Alma 45–46

Si Moroni Mipataas sa Bandila sa Kalingkawasan

Sa dihang si Moroni nakadungog sa mga pagbiya taliwala sa iyang katawhan nga tungod ni Amalickiah, siya nasuko. Siya mibuhat og bandila sa kalingkawasan, ug dinhi niini iyang gilista ang importante nga mga butang alang sa iyang mga katawhan aron kanunay nga hinumdoman. Ang mga pulong ni Moroni nakadasig sa mga tawo sa pagpalig-on sa ilang pasalig ngadto sa Dios. Kini nga leksiyon makatabang nimo nga masabtan ang mga paagi nga imong mapakita ang imong pasalig ngadto sa Dios.

Tabangi ang mga tigkat-on sa paghinumdom sa Ginoo. Ang paghinumdom sa Ginoo ug sa Iyang kaayo maoy makanunayon nga tema sa tibuok Basahon ni Mormon (tan-awa sa 2 Nephi 10:2; Jacob 6:4; Moroni 10:3). Dapita ang mga estudyante sa pag-apil sa mga kalihokan sa pagkat-on nga makatabang nila sa paghinumdom ni Jesukristo ug sa pagpamalandong kon giunsa Niya sila pagpanalangin ug paglig-on.

Pagpangandam sa estudyante: Dapita ang mga estudyante sa paghimo og listahan sa mga butang nga makapadasig o makapahinumdom kanila sa pagtuman sa mga sugo sa Dios.

Mga Posibleng Kalihokan sa Pagkat-on

Ayaw hikalimti

Ipakita ang mosunod nga mga pangutana. Mahimong motubag ang mga estudyante niini uban sa usa ka pares o diha sa usa ka gamay nga grupo. Mahimo ka usab mopakigbahin og personal nga ehemplo gikan sa imong kinabuhi.

• Kanus-a ka nakalimot sa usa ka importante nga butang? Unsay nahitabo isip resulta?

• Unsa ang pipila ka mga butang nga dili nimo gusto nga makalimtan? Ngano man?

Karon makakat-on ka mahitungod sa usa ka panahon sa dihang ang mga Nephite napakyas sa paghinumdom sa Ginoo, bisan human sila makasinati og milagroso nga kaluwasan pinaagi Kaniya. Mahimo nimong mahinumdoman gikan sa pagtuon sa Alma 43–44 nga ang Ginoo mitabang sa mga Nephite sa pagpildi sa mga Lamanite sa usa ka gubat, bisan pa nga ang mga Nephite hilabihan nga nalabwan sa gidaghanon (tan-awa sa Alma 43:51–54).

Basaha ang Alma 45:1, mangita kon unsay reaksiyon sa mga Nephite human niining milagroso nga kadaogan.

• Unsay imong nakaplagan?

Atol niini nga panahon sa kalinaw, ang anak ni Alma nga lalaki nga si Helaman mitudlo og mga pari ug mga magtutudlo sa Simbahan sa tibuok yuta, ug siya misangyaw sa pulong sa Dios uban sa iyang mga kaigsoonan.

Basaha ang Alma 45:23–24; 46:1–5, 7–8, mangita kon giunsa pagtubag sa mga tawo kini nga mga pagtulun-an.

• Unsa ang mipatigbabaw kanimo mahitungod sa mga kinaiya ug mga pamatasan sa mga Nephite dinhi niini nga mga bersikulo?

• Unsa ang kamatuoran nga atong makat-onan gikan sa bersikulo 8 mahitungod sa unsay mahitabo kon atong hikalimtan ang Ginoo?

Usa ka kamatuoran nga atong makat-onan gikan sa Alma 46:8 mao nga kon kita makalimot sa Ginoo, kita mas daling madala sa pagbuhat og kadaotan.

Hunahunaa kon sa unsang paagi nimo nakita ang ebidensiya niini nga kamatuoran sa imong kaugalingong kinabuhi. Samtang magpadayon ka sa pagtuon karon, pangitaa ang mga pagtulun-an nga makatabang nimo nga mas mahinumdom sa Ginoo ug makapakita sa imong pasalig ngadto Kaniya.

Moroni naghimo sa bandila sa kalingkawasan

Si Moroni nasuko kang Amalickiah tungod kay siya ang hinungdan sa mga pagbiya taliwala sa mga Nephite.

Basaha ang Alma 46:12–14, 19–20, mangita kon unsay gibuhat ni Moroni sa pagdasig sa mga Nephite nga magmatinud-anon ngadto sa Dios.

Sa dili pa ipangutana ang mosunod nga mga pangutana, ikonsiderar ang paglista niini nga mga butang gikan sa bersikulo 12 diha sa pisara: Dios, tinuohan, kagawasan, kalinaw, pamilya (mga asawa ug mga anak).

• Ngano sa imong hunahuna nga gipili ni Moroni nga ipakita kini nga mga pulong aron makita sa uban atol niining malisod nga panahon?

• Sa unsang paagi nimo nakita nga ang usa o daghan pa niini nga mga butang nakalimtan o wala hatagi og gibug-aton sa kalibotan karon?

Sama ni Moroni, ang mga lider sa Simbahan sa atong panahon nagdapit kanato sa paghinumdom ug pagpanalipod niining sama nga mga mithi. Basaha ang mosunod nga mga pamahayag, mangita sa modernong-adlaw nga mga pagtulun-an nga may kalabotan sa mga butang nga gilista sa bandila sa kalingkawasan.

Ipanghatag ang handout sa ubos ug hatagi ang mga estudyante og panahon sa pagtuon sa mga pamahayag niini nga magtinagsa o uban sa usa ka pares.

O mahimo nimong i-imprinta ang mga pamahayag sa tinagsa ug ibutang kini sa mga bongbong sa tibuok lawak [room]. Ang matag pamahayag mahimong i-imprinta o ipapilit sa hulagway sa usa ka bandila aron susama tan-awon sa bandila sa kalingkawasan. Mahimong hatagan og panahon ang mga estudyante sa paglakaw-lakaw sa palibot ug sa pagbasa sa matag pamahayag.

Modernong-Adlaw nga mga Pagtulun-an nga may Kalabotan sa Bandila sa Kagawasan

Manwal sa Magtutudlo sa Basahon ni Mormon (2024)––”Alma 45–46: Si Moroni Mipataas sa Bandila sa Kalingkawasan”

“Agi og paghinumdom sa atong Dios”

Si Elder Neil L. Andersen sa Korum sa Napulog Duha ka Apostoles mitudlo:

Adunay daghang tawo dinhi sa yuta nga gamay ra kaayo og nahibaloan ni Jesukristo, ug sa pipila ka bahin sa kalibotan diin ang Iyang ngalan gipahayag sulod sa gatosan ka tuig, ang [hugot nga] pagtuo diha ni Jesukristo nagkawala. …

Samtang ang kalibotan maghisgot og gamay ni Jesukristo, maghisgot kita og daghan bahin Kaniya. Samtang ang atong tinuod nga kinaiya isip Iyang mga disipulo mapadayag, daghan sa naglibot nato ang maandam sa pagpaminaw. (Neil L. Andersen, “Kita Naghisgot kang Kristo,” Liahona, Nob. 2020, 88, 90)

“Agi og paghinumdom sa … atong tinuohan”

Si Presidente Dallin H. Oaks sa Unang Kapangulohan mitudlo:

Kon mohunong kita sa paghatag og bili sa atong mga simbahan alang sa bisan unsang rason, gihulga nato ang atong personal nga espirituhanon nga kinabuhi, ug ang daghang tawo nga nagbulag sa ilang kaugalingon gikan sa Dios mopakunhod sa Iyang mga panalangin sa atong mga nasod.

Ang pagtambong ug pagkaaktibo diha sa usa ka simbahan motabang kanato nga mahimong mas maayo nga mga tawo ug mas maayo nga mga impluwensiya sa mga kinabuhi sa uban. Diha sa simbahan gitudloan kita kon unsaon sa paggamit sa relihiyoso nga mga baroganan. Magkat-on kita gikan sa usag usa. …

… Nag-ampo ako nga kitang tanan mahimong makanunayon niini nga mga kasinatian sa Simbahan samtang gitinguha nato ang kinabuhing dayon, ang labing mahinungdanon sa tanang gasa sa Dios. (Dallin H. Oaks, “Ang Panginahanglan alang sa usa ka Simbahan,” Liahona, Nob. 2021, 24, 26)

“Agi og paghinumdom sa atong … kagawasan”

Si Elder Ronald A. Rasband sa Korum sa Napulog Duha ka Apostoles mitudlo:

Unsa ang relihiyoso nga kagawasan?

Kini mao ang kagawasan sa pagsimba sa tanang matang niini: kagawasan sa pagpundok, kagawasan sa pagpahayag, kagawasan sa paglihok sa personal nga mga tinuohan, ug kagawasan sa uban sa pagbuhat sa ingon. Ang relihiyoso nga kagawasan nagtugot sa matag usa kanato nga mohukom sa atong kaugalingon unsa ang atong tuohan, sa unsang paagi kita magpakabuhi ug molihok sumala sa atong hugot nga pagtuo, ug sa unsay gilaoman sa Dios kanato. …

Ako kamong dapiton sa pagpasiugda sa kawsa sa relihiyoso nga kagawasan. Kini usa ka pagpahayag sa gihatag sa Dios nga baroganan sa kabubut-on.

Ang relihiyoso nga kagawasan nagbalanse sa nag-indigay nga mga pilosopiya. Ang maayo sa relihiyon, ang impluwensiya niini, ug ang inadlaw nga mga buhat sa gugma nga dinasig sa relihiyon modaghan lamang kon atong panalipdan ang kagawasan sa pagpahayag ug paglihok sa labing importante nga mga gituohan. (Ronald A. Rasband, “Aron sa Pag-alim sa Kalibotan,” Liahona, Mayo 2022, 91, 93)

“Agi og paghinumdom sa … atong kalinaw”

Si Elder Jeffrey R. Holland sa Korum sa Napulog Duha ka Apostoles mitudlo:

Ang Tig-alim [Healer] sa matag samad, Siya kinsa mitarong sa matag sayop, naghangyo kanato nga makigtambayayong Kaniya sa lisod nga tahas sa pagpasiugda og kalinaw sa kalibotan nga dili makakaplag niini sa bisan unsang paagi. …

… Mohangyo ko kanato nga mahimong magbalantay sa kalinaw—sa paghigugma sa kalinaw, sa pagpatinguha og kalinaw, sa pagmugna og kalinaw, sa pagpatunhay sa kalinaw. Ako mohimo niana nga pangamuyo diha sa ngalan sa Prinsipe sa Kalinaw. (Jeffrey R. Holland, “Ang Pangalagad sa Pagpasig-uli (Reconciliation),” Liahona, Nob. 2018, 79)

“Agi og paghinumdom sa … atong [mga pamilya]”

Si Sister Bonnie L. Oscarson, kanhi Kinatibuk-ang Presidente sa Young Women, mitudlo:

Ang tanan, walay pagsapayan sa ilang sitwasyon sa kaminyoon o gidaghanon sa mga anak, makapanalipod sa plano sa Ginoo nga gihulagway diha sa pamahayag bahin sa pamilya. Kon kini plano sa Ginoo, kinahanglan nga ato usab kini nga plano! …

… Motabang kita sa pagtukod sa gingharian sa Dios pinaagi sa pagbarog nga maisogon ug ingon nga mga tigpanalipod sa kaminyoon, pagka-ginikanan, ug sa panimalay. Ang Ginoo nagkinahanglan kanato nga magmaisogon, makanunayon, ug dili matarog nga mga manggugubat kinsa mopanalipod sa Iyang plano ug motudlo sa umaabot nga mga henerasyon sa Iyang mga kamatuoran. (Bonnie L. Oscarson, “Mga Tigpanalipod sa Pamahayag bahin sa Pamilya,” Liahona, Mayo 2015, 15, 17)

Dapita ang mga estudyante sa pagpakigbahin kon unsay mipatigbabaw ngadto kanila niini nga mga pamahayag. Hisgoti ang piho nga mga paagi nga sila makahinumdom ug makapanalipod sa Kristohanong paagi sa mga butang nga gilista sa bandila sa kalingkawasan.

• Unsa ang pipila ka mga paagi nga imong mahinumduman ang mga mithi nga gilista sa bandila sa kalingkawasan?

• Unsa ang pipila ka mga paagi nga mapanalipdan nimo kini sa Kristohanong paagi?

Ang epekto sa bandila sa kalingkawasan

Human napahinumdoman ni Moroni niining importante nga mga kamatuoran, daghan sa mga Nephite mihimo og pakigsaad nga dili gayod sila mobiya sa Dios ug maningkamot alang sa kalinaw (tan-awa sa Alma 46:21–22, 28–31).

Basaha ang Alma 46:36–38, mangita sa unsay gibuhat ni Moroni sa pagtabang sa iyang katawhan sa paghinumdom sa Dios ug sa ubang importante nga mga butang nga gilista diha sa bandila sa kalingkawasan.

• Hain sa mga butang nga gilista diha sa bandila sa kalingkawasan ang imong gibati nga gusto nimong hinumdoman o mas hingpit nga barogan diha sa imong kinabuhi?

• Unsa ang butang nga imong mahimo aron mas mahinumdoman kini nga hilisgotanan o mapanalipdan ang imong mga pagtuo bahin niini?

Pagpamatuod sa mga kamatuoran nga nahisgotan karon. Dasiga ang mga estudyante sa paghimo og mga paningkamot sa pagpasidungog ug paghinumdom sa Dios ug sa ubang mga butang nga gilista diha sa bandila sa kalingkawasan.

Komentaryo ug Background nga Impormasyon

Sa unsang paagi nga ang paghinumdom ni Jesukristo makaapekto sa atong mga kinabuhi?

Si Presidente Russell M. Nelson mitudlo:

Wala pa gayoy panahon sa kasaysayan sa kalibotan nga ang kaalam bahin sa atong Manluluwas adunay mas personal nga kaimportante ug may kalabotan ngadto sa matag kalag sa tawo. Hunahunaa unsa kadali sa makapahugno nga mga kaguliyang sa tibuok kalibotan––ug niadtong anaa sa atong kaugalingon nga mga kinabuhi––masulbad kon kitang tanan mopili sa pagsunod ni Jesukristo ug magtuman sa Iyang mga panudlo. (Russell M. Nelson, “Putli nga Kamatuoran, Putli nga Doktrina, ug Putli nga Pagpadayag,” Liahona, Nob. 2021, 6)

Ngano nga importante man ang pagpanalipod sa relihiyoso nga kagawasan?

Si Elder Ronald A. Rasband sa Korum sa Napulog Duha ka Apostoles mitudlo:

Adunay [usa ka] hampak nga mikatap sa kalibotan: mga pangatake sa inyo ug sa akong relihiyoso nga kagawasan. Kining nagtubo nga sentimento nagtinguha sa pagtangtang sa relihiyon ug hugot nga pagtuo sa Dios gikan sa opinyon sa publiko, mga eskwelahan, mga sumbanan sa komunidad, ug sibiko nga panag-istoryahanay. Ang mga kaaway sa relihiyoso nga kagawasan nagtinguha sa pagpahamtang og mga restriksiyon sa mga pagpahayag og kinasingkasing nga mga lig-on nga pagtuo. Sila gani misaway ug mibiaybiay sa mga tradisyon sa hugot nga pagtuo.

Kana nga kinaiya nagbaliwala sa mga tawo, nagpaubos sa bili sa personal nga mga baroganan, kaangayan, pagtahod, espirituwalidad, ug kalinaw sa konsiyensiya. (Ronald A. Rasband, “Aron sa Pag-alim sa Kalibotan,” Liahona, Mayo 2022, 91)

Unsaon nako pagtabang sa pagtukod og kalinaw sa kalibotan sa akong palibot?

Si Presidente Russell M. Nelson mitudlo:

Isip mga miyembro sa Ang Simbahan ni Jesukristo sa mga Santos sa Ulahing mga Adlaw, unsa ang gipaabot sa Ginoo kanato? Isip usa ka Simbahan, kinahanglan natong “isalikway ang gubat ug ipahayag ang kalinaw”[Doktrina ug mga Pakigsaad 98:16]. Isip mga indibidwal, kinahanglan nato nga “[sundon] ang mga butang nga makahatag og kalinaw” [Mga Romano 14:19]. Kinahanglan kita nga mahimong personal nga tigpasiugda og kalinaw. Kinahanglan kitang magpuyo nga malinawon—isip mga magtiayon, mga pamilya, ug mga silingan. Kinahanglan nga magpuyo kita sumala sa Mahinungdanon nga Lagda [Golden Rule]. (Russell M. Nelson, “Blessed Are the Peacemakers,” Ensign, Nob. 2002, 41)

Dugang nga mga Kalihokan sa Pagkat-on

Pagpanalipod sa relihiyoso nga kagawasan

Ikonsiderar ang paghisgot nga si Amalickiah nangulo sa kadaghanan aron sa “[pagtinguha] sa paglaglag sa simbahan sa Dios” (Alma 46:10). Mahimong makabenepisyo ang mga estudyante gikan sa panaghisgot bahin sa kamahinungdanon sa relihiyoso nga kagawasan sa atong panahon. Mahimo ninyoong tun-an og dungan ang Alma 46:1–10 usa ka klase, mangita sa mga hulga nga giatubang sa mga Nephite sa ilang kagawasan sa pagsimba sa Dios sumala sa ilang gipili. Dapita ang mga estudyante sa pagpakigbahin og mga paagi nga ilang nakita ang mga tawo nga naningkamot sa pagguba sa relihiyoso nga kagawasan sa atong panahon.

Mahimo usab nimong dapiton ang mga estudyante sa pagtuon sa pamahayag ni Elder Ronald A. Rasband nga nalakip sa seksiyon sa “Komentaryo ug Background nga Impormasyon”.