumusta sila sa espirituhanon nga kahimtang ug mosukod sa ilang paglambo ug kon giunsa nila sa pagpatuman ang ilang pagtuon sa ebanghelyo.