Alma 43, 48–50

Pagkat-on gikan sa mga Kapitulo sa Gubat

Ang kataposang bahin sa basahon ni Alma naghulagway sa panahon sa panagbingkil ug gubat. Ang mga estratehiya nga gigamit sa mga Nephite niini nga mga gubat makatabang kanato sa pagpalambo og mga estratehiya nga atong magamit sa atong inadlaw-adlaw nga pakig-away batok ni Satanas. Kini nga leksiyon makatabang nimo sa pagpahisama sa mga kasulatan ngadto sa imong kaugalingon aron makadawat sa panalipod sa Ginoo gikan sa makanunayon ug nagkadaghang pag-atake sa kaaway.

Tabangi ang mga estudyante nga makakaplag og personal nga kahulogan diha sa mga kasulatan. Dasiga ang mga estudyante sa paggamit og nagkalainlaing mga kahanas sa pagtuon aron mapalambo ang ilang pagsabot sa mga kasulatan. Mahimo silang mangita og mga detalye sa dagan sa istorya, maghimo og mga pagtandi ug mga koneksiyon tali sa mga asoy sa kasulatan ug sa ilang kaugalingon nga mga kinabuhi, ug motino kon sa unsang paagi nila gamiton ang ilang nakat-onan.

Pagpangandam sa estudyante: Dapita ang mga estudyante sa pagtuon sa Alma 43:18–21, 37–38, mangita sa mga leksiyon nga makatabang kanila sa ilang pakiggubat batok ni Satanas.

Mga Posibleng Kalihokan sa Pagkat-on

Pag-ila sa kaaway

Ikonsiderar ang pagpakita sa mosunod nga pamahayag samtang ang mga estudyante maghisgot sa ilang mga tubag sa mga pangutana nga nagsunod niini.

Si Presidente Boyd K. Packer (1924–2015) sa Korum sa Napulog Duha ka Apostoles mipasidaan:

Kamo nagtubo sa teritoryo sa kaaway. … [Ang kaaway] anaa sa mga panimalay, kalingawan, media, pinulongan—tanang nagpalibot kaninyo. Sa kasagaran, ang iyang presensiya dili mabantayan. (Boyd K. Packer, “Unsaon nga Maluwas sa Teritoryo sa Kaaway,” Liahona, Okt. 2012, 34)

• Unsa nga mga hunahuna o mga pagbati ang anaa kanimo mahitungod niini nga pamahayag?

• Unsa nga mga pananglitan ang imong mahunahunaan nga naghulagway sa gisulti ni Presidente Packer?

Kinahanglan nga hunahunaon lamang sa mga estudyante ang ilang mga tubag sa mga pangutana sa mosunod nga parapo, kay sa motubag og kusog.

Pamalandongi sa makadiyot kon sa unsang paagi ang pamahayag ni Presidente Packer magamit diha kanimo. Unsa ang pipila sa mga paagi nga imong namatikdan ang mga pagtental ni Satanas nga nag-impluwensiya kanimo o sa mga tawo nga imong minahal? Unsa nga mga paningkamot ang imong gihimo aron mapanalipdan ang imong kaugalingon gikan sa iyang mga pag-atake?

Ang mga gubat tali sa mga Nephite ug sa mga Lamanite

Ang kataposan sa basahon ni Alma naghulagway sa pipila ka mga gubat nga nahitabo tali sa mga Nephite ug sa mga Lamanite. Samtang magtuon ka niini nga mga asoy, makakat-on ka og bililhong mga leksiyon nga makatabang kanimo sa imong pagpakig-away batok kang Satanas. Sama pananglit, ang mga katuyoan ug mga taktika sa mga Lamanite mahimong ikatandi ngadto sa mga katuyoan ug mga taktika ni Satanas ngari kanato.

Ikonsiderar ang pagsulat sa mosunod nga mga pakisayran sa kasulatan ug mga ngalan diha sa pisara. Ibabaw sa Alma 43:5–8, isulat ang Zerahemnah. Ibabaw sa Alma 46:3–5, 10, isulat ang Amalickiah. Mahimong bahinon ang mga estudyante ngadto sa mga grupo ug i-assign sa pagtuon og usa ka hugpong sa mga bersikulo.

Basaha ang Alma 43:5–8; 46:3–5, 10, mangita sa gibuhat sa daotang mga lider sa mga Lamanite nga susama sa mga katuyoan ug mga taktika ni Satanas.

Ikonsiderar ang pagdapit og pipila ka mga boluntaryo aron sa pagduol ngadto sa pisara ug sa pagsulat sa mga katuyoan ug mga taktika nga gigamit sa tawo nga ilang gitun-an.

• Sa unsang paagi nga ang mga katuyoan ug mga taktika niini nga mga lider nahisama niadtong kang Satanas?

Ang mga kasundalohan sa mga Nephite gipangulohan sa usa ka matarong nga tawo nga ginganlan og Moroni.

Ikonsiderar ang pagsulat sa mosunod nga pakisayran sa kasulatan diha sa pisara sunod sa miaging mga pakisayran mahitungod ni Zerahemnah ug Amalickiah. Isulat ang Moroni sa ibabaw sa bag-ong pakisayran.

Basaha ang Alma 48:11–13, 17, mangita sa Kristohanong mga hiyas o mga kinaiya ni Moroni.

Pagdapit og pipila ka mga boluntaryo sa pagduol ngadto sa pisara ug sa pagsulat sa mga kinaiya ni Moroni nga nagpahinumdom kanila sa Manluluwas.

• Unsay imong nakaplagan?

Pagpahisama sa mga kasulatan sa imong kaugalingon

Ang mga pagtandi nga imong nahimo hangtod karon diha sa mga kasulatan makaandam kanimo sa pagpahisama, o sa pagkonektar, sa ubang mga detalye gikan niini nga mga asoy ngadto sa imong kaugalingong kinabuhi.

Ipakita ang mosunod nga mga lakang aron ang mga estudyante makadangop niini sa tibuok leksiyon.

Ang mosunod nga proseso makatabang kanimo sa pagpahisama sa mga kasulatan ngadto sa imong kinabuhi. Irekord kini nga mga lakang diha sa imong journal sa pagtuon.

1. Pangita og importante nga mga detalye.

2. Paghimo og mga pagtandi sa imong kinabuhi.

3. Pagkaplag og bililhong mga leksiyon.

4. Tinoa ang personal nga paggamit.

Praktisa ang kahanas sa pagtuon sa kasulatan sa pagpahisama pinaagi sa paggamit niini nga proseso samtang nagkat-on ka mahitungod sa usa sa mga gubat tali sa mga Nephite ug sa mga Lamanite.

Ang mosunod gituyo aron paggiya sa mga estudyante nga mapahisama sa mga kasulatan ug sa pag-andam kanila sa pagbuhat niini sa ilang kaugalingon unya sa leksiyon.

Lakang 1: Pangita og importante nga mga detalye

Basaha ang Alma 43:17–21, 37–39, 51–54, mangita sa importante nga mga detalye. Kini nga mga detalye mahimong maglakip sa mga tawo, mga lugar, mga butang, o mga binuhatan nga gihatagan og gibug-aton.

Hangyoa ang mga estudyante sa pagpakigbahin og importante nga mga detalye nga ilang nakaplagan niini nga mga bersikulo. Mahimo kining isulat diha sa pisara. Kon gikinahanglan, tabangi ang mga estudyante sa pag-ila sa mosunod nga importante nga mga detalye.

Pipila sa mga detalye nga tingali imong namatikdan naglakip ni Moroni nga nanalipod sa iyang mga kasundalohan gamit ang hinagiban ug baga nga sinina, ang mga Lamanite wala magsul-ob og pagpanalipod nga hinagiban, ug ang mga Nephite mipildi sa mga Lamanite bisan pa sa hilabihan nila ka daghan.

Lakang 2: Paghimo og mga pagtandi sa imong kinabuhi

Hunahunaa kon sa unsang paagi ang mga detalye nga imong namatikdan sa miaging lakang mahimong ikatandi sa usa ka butang nga espirituhanon o sa mga sitwasyon sa imong kinabuhi.

• Unsa nga mga pagtandi ang imong mahimo gamit ang mga detalye nga imong nahibaloan sa miaging lakang? (Kon gikinahanglan, tan-awa diha sa Doktrina ug mga Pakigsaad 27:1, 15–18 o Mga Taga-Efeso 6:11–16. Mahimo nimong i-cross-reference kini nga mga bersikulo diha sa mga bersikulo sa Alma 43.)

Mahimong imong natandi ang hinagiban sa mga Nephite ngadto sa hinagiban sa Dios. Mahimo usab nimong natandi ang kadaogan sa mga Nephite ngadto sa pagbuntog ni Satanas ug sa iyang mga tentasyon.

Lakang 3: Pagkaplag og bililhong mga leksiyon

Hunahunaa kon unsay imong nakat-onan gikan niini nga asoy nga mahimong magamit nganha kanimo. Mahimo usab nimong hunahunaon ang unsay imong nakat-onan mahitungod sa Manluluwas.

Dapita ang pipila ka mga estudyante sa pagpakigbahin sa ilang mga tubag sa mosunod nga mga pangutana.

• Unsa ang pipila ka mga leksiyon nga imong nakat-onan gikan niini nga gubat tali sa mga Nephite ug sa mga Lamanite nga makatabang kanimo sa imong mga gubat batok ni Satanas?

• Unsa ang gitudlo niini nga asoy kanimo mahitungod ni Jesukristo?

Usa ka baroganan nga atong makat-onan mao nga si Jesukristo nagtanyag kanato sa panalipod nga atong gikinahanglan sa atong pagpakig-away batok kang Satanas.

Lakang 4: Tinoa ang personal nga paggamit

Pamalandongi kon unsaon nimo paggamit ang mga leksiyon nga imong nahibaloan sa miaging lakang.

• Unsay imong mahimo aron makadawat sa panalipod ni Jesukristo batok kang Satanas?

Taliwala sa daghang mga paagi sa paggamit niini nga kamatuoran, tingali nakahunahuna ka kon sa unsang paagi ang pagpanalipod sa Manluluwas anaa pinaagi sa matinud-anong mga buhat sama sa pag-ampo (tan-awa sa Doktrina ug mga Pakigsaad 10:5), pagtuon sa kasulatan (tan-awa sa 1 Nephi 15:24), o pagsunod sa mga sugo sa Ginoo (tan-awa sa Mosiah 2:41).

Pagbansay sa pagpahisama sa mga kasulatan pag-usab

Ang mosunod gituyo aron sa pagtabang sa mga estudyante sa paggamit sa kahanas sa pagpahisama sa mga kasulatan nga sila ra. Kon gikinahanglan, i-assign ang mga estudyante og pares o grupo nga ikauban sa pagbuhat. Ipakita ang mosunod nga mga kasulatan, ug ipatan-aw sa mga estudyante ang upat ka mga lakang nga gipakita bag-ohay lang sa leksiyon aron magamit nila kini samtang nagtuon.

Pagpili og labing menos duha sa mosunod nga mga hugpong sa mga bersikulo, ug, samtang ikaw nagtuon, pagbansay sa paggamit sa upat ka mga lakang nga proseso sa pagpahisama sa mga kasulatan.

• Alma 48:7–9; 49:13–15

• Alma 48:14–16

• Alma 49:1–5, 8–9

• Alma 49:18–23

• Alma 50:1–6

• Alma 50:17–23

Hatagi ang mga estudyante og kahigayonan nga ipakigbahin ang ilang nakat-onan gikan sa ilang mga pagtuon. Mahimo usab nimong ikonsiderar ang pagdugang sa imong kaugalingon nga mga panabot gikan niini nga mga bersikulo.

• Unsa nga importante nga mga detalye ang imong nahibaloan gikan sa asoy nga imong gitun-an?

• Unsa ang pipila ka mga pagtandi nga imong gihimo tali niadto nga mga detalye ug sa mga aspeto sa imong kinabuhi?

• Unsa ang usa o daghang mga leksiyon nga imong nakat-onan gikan niini nga asoy?

• Unsaon nimo paggamit niini nga mga leksiyon diha sa imong kinabuhi?

Komentaryo ug Background nga Impormasyon

Sa unsang mga paagi nga kita anaa sa usa ka espirituhanon nga gubat karon?

Si Presidente Russell M. Nelson mitudlo:

Ang giyera batok sa sala tinuod. Ang kaaway mipakusog pag-ayo sa iyang mga paningkamot aron sa pagbalda sa mga pagpamatuod ug pagbabag sa buhat sa Ginoo. Iyang gisangkapan ang iyang mga sulugoon og gamhanang mga hinagiban aron dili kita makaambit sa hingpit nga kalipay ug gugma sa Ginoo. (Russell M. Nelson, “Kita Makabuhat og Mas Maayo pa ug Mahimong mas Maayo,” Liahona, Mayo 2019, 67)

Ang kaaway paspas kaayong mipalapad sa iyang pag-atake sa hugot nga pagtuo ug ngari kanato ug sa atong mga pamilya. Aron makasugakod sa espirituhanon nga paagi, nanginahanglan kita og pang-alkontra nga mga estratehiya ug mga plano sa pagpangandam. (Russell M. Nelson, “Pasiuna nga Pakigpulong,” Liahona, Nob. 2018, 7)

Unsa ang akong mahimo aron mapanalipdan gikan sa kaaway?

Si Presidente Russell M. Nelson mipasabot:

Kita gisaaran nga “kon [kita] andam dili [kita] mahadlok” [Doktrina ug mga Pakigsaad 38:30].  Kini nga kasiguroan adunay dagkong implikasyon karon. Ang Ginoo namahayag nga bisan sa dili ordinaryo nga mga hagit, kadtong kinsa motukod sa ilang mga pundasyon diha kang Jesukristo, ug nakat-on unsaon sa paggamit sa Iyang gahom, dili kinahanglan nga magpadala sa talagsa nga mga kabalaka niining panahona. (Russell M. Nelson, “Ang Templo ug ang Inyong Espirituwal nga Pundasyon,” Liahona, Nob. 2021, 94)

Unsa ang akong mabuhat aron mahimo ang akong balay nga usa ka lugar nga luwas?

Tan-awa ang mosunod nga mga bidyo aron makat-on pa bahin niini.

Dugang nga mga Kalihokan sa Pagkat-on

Alma 50:17–23. “Wala pay labaw nga malipayon nga panahon”

Tabangi ang mga estudyante sa paghunahuna og pipila ka malipayong mga panahon diha sa ilang kinabuhi. Mahimo nimong dapiton ang mga estudyante sa pagbasa sa Alma 50:17–23, mangita kon nganong ang mga Nephite napanalanginan ug nalipay. Mahimo nimong hisgotan ang mga pangutana sama sa “Unsa ang imong nakat-onan bahin sa Ginoo gikan sa bersikulo 19 nga makatabang kanimo diha sa imong kinabuhi?” ug “Unsa ang atong mahinumdoman mahitungod sa pagkamasulundon ngadto sa Ginoo, bisan kon kita moagi og malisod nga mga panahon sa kinabuhi?”

Si Presidente Russell M. Nelson mipasabot nga “kon ang sentro sa atong kinabuhi anaa sa plano sa Dios sa kaluwasan … ug ni Jesukristo ug sa Iyang ebanghelyo, mobati kita og kalipay bisan unsa pay mahitabo—o wala mahitabo—sa atong kinabuhi” (“Hingpit nga Kalipay ug Espirituhanon nga Pagsugakod,” Liahona, Nob. 2016, 82).

Alma 50–51. Likayi ang pagkabahinbahin [division] ug panagbingkil aron mapadayon ang kalinaw

Ikonsiderar ang pagsulat og pipila ka mga kapulong [synonym] sa pulong nga panagbingkil diha sa pisara o paghimo og pipila ka yano nga mga drowing nga makahulagway sa panagbingkil. Pangutan-a ang mga estudyante kon sa unsang paagi ilang nakita nga ang panagbingkil negatibo nga nakaapekto sa mga kinabuhi.

Mahimong basahon sa mga estudyante ang mosunod nga mga pakisayran sa kasulatan, mangita sa epekto sa panagbingkil ngadto sa mga Nephite.

• Alma 50:23–26, 35–36

• Alma 51:1–8, 14–16, 21

Tabangi ang mga estudyante nga makakita kon unsaon kaha nila sa paggamit ang ilang nakat-onan sa ilang kaugalingong mga kinabuhi pinaagi sa paghisgot sa mga pangutana sama sa mosunod: Unsa ang kahulogan sa pagbaton og kalinaw diha sa imong pamilya, sa imong mga higala, o sa imong komunidad? Unsaon nimo sa pagtabang sa pagsulbad sa panagbingkil sa bisan hain niini nga mga bahin sa imong kinabuhi?

Alma 50:1–6. Ayaw paghunong sa pagpangandam

Mahimong basahon sa mga estudyante ang Alma 50:1–6 ug magdrowing og hulagway nga nagrepresentar sa mga pagpangandam sa mga Nephite. Ikonsiderar ang paggamit niini nga pamahayag ni Presidente Nelson aron matabangan ang mga estudyante nga makasabot sa kamahinungdanon sa pagpangandam bisan kon ang peligro dili dayon makita:

“Bisan kon maayo ra ang mga sitwasyon, si Kapitan Moroni nagpadayon sa pag-andam sa iyang mga katawhan. Siya wala gayod mohunong. Siya wala gayod makontento.

“Ang kaaway dili gayod mohunong sa pag-atake. Mao nga, kita dili gayod mohunong sa pagpangandam!” (Russell M. Nelson, “Hangupon ang Umaabot uban sa Hugot nga Pagtuo,” Liahona, Nob. 2020, 75)